Yati Indlela Lokufanele Uphendvule Ngayo

LEMINYE imibuto ifanana nelichwa lelikhulu lelintanta elwandle. Incenye lenkhulu yalo ifihleke ngephansi kwemanti. Sizatfu sekubuta umbuto sibaluleke kakhulu kunalowo mbuto.

Ngisho nobe lobutako afisa kutfola imphendvulo, kudzingeka ucabange kutsi kungakanani lotakusho kanye nendlela lotakusho ngayo kute wati kutsi kufanele umphendvule njani. (Joh. 16:12) Ngaletinye tikhatsi, njengobe Jesu aveta kubafundzi bakhe, umuntfu angase afune kwatiswa lete lilungelo lekukwati nobe lokungeke kumsite.​—Imis. 1:6, 7.

ImiBhalo iyaseluleka: “Ngaso sonkhe sikhatsi, emavi enu akabe nemusa, futsi avangwe ngeluswayi, kuze niyati indlela yekuphendvula umuntfu ngamunye.” (Khol. 4:6) Ngako-ke ngembikwekutsi siphendvule, kufanele singacabangi kuphela ngalesitakusho kodvwa sicabange nangendlela lesitakusho ngayo.

BaSadusi betama kutsiya Jesu ngembuto lowawumayelana nekuvuswa kwemfati lobesashade tikhatsi letinyenti. Nobe kunjalo, Jesu bekati kutsi abakholelwa ekuvusweni kwalabafile. Ngako-ke nasekabaphendvula, wakhuluma ngendlela lebeyilungisa umbono wabo loliphutsa lowabenta babuta lowo mbuto. Asebentisa likhono lekubonisana kanye nendzaba leseBhayibhelini labayetayele, Jesu waveta intfo labebangakase bayicabanga​—bufakazi lobucacile bekutsi Nkulunkulu utawubavusa labafile. Imphendvulo yakhe yabamangalisa kakhulu baphikisi bakhe kangangekutsi besaba nekuphindze bambute lomunye umbuto.​—Luk. 20:27-40.

Kute uyati indlela lokufanele uphendvule ngayo, nawe kufanele ukucondze lokusetingcondvweni talabo lababutako kanye naloko lokubakhatsatako. Nasi sibonelo: Lofundza naye esikolweni nobe losebenta naye angase akubute kutsi awuwugubhi leni Khisimusi. Kungani abuta lombuto? Ukhatsateke ngesizatfu sekungawugubhi yini nobe umane ufuna kwati kutsi sivumelekile yini kutijabulisa? Kute ukutfole loko, kungase kudzingeke kutsi nawe umbute kutsi ubutiswa yini. Ngemuva kwaloko mphendvule ngendlela lefanele. Ungase uphindze usebentise lelo tfuba kute umchazele indlela kulandzela ticondziso teliBhayibheli lokusivikela ngayo etintfweni letihambisana naleliholidi letibangela bantfu kutsi bacindzeteleke tiphindze tibe ngumtfwalo kubo.

Ase sitsi ucelwe kutsi ukhulume ngaBoFakazi BaJehova embikwelicembu lalofundza nabo esikolweni. Ngemuva kwekucoca nabo, bangase bakubute imibuto. Nangabe imibuto yabo icotfo futsi ilula, timphendvulo letimelula kanye naleticondzile tingase tiphumelele. Nangabe leyo mibuto ikhombisa kutsi banemibono leliphutsa ngatsi, kungaba kuhle kucala ngekubachazela kafishane kutsi yini lebangela bantfu labanyenti babe naleyo mibono, bese uyabachazela kutsi kungani BoFakazi BaJehova bakhetsa kusebentisa timiso teliBhayibheli ekuphileni kwabo. Etikhatsini letinyenti, leyo mibuto ungayitsatsi njengelugibe, kodvwa yitsatse njengendlela yekutfola loko labakucabangako​—ngisho nobe vele bawubute ngaleyo njongo. Imphendvulo yakho ikuniketa litfuba lekusita labo labakulalele kutsi babe nembono lobanti, ubanike kwatiswa lokuliciniso uphindze ubachazele nekutsi tinkholelo tetfu tisekelwe kumiphi imiBhalo.

Ungamphendvula njani umcashi longafuni kukunika sikhatsi sekuya emhlanganweni lomkhulu? Kwekucala, cabanga ngaloko lokusengcondvweni yakhe. Kungasita yini kucela kusebenta sikhatsi lesengetiwe? Kungawenta yini umehluko kumchazela kutsi loko lesikufundza emihlanganweni lemikhulu kusisita kutsi setsembeke futsi sibe tisebenti letikhutsele? Nangabe ukhombisa kutsi uyamcabangela, mhlawumbe loko kungamenta naye abone tintfo letibalulekile ekuphileni kwakho. Kutsiwani nangabe afuna kutsi ungetsembeki? Kumtjela ngalokucacile kutsi ngeke ukwente loko kanye nekukusekela ngemiBhalo kungamkhombisa kutsi ungumuntfu lonjani. Angeke kube lusito yini kutsi ucale ngekubonisana naye kutsi umuntfu lamtfuma kutsi acale emanga nobe ayomebela lokutsite, loyo muntfu angaphindze acale emanga kuye nobe ebe tintfo takhe?

