Uyakwatisa Yini Kuphila, NjengaNkulunkulu?

1, 2. Ngusiphi sipho lesivela kuNkulunkulu lesiligugu kakhulu lamuhla, futsi kungani?

BABE wetfu losezulwini usiphe intfo leligugu kakhulu, lesingeke siyifananise nalutfo​—sipho sekuphila sibantfu labahlakaniphile lababonakalisa timfanelo takhe. (Genesisi 1:27) Siyambonga ngalesipho lesihle kangaka, sekukwati kucondza timiso teliBhayibheli. Ngekutisebentisa, singakwati kukhula, sibe bantfu labavutsiwe, labatsandza Jehova, futsi “lasebanemicondvo lehlutekile, leseyikwati kwehlukanisa lokuhle nalokubi.”​—Hebheru 5:14.

² Likhono letfu lekucondza timiso teliBhayibheli libaluleke kakhulu lamuhla, ngobe lelive selibi kangangekutsi akusiyo yonkhe imitsetfo lengasebentiseka kuto tonkhe timo letingavela. Isayensi yetekwelapha ikubonisa kahle loku, ikakhulukati endzabeni yekusebentisa ingati kanye nemikhicito yayo. Lena yindzaba lebaluleke kakhulu kulabo labafuna kulalela Jehova. Nobe kunjalo, nangabe sisati simiso seliBhayibheli lesicondzile kuleyo ndzaba, kufanele sikwati kwenta tincumo letihlakaniphile, letingakwati kusenta sibe nanembeza lomuhle futsi sitigcine elutsandvweni lwaNkulunkulu. (Taga 2:6-11) Asewucabange nganati timiso letilandzelako.

3, 4. Kunini lapho imiBhalo ikhuluma ngebungcwele bengati kwekucala, futsi loko kusekelwe kusiphi simiso?

³ Jehova waveta kuhlobana emkhatsini wekuphila kanye nengati, nebungcwele bako, ngemuva nje kwekutsi Khayini abulele umnakabo Abela. Nkulunkulu watsi kuKhayini: “Wenteni? Livi lengati yemnakenu liyakhala kimi, lisemhlabatsini.” (Genesisi 4:10) KuJehova, ingati ya-Abela beyimelela kuphila kwakhe, lokwacedvwa ngesibhuku. Ngako-ke, kungashiwo kutsi ingati ya-Abela yakhala kuNkulunkulu ifuna kuphindziselelwa.​—Hebheru 12:24.

⁴ Ngemuva kwaZamcolo wesikhatsi saNowa, Nkulunkulu wanika bantfu imvume yekudla inyama yetilwane, kepha hhayi ingati. Nkulunkulu wabatjela watsi: “Intfo nje, ningayidli inyama lesenengati; Umuntfu lobulala lomunye umuntfu uyawujeziswa.” (Genesisi 9:4, 5) Lomyalo wawutawusebenta esitukulwaneni saNowa kute kube sesikhatsini setfu. Kwacinisekisa lokwakushiwo nguNkulunkulu kuKhayini esikhatsini lesengcile, kutsi umphefumulo nobe kuphila kwato tonkhe tidalwa kusengatini. Lomyalo waphindze waveta kutsi Jehova, longuMtfombo wekuphila, utawujezisa bonkhe labangakuhloniphi kuphila nengati.​—Tihlabelelo 36:9.

5, 6. UMtsetfo waMosi wabonisa njani kutsi ingati ingcwele futsi iligugu? (Fundza libhokisi “Hlonipha Kuphila Kwetilwane.”)

⁵ Lamaciniso lamabili labalulekile aphindze abonakala naseMtsetfweni waMosi. Incwadzi yaLevithikhusi 17:10, 11 ifundzeka kanje: “Wonkhe umIsrayeli . . . Lodla ingati, ngiyawumelana naye ngimncume esiveni sakubo. Phela kuphila kwemtimba kusengatini; mine ngininike ingati kutsi ifeze inkonzo yekuhlenga timphilo tenu etikwelilati.”a​—Fundza libhokisi lelitsi “Emandla Engati Ekuhlawula.”

