Yini Letawususwa Nakufika Umbuso WaNkulunkulu?

1, 2. (a) Lelive lelibi lesiphila kulo lifana njani nesiboshwa lesigwetjelwe kufa? (Buka sitfombe lesisekucaleni kwalesihloko.) (b) Sitawuba njani simo nasekubhujiswe lelive lelibi?

“SIDVUMBU LESIHAMBAKO!” Lawa ngemavi levakala ngalesikhatsi siboshwa lesiyingoti sikhishwa endzaweni lebesivalelwe kuyo, kukhala iminyango yensimbi ngemuva kwaso. Yini leyenta labogadzi balesiboshwa bakhulume intfo lenjena? Lendvodza ibonakala ingumcemane futsi kute lokukhombisa kutsi itakufa. Ecinisweni, labogadzi bamikisa lesiboshwa lapho siyobulawelwa khona. Lesiboshwa sesifana nemuntfu losavele afile.a

² Ngandlelatsite, lelive lelibi lanamuhla lifanana nalendvodza leseyiya ekufeni. Sekuphele sikhatsi lesidze lelive latfola sehlulelo sekubhujiswa futsi kubhujiswa kwalo sekusedvute kakhulu. LiBhayibheli litsi: “Live liyendlula.” (1 Joh. 2:17) Nakanjani lelive litawubhujiswa. Nobe kunjalo, kunemehluko lomkhulu emkhatsini wekubhujiswa kwalelive nekubulawa kwalesiboshwa lesikhulume ngaso. Kulendzawo lesiboshwa lesiya kuyo, labanye bangaphikisana nalesigwebo, bangabate kufaneleka kwaso, nome mhlawumbe babe nelitsemba lekutsi singakhululwa ngemzuzu wekugcina. Sigwebo salelive sona ngeke sishintje ngoba sikhishwe nguMbusi lowetsembekile wendalo yonkhe. (Dut. 32:4) Kubhujiswa kwalo ngeke kusamiswa futsi asingabati kutsi sigwebo salo siyafaneleka. Ngemuva kwekubhujiswa kwalo, yonkhe indalo lephilako itawubona kutsi vele lesigwebo besifaneleka. Kutawuba nenjabulo lenkhulu!

 3. Ngutiphi tincenye letine lesitawucoca ngato futsi letitawucedvwa nakufika uMbuso waNkulunkulu?

³ Yini lenye ‘letawundlula nalelive’? Tintfo letinyenti lamuhla bantfu labacabanga kutsi titawuhlala tikhona, nato titawendlula. Tindzaba letimbi yini leti? Cha! Ecinisweni letindzaba leti tiyincenye lebalulekile ‘yetindzaba letimnandzi letimayela neMbuso.’ (Mat. 24:14) Nyalo-ke asesicoce ngaloko lokutawucedvwa nakufika uMbuso waNkulunkulu. Sitawucoca nganati tincenye letine: bantfu lababi, tinhlangano letigcwele inkhohlakalo, imikhuba lemibi, netimo leticindzetelako. Encenyeni ngayinye sitawuhlola , (1) indlela letintfo letisitsintsa ngayo, (2) loko Jehova latakwenta ngato, (3) nendlela Jehova latawuciniseka ngayo kutsi esikhundleni sato usiniketa tintfo letinhle sibili.

 4. Bantfu lababi basiphatsa kabi ngatiphi tindlela lamuhla?

⁴ Sitiva njani ngebantfu lababi labakhona lamuhla? Ngemuva kwekubiketela kutsi lesikhatsi lesiphila kuso sitawufaka ekhatsi “tikhatsi letibucayi lokumatima kubhekana nato”, umphostoli Pawula waphefumulelwa kutsi abhale kutsi: “bantfu lababi nebakhohlisi batawudlanga ngebubi, badukise futsi nabo badukiswe.” (2 Thim. 3:1-5, 13) Lamavi alesiphrofetho uwabonile yini afezeka? Linyenti letfu like lahlukunyetwa bantfu lababi, labatidlova, bantfu labenenzondo netigebengu letiyingoti. Labanye balabantfu ababufihli bubi babo, labanye bayabufihla, batente bantfu labalungile kantsi babi. Ngisho nobe singakahlukumeteki ngalokucondzile, kodvwa bantfu lababi baseseyinkinga kitsi. Sikhatsateka kakhulu nangabe siva ngetento tabo letihlasimulisa lugogo. Indlela bantfu lababi lababahlukumeta ngayo bantfwana labancane nalasebakhulile labangakhoni kutivikela, isivisa buhlungu kakhulu. Bantfu lababi baveta umoya lobonakala unebulwane kanye nebudimoni. (Jak. 3:15) Esikhundleni setindzaba letimbi, siyajabula kutsi liVi laJehova lisitjela tindzaba letimnandzi.

