Tfola Injabulo EVini LaNkulunkulu

UBUSISIWE umuntfu ‘lojabula ngemtsetfo waJehova.’ Umuntfu lonjalo ufundza liVi laNkulunkulu futsi ‘azindle ngalo imini nebusuku.’ (Hla. 1:1, 2) Uyayitfola yini wena injabulo lenjalo? Ungayikhulisa njani injabulo letfolakala eVini laNkulunkulu?

Ungamane nje ufundze emagama. Kubone ngeliso lengcondvo loko lokufundzako. Cabanga ngemaphimbo alabo labacashuniwe. Njengobe ufundza tehluko tekucala teliBhayibheli, muve Jehova embula kancane kancane loko lakwentako nakadala umhlaba kute ulungele kuhlala bantfu. Lalela njengobe akhuluma neNdvodzana yakhe leSisebenti Lesiyingcweti, ayitjela kutsi sesifikile sikhatsi sekudala bantfu bekucala. Cabanga nganasi simo: Bo-Adamu na-Eva bayahlubuka, Nkulunkulu uyabehlulela, futsi uyabacosha ePharadisi. (Genesisi, tehl. 1-3) Tive umangala njengobe ufundza kutsi livi lelichamuka ezulwini lichaza Jesu Khristu njengeNdvodzana yaNkulunkulu letsandzekako, letfunywe nguYe kute ifele bantfu. (Mat. 3:16, 17) Yetama kucabanga ngendlela umphostoli Johane lativa ngayo nakeva Jehova atsi: “Buka, ngenta tonkhe tintfo tibe tinsha.” (Semb. 21:5) Kuliciniso kutsi kufundza liVi laNkulunkulu ngaleyo ndlela kuletsa injabulo.

Chubeka ufundza imibhalo lephefumulelwe, futsi utawumati kancono Jehova kutsi ungumuntfu lobabatekako kanye nalowesabekako. Utawutiva usondzelene naLoyo lositsandzako, losiphatsa ngemusa, losisitako nasenta imetamo yekwenta intsandvo yakhe, futsi losifundzisa indlela yekuphumelela kuto tonkhe tintfo lesitentako.​—Josh. 1:8; Hla. 8:1; Isa. 41:10.

Kucitsa sikhatsi lesinyenti ufundza liBhayibheli, kutawukusita utfole kwenetiseka lokukhulu njengobe uchubeka ukhula elwatini lolumayelana nentsandvo yaNkulunkulu. Kodvwa injabulo yakho angeke igcine lapho. Nangabe lokufundzako kukuniketa lusito loludzingako kute uncobe tinkinga lonato, utawutiva njengemhlabeli lowatsi: “Timiso takho tiyamangalisa, ngako ngiyatilalela.” (Hla. 119:129) Nawe utawujabula njengobe ucondza timiso temiBhalo letikusita kutsi ulungise indlela yakho yekucabanga kanye netifiso takho kuze tivumelane nentsandvo yaNkulunkulu.​—Isa. 55:8, 9.

LiBhayibheli lisiniketa sicondziso sekutiphatsa lesingasivikela engotini, futsi lesingasiholela endleleni lefanele. Nasilifundza, sitfola kutsi Jehova unguBabe lotati kahle tinkinga lesingahlangabetana nato nasivumela tifiso tenyama yetfu lenesono. Akafuni kutsi sitfole imiphumela lebuhlungu, letawuba khona nasingayilaleli imitsetfo yakhe yekutiphatsa. Uyasikhatsalela futsi ufuna sibe nemphilo lencono kakhulu. Kufundza kwetfu liVi lakhe kusisita kutsi sisibonge kakhulu sibusiso sekutsi abe nguNkulunkulu kanye naBabe wetfu wasezulwini.

Naku lokwashiwo ngumhlabeli ngemuntfu lofundza liVi laNkulunkulu malanga onkhe: “Konkhe lakwentako kuyaphumelela.” (Hla. 1:3) Kuliciniso kutsi nanobe sinesono, siphila eveni lelibi lelibuswa nguSathane, futsi nanobe Develi enta imetamo yekusishwabadzela, kulifundza njalo liVi laNkulunkulu kanye nekukusebentisa loko lesikufundzako, kutawusisita kutsi siphumelele kuko konkhe lesikwentako lokutsintsa buhlobo betfu naJehova.

Njengobe sicindzetelwa ngulelive laSathane, kuzindla ngemicabango yeMdali wetfu sikhatsi lesitsite lilanga ngalinye, kungasiniketa emandla. Labanye lebebaboshiwe ngesizatfu sekukholwa kwabo, bebaba nemavesi kuphela labekatfolakala emaphephandzabeni latsite. Bebawasika, bawabambe ngengcondvo baphindze bazindle ngawo. Jehova wayibusisa imetamo yabo, ngobe benta loko labebangakhona kukwenta kute bangenise lwati lweliVi laNkulunkulu. (Mat. 5:3) Kodvwa-ke linyenti letfu linenkhululeko lenkhulu. Akukafaneli siphetse ngekutsi kufundza livesi leliBhayibheli sijakile lilanga ngalinye kutasisita ngalokumangalisako. Sitawutitfola tibusiso nangabe sitinika sikhatsi sekufundza indzinyana yeliBhayibheli lilanga ngalinye, sicabange ngayo, siphindze siyisebentise ekuphileni kwetfu.

Kuliciniso kutsi luhlelo lwetfu lungase luphazamiseke. Nakwenteka loko, tintfo letibalulekile kufanele tite kucala. Nasi sibonelo: Angitsi ngeke sihlale ngemabomu singawanatsi emanti lilanga linye nobe lamabili? Ngako-ke, ngisho nobe simatasatasa kangakanani ekuphileni, kufanele sitinike sikhatsi sekufundza liVi laNkulunkulu.​—Imis. 17:11.