⁶ Nangabe ingati yesilwane lesihlatjiwe ingasetjentiswa e-altare, kwakufanele icitselwe phansi. Loko kwakufanana nekutsi kuphila kwakubuyela kuMnikati wako. (Dutheronomi 12:16; Hezekeli 18:4, catsanisa ne-NW.) Phawula kutsi ema-Israyeli kwakungadzingeki aze asebentisa tindlela tebuciko naletimatima kute akhiphe yonkhe ingati enyameni latawuyidla. Yingci nje nangabe silwane lesihlatjiwe siphompiswe kahle, umIsrayeli abengayidla leyo nyama nganembeza lomsulwa, ngobe lokuphompiswa kwesilwane kwakubonisa inhlonipho ngeMniki-weKuphila.

 7. Davide wayibonisa njani inhlonipho ngebungcwele bengati?

⁷ Davide, ‘umuntfu wenhlitiyo yaNkulunkulu,’ waticondza kahle timiso letatisekelwe emtsetfweni waNkulunkulu ngekusebentisa ingati. (Imisebenti 13:22) Ngalelinye lilanga, Davide bekome kakhulu, emadvodza akhe lamatsatfu ehla ngendlela alibangisa enkanjini yetitsa, afika akha emanti emtfonjeni, futsi amletsela wona. Yini layenta Davide? Watsi: “Akube khashane nami kutsi ngiwanatse lamanti. Kimi kungabe kufanana nekunatsa ingati yalamadvodza latilahle ematsambo ngemphilo yawo.” KuDavide, kunatsa lamanti kwakufanana nekunatsa ingati yalamadvodza lafake kuphila kwawo engotini ngekuyowakha etitseni. Nobe Davide bekome kakhulu, “wawatfululela phansi embikwaSimakadze.”​—2 Samuweli 23:15-17.

8, 9. Umbono waNkulunkulu ngekuphila nengati washintja yini lapho kumiswa libandla lemaKhristu? Chaza.

⁸ Ngemuva kweminyaka lengu-2 400 Nkulunkulu anikete Nowa umtsetfo lophatselene nengati, nangemuva kweminyaka lengu-1 500 kwentiwe sivumelwane seMtsetfo, Jehova waphefumulela sigungu lesibusako selibandla lemaKhristu ekucala kutsi sibhale sitsi: ‘Umoya longcwele kanye natsi sivumelene ngekutsi singanetfwesi lomunye umtfwalo ngaphandle kwalemiyalo ledzingekile: Ningakudli kudla lokungcoliswe ngekunikelwa etithicweni, ningayidli ingati, ningadli lokucumbelene; nibalekele bugwadla.’​—Imisebenti 15:28, 29.

⁹ Kuyacaca kutsi sigungu lesibusako sekucala besibucondza bungcwele bengati, nekutsi kuyisebentisa kabi kubi kakhulu kangangekutsi kufanana nekukhonta tithico kanye nekwenta bundlundlulu. NemaKhristu eliciniso lamuhla anemcondvo lofananako. Ngetulu kwaloko, ngenca yekutsi bacabanga ngetimiso teliBhayibheli, futsi bayatisebentisa, bayakwati kujabulisa Jehova lapho benta tincumo ngekusebentisa ingati.

10, 11. (a) BoFakazi BaJehova bakubheka njani kumpontjelwa ingati kanye nekusetjentiswa kwetincenye tayo letine? (b) Kukusiphi sici lesiphatselene nengati lapho emaKhristu angase abe nemibono lengafanani khona?

¹⁰ BoFakazi BaJehova bayacaphela kutsi ‘kungayidli ingati’ kusho kungavumi kumpontjelwa ingati kanye nekunikela ngayo nobe kuyigcina kute kumpontjelwe labanye. Ngenca yekutsi bayawuhlonipha umtsetfo waNkulunkulu, abatemukeli tincenye tayo letine: Tinhlayiya letibovu, tinhlayiya letimhlophe, ema-platelets, kanye ne-plasma.

