Kungani Bantfu Benta Tintfo Letimbi?

KUNENTFO leyodvwa bantfu labambalwa labaphikisana ngayo: Sonkhe sinesono ngako-ke, senta emaphutsa futsi sente netintfo lesitisola ngato ekugcineni. Nobe kunjalo, loko kuyimbangela yebubi lobentiwako yini, lobukhulu kanye nalobuncane lesibubona ngemehlo, nalesibuvako malanga onkhe emsakatweni nobe kuthelevishini?

Nanobe bantfu banesono, bayacaphela kutsi kunemincele yekutiphatsa lekungakafaneli bawelele ngale kwayo futsi bangakwati kubalekela kwenta tintfo letingakalungi. Bantfu labanyenti bayavuma kutsi kunemehluko emkhatsini kwekukhuluma emavi langesilo liciniso ungakacondzi kuwasho kanye nekunyundzela ngemabomu. Kuphindze kube nemehluko emkhatsini wekubanga umonakalo ungakahlosi kanye nekubulala uhlosile. Imvamisa tento letetfusako tibangelwa bantfu labavamile emmangweni. Kungani kunjalo? Kungani bantfu benta tintfo letimbi?

LiBhayibheli liyayikhanyisa lendzaba. Lisiniketa tizatfu letivakalako letenta bantfu batiphatse ngendlela labati kahle-hle kutsi ayikalungi. Ase ucabange nganaku lelikushoko.

▪ “Inkhohliso yenta umuntfu lohlakaniphile abe silima.”—UMSHUMAYELI 7:7.

LiBhayibheli litsi ngaletinye tikhatsi bantfu bacindzetelwa timo tabo kute bente loko labebangeke bakwente. Labanye bangadzimate bente bugebengu ngobe bafuna kutfola sisombululo etinkingeni lababhekene nato futsi bacedze nekungalungi. Incwadzi i-Urban Terrorism, itsi “etimeni letinyenti intfo leyinhloko leyenta umuntfu kutsi abe liphekula, kutfukutsela lokukhulu kanye nekubona tintfo letingakalungi letifaka ekhatsi tindzaba tepolitiki, tindzaba tasemmangweni kanye netinkinga temnotfo.”

▪ “Kutsandza imali kuyimphandze yako konkhe lokubi.”—1 THIMOTHI 6:10.

Labanye batsi ngisho nebantfu labalungile bayayeca imitsetfo yekutiphatsa nangabe betsenjiswe imali. Labanye bantfu lababonakala batilungele futsi banemusa etimeni letivamile, bavele bashintje nangabe indzaba letsite seyifaka ekhatsi imali, babe netinhlitiyo letimbi nelulaka. Ase ucabange ngebugebengu lobunyenti lobubangelwa kutsandza imali—kwesabisa bantfu, kungetsembeki, kutfumba bantfu kanye nekubulala.

▪ “Ngenca yekutsi sigwebo sentfo lembi siyephuta kukhishwa, tinhlitiyo tebantfu setihlosa kwenta bubi ngesibindzi.”—UMSHUMAYELI 8:11.

Lombhalo usikhombisa kutsi bantfu banemkhuba wekucabanga kutsi bangaphumelela kunobe ngabe yini labayentako nangabe labasemagunyeni bangaboni kutsi bentani. Loku kuliciniso ngobe bantfu bashayela timoto tabo ngesivinini lesikhulu, labanye bayakopa nababhala sivivinyo, labanye beba imali bente naletinye tintfo letimbi kakhulu. Nangabe umtsetfo ungakacini nobe bantfu bangakwesabi kubanjwa, bantfu labawugcinako umtsetfo bangativa banesibindzi sekwenta intfo labebangeke sebayente. Magazini i-Arguments and Facts, watsi: “Kungajeziswa kwalabo labagangako, kubonakala kuniketa bantfu sibindzi sekwenta bugebengu lobukhulu.”

▪ “Ngulowo nalowo ulingwa ahuhwe tinkhanuko takhe, [adideke]. Nangabe inkhanuko seyitsatsile, itala sono.”—JAKOBE 1:14, 15.

Bonkhe bantfu bangaba nayo imicabango lemibi. Malanga onkhe, sifunjwa ngetilingo letinyenti tekutsi sente tintfo letimbi. Endvulo ngesikhatsi kusabhalwa liBhayibheli, naku emaKhristu latjelwa kona: “Anikefikelwa kulingwa lokwehlukile kunekwalabanye bantfu.” (1 Khorinte 10:13) Nanobe kunjalo, imiphumela lemibi lesibanayo ibangelwa tincumo umuntfu latentako—kuyekela kucabanga tintfo letimbi nobe kuchubeka ucabanga ngato futsi utivumele kutsi tikhule engcondvweni yakho. Lombhalo longenhla losencwadzini lephefumulelwe yaJakobe, usecwayisa ngekutsi nangabe sivumela sifiso lesibi kutsi ‘sikhule,’ nakanjani sitawukwenta tintfo letimbi.

▪ “Lohambisana nebantfu labahlakaniphile naye ugcina asahlakaniphile; kodvwa umngani wetilima uyawuhlupheka.”—TAGA 13:20.

Bantfu lesetayelana nabo, bangafaka sandla emphilweni yetfu—basentise tintfo letinhle nobe letimbi. Ngaletinye tikhatsi, bantfu benta tintfo labangakahlosi kutenta—ngenca nje yekucindzetelwa bontsanga, nobe nguloko labanye labakushoko. Loko kuphindze kubangelwe kutsi batihlanganise nebantfu lababi, futsi loko kuba nemiphumela lemibi. LiBhayibheli nalikhuluma ‘ngetilima,’ lisuke lingakhulumi ngebantfu labangakahlakaniphi, kodvwa lisuke likhuluma ngalabo labangasinaki seluleko seliVi laNkulunkulu lesihlakaniphile. Nobe ngabe sibancane nobe sibadzala, nangabe singabakhetsi ngekuhlakanipha bangani betfu ngisho nalabo lesitihlanganisa nabo, sisebentisa timiso teliBhayibheli, ‘sitawuhlupheka.’

Lamavesi kanye nalamanye laseBhayibhelini achaza kahle kutsi kungani bantfu—mhlawumbe bantfu labavamile—benta tintfo letimbi, ngisho naletetfusako. Njengobe kubalulekile kucondza kutsi yini lebangela kutsi bantfu bente tintfo letetfusako, likhona yini litsemba lekutsi simo sitawushintja sibe ncono? Njengobe liBhayibheli lichaza kutsi kungani bantfu benta tintfo letimbi, liphindze lisetsembise kutsi loko angeke kusaba khona. Ngutiphi letetsembiso? Tonkhe tintfo letimbi letenteka emhlabeni titawuphela yini? Sihloko lesilandzelako siyayiphendvula lemibuto.