Tikhombo Tencwajana Yekubhalela Emihlanganweni

NOVEMBER 5-11, 2013

UMCEBO LOSEVINI LANKULUNKULU | JOHANE 20–21

“Uyangitsandza Yini Kwendlula Leti?”

(Johane 21:1-3) Ngemuva kwaloko, Jesu waphindze wativeta kubafundzi bakhe ngaselwandle lwaseThibheriyase. Ngulena indlela lativeta ngayo: ² BoSimoni Phetro, Tomase labebitwa ngekutsi Liphahla, Nathanayeli waseKhana yaseGalile, emadvodzana aZebedi, kanye nalabanye bafundzi lababili, bebandzawonye. ³ Simoni Phetro watsi kubo: “Ngisayodweba.” Bona batsi: “Natsi sitawuhamba nawe.” Ngako bahamba bagibela sikebhe, kodvwa kubo bonkhe lobo busuku abazange babambe lutfo.

(Johane 21:4-14) Kwatsi nasekusa, Jesu wema elugwini, kodvwa labafundzi abazange babone kutsi kwakunguye. ⁵ Ngako Jesu watsi kubo: “Bantfwana labatsandzekako, ninako yini lokudliwako?” Bona batsi: “Cha!” ⁶ Yena watsi kubo: “Jikani lelinethi ngesekudla salesikebhe, futsi tikhona lenitatibamba.” Ngako balijika, kodvwa abazange basakhona kulidvonsa ngobe beseligcwele tinhlanti letinyenti. ⁷ Lomfundzi Jesu labemtsandza watsi kuPhetro: “YiNkhosi!” Simoni Phetro nakeva kutsi yiNkhosi, wembatsa ingubo yakhe yangetulu ngobe abecimbile, watijika elwandle. ⁸ Lalabanye bafundzi beta ngalesikebhe lesincane badvonsa lelinethi lebeligcwele tinhlanti, ngobe besebatawufika elugwini, sekusele tinyatselo letingaba ngemakhulu lamatsatfu kuphela.⁹ Nabefika elugwini, babona emalahle lavutsako, futsi kwakubekwe tinhlanti nesinkhwa etikwawo. ¹⁰ Jesu watsi kubo: “Letsani letinye taletinhlanti lenitibambile.” ¹¹ Ngako Simoni Phetro wagibela esikebheni wadvonsela lelinethi elugwini, futsi laligcwele tinhlanti letinkhulu letilikhulu nemashumi lasihlanu nakutsatfu. Nanobe lelinethi beligcwele, alizange lidzabuke. ¹² Jesu watsi: “Kotani nitewukudla.” Kute ngisho namunye kulabafundzi lowaba nesibindzi sekumbuta atsi: “Ungubani?” Ngobe bebati kutsi yiNkhosi. ¹³ Jesu watsatsa lesinkhwa wabanika, wenta kanjalo nangaletinhlanti. ¹⁴ Besekukwesitsatfu Jesu ativeta kubafundzi bakhe ngemuva kwekuvuswa kwakhe ekufeni.

(Johane 21:15-19) Batsi nasebacedzile kudla, Jesu watsi kuSimoni Phetro: “Simoni ndvodzana yaJohane, uyangitsandza yini kwendlula leti?” Yena watsi: “Yebo Nkhosi, uyati kutsi ngiyakutsandza.” Jesu watsi kuye: “Yondla emawundlu ami.” ¹⁶ Wakhuluma naye kwesibili watsi: “Simoni ndvodzana yaJohane, uyangitsandza yini?” Yena watsi: “Yebo Nkhosi, uyati kutsi ngiyakutsandza.” Jesu watsi kuye: “Yelusa emawundlu ami.” ¹⁷ Waphindze washo kwesitsatfu watsi: “Simoni ndvodzana yaJohane, uyangitsandza yini?” Phetro wadzabuka ngobe abesambute kwesitsatfu kutsi: “Uyangitsandza yini?” Ngako watsi: “Nkhosi, wena wati tonkhe tintfo; uyati kutsi ngiyakutsandza.” Jesu watsi kuye: “Yondla emawundlu ami. ¹⁸ Ngicinisile, ngicinisile ngitsi kini: Ngesikhatsi usemusha, wawutigcokisa uphindze uye lapho ufuna kuya khona. Kodvwa utawutsi nasewukhulile welule tandla takho, lomunye umuntfu akugcokise, akuyise nalapho ungatsandzi khona.” ¹⁹ Lamavi wawasho kuze avete indlela Phetro labetawukufa ngayo, nekutsi loku bekutawukhatimulisa Nkulunkulu. Nasakushito loko, watsi kuye: “Chubeka ungilandzela.”