¹¹ Esikhatsini salamuhla, letincenye tiyehlukaniswa tibe tincenyana letisetjentiselwa imisebenti leminyenti leyehlukehlukene. UmKhristu angatemukela yini letincenyana? Kufanele atibheke ‘njengengati’ yini? Ngamunye wetfu kufanele atentele yena sincumo kulendzaba. Simiso lesifananako siyasebenta nakuloluhlobo lwekwelapha lolunjenge-hemodialysis ne-hemodilution, kanye ne-cell salvage, lapho ingati yemuntfu ikhishwa emtimbeni wakhe, kepha ingagcinwa.​—Fundza Sandzisanchazo lesinesihloko lesitsi: “Tincenyana Tengati Kanye Netindlela Tekuhlindza.”

12. Kufanele sitibheke futsi sitisingatse njani tindzaba letitsintsa nembeza?

¹² Nangabe indzaba ishiyelwa kumuntfu ngamunye kutsi atincumele, loko kusho kutsi leyo ndzaba ayikabaluleki yini kuJehova? Cha! Ngobe ufuna kwati kutsi sicabangani kanye nekutsi tisusa tetfu tinjani. (Fundza Taga 17:3; 24:12.) Ngako-ke, ngemuva kwekutsi sesicele Jehova ngemthandazo kutsi asinikete sicondzise sakhe, saphindze sacwaninga ngaloluhlobo lwekwelapha, kufanele sisebentise nembeza wetfu loceceshwe liBhayibheli. (Roma 14:2, 22, 23) Kute umuntfu lokufanele asincumele kutsi senteni, futsi natsi akukafaneli sifune imibono yalabanye etindzabeni letidzinga nembeza, njengekutsi sitsi: “Kube bekunguwe lobewusesimeni lesinjena, yini lobewungayenta?” Endzabeni lefanana nalena, umKhristu ngamunye kufanele ‘atetfwalele umtfwalo wakhe.’b​—Galathiya 6:5; Roma 14:12; fundza libhokisi lelitsi “Ngiyibheka Njengalengcwele Yini Ingati?”

13. Imitsetfo kanye netimiso taJehova tivetani ngaye? Fananisa.

¹³ Imitsetfo kanye netimiso letitfolakala eBhayibhelini tiveta kutsi Jehova unguMniki wemtsetfo lonelutsandvo, futsi unguBabe lonelutsandvo, lokhatsateka ngenhlalakahle yebantfwana bakhe. (Tihlabelelo 19:7-11) Ngisho nobe lomyalo lotsi ‘ningayidli ingati’ wawungakabekwa njengemyalo wetemphilo, kepha uyasivikela etifeni letihlobene nekumpontjelwa ingati. (Imisebenti 15:20) Ngetulu kwaloko, linyenti labodokotela litsi kuhlindvwa ngephandle kwekusetjentiswa kwengati ngiko “lokuncono kakhulu” etinhlelweni tekwelapha kwalamuhla. KumaKhristu eliciniso, lentfutfuko imane iwacinisekise ngekuhlakanipha kwaJehova lokungeke kulinganiswe, nangelutsandvo lwakhe lolunjengelwababe.—Fundza Isaya 55:9; Johane 14:21, 23.

14, 15. (a) Lutsandvo lwaNkulunkulu ngebantfu bakhe lwalubonakala kumiphi imitsetfo? (b) Ungatisebentisa njani timiso lekwakusekelwe kuto lemitsetfo yekuphepha?

¹⁴ Kukhatsateka kwaNkulunkulu ngenhlalakahle yebantfu bakhe, ema-Israyeli asendvulo, kwakubonakala emitsetfweni yakhe leminyenti. Sibonelo saloko kutsi abefuna tindlu tema-Israyeli tibe nelutsango lolutungeleta luphahla kute agweme tingoti, ngobe tintfo letinyenti tatentelwa eluphahleni. (Dutheronomi 22:8; 1Samuweli 9:25, 26; Nehemiya 8:16; Imisebenti 10:9) Nkulunkulu waphindze wawayala kutsi agadze tinkhomo letiyingoti. (Eksodusi 21:28, 29) Kungayinaki lemiyalo kwakungakhombisa kutsi umuntfu akanandzaba nenhlalakahle yalabanye, futsi loko kwakungase kuholele ecaleni lengati.