 5. (a) Nguliphi litfuba lelisavulekele bantfu lababi? (b) Ngusiphi sehlulelo sekugcina bantfu lababi labatasitfola?

⁵ Yini Jehova latayenta? Nyalo Jehova uniketa bantfu lababi litfuba lekutsi baphendvuke. (Isa. 55:7) Kusete umuntfu lotfole sehlulelo sakhe sekugcina. Ngulelive lelibi kuphela, leselivele litfole sehlulelo salo. Kodvwa kutakwentekani ngalabantfu labangafuni kushintja, labasolo basekela lelive ngisho nobe babona kutsi kuhlupheka lokukhulu sekusondzele? Jehova wetsembisa kulibhubhisa phakadze lelive lelinebantfu lababi. (Fundza Tihlabelelo 37:10) Bantfu lababi kungenteka batitjela kutsi ngeke basitfole lesehlulelo. Bantfu labanyenti bayakufihla loko labakwentako, futsi kungabonakala shengatsi ngeke basitfole sehlulelo kanye nemphumela waloko labakwentako. (Jobe 21:7, 9) Kodvwa naku liBhayibheli lelisikhumbuta kona: “Emehlo akhe [Nkulunkulu] abuka kuhamba kwemuntfu njalo, ubona tonkhe tinyatselo takhe. Kute bumnyama lobumnyama kuye, kute nelitfunti lelimnyama, lapho benti balokubi bangabhaca khona.” (Jobe 34:21, 22) Kute longamfihlela kona Jehova Nkulunkulu. Kute umtentisi longamkhohlisa; kute futsi nesitfunti lesimnyama kangangekutsi Nkulunkulu ngeke akhone kubona kuso. Ngemva kwe-Amagedoni, sitawutsi nasibuka indzawo yalababi, bona batawube sebangasekho. Batawube bangasekho kuze kube phakadze!​—Hla. 37:12-15.

 6. Bobani labatawusala esikhundleni sebantfu salababi futsi kungani loko kutindzaba letimnandzi?

⁶ Bobani labatawusala esikhundleni sebantfu lababi? Jehova usetsembisa naku lokujabulisako: “Labamnene bayawulidla lifa lemhlaba, bahlale kahle, batijabulise ngekuthula lokukhulu.” Kuso sona lesihlabelelo siphindze sifundze naku: “Labalungile bayawudla lifa lemhlaba, bahlale kulo kuze kube phakadze.” (Hla. 37:11, 29) Bobani “labamnene” ‘nalabalungile’? Labamnene ngulabo labakwemukela ngekutfobeka kufundziswa nguJehova nekucondziswa nguye; labalungile bona ngulabo labatsandza kwenta lokuhle embikwaJehova Nkulunkulu. Kulelive lanamuhla, bantfu labalungile bambalwa kakhulu nabacatsaniswa nalababi. Kodvwa eveni lelisha lelisedvutane bantfu labalungile ngeke babe bancane nobe babe banyenti kodvwa kutawuba ngibo kuphela labaphila eveni lelisha. Nembala, bantfu labanjalo ngibo labatawenta umhlaba ube lipharadisi!

 7. Tinhlangano letikhohlakele tisiphatsa njani lamuhla?

⁷ Utiva njani ngetinhlangano letigcwele inkhohlakalo letikhona lamuhla? Tintfo letinyenti letimbi letikhona lamhlabeni atentiwa nje bantfu labatimele kuphela, kodvwa tentiwa natinhlangano. Nasi sibonelo, cabanga ngetinhlangano tetinkholo letiyenge bantfu labanyenti ngemvelaphi yaNkulunkulu; tenta bantfu bangabata kwetsembeka kweliBhayibheli; likusasa ngemhlaba nangebantfu, kanye nangaletinye tindzaba letinyenti. Kutsiwani ngabohulumende labaphehla timphi kanye nekuvukela lokunebudlova lokucindzetela bantfu labaphuyile nalabete emandla ekutivikela kanye nekwandza kwemkhuba wekufumbatsisana nome kucashwa ngebuhlobo? Kutsiwani ngetinhlangano letingcolisa imvelo, leticedza kancane kancane umnotfo wemvelo, futsi letikhohlisa batsengi bato kute baletsele bantfu labambalwa umnotfo lomnyenti kube tigidzi tebantfu tihlaselwe buphuya? Asingabati kutsi ngito letinhlangano letikhohlakele letibangela kucindzeteleka emhlabeni.

