Jehova Ucondzisa Bantfu Bakhe Endleleni Yekuphila

1, 2. (a) Ngusiphi secwayiso lesente bantfu labanyenti basindza? (Buka sitfombe lesisekucaleni kwalesihloko.) (b) Bantfu baNkulunkulu banasiphi sicondziso lesingasindzisa kuphila kwabo?

“MANI, BUKA, LALELA.” Kusukela eminyakeni lengetulu kwa-100 leyendlulile, lamagama labebhalwe ngalokugcamile kuletinye timphawu lapho kuphambana khona bojantji besitimela eNyakatfo Melika. Kungani? Kuze timoto tingatewushayiswa sitimela lesigijimako natewela lojantji. Kuhlonipha letimphawu letisecwayiso, kusindzise bantfu labanyenti.

² Jehova usentela lokuncono kakhulu kwendlula kusiniketa timphawu tekuphepha. Ucondzisa bantfu bakhe kute batfole kuphila lokuphakadze futsi bagweme tingoti. Jehova ufanana nemelusi lonelutsandvo locondzisa aphindze ecwayise timvu takhe kutsi tingahambi etindleleni letiyingoti.​—Fundza Isaya 30:20, 21.

 3. Sangena njani endleleni leholela ekufeni?

³ Kusukela adala bantfu, Jehova wabaniketa ticondziso leticacile. Sibonelo saloku kutsi ensimini yase-Edeni, Jehova washo ticondziso leticacile lebetitawusita bantfu kutsi batfole kuphila lokuphakadze nenjabulo. (Genesisi 2:15-17) Kodvwa bo-Adamu na-Eva abazange batemukele leticondziso lebetivela kuBabe wabo lonelutsandvo. Eva walalela loko lokwashiwo yinyoka, Adamu walalela umfati wakhe. Waba yini umphumela? Bobabili bahlupheka futsi bafa bete litsemba. Ngenca yekutsi abazange balalele, bafaka bonkhe bantfu elubishini, lokuyindlela leholela ekufeni.

 4. (a) Kungani kwakudzingeka ticondziso letengetiwe ngemuva kwaZamcolo? (b) Kushintja kwetimo kwayiveta njani indlela yaNkulunkulu yekucabanga?

⁴ Nkulunkulu waniketa Nowa ticondziso letasindzisa kuphila kwebantfu. Ngemuva kwaZamcolo, Jehova watjela bantfu kutsi bangayidli ingati nobe bayinatse. Kungani asho njalo? Kungobe Jehova besekatawuvumela bantfu kutsi badle inyama. Ngenca yalolushintjo, besekudzingeka kutsi baniketwe ticondziso letinsha, letitsi: “Ningayidli inyama lesenengati; loko ngikusho ngobe kuphila kusengatini.” (Genesisi 9:1-4) Kulomyalo sifundza ngendlela Nkulunkulu lacabanga ngayo ngekuphila, njengobe kuvela kuye. UnguMdali futsi nguye losinika kuphila, ngako unelilungelo lekushaya imitsetfo yekuphila. Sibonelo saloko kutsi wayala bantfu kutsi bangabulalani. Nkulunkulu utsatsa kuphila nengati njengetintfo letingcwele futsi utamjezisa umuntfu lotisebentisa kabi.​—Genesisi 9:5, 6.

 5. Yini lesitayifundza, futsi kungani?

⁵ Ngemuva kwemalanga aNowa, Nkulunkulu wachubeka acondzisa bantfu bakhe. Kulesihloko sitawufundza ngetibonelo letimbalwa tendlela labacondzisa ngayo. Kufundza ngato kutawucinisa sincumo setfu sekulandzela sicondziso saJehova size siyongena emhlabeni lomusha.

 6. Kungani kwakubalulekile ngebantfu baNkulunkulu kutsi bayilalele imitsetfo labanika yona ngaMosi, futsi ngusiphi simo sengcondvo ema-Israyeli lobekufanele abe naso?

⁶ Ngesikhatsi saMosi, Jehova waniketa bantfu bakhe ticondziso leticacile ngendlela lobekufanele batiphatse ngayo nangendlela lobekufanele bamkhonte ngayo. Kungani? Nakulesimo, kukhona lushintjo lebeselwentekile. Besekwendlule iminyaka lengetulu kwa-200 ema-Israyeli atigcila eGibhithe lapho wonkhe umuntfu abekhonta bantfu labafile, akhonta titfombe futsi enta tintfo letinyenti lebetikhombisa kungamhloniphi Nkulunkulu. Ngesikhatsi bantfu baNkulunkulu bakhululwa eGibhithe, besebadzinga ticondziso letinsha. Bebatawuba sive lesitawulandzela uMtsetfo waJehova kuphela. Letinye tincwadzi titsi ligama lesiHebheru lelitsi “umtsetfo” lihlobene neligama lelisho “kucondzisa, kuhola, nekufudzisa.” LoMtsetfo wawuvikela ema-Israyeli ekutiphatseni lokubi nasekukhulekeleni kwemanga lobekwentiwa tive lebetibomakhelwane bawo. Ema-Israyeli abebusiswa nakamlalela Nkulunkulu. Nakangamlaleli, abebhekana netinkinga letimatima.​—Fundza Dutheronomi 28:1, 2, 15.

 7. (a) Chaza kutsi kungani Jehova anikete bantfu bakhe ticondziso. (b) Umtsetfo wawungumcondzisi ngayiphi indlela kuma-Israyeli?

⁷ Kwakunalesinye sizatfu lesabangela kutsi kube neticondziso letinsha. UMtsetfo wenta kutsi ema-Israyeli akulungele kufika kwaMesiya, Jesu Khristu, lobekusentakalo lesibalulekile. LoMtsetfo wakhumbuta ema-Israyeli kutsi anesono. Wawasita nekutsi acondze kutsi bekayidzinga inhlawulo, lengumhlatjelo lebewutawususa tono tawo ngalokuphelele. (Galathiya 3:19; Hebheru 10:1-10) Ngetulu kwaloko, umtsetfo bewutawuvikela luhla lwekutalwa kwaMesiya futsi usite ema-Israyeli abone kutsi nguye nasekafika. Kuliciniso kutsi loMtsetfo wawusicondziso lebesitawusebenta sikhashana nobe ‘umcondzisi’ loholela kuKhristu.​—Galathiya 3:23, 24.

 8. Kungani kufanele sicondziswe timiso letiseMtsetfweni waMosi?

⁸ Natsi njengemaKhristu singazuza kuleticondziso Jehova latisho kulomtsetfo. Ngayiphi indlela? Singema futsi sibuke timiso loMtsetfo losekelwe kuto. Ngisho nobe singekho ngaphansi kwaleyomitsetfo, singetsembela kuleminyenti yayo kute isicondzise ekuphileni kwetfu nasekukhonteni kwetfu Jehova. Lemitsetfo wayibhala eBhayibhelini kute sifundze kuyo, sicondziswe timiso tayo, siphindze sijabule ngekutsi Jesu usifundzisa lokungetulu kwayo. Lalela loko Jesu lakusho: “Niyati kutsi kwatsiwa: ‘Ungaphingi.’ Kodvwa mine ngitsi kini, wonkhe umuntfu lochubeka abuka lomsikati ate amkhanuke sewuvele uphingile naye enhlitiyweni.” Akusho nje kutsi kufanele sigweme kuphinga kuphela kodvwa kufanele siphindze sisuse imicabango lemibi kanye netifiso letingakalungi.​—Matewu 5:27, 28.

 9. Ngutiphi timo letinsha letabangela kutsi Nkulunkulu akubone kufaneleka kutsi anikete sicondziso lesisha?

⁹ Ngemuva kwekutsi Jesu sekafikile njengaMesiya, Jehova waniketa ticondziso letinyenti futsi wembula imininingwane leminyenti mayelana nenjongo yakhe. Kungani enta njalo? Ngemnyaka wanga-33, baphela budlelwane Jehova bekanabo nesive saka-Israyeli futsi wakhetsa libandla lebuKhristu kutsi libe bantfu bakhe. Ngaleso sikhatsi saphindze saba sisha simo bantfu baNkulunkulu lebebakuso.

10. Kungani libandla lebuKhristu laniketwa imitsetfo lemisha, futsi yayehluke njani kuleyo leyaniketwa ema-Israyeli?

¹⁰ Jehova waniketa ema-Israyeli uMtsetfo waMosi kute awafundzise indlela yekuphila nendlela yekumkhonta. Kusukela ngelikhulu lekucala leminyaka, bantfu baNkulunkulu besebangasasuki esiveni sinye kodvwa bebasuka etiveni letinyenti. Bebakhuliswe ngetindlela letingafani, futsi bebabitwa ngekutsi ngu-Israyeli waNkulunkulu. Bakha libandla lebuKhristu futsi baba ngephansi kwesivumelwano lesisha. Jehova wabaniketa ticondziso letinsha nobe letengetiwe tendlela lebekufanele baphile ngayo futsi bamkhonte ngayo. Ecinisweni “Nkulunkulu akakhetsi, kodvwa etiveni tonkhe wonkhe umuntfu lomesabako nalowenta lokulungile uyemukeleka kuye.” (Imisebenti 10:34, 35) Balandzela “umtsetfo waKhristu” lobewusekelwe etimisweni letibhalwe etinhlitiyweni tabo hhayi ematjeni. Lomtsetfo bewutawucondzisa emaKhristu futsi uwazuzise nomaphi lapho bekatawuhlala khona.​—Galathiya 6:2.

11. Ngutiphi tindlela letimbili lebetitawutsintsa kuphila kwemaKhristu ngenca ‘yemtsetfo waKhristu’?

¹¹ Israyeli waNkulunkulu wazuza kakhulu esicondzisweni Jehova lamniketa sona asebentisa Jesu. Ngaphambi nje kwekutsi ente sivumelwano lesisha, Jesu washo imiyalo lemibili lebalulekile. Wekucala bewumayelana nemsebenti wekushumayela. Wesibili wawumayelana nendlela emaKhristu lebekufanele ente ngayo tintfo nendlela lebekufanele aphatsane ngayo. Leticondziso betiya kuwo onkhe emaKhristu, ngako tiyasebenta nakitsi lamuhla ngisho nobe sinelitsemba lekuyophila phakadze ezulwini nobe emhlabeni.

12. Yini lebeyiyinsha ngemsebenti wekushumayela?

¹² Esikhatsini lesendlulile, bantfu lababuya etiveni letehlukene bekufanele bete ka-Israyeli kute batewukhonta Jehova. (1 Emakhosi 8:41-43) Kodvwa Jesu washo umyalo lesiwutfola kuMatewu 28:19, 20. (Fundza.) Jesu watjela bafundzi bakhe kutsi ‘bahambe’ baye kubo bonkhe bantfu. NgeliPhentekhoste langa-33, Jehova wakhombisa kutsi ufuna tindzaba letimnandzi tishunyayelwe emhlabeni wonkhe. Ngalelo langa, bantfu labacishe babe ngu-120 labebakha lelibandla lelisha, bagcwala umoya longwele futsi bacala kukhuluma tilwimi letehlukehlukene kumaJuda nakubantfu labagucukele enkholweni yebuJuda. (Imisebenti 2:4-11) Ngemuva kwaloko, bantfu lebesekufanele bashunyayelwe bandza bahlanganisa nemaSamariya. Ngemnyaka wanga-36, insimu yabo yaphindze yandza kakhulu kute ihlanganise bantfu beTive labangakasoki. Loko bekusho kutsi emaKhristu besekufanele ashumayele bonkhe bantfu emhlabeni!

13, 14. (a) Ufaka ekhatsi ini “umtsetfo lomusha” lowashiwo nguJesu? (b) Yini lesiyifundzako esibonelweni lesabekwa nguJesu?

¹³ Jesu waphindze washo “umtsetfo lomusha” mayelana nendlela lesingaphatsa ngayo bazalwane nabodzadzewetfu. (Fundza Johane 13:34, 35.) Kufanele sibakhombise onkhe malanga kutsi siyabatsandza, futsi kufanele sitimisele kubafela. Umtsetfo wawungakukhutsati loko.​—Matewu 22:39; 1 Johane 3:16.

¹⁴ Jesu usibonelo lesihamba embili semuntfu lowakhombisa lutsandvo lolute bugovu. Abebatsandza bafundzi bakhe kangangekutsi waze wabafela ngekutitsandzela. Ulindzele kutsi bonkhe balandzeli bakhe bakwente loko. Ngako-ke, kufanele sibubeketelele bulukhuni lesibhekana nabo futsi size sibafele bazalwane nabodzadzewetfu.​—1 Thesalonika 2:8.

15, 16. Ngutiphi timo letinsha lesikuto nyalo, futsi Nkulunkulu usicondzisa njani?

¹⁵ Jesu ubeke “sisebenti lesetsembekile nalesihlakaniphile” kute sinikete balandzeli bakhe “kudla ngesikhatsi lesifanele.” (Matewu 24:45-47) Lokudla kuhlanganisa ticondziso letibalulekile tebantfu baNkulunkulu nangabe timo tishintja. Timo lesibhekene nato tinsha ngamuphi umcondvo?

¹⁶ Siphila “emalangeni ekugcina,” futsi ngekushesha lokukhulu sitawubhekana nekuhlupheka lokungakase kube khona. (2 Thimothi 3:1; Makho 13:19) Sathane nemadimoni akhe bacoshwa ezulwini futsi balahlelwa emhlabeni, ngako babangela kuhlupheka lokukhulu kubantfu. (Sembulo 12:9, 12) Ngetulu kwaloko, silalela umyalo waJesu ngekutsi sishumayele emhlabeni wonkhe, kubantfu labanyenti nangetilwimi letinyenti kwendlula esikhatsini lesendlulile!

17, 18. Yini lokufanele siyente ngeticondziso lesiniketwa tona?

¹⁷ Inhlangano yaNkulunkulu isiniketa emathulusi lamanyenti latasisita emsebentini wekushumayela. Uyawasebentisa yini? Emihlanganweni yelibandla sitfola ticondziso letisitjela indlela lokufanele siwasebentise ngayo lamathulusi. Leticondziso utitsatsa njengaleto letivela kuNkulunkulu yini?

¹⁸ Kute sitfole sibusiso saNkulunkulu, kudzingeka silalele tonkhe ticondziso lasiniketa tona ngelibandla lebuKhristu. Nangabe silalela nyalo, kutawuba melula kulandzela ticondziso ngesikhatsi ‘sekuhlupheka lokukhulu,’ lapho lonkhe live lelibi laSathane libhujiswa. (Matewu 24:21) Ngemuva kwaloko, sitawudzinga ticondziso letinsha lesitawuphila ngato emhlabeni lomusha lonekulunga lotawube ukhululwe ngalokuphelele emandleni aSathane.

19, 20. Ngumiphi imiculu letawuvulwa, futsi loko kutawuba namiphi imiphumela?

¹⁹ Ngesikhatsi saMosi, sive saka-Israyeli besidzinga ticondziso letinsha, ngako Nkulunkulu wasiniketa uMtsetfo. Ngekuhamba kwesikhatsi libandla lebuKhristu kwadzingeka lilandzele “umtsetfo waKhristu.” Ngendlela lefanako, liBhayibheli lisitjela kutsi eveni lelisha sitawutfola imiculu leneticondziso letinsha. (Fundza Sembulo 20:12.) Kungenteka lemiculu itawube ichaza loko Jehova latawube akufuna kubantfu ngaleso sikhatsi. Ngekudadisha leyo miculu, bonkhe bantfu kuhlanganise nalabo labatawube bavusiwe batawati kutsi Nkulunkulu ufunani kubo. Lemiculu itasisita kutsi sifundze lokunyenti mayelana nendlela Jehova lacabanga ngayo. Sitawuphindze silicondze kancono liBhayibheli, ngako ePharadisi sitawube sitsandzana, sihloniphana futsi sicotfo kulomunye nalomunye. (Isaya 26:9) Cabanga nje kutsi tinyenti kangakanani tintfo lesitatifundza futsi sitifundzise labanye nasesicondziswa yiNkhosi, Jesu Khristu!

²⁰ Nasilandzela ticondziso letitawube tibhalwe “kulemiculu” futsi sihlale setsembekile kuJehova nakufika kuvivinywa kwekugcina, Jehova utawubese ubhala emagama etfu ‘emculwini wekuphila.’ Sitawubese sitfola kuphila lokuphakadze! Ngako-ke kudzingeka SIME kute sifundze loko liBhayibheli lelikushoko, SIBUKE kute sicondze kutsi loko lesikufundzako kusho kutsini kitsi futsi SILALELE ngekwenta loko ticondziso taNkulunkulu letikushoko nyalo. Nasenta njalo, sitawusindza ekuhluphekeni lokukhulu futsi sijabulele kufundza kuze kube phakadze ngaNkulunkulu lohlakaniphile nalonelutsandvo, Jehova.​—Umshumayeli 3:11; Roma 11:33.