¹⁵ Ungatisebentisa njani timiso lekwakusekelwe kuto lemitsetfo? Cabanga nganaku lokulandzelako: Imoto yakho ikusiphi simo, injani indlela loshayela ngayo, tinjani tilwane lotifuyile, injani indzawo losebentela kuyo neluhlobo lwekutijabulisa lolukhetsako? Kulamanye emave, tingoti tiyimbangela lenkhulu yekufa kwebantfu labasha, imvamisa letibangelwa kunganaki. Kepha labasha labafuna kutigcina elutsandvweni lwaNkulunkulu, bayakwatisa kuphila, futsi abatijabulisi ngemidlalo leyingoti. Abacabangi ngendlela lebulima yekutsi bantfu labasha bona abalimali. Kunaloko, bajabulela busha babo ngekutsi bagweme tingoti letingakadzingeki.​—Umshumayeli 11:9, 10.

16. Ngusiphi simiso seliBhayibheli lesisebentako endzabeni yekukhipha sisu? (Fundza umbhalo longentasi.)

¹⁶ Ngisho nekuphila kwemntfwana longakatalwa kuligugu emehlweni aNkulunkulu. Ngesikhatsi sema-Israyeli asendvulo, nangabe umuntfu lotsite alimete umfati lotetfwele, bese kufa yena nobe umbungu lawetfwele, Nkulunkulu abetsatsa lomuntfu lonelicala njengembulali, futsi kwakufanele “kunanwe kuphila ngekuphila.”c (Fundza Eksodusi 21:22, 23.) Asewucabange-ke kutsi Jehova utiva njani nangabe incumbi yebantfu, ngemabomu ikhipha tisu umnyaka ngamunye, futsi linyenti lalabantfu litikhipha ngobe lifuna kuba nenkhululeko, nangenca yekutsi selite similo.

17. Ungamdvudvuta njani umuntfu lowakhipha sisu ngembikwekutsi afundze ngetimiso taNkulunkulu?

¹⁷ Kepha kutsiwani ngemuntfu lowakhipha sisu ngembikwekutsi afundze emaciniso eliBhayibheli? Loko kusho kutsi Nkulunkulu angeke yini ambonise umusa? Cha! Umuntfu lophendvuka ngebucotfo angetsembela entsetselelweni yaJehova lesekelwe engatini yaJesu leyacitseka. (Tihlabelelo 103:8-14; Efesu 1:7) Phela naKhristu ngekwakhe watsi: “Angiketeli kubita labalungile, kodvwa ngitele kubita toni kutsi tiphendvuke.”​—Lukha 5:32.

18. LiBhayibheli litsi iyini imbangela lenkhulu yekucitfwa lokunyenti kwengati?

¹⁸ Ngetulu kwekutsi singabalimati labanye, Jehova ufuna sikhiphe imbangela yekucitfwa kwengati etinhlitiyweni tetfu​—inzondo. Umphostoli Johane wabhala watsi: “Umuntfu lotondza umzalwane ungumbulali.” (1 Johane 3:15) Umuntfu lonjalo akusiko kutsi umane akamtsandzi nje umnakabo, kepha umfisela nekufa. Inzondo lenjalo ingase ibonakale ngekumnyundzela nobe ngekumcalela emanga langenta kutsi atfole sehlulelo saNkulunkulu. (Levithikhusi 19:16; Dutheronomi 19:18-21; Matewu 5:22) Uyabona-ke kutsi kubaluleke kangakanani kutsi sikhiphe etinhlitiyweni tetfu nobe ngabe nguyiphi inzondo lengase yakheke khona?​—Jakobe 1:14, 15; 4:1-3.