 8. Ngekusho kweliBhayibheli, kutakwentekani ngetinhlangano letibonakala tinemandla lamuhla?

⁸ Yini Jehova latayenta? Kuhlupheka lokukhulu kutawucala ngalesikhatsi bosopolitiki bavukela tonkhe tinhlangano tenkholo yemanga njengoba timelelwa yingwadla lebitwa ngekutsi yiBhabhulona Lenkhulu. (Semb. 17:1, 2, 16; 18:1-4) Leto tinhlangano tetinkholo titawucedvwa tiphele nya. Nobe kunjalo, kutakwentekani ngaleletinye tinhlangano nato letikhohlakele? LiBhayibheli lifananisa leto tinhlangano letibonakala tinemandla, netintsaba kanye netichingi. (Fundza Sembulo 6:14) LiBhayibheli libiketela kutsi bohulumende kanye netinhlangano letitimele titawusiphulwa. Kuhlupheka lokukhulu kutawufika esiphetfweni sako ngekutsi kubhujiswe bonkhe labohulumende balelive lelidzala kanye nalabo lababasekelako ngekutsi bamelane neMbuso waNkulunkulu. (Jer. 25:31-33) Ngemva kwaloko, ngeke kuphindze kube netinhlangano letikhohlakele!

 9. Yini lesenta siciniseke kutsi emhlabeni lomusha kutawuba nekuhleleka?

⁹ Yini letawuvala sikhundla sabohulumende labagcwele inkhohlakalo? Ngemuva kwe-Amagedoni, ikhona yini inhlangano letawube isele? LiBhayibheli litsi: “Kunemazulu lamasha nemhlaba lomusha lesikulindzele ngekwesetsembiso sakhe, futsi kuko kutawuba nekulunga.” (2 Phet. 3:13) Emazulu nemhlaba lomdzala, lokusho labohulumende labakhohlakele kanye nebantfu labababusako, batawube sebabhujisiwe. Yini letawuvala sikhundla sabo? Inkhulumo letsi “emazulu lamasha” kanye “nemhlaba lomusha” isho kutsi kutawuba nahulumende lomusha nebantfu labasha labatawubuswa nguloyo hulumende. LoMbuso lotawube uholwa nguJesu Khristu utawukhombisa buntfu baJehova Nkulunkulu, longuNkulunkulu lohlelekile. (1 Khor. 14:33) Ngako emhlabeni lomusha kutawuba nekuhleleka. Kutawuba nemadvodza lalungile lahlela kahle tintfo. (Hla. 45:16) Batawube bacondziswa nguKhristu kanye nalabangu-144 000 labatawubusa naye. Cabanga nje kutsi kutawuba njani kuphila nasekute tinhlangano letikhohlakele, kodvwa sekunenhlangano yinye, lenebunye futsi lete kukhohlakala!

10. Ngumiphi imikhuba lemibi leseyivamile endzaweni lohlala kuyo futsi ikutsintsa njani wena nemndeni wakho?

¹⁰ Utiva njani ngemikhuba lemibi lekhona nyalo? Siphila eveni leligcwele bubi. Kutiphatsa lokubi, kungetsembeki kanye nebudlova kugcwele kulelive lesiphila kulo. Batali bakutfola kumatima kuvikela bantfwana babo kulobubi lobukhona. Tinhlelo tekutijabulisa tibonakala tikhangisa kakhulu ngato tonkhe tinhlobo tebubi, lokwenta kutsi timiso taJehova talokuhle nalokubi tibukeleke phansi. (Isa. 5:20) EmaKhristu eliciniso alwisana nalomkhuba. Alwa kamatima kute agcine bucotfo bawo kulelive lelikhutsata kungatihloniphi timiso taJehova.

11. Yini lesiyifundzako ngesehlulelo Jehova lasikhipha eSodoma naseGomora?

¹¹ Yini Jehova latayenta ngalemikhuba lemibi? Cabanga ngaloko lakwenta ngemikhuba lemibi lebeyivamile eSodoma naseGomora. (Fundza 2 Phetro 2:6-8.) Indvodza lelungile lenguLoti kanye nemndeni wayo beyiphila emkhatsini webantfu lebebenta tintfo letimbi. Ngesikhatsi Jehova abhubhisa yonkhe leyondzawo, wenta lokungetulu nje kwekucedza lobo bubi. ‘Wabekela labo labangamesabi Nkulunkulu sibonelo saloko lobekuseta.’ Njengobe Jehova abucedza bubi bangaleso sikhatsi, nanyalo utabucedza nakaletsa sehlulelo sakhe kulelive lanamuhla.