Liphuzu lelicwaningiwe laJoh 21:15, 17 leliku-nwtsty

Jesu watsi kuSimoni Phetro: Lencociswano leyaba khona emkhatsini waJesu naPhetro yenteka ngemuva nje kwekutsi Phetro aphike Jesu katsatfu. Jesu wabuta Phetro imibuto lemitsatfu yekuhlola kutsi bekativa njani ngaye waze “Phetro wadzabuka.” (Joh 21:17) Indzaba yaJohane leku-Joh 21:15-17, isebentisa emagama esiGriki lamabili: i-a·ga·paʹo, lokusho lutsandvo, kanye nalelitsi phi·leʹo, lelisho kutsandza. Jesu wabuta Phetro kabili umbuto lotsi, “Uyangitsandza yini?” Timphendvulo taPhetro letimbili taveta kutsi ‘bekamtsandza’ mbamba Jesu. Ekugcineni Jesu wabuta kutsi “Uyangitsandza yini?” Nalapha Phetro wagcizelela kutsi vele uyamtsandza. Ngalesikhatsi Phetro atsi uyamtsandza, Jesu wabona kutsi lutsandvo lanalo belutawenta Phetro ondle futsi ‘eluse’ bafundzi bakhe, lokusho timvu takhe nobe ‘emawundlu akhe’. (Joh 21:16, 17; 1Ph 5:1-3) Jesu wavumela Phetro kutsi avete lutsandvo lanalo ngaye tikhatsi letintsatfu kute amnikete sabelo sekunakekela timvu takhe. Ngekwenta kanjena, Jesu bekacinisekisa Phetro kutsi umcolele kulokumphika kwakhe katsatfu.

uyangitsandza yini kwendlula leti?: Inkhulumo letsi, “kwendlula leti” ingasho tintfo letinyenti. Letinye tati titsi lamavi bekatsi, “uyangitsandza yini kwendlula indlela lotsandza ngayo labanye bafundzi?” noma “uyangitsandza yini kwendlula indlela labafundzi labangitsandza ngayo?” Nobe kunjalo, lombuto lotsi “uyangitsandza kwendlula leti?”, kungenteka bewusho timfishi labatidvwebile nome letinye tintfo nje letihambisana nelibhizinisi lekudvweba. Umcondvo lophelele walelivesi ungasho kutsi ‘uyangitsandza yini kwendlula tintfo lotiphilisa ngato noma kufuna kuba netintfo letinyenti? Nangabe ungitsandza kwendlula loku, yondla timvu tami.’ Nasibuka limuva laPhetro kutsi belinjani, bekufaneleka kutsi abutwe umbuto lonje. Nanobe Phetro bekangulomunye webafundzi baJesu bekucala (Joh 1:35-42), kodvwa akazange amlandzele ngekushesha. Kunaloko, bekahle ayodvweba. Ngemuva kwetinyanga letimbalwa letalandzela, Jesu wacela Phetro kutsi aliyekele libhizinisi lakhe lekudweba timfishi kodvwa abe ‘ngumdwebi webantfu.’ (Mat 4:18-20; Luk 5:1-11) Ngemuva kwekutsi Jesu afe, Phetro waphindze wabuyela ebhizinisini lakhe lekudvweba, futsi nalabanye baphostoli bamlandzela. (Joh 21:2, 3) Kubonakala ngatsi Jesu ulungisa kucabanga kwaPhetro ekutseni ente sincumo lesihlakaniphile: Ingabe Phetro bekatawunikela kuphila kwakhe ekwenteni libhizinisi lekudvweba timfishi, lokumelelwa yincumbi yetimfishi lebetisembikwakhe, noma bekatawanaka umsebenti wekondla timvu taJesu noma balandzeli bakhe ngetintfo letiphatselene naNkulunkulu?—Joh 21:4-8.

kwesitsatfu: Njengobe Phetro aphika Jesu tikhatsi letintsatfu; Jesu wase umnika litfuba lekutsi avete indlela lamtsandza ngayo tikhatsi letintsatfu. Phetro wakwenta loko, ngako Jesu wamtjela kutsi akente imisebenti lengcwele kucala kwendlula yonkhe intfo kute akhombise kutsi uyamtsandza. Akanye nalabanye bazalwane, Phetro bekufanele ondle, acinise, futsi eluse umhlambi waKhristu lowakhiwa balandzeli bakhe labetsembekile. Nanobe labandzeli baKhristu bebagcotjiwe, kodvwa bebasakudzinga kondliwa ngetintfo letiphatselene naNkulunkulu.—Luk 22:32.

Kufunisisa Umcebo EVini LaNkulunkulu

(Johane 20:17) Ngako Jesu watsi: “Yekela kunginkonkoshela, ngobe ngisengakenyukeli kuBabe. Kodvwa hamba uye kubomnaketfu utsi kubo: ‘Sengenyukela kuBabe longuYihlo, nakuNkulunkulu wami longuNkulunkulu wenu.’”

Liphuzu lelicwaningiwe laJoh 20:17 leliku-nwtsty

Yekela kunginkonkoshela: Leligama lesiGriki lelitsi haʹpto·mai lingasho “kutsintsa” nobe “kunkonkoshela”; lokusho “kunamtsela entfweni.” Lamanye emahumusho atsi Jesu watsi: “Ungangitsintsi.” Nobe kunjalo, Jesu bekangali kutsintfwa nguMariya waseMagdala, njengobe angazange abalele besifazane labambona nakasandza kuvuswa kutsi ‘bamtsintsa tinyawo takhe.’ (Mat 28:9) Kubonakala ngatsi Mariya waseMagdala bekasaba kutsi Jesu sewutawenyukela ezulwini. Ngenca yekutsi Mariya bekatsandza kakhulu kuba neNkhosi yakhe, wambamba wamcinisa, kute angahambi. Kute Jesu acinisekise Mariya kutsi bekasengakahambi, wamtjela kutsi akayekele kumnkonkoshela kunaloko wamtfuma kutsi aye kubafundzi bakhe ayobatjela kutsi sewuvusiwe.

(Johane 20:28) Tomase watsi: “Nkhosi, Nkulunkulu wami!”

Liphuzu lelicwaningiwe laJoh 20:28 leliku-nwtsty

Nkhosi, Nkulunkulu wami!: Lokusho kutsi, “INkhosi yami naNkulunkulu [ho the·osʹ] wami!” Letinye tati teliBhayibheli tichaza lenkhulumo ngekutsi bekungemavi lamangalisako lakhulunywa kuJesu kodvwa bekushiwo kuNkulunkulu, longubabe wakhe. Labanye bacabanga kutsi ngesiGriki lamavi bekufanele abhekiselwe kuJesu. Noma ngabe bekunjalo, emavi latsi “iNkhosi yami naNkulunkulu wami” angacondvwa kahle ngekubuka umongo wayo yonkhe leyo ndzaba leseBhayibhelini. Njengoba lendzaba iveta kutsi Jesu bekatjele bafundzi bakhe umlayeto lotsi, “Sengenyukela kuBabe longuYihlo, nakuNkulunkulu wami longuNkulunkulu wenu,” ngako kute sizatfu sekukholelwa kutsi Tomase bekacabanga kutsi Jesu bekanguNkulunkulu Somandla. (Fundza liphuzu lelicwaningiwe lelikuJoh 20:17.) Tomase bekamuva Jesu nakathandaza ‘kubabe’ wakhe, futsi atsi nguye ‘kuphela longuNkulunkulu weliciniso.’ (Joh 17:1-3) Ngako-ke, kungenteka Thomasi wabita Jesu ngekutsi ‘nguNkulunkulu wakhe’ ngenca yanati tizatfu letilandzelako: Bekatsatsa Jesu njengaNkulunkulu, kodvwa hhayi Nkulunkulu Somandla. (Fundza liphuzu lelicwaningiwe leliku-Joh 1:1.) Nobe kungenteka bekabita Jesu ngendlela tinceku taNkulunkulu lebetibita ngayo tingilosi lebetiletse umlayeto lovela kuJehova, njengoba kubhalwe emiBhalweni yesiHebheru. Kufanele kube Thomasi bekatati tindzaba lapho khona bantfu labatsite, nobe lapho khona umbhali weliBhayibheli, aphendvula nobe akhuluma nengilosi lebeyitfunyiwe kube ngazutsi kukhuluma Jehova Nkulunkulu. (Catsanisa Ge 16:7-11, 13; 18:1-5, 22-33; 32:24-30; Khu 6:11-15; 13:20-22.) Ngako ke, Thomasi kungenteka wabita Jesu ngekutsi ‘nguNkulunkulu wakhe’, ngemcondvo wekutsi bekavuma kutsi Jesu bekangummeleli kanye nemkhulumeli waNkulunkulu weliciniso.

Labanye bantfu batsi kusetjentiswa kwenchazelo yesiGriki kuleligama lelitsi “nkhosi” nalelitsi “nkulunkulu” kuveta kutsi lamagama bekashiwo kuNkulunkulu Somandla kuphela. Nobe kunjalo, kulendzaba le, leligama labhalwa kusetjentiswa umtsetfo wekubhala lulwimi lwesiGriki. Ngendlela lefanako, kuhumusha emagama njengobe anjalo kumBhalo wa-1 Phetro 3:7 bekangafundzeka kanje: “Emadvodza.” Nasisebentisa lesihloko lesi angeke sikhone kubona kutsi yini Tomase lebekayicabanga noma labefuna kuyisho nakakhuluma lamagama.

Kufundvwa KweliBhayibheli

(Johane 20:1-18) Ngelilanga lekucala evikini, Mariya waseMagdala waya ethuneni ekuseni ngeluvivi, wakhandza litje lisusiwe kulelithuna.² Ngako wagijima waya kuSimoni Phetro nakulomfundzi Jesu labemtsandza, watsi: “INkhosi bayitsatsile ethuneni, asati nekutsi bayibekephi.”³ BoPhetro nalolomunye umfundzi besuka baya kulelithuna. ⁴ Bobabili bagijima, kodvwa lolomunye umfundzi wagijima kakhulu kunaPhetro wefika kucala. ⁵ Nakagobondzela ahlola, wabona tindvwangu telineni tiphansi, kodvwa akazange angene ngekhatsi. ⁶ NaSimoni Phetro wefika emvakwakhe, wangena ethuneni. Watfola letindvwangu telineni tiphansi.⁷ Indvwangu lebeyisenhloko yaJesu beyingekho kuleti letinye tindvwangu, kodvwa beyigocwe yodvwa. ⁸ Nalomfundzi labefike kucala ethuneni wangena, futsi wakubona loko wase uyakukholwa.⁹ Bebangakawucondzi umbhalo lotsi bekufanele avuke ekufeni.¹⁰ Ngako labafundzi babuyela emakhaya abo.¹¹ Nanobe kunjalo, Mariya abesolo eme ngephandle kwalelithuna akhala. Njengobe akhala, wagobondzela kuze ahlole ngekhatsi ethuneni, ¹² futsi