19. Umuntfu lophila ngetimiso teliBhayibheli uwubheka njani umbhalo weTihlabelelo 11:5, kanye naFiliphi 4:8, 9?

¹⁹ Labo labatisa kuphila njengaJehova, futsi labafuna kuhlala elutsandvweni lwakhe, bagwema tonkhe tinhlobo tebudlova. Tihlabelelo 11:5 titsi: ‘Simakadze uyamtondza lomubi nalotsandza budlova.’ Lelo vesi alisitjeli nje kuphela ngebuntfu baNkulunkulu, lisimiso lokufanele siphile ngaso. Lenta labo labatsandza Nkulunkulu bagweme nobe ngabe ngutiphi tinhlobo tekutijabulisa letikhutsata budlova. Ngalokufananako-ke, lamavi latsi Jehova ‘unguNkulunkulu wekuthula,’ enta tinceku takhe tigcwalise tingcondvo netinhlitiyo tato ngetintfo letitsandzekako, letinhle naletibongekako, letenta kube nekuthula..​—Fundza Filiphi 4:8, 9.

20-22. Ngutiphi tintfo emaKhristu latigwemako ngalokuphatselene nalelive, futsi kungani?

²⁰ Lonkhe live laSathane linelicala lengati emehlweni aNkulunkulu. Tembusave talo letivetwe emiBhalweni njengetilo letinelulaka, tiye tabulala tigidzi tebantfu letingeke tibalwe, lokufaka ekhatsi netinceku taJehova. (Danyela 8:3, 4, 20-22; Sembulo 13:1, 2, 7, 8) Babambisene nalemibuso lefanana nesilo, bosomabhizinisi nabososayensi baye bakha tikhali letimbi nobe letiyingoti kakhulu futsi batfola inzuzo lenkhulu ngaloku. Uyabona yini kutsi vele “umhlaba wonkhe ungephansi kwemandla aLomubi”?​—1 Johane 5:19.

²¹ Ngenca yekutsi balandzeli baJesu ‘abasibo balelive,’ futsi abahlanganyeli kutembangalive nasetimphini, bagwema kuba nelicala lengati, bona ngekwabo kanye nemmango labaphila kuwo.d (Johane 15:19; 17:16) Njengobe balingisa Khristu, abavuki indlwabane lapho labanye babashushisa. Kunaloko bayatitsandza titsa tabo, futsi baze batithandazele.​—Matewu 5:44; Roma 12:17-21.

²² Ngetulu kwako konkhe, emaKhristu eliciniso agwema kutihlanganisa ‘neBhabhulona Lenkhulu,’ lokungumbuso welive wenkholo yemanga, futsi lonelicala lengati kunayo yonkhe leminye imibuso. LiVi laNkulunkulu litsi: ‘Kwatfolakala kuyo ingati yebaphrofethi, neyalabangcwele, neyabo bonkhe lababulawa emhlabeni.’ Ngako-ke siyacwayiswa: “Sive sami, phumani kuyo.”​—Sembulo 17:6; 18:2, 4, 24.

23. Kuhlanganisani kuphuma eBhabhulona Lenkhulu?

²³ Kushiya iBhabhulona Lenkhulu kuhlanganisa lokungetulu kwekumane usule ligama lakho eluhlwini lwemalunga ayo. Kuhlanganisa kwenyanya imikhuba lemibi lekhutsatwa yinkholo yemanga—imikhuba lenjengekutiphatsa lokubi, kungenela tembangalive, kanye nekutsandza ingcebo. (Fundza Tihlabelelo 97:10; Sembulo 18:7, 9, 11-17) Awuvumi yini kutsi lemikhuba ibangela kucitfwa kwengati?

24, 25. Kungasiphi sisekelo Nkulunkulu langabonisa ngaso umusa kumuntfu lonelicala lengati lophendvukako, futsi kufananiswa nani leyayikhona etikhatsini tekubhalwa kweliBhayibheli?

