Sekela Libandla Lokulo

Emhlabeni wonkhe, tigidzi tebantfu tikhonta Jehova ngenjabulo emabandleni lamanyenti. Tiyatijabulela ticondziso letititfolako futsi tilisekela ngekutimisela nangetindlela letehlukahlukene libandla. Utiva kanjalo yini nawe ngelibandla lokulo?

1. Ungasisebentisa njani sikhatsi nemandla akho kute usekele libandla ngetindlela letehlukahlukene?

Sonkhe singasita ebandleni. Sibonelo nje, bakhona yini ebandleni lokulo lasebakhulile nobe labagulako? Ungabasita yini ngekwekuhamba nabaya emihlanganweni nobe ngaletinye tindlela, njengekubatsengela kudla naletinye tintfo labatidzingako nobe ubahlantele imiti yabo? (Fundza Jakobe 1:27.) Singaphindze sivolontiye ekuhlanteni kanye nasekunakekeleni liHholwa letfu leMbuso. Kute losiphocelela kutsi sente letintfo. Indlela lesimtsandza ngayo Nkulunkulu kanye nebazalwane betfu isenta ‘sitinikele ngekutitsandzela.’—Tihlabelelo 110:3.

BoFakazi lababhajatisiwe bangasekela libandla nangaletinye tindlela. Bazalwane labenta loko lokushiwo liBhayibheli bangasita libandla njengetinceku letisebentako nobe labadzala belibandla. Kokubili bazalwane nabodzadze bangaba ngemahlahlandlela kuze basekele libandla emsebentini wekushumayela. Labanye boFakazi bangasita ekwakheni tindzawo tekukhontela nobe batfutsele kulelinye libandla kuze balisite ngaletinye tindlela.

2. Singatisebentisa njani tintfo lesinato kute sisekele libandla?

‘Singamdvumisa Jehova ngekumnika lokuncono kakhulu kulesinako.’ (Taga 3:9) Sikutsatsa njengelilungelo kunikela ngemali nangaletinye tintfo lesinato kuze sisekele libandla lesikulo kanye nemsebenti wekushumayela emhlabeni wonkhe. (Fundza 2 KubaseKhorinte 9:7.) Iminikelo yetfu iphindze isite nakuvele tehlakalo. Labanyenti bakhetsa kuhlale ‘babekela eceleni lokutsite’ kuze banikele ngako. (Fundza 1 KubaseKhorinte 16:2.) Singanikela ngekufaka imali emabhokisini emnikelo lasetindzaweni tetfu tekukhontela nobe ku-internet ku-website letsi donate.jw.org. Indlela lesisebentisa ngayo tintfo lesinato isiniketa litfuba lekukhombisa kutsi simtsandza kangakanani Jehova.

CHUBEKA UFUNISISA

3. Singasebentisa tintfo lesinato

Jehova naJesu bayabatsandza bantfu labapha bajabulile. Sibonelo nje, Jesu wanaka ngesikhatsi umfelokati anikela kuJehova ngisho nobe bekanemali lencane. Fundza Lukha 21:1-4, bese nicoca ngalemibuto:

• Kufanele sinikele ngemali lenyenti yini kuze sijabulise Jehova?

• Jehova naJesu bativa njani ngeminikelo yetfu lesuka enhlitiyweni?

Kuze utfole kutsi iminikelo yetfu isetjentiswa njani, dlala le-VIDEO, bese nicoca ngalombuto lolandzelako.

I-VIDEO: ‘Kunikela KuJehova’ (4:47)

• Iminikelo isetjentiswa njani kute isite emabandla emhlabeni wonkhe?

4. Singavolontiya ngekutsi sisite

Ngetikhatsi tekubhalwa kweliBhayibheli, tikhonti taJehova betisebenta ngekutimisela kute tinakekele tindzawo tato tekukhontela. Nobe kunjalo, loko bekungetulu nje kwekumane banikele ngemali. Fundza 2 Tikhronike 34:9-11, bese nicoca ngalombuto:

• Ema-Israyeli bekasita njani ekunakekeleni indlu yaJehova nobe indzawo yekukhontela?

Kuze ubone kutsi BoFakazi BaJehova basilandzela njani lesibonelo lesiseBhayibhelini, dlala le-VIDEO, bese nicoca ngalemibuto lelandzelako.

I-VIDEO: Kunakekela Tindzawo Tetfu Tekukhontela (3:31)

• Kubaluleke ngani kugcina emaHholwa etfu eMbuso ahlobile futsi asesimeni lesikahle?

• Ngutiphi letinye tindlela longasita ngato?

5. Bazalwane bangasebenta ngekutikhandla kuze bafanelekele kwenta imisebenti leyengetiwe ebandleni

Imibhalo ikhutsata emadvodza langemaKhristu kutsi asebente ngekutikhandla kuze asekele libandla. Kuze ubone sibonelo, dlala le-VIDEO, bese nicoca ngalombuto lolandzelako.

I-VIDEO: Bazalwane, Sebentani Ngekutikhandla Kuze Nente Imisebenti Lemihle (5:19)

• Kule-video, Ryan wasebenta njani ngekutikhandla kuze asekele libandla ngalokugcwele?

LiBhayibheli lichaza kutsi bazalwane labatinceku letisebentako nalabadzala belibandla kufanele batiphatse njani. Fundza 1 KuThimothi 3:1-13, bese nicoca ngalemibuto:

• Yini lelindzelekile kubazalwane labafuna kuba tinceku letisebentako nobe labadzala belibandla?

• Yini lelindzelekile emindenini yabo?—Buka vesi 4 na-11.

• Nangabe umzalwane asebenta ngekutikhandla kuze ente loko lokushiwo ngulamavesi, libandla lizuza njani?

LOKO LESICOCE NGAKO

Jehova ujabula kakhulu ngemetamo lesiyentako kuze sisekele libandla ngesikhatsi setfu, emandla etfu kanye netintfo lesinato.

Yini Loyifundzile?

• Singasisebentisa njani sikhatsi setfu kanye nemandla kuze sisekele libandla?

• Singatisebentisa njani tintfo lesinato kuze sisekele libandla?

• Ngutiphi tindlela wena longatsandza kusekela ngato libandla?

LOKUNYE LONGAKUHLOLA

Tfola kutsi kungani Nkulunkulu angasalindzeli kutsi tikhonti takhe tikhokhe kwelishumi.

“Litsini LiBhayibheli Ngekukhokha Kwelishumi?” (Sihloko lesiku-internet)

Fundza kutsi kusho kutsini kuba nesifiso sekutfola emalungelo ebandleni.

“Unaso Yini ‘Sifiso’ Sekutfola Emalungelo Ebandleni?” (Sicongosekulindza sa-September 15, 2014)

Bukela boFakazi labanesibindzi nalabatidzelako kuze bamikise tincwadzi kulabanye labakholwa nabo.

Kutfunyelwa Kwetincwadzi ECongo (4:25)

Tfola kutsi umsebenti wetfu usekelwa njani ngendlela leyehlukile kuneyaletinye tinkholo.

“Umsebenti WaBoFakazi BaJehova Usekelwa Njani Ngetimali?” (Sihloko lesiku-internet)