Sewulifundze lonkhe yini liBhayibheli? Labanye iyabetfusa indzaba yekufundza liBhayibheli kusukela kuGenesisi kuya kuSembulo. Ngaleso sizatfu, labanyenti labafisa kulifundza lonkhe bacala ngekufundza ImiBhalo YemaKhristu YesiGriki. Kungani benta njalo? Kungenteka kutsi basheshe babone kutsi leto tincwadzi teliBhayibheli tisebenta njani kubo, njengobe banemgomo wekuhamba etinyatselweni taKhristu. Kungenteka futsi kungobe ImiBhalo YemaKhristu YesiGriki ibonakala ingasimidze kakhulu​—ingetudlwana kwencenye yinye kuletine teliBhayibheli. Nanobe kunjalo, ngemuva kwekufundza leto tincwadzi letingu-27, balandzela ngaletingu-39 temiBhalo YesiHebheru, futsi bayakujabulela kutifundza. Nasebacedze kufundza lemiBhalo YesiHebheru, basuke sebaneluhlelo lwekufundza liBhayibheli njalo, ngako babuyela emiBhalweni YemaKhristu YesiGriki lihlandla lesibili. Lenchubo bayayiphindzaphindza bangasayekeli. Shengatsi nawe kungaba ngumkhuba wakho kufundza liVi laNkulunkulu malanga onkhe.

Ukhona yini umuntfu emndenini wakho nobe ebandleni longakwati kufundza? Kungani ungaceli kumfundzela liBhayibheli njalo? Loku kutawukuzuzisa, futsi naye utawuzuza njengobe azindla ngaloko lakuvako, bese akusebentisa ekuphileni kwakhe.—Semb. 1:3.

Ngemuva kwesikhatsi, ungatsandza kwengeta letinye tintfo ekufundzeni kwakho liBhayibheli. Letinye taletintfo tingakhulisa indlela lokucondza ngayo kuhlobana kwetincenye letitsite teliBhayibheli. Nangabe liBhayibheli lolisebentisako linetikhombo, tingakusita utfole imininingwane lehambisana nemlandvo nobe kulandzisa lokufananako. Tingakusita ucondze timo letaholela ekubhalweni kwetihlabelelo letitsite kanye netincwadzi letabhalwa baphostoli baJesu Khristu. I-“Insight on the Scriptures” inekwatiswa lokubanti mayelana nebantfu, tindzawo, kanye nebuntfu lokukhulunywa ngabo eBhayibhelini. Emashadi asisita sibone kugcwaliseka kwetiphrofetho teliBhayibheli, aveta emagama emakhosi nebaphrofethi labebaphila ngesikhatsi lesifananako, aphindze asinike nesikhatsi lokungenteka kutsi tindzaba letiseBhayibhelini tenteka ngaso.

Njengobe uzindla ngaloko lokufundzako, utawucondza tizatfu letabangela kutsi tintfo letitsite tenteke kubantfu baNkulunkulu. Utawuphindze ucondze kutsi kungani Jehova asebentelana nebantfu bakhe ngaleyo ndlela. Utawubona kutsi Jehova ukutsatsa njani loko lokwentiwa bohulumende, ngemacembu ebantfu kanye nalokwentiwa ngumuntfu ngamunye. Loku kutakusita kutsi uyicondze kahle indlela lacabanga ngayo.

Umlandvo lotfolakala eBhayibhelini uwujabulela kakhulu nangabe uyibona ngemehlo engcondvo indzawo lokwenteka kuyo tintfo letitsite. Emabalave etindzawo lokukhulunywa ngato eBhayibhelini aveta kuma kwetindzawo kanye nelibanga lebelitehlukanisa leto tindzawo. Nasi sibonelo: Ema-Israyeli kungenteka kutsi aluwela kuphi Lwandle Lolubovu? Belilikhulu kangakanani Live Lesetsembiso? Jesu wahamba indzawo lengakanani nakenta umsebenti wakhe wekushumayela emhlabeni? Ngutiphi tindzawo letabonwa nguPawula eluhambeni lwakhe lwetitfunywa telivangeli? Emabalave kanye netintfo letichaza kuma kwemhlaba kusinika imininingwane letawukwenta loko lokufundzako kuphile. Ungawatfolaphi emabalave etindzawo lokukhulunywa ngato eBhayibhelini? “INguqulo Yezwe Elisha YemiBhalo Engcwele” inawo lamanye awo. Imiculu ye-“Insight” inemabalave langu-70 futsi kunetikhombo tawo ekugcineni kwemculu wekucala. Sebentisa i-“Watch Tower Publications Index” kute utfole lamanye emabalave. Nangabe letincwadzi tingatfolakali ngelulwimi lwakho, sebentisa emabalave latfolakala ku-Sicongosekulindza kute akusite nawufundza liBhayibheli.

EmiBhalweni YesiHebheru, iNkhosi Davide yadvumisa Jehova yatsi: “Imicabango yakho ijulile, Nkulunkulu! Maye, bukhulu bunyenti bayo!” (Hla. 139:17) EmiBhalweni YemaKhristu YesiGriki, umphostoli Pawula wadvumisa Jehova ngobe “Yena ukhanye etinhlitiyweni tetfu kuze atente tikhanye inkhatimulo yelwati lwaKhe ngebuso baKhristu.” (2 Khor. 4:6) BoDavide naPawula baphila etikhatsini letingafanani, kodvwa bobabili batfola injabulo eVini laNkulunkulu. Ngaleso sizatfu, nawe ungayitfola injabulo nangabe utinika sikhatsi sekufundza liVi laJehova leliphefumulelwe.