Ngakulolunye luhlangotsi, kungenteka kutsi awuhlanganyeli etintfweni letitsite letentiwa esikolweni letiphambene nemibhalo. Khumbula kutsi thishela wakho kungenteka ute umbono lofanana newakho futsi kungumsebenti wakhe kutsi alawule bafundzi. Insayeya losuke unayo kutsi (1) ucabange ngaloko lokumkhatsatako, (2) umchazele ngenhlonipho simo sakho, futsi (3) ukumele loko lowati kutsi kutawujabulisa Jehova. Kute kube nemiphumela lemihle, kungadzingeka uchaze kabanti kunekumane ukusho kafishane loko lokukholelwako. (Taga 15:28) Nangabe usesemncane, umtali wakho utakusita kute ulungiselele loko lotakusho.

Ngaletinye tikhatsi, umuntfu kungase kudzingeke kutsi atiphendvulele emacaleni labekwe wona tiphatsimandla. Liphoyisa, sisebenti sahulumende nobe lijaji lingakuphocelela kutsi uphendvule imibuto lemayelana nekungahloniphi umtsetfo lotsite, kungatsatsi luhlangotsi njengemKhristu nobe simo sakho sengcondvo ngemikhosi yekushisekela buve. Kufanele uphendvule njani? LiBhayibheli liyaseluleka, litsi: “Ngemoya lomuhle nangenhlonipho lenkhulu.” (1 Phet. 3:15) Tibute nekutsi yini lebenta bakhatsateke ngalendzaba bese ukwemukela ngenhlonipho loko lokubakhatsatako. Yini longayenta ngemuva kwaloko? Umphostoli Pawula waveta loko lokwakushiwo ngumtsetfo wemaRoma lokwakumvuna. Ngako-ke, nawe ungase uvete lokutsite emtsetfweni welive lakini lokusebenta ecaleni lobekwe lona. (Imis. 22:25-29) Nangabe leso siphatsimandla siva ngaloko lokwentiwa ngemaKhristu ekucala kanye nalokwentiwa BoFakazi BaJehova emhlabeni wonkhe kungasenta sibe nembono lobanti. Mhlawumbe ungase uchaze indlela kuhlonipha ligunya laNkulunkulu lokubasita ngayo bantfu kutsi bahlale bayilalela imitsetfo leshaywa tiphatsimandla. (Rom. 13:1-14) Etimeni letinjalo, kuveta tizatfu letisekelwe emiBhalweni kungatenta tikwemukele loko lokushoko.

Nawuncuma indlela lotawuphendvula ngayo umuntfu lococa naye, kungase kudzingeke ucabangisise ngembono wakhe ngemiBhalo Lengcwele. Jesu wenta njalo nakaphendvula umbuto webaSadusi lowawumayelana nekuvuswa kwalabafile. Ngesizatfu sekutsi bekati kutsi bemukela kuphela tincwadzi letabhalwa nguMosi, Jesu wabonisana nabo ngendzaba lekuleto tincwadzi, watsi: “Kutsi labafile batawuvuswa, ngisho naMosi wakhuluma ngako.” (Luk. 20:37) Nawe kungakusita kucaphuna emavesi latsite lemukelekako naletayelekile kumuntfu lococa naye.

Kutsiwani nangabe umuntfu lococa naye angalihloniphi liBhayibheli? Naka loko lokwashiwo ngumphostoli Pawula enkhulumeni yakhe e-Ariyophagusi, letfolakala kuMisebenti 17:22-31. Wacoca nabo ngemaciniso emiBhalo ngaphandle kwekuwacaphuna eBhayibhelini. Nangabe ubona kunesidzingo, nawe ungenta kanjalo. Kuletinye tindzawo, ungase ucocisane nemuntfu tikhatsi letinyenti ngembikwekutsi umfundzele emavesi eliBhayibheli. Nasewucala kusebentisa liBhayibheli, kungaba kuhlakanipha kucale usho tizatfu letenta kubaluleke kutsi silinake kunekuvele ugcizelele kutsi liliVi laNkulunkulu. Kodvwa-ke umgomo wakho kufanele kube kuniketa bufakazi lobucacile mayelana nenjongo yaNkulunkulu, bese kutsi ngekuhamba kwesikhatsi, umente atibonele loko lokushiwo liBhayibheli. Linemandla kwendlula nobe yini tsine lesingayisho.​—Heb. 4:12.

Jehova unemusa, ngako-ke kubalulekile kutsi nemavi etinceku takhe ‘abe nemusa, futsi avangwe ngeluswayi.’ (Khol. 4:6; Eks. 34:6) Loku kusho kutsi kufanele sikhulume ngemusa ngisho nome kungase kubonakale kungakafaneli. Emavi etfu kufanele abe mnandzi, singakhulumi kabi nobe budlabha.

Bantfu labanyenti bacindzetelekile, futsi bahlukunyetwa ngemavi malanga onkhe. Nasicoca nebantfu labanjalo, bangase basiphendvule kabi. Kufanele sibaphendvule njani? LiBhayibheli litsi: “Imphendvulo letfobekile icitsa intfukutselo.” Imphendvulo lenjalo ingamenta atsambe umuntfu lophikisako. (Taga 15:1; 25:15) Bantfu labahlale baphatfwa kabi bangajabula kakhulu nabaphatfwa kahle futsi bakhulunyiswa ngemavi lanemusa. Loko kungase kubente batilalele tindzaba letimnandzi lesibaphatsela tona.

Akusiwo umgomo wetfu kuphikisana nebantfu labangalihloniphi liciniso. Kunaloko, sifiso setfu kubonisana ngemiBhalo nebantfu labasiniketa litfuba lekwenta njalo. Ngisho nome sihlangabetana nasiphi simo, sihlale sikhumbula kutsi kufanele siphendvule ngemusa futsi sikhombise kutsi siyaciniseka kutsi siyatetsemba tetsembiso taNkulunkulu letiligugu.​—1 Thes. 1:5.

Nangabe umuntfu lofundza naye liBhayibheli nome lokholwa naye akubuta kutsi yini lokufanele ayente esimeni lesitsite, kufanele umphendvule njani? Kungenteka wena uyati kutsi bewungenta njani kuleso simo. Kodvwa-ke, umuntfu ngamunye kufanele atetfwalele wakhe umtfwalo ngetincumo latentako. (Gal. 6:5) Umphostoli Pawula wachaza kutsi wakhutsata bantfu labekabashumayela kutsi ‘balalele ngekukholwa.’ (Rom. 16:26) Lesi sibonelo lesihle lesingasilandzela. Umuntfu lowenta tincumo kute ajabulise loyo lomfundzisa liBhayibheli nome labanye bantfu, usuke akhonta bantfu, angaphili ngekukholwa. (Gal. 1:10) Ngako-ke imphendvulo lecondzile ingase ingamsiti loyo lobutako.

Ungamphendvula njani-ke loyo muntfu ngendlela levumelana neticondziso teliBhayibheli? Ungase umkhombise timiso teliBhayibheli letihambisana naleyo ndzaba kanye netibonelo letikulo. Ngaletinye tikhatsi, ungase umtjengise indlela yekwenta lucwaningo kute atitfolele yena letimiso kanye naletibonelo. Ungaphindze ucoce naye ngaletimiso kanye nangekubaluleka kwaletibonelo, kodvwa ungamtjeli kutsi tisebenta njani kulesimo lakuso. Mbute kutsi kukhona yini lakutfolako kuloko lenicoce ngako lokungamsita kutsi ente sincumo lesinengcondvo. Mkhutsate kutsi acabangisise ngaletimiso kanye nangaletibonelo kute abone kutsi yini langayenta letawujabulisa Jehova. Nawenta njalo, usuke umsita kutsi ‘aceceshe umcondvo wakhe ngekuwusebentisa kuze ehlukanise lokulungile nalokungakalungi.’​—Heb. 5:14.

Imihlangano yelibandla ivamise kusivulela ematfuba ekukuvuma ngemlomo kukholwa kwetfu. Lenye indlela lesikwenta ngayo loku, kuphendvula nakubutwa imibuto. Kufanele siphendvule njani? Kufanele sibe nesifiso sekudvumisa nobe kukhuluma kahle ngaJehova. Nguloko Davide lakwenta ngesikhatsi ‘asemkhatsini welibandla lelikhulu.’ (Hla. 26:12) Kufanele siphendvule ngendlela yekutsi lamanye emakholwa akhutsale “elutsandvweni nasemisebentini lemihle,” njengobe umphostoli Pawula ayala. (Heb. 10:23-25) Kutadisha kusenesikhatsi kungasisita kutsi sikhone kwenta njalo.

Nawukhonjwa kutsi uphendvule, yenta imphendvule yakho ibe melula, icace futsi ibe yimfishane. Ungakhulumeli sonkhe sigaba; khulumela liphuzu linye. Nawenta njalo, uniketa labanye litfuba lekutsi nabo baphendvule. Kuyasita kakhulu kukhulumela imibhalo lekhonjiwe. Nawenta njalo, yetama kugcizelela incenye yalombhalo leneliphuzu lokukhulunywa ngalo. Phendvula ngemavi akho kunekutsi ufundze sigaba njengobe sinjalo. Ungakhatsateki nangabe imphendvulo yakho wehlulekile kuyibeka kahle. Loko kuvamile kwenteka kuwo wonkhe umuntfu lophendvulako.

Kuyacaca kutsi kwati indlela lesitawuphendvula ngayo kusho lokungetulu kwekumane sati imphendvulo. Loku kudzinga sibe nekucondza. Kepha-ke kujabulisa kakhulu nangabe uphendvula ngalokusuka enhlitiyweni futsi ufinyelela tinhlitiyo talabanye!​—Taga 15:23.