²⁴ Ngembikwekutsi sibe ngemaKhristu eliciniso, kungenteka ngandlelatsite sasisekela lelive laSathane, futsi ngaloko saba nelicala lengati. Kepha-ke ngenca yekutsi siye sashintja indlela lesasiphila ngayo, sakha lukholo emhlatjelweni waKhristu wesihlengo, futsi sanikela kuphila kwetfu kuNkulunkulu, ngaloko siye satfola umusa wakhe futsi savikeleka etintfweni letingalimata buhlobo betfu naye. (Imisebenti 3:19) Leso sivikelo sifanana nemadolobha ekukhosela labekhona ngesikhatsi sekubhalwa kweliBhayibheli.​—Numeri 35:11-15; Dutheronomi 21:1-9.

²⁵ Lwalusebenta njani loluhlelo? Nangabe umIsrayeli abulele umuntfu ngeliphutsa, kwakufanele abalekele kulinye lalamadolobha ekukhosela. Lapho behluleli labafanelekako sebasentile sijubo ngalendzaba, lomuntfu lobulele ngeliphutsa kwakufanele ahlale kulelidolobha lekukhosela kuze kufe umphristi lomkhulu. Ngemuva kwaloko abekhululekile kutsi angahlala nobe ngukuphi. Uyabona-ke kutsi ungakanani umusa waNkulunkulu, nekutsi ukutsatsa njengalokubaluleke kangakanani kuphila! Lamuhla, umhlatjelo waKhristu wesihlengo ufanana nalawo madolobha ekukhosela labekhona kadzeni. Uyasivikela ekufeni ngenca yekwephula umyalo waNkulunkulu wekuphila nengati singakahlosi. Uyasatisa yini wena leso sipho? Ungakubonisa njani loko? Lenye indlela kumema labanye kutsi nabo babe nawe kulelidolobha lekukhosela lelingumfanekiso, ikakhulukati ngenca ‘yekuhlupheka lokukhulu lokutako.’—Matewu 24:21; 2 Khorinte 6:1, 2.

26-28. Simo setfu lamuhla sifanana njani naleso semphrofethi Hezekeli, futsi singatigcina njani elutsandvweni lwaNkulunkulu?

²⁶ Simo sebantfu baNkulunkulu lamuhla sisikhumbuta umphrofethi wakadzeni Hezekeli, lowatfunywa nguJehova kutsi abe ngumlindzi lomemetela tecwayiso takhe kuma-Israyeli. Nkulunkulu watsi kuye: “Vani livi lengilikhuluma kuwe, ubanike secwayiso lesiphuma kimi.” Kube Hezekeli abengahlala angakunaki lokutfunywa kwakhe, abeyawuba nelicala lengati ngenca yalabo lababulawa lapho liJerusalema libhujiswa. (Hezekeli 33:7-9) Kepha Hezekeli walalela, ngako-ke akazange abe nelicala lengati.

²⁷ Lamuhla sisekupheleni kwalelive laSathane. Ngako-ke boFakazi BaJehova bakutsatsa njengesibopho nelilungelo kumemetela ‘lilanga lemphindziselo’ yaNkulunkulu, kanye nekushumayela ngeMbuso wakhe. (Isaya 61:2; Matewu 24:14) Uyahlanganyela yini ngalokugcwele kulomsebenti lobaluleke kangaka? Umphostoli Pawula wawutsatsa njengalobalulekile lomsebenti. Kungako atsi: “Anginacala lengati yenu nonkhe. Ngobe angizange nginifihlele lutfo lwentsandvo yaNkulunkulu.” (Imisebenti 20:26, 27) Uyabona yini kutsi natsi kufanele silandzele leso sibonelo?

²⁸ Kuliciniso kutsi kute sitigcine elutsandvweni lwaJehova lolunjengelwababe, kufanele sente lokungetulu kwekutsatsa kuphila kanye nengati njengalokubalulekile, silingisa Jehova. Kufanele futsi sihlale sihlantekile nobe singcwele emehlweni akhe, njengobe sitawubona esehlukweni lesilandzelako.