12. Ngutiphi tintfo lolangatelela kutenta nasekususwe lelive lelibi laSathane?

¹² Yini letawutsatsela sikhundla tintfo letimbi? Epharadisi kutabe kunetintfo letinyenti letijabulisako lesitabe sitenta. Cabanga ngemsebenti lomkhulu wekushintja lomhlaba ube lipharadisi, newekwakha tindlu tetfu netalabo lesibatsandzako. Asewucabange nje nasesemukela tigidzi tebantfu lesetivuswe ekufeni futsi sitifundzise ngetindlela taJehova siphindze siticocele nangendlela labanakekele ngayo bantfu bakhe. (Isa. 65:21, 22; Imis. 24:15) Sitawube senta tintfo letinyenti letijabulisako naletiletsa ludvumo kuJehova!

13. Ngutiphi timo leticindzetelako lamuhla letibangelwe kuvukela kwaSathane, Adamu kanye na-Eva?

¹³ Utiva njani ngetimo leticindzetelako letikhona lamuhla? Timo letimatima letikhona lamhlabeni tibangelwa bantfu lababi, tinhlangano letikhohlakele kanye netento letimbi. Ngubani nje longatsi timphi, kuhlupheka nobe kubandlululwa kuyamjabulisa? Kutsiwani ngekugula kanye nekufa? Sonkhe tisivisa buhlungu letimo leti. Tonkhe letimo tiyimiphumela yekuvukela Jehova lokwentiwa nguSathane, nabo-Adamu na-Eva. Kute umuntfu lamuhla longayibalekela lenhlekelele leyabangelwa ngulokuvukela.

14. Yini Jehova latayenta ngetimo leticindzetelako letikhona? Niketa sibonelo.

¹⁴ Yini Jehova latayenta ngaletimo leticindzetelako? Cabanga nje ngetimphi. Jehova wetsembisa kutsi utaticedza nya! (Fundza Tihlabelelo 46:8, 9) Kutsiwani-ke ngekugula? Nako ngeke kuphindze kube khona. (Isa. 33:24) Kufa kona? Jehova utakugwinya phakadze naphakadze! (Isa. 25:8) Utawucedza ngisho nendlala. (Hla. 72:12-16) Timo leticindzetelako letenta kuphila kube matima ngeke tiphindze tibe khona. Utawucedza ngisho ‘nemoya’ lomubi walelive lobangelwa nguSathane kanye nemadimoni.​—Ef. 2:2.

15. Ngemuva kwe-Amagedoni, ngutiphi tintfo letitawube setingasekho?

¹⁵ Ucabanga kutsi kutaba njani kuphila emhlabeni nasekute timphi, kugula kanye nekufa? Sekute emasotja, imikhumbi yetimphi nobe tindiza temphi! Sekute tikhali temphi nemicimbi yekukhumbula bantfu labafe etimphini. Setingasekho tibhedlela, bodokotela, bonesi, emamoshali nobe emathuna! Ngenca yekutsi bugebengu butabe sebungasekho, kutaba bete sidzingo setinkapani letibuke tekuphepha, ema-alarm, emaphoyisa, mhlawumbe netinkanankana nobe tikhiya. Ngeke siphindze sikhatsateke.

16, 17. (a) Batawutiva njani labo labasindze e-Amagedoni? Fanekisa. (b) Yini lesingayenta kute sichubeke siphila nasekususwe lelive lelibi laSathane?

¹⁶ Kutawuba njani kuphila nasekute tintfo letisicindzetelako? Akusiko lula kukubona ngeliso lengcondvo kutsi kutabe kunjani. Sesiphile sikhatsi lesidze kulelive lelibi, kangangekutsi sesize sikwejwayele kuphila kulelive lelicindzetelako. Loku kufanana nebantfu labahlala dvutane nemgwaco wesitimela, bagcine bangasawunaki umsindvo lomkhulu wekudvuma kwesitimela futsi labo labahlala dvutane nalakulahlwa khona tibi bagcine bangasaliva liphunga laletibi. Kodvwa kutasijabulisa kakhulu lapho tonkhe letintfo letisicindzetelako setiphelile.

¹⁷ Yini letawutsatsa sikhundla salokucindzeteleka lesikuvako lamuhla? Tihlabelelo 37:11 titsi: “Bahlale kahle, batijabulise ngekuthula lokukhulu.” Akakujabulisi yini lamavi? Nguloko Jehova latsi utasentela kona. Ngako-ke, yenta konkhe lokusemandleni akho kute uhlale usondzelene naJehova Nkulunkulu kanye nenhlangano yakhe kulamalanga ekugcina lacindzetelako! Hlale ucabanga ngaletetsembiso, tente tiphile engcondvweni yakho nasenhlitiyweni yakho futsi ucocele nalabanye ngato. (1 Thim. 4:15, 16; 1 Phet. 3:15) Nawenta njalo, ungaciniseka kutsi ngeke uze wendlule nalelive lelibi naselibhujiswa. Kunaloko, utawuchubeka uphila phakadze futsi ujabulile.