Lendzaba lengakavami itfolakala emaVangelini lamane lasemiBhalweni YemaKhristu YesiGriki, leyatiwa kakhulu ngekutsi Lithestamende Lelisha. Kwenteka mbamba yini loko lokukhulunywa ngako? Lona ngumbuto lobalulekile. Ngako, nangabe kungazange kwenteke, kukholwa kwemaKhristu kulite futsi nelitsemba lawo lekuphila phakadze ePharadisi limane liliphupho nje lelingayuze lifezeke. (1 Khorinte 15:14) Kodvwa nangabe loku kwenteka, bantfu banelikusasa lelihle futsi nawe ungaba yincenye yalo. Tiliciniso yini tindzaba letisemaVangelini nobe timane titinganekwane nje?

Ngalokungafani nebantfu lababhala tinganekwane, emaVangeli anemininigwane lehlolisisiwe nalecondzile. Sibonelo saloko kutsi agcwele emagama etindzawo letikhona mbamba, bantfu labangavakasha kuto lamuhla. EmaVangeli akhuluma ngebantfu mbamba, futsi netati temlandvo tiyakufakazela loko.​—Lukha 3:1, 2, 23.

Babhali bangelikhulu lekucala nelesibili bakhuluma ngaJesu.a Indlela Jesu labulawa ngayo njengoba ichazwe emaVangelini, ivumelana nendlela emaRoma angaleso sikhatsi labekabulala ngayo bantfu. Ngetulu kwaloko, atichazwa ngendlela lecacile nalevakalako tintfo letenteka, aze akhulume nangemaphutsa lentiwa baphostoli baJesu. (Matewu 26:56; Lukha 22:24-26; Johane 18:10, 11) Konkhe loku kuveta kahle kutsi babhali bemaVangeli babhala liciniso ngaJesu.

Nanobe kwatiwa kutsi Jesu waphila wase uyafa, labanye abakholwa kutsi wavuswa. Ngisho nebaphostoli bakhe abazange bakholwe nabeva kwekucala kutsi uvusiwe ekufeni. (Lukha 24:11) Kungabata kwabo kwaphela ngesikhatsi labaphostoli kanye nalabanye bafundzi babona Jesu lovusiwe etindzaweni letehlukene. Ecinisweni, ngalesinye sikhatsi kwaba nabofakazi labangetulu kwa-500.​—1 Khorinte 15:6.

Nanobe bekungenteka baboshwe futsi babulawe, bafundzi baJesu bamemetela ngesibindzi kutsi uvusiwe, bamemetela nakulabo labambulala. (Imisebenti 4:1-3, 10, 19, 20; 5:27-32) Bekungenteka yini kutsi bafundzi labanyenti babe nesibindzi sekwenta loko babe bangaciniseki kutsi Jesu uvuswe mbamba? Liciniso lekutsi Jesu wavuswa ngilo lelenta kutsi buKhristu bube nemandla emhlabeni lamuhla kanye nasesikhatsini lesendlulile.

Tindzaba letisemaVangelini letimayelana nekufa kwaJesu nekuvuswa kwakhe tiniketa bufakazi balokwenteka kadzeni. Kuwafundzisisa kutakwenta ubone kutsi letintfo tenteka mbamba. Kukholwa kwakho kutawucina kakhulu nawucondza kutsi tentekelani letintfo. Sihloko lesilandzelako sitawuchaza.

Bongaphendvula utsini nawubutwa kutsi, “Uyafuna yini kuphila phakadze?” Bantfu labanyenti bangaphendvula ngekutsi bayafisa, kepha bacabanga kutsi leyo akusiyo intfo letawenteka mbamba. Batsi kufa kuyintfo levamile futsi kuyincenye yekuphila.

Ase sitsi lombuto uyashintja, sewutsi, “Sowukulungele yini kufa?” Ngalokuvamile bantfu labanyenti bangaphendvula batsi chake. Kusitjelani loko? Ngisho noma sihlangabetana nebumatima, siyafisa kuchubeka siphila. LiBhayibheli litsi Nkulunkulu wadala bantfu baba nesifiso sekuchubeka baphila. Ecinisweni litsi “wabeka liphakadze etinhlitiyweni” tabo.​—Umshumayeli 3:11.

Liciniso lesingeke siliphike likutsi bantfu abaphili kuze kube phakadze. Konakalaphi? Ngetulu kwaloko, kukhona yini Nkulunkulu lakwentile kute alungise lesimo? Timphendvulo letivela eBhayibhelini tiyasidvudvuta futsi tisenta sibone kutsi yini leyabangela kutsi Jesu ahlupheke aphindze afe.

Tehluko letintsatfu tekucala taGenesisi tisitjela kutsi Nkulunkulu wetsembisa umndeni wekucala bo-Adamu na-Eva kuphila lokuphakadze, futsi wabatjela loko lebekufanele bakwente kute bakutfole. Letehluko tichubeka tichaza indlela labehluleka ngayo kulalela Nkulunkulu futsi balahlekelwa litsemba lekuphila phakadze. Lendzaba ibekwe ngendlela lelula, kangangekutsi labanye bantfu basheshe babone kutsi ayisiyo inganekwane. NjengemaVangeli, incwadzi yaGenesisi ikwenta kucace kutsi lendzaba iliciniso futsi ingumlandvo lesingawetsemba.a

Ube yini umphumela wekungalaleli kwa-Adamu? LiBhayibheli liphendvula litsi: “Ngako-ke ngemuntfu munye [Adamu] sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.” (Roma 5:12) Adamu wona ngesikhatsi angalaleli Nkulunkulu. Ngaleyondlela walahlekelwa litsemba lekuphila phakadze futsi wagcine afile. Njengoba siyintalelwane ya-Adamu, sonkhe sinesono. Loko kubangela kutsi sigule, siguge futsi sife. Lenchazelo lesiniketwa yona yembhangela yekufa ivumelana naloko lokutfolwe bososayensi ngendlela batali labandlulisela ngayo lufuto kubantfwana babo. Kukhona yini Nkulunkulu lakwentile kute alungise lesimo?

Nkulunkulu watsatsa sinyatselo kute aphindze abuyisele loko lokwalahlwa ngu-Adamu, lokulitsemba lekuphila phakadze. Wakwenta njani loko?

Roma 6:23 utsi, “umvuzo wesono kufa.” Loko kusho kutsi kufa kungumphumela wesono. Lokwabangela Adamu afe kutsi wona. Ngendlela lefanako, sonkhe siyona futsi umvuzo wesono kufa. Satalwa sinesona futsi loko akusilo liphutsa letfu. Nkulunkulu lonelutsandvo watfumela iNdvodzana yakhe Jesu kuze itfwale imiphumela yetono tetfu. Kwenteka njani loko?

Ngekungalaleli kwemuntfu munye lote sono longu-Adamu, sabese sitfola sono nekufa, ngako-ke bekudzingeka umuntfu munye lote sono kute sikhululwe esonweni nasekufeni. LiBhayibheli loko likuchaza litsi: “Njengobe ngekungalaleli kwemuntfu munye, bantfu labanyenti baba toni, ngendlela lefanako, ngekulalela kwemuntfu munye, bantfu labanyenti kutawutsiwa balungile.” (Roma 5:19) NguJesu ‘lomuntfu munye’ lokukhulunywa ngaye. Washiya lizulu, weta emhlabeni waba ngumuntfu lote sonob, futsi wasifela. Ngenca yaloko, sesingakhona kuba nebuhlobo lobuhle naNkulunkulu siphindze sibe nelitsemba lekuphila phakadze.

Bekubaluleke ngani kutsi Jesu afe kuze sikhululeke esonweni nasekufeni? Nkulunkulu Somandla bekangeke yini akhone kushaya umtsetfo kutsi intalo ya-Adamu ivunyelwe kutsi iphile phakadze? Asingabati kutsi unalo ligunya lekwenta loko. Kodvwa loko bekutawuphambana nemtsetfo wakhe lotsi umvuzo wesono kufa. Loyo mtsetfo awusiwo lula kutsi ungamane uyekelwe noma ushintjwe kuze uvumelane netimo. Loku kubalulekile kute kwentiwe tintfo ngekulunga.​—Tihlabelelo 37:28.

Kube Nkulunkulu akazange awunake umtsetfo wakhe kulendzaba, bantfu bebangatibuta kutsi utawenta lokufanako yini nakuvela letinye timo. Nasi sibonelo: Bekatabe wenta kahle yini kukhetsa kutsi bobani kulentalo ya-Adamu lobekufanele batfole kuphila lokuphakadze? Besingametsemba yini kutsi uyatigcina tetsembiso takhe? Kunamatsela kwaNkulunkulu ekusebentiseni umtsetfo wakhe kute asisindzise kubufakazi bekutsi utawuhlala enta lokulungile sonkhe sikhatsi.

Ngekufa kwaJesu lokuyinhlawulo Nkulunkulu wasivulela indlela yekuphila phakadze emahlabeni loliPharadisi. Naka emavi lashiwo nguJesu lakuJohane 3:16 latsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” Kufa kwaJesu akuveti nje kuphela bufakazi bekulunga kwaNkulunkulu, kodvwa lokubaluleke kakhulu kutsi kuphindze kuvete lutsandvo lanalo ngebantfu.

Yini leyenta Jesu wahlupheka waphindze wafa ngendlela lebuhlungu lechazwe kulamaVangeli? Kwetsembeka kwaJesu ngisho noma ahlushwa kamatima, kwenta kwacaca kutsi tinsolo taDeveli tekutsi bantfu angeke bahlale betsembekile kuNkulunkulu nabahlushwa atisilo liciniso. (Jobe 2:4, 5) Letinsolo betingabonakala ngatsi tiliciniso ngesikhatsi Sathane aphumelela ekulingeni Adamu lobekete sono kutsi one. Kodvwa Jesu lobekete sono njenga-Adamu wetsembeka ngisho noma ahlushwa kamatima. (1 Khorinte 15:45) Jesu wafakazela kutsi na-Adamu bekangahlala etsembekile kuNkulunkulu kube wakhetsa kwenta njalo. Ngekuhlala etsembekile ngisho alingwa, Jesu wasishiyela sibonelo lesingasilingisa. (1 Phetro 2:21) Nkulunkulu wayivuza iNdvodzana yakhe lete sono ngekuyiniketa kuphila lokute konakala ezulwini.

Jesu wafa mbamba. Kufa kwakhe kusivulela litfuba lekuphila lokuphakadze. Uyafisa yini kuphila phakadze? Jesu wachaza kutsi yini lokudzingeka siyente nakatsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.”​—Johane 17:3.

Bashicileli balomagazini bayakumema kutsi ufundze kabanti ngaJehova longuNkulunkulu weliciniso, nangeNdvodzana yakhe lenguJesu Khristu. BoFakazi BaJehova endzaweni yangakini bangatsandza kukusita. Ungaphindze utfole kwatiswa lokulusito ngekuvakashela i-website yetfu letsi-www.jw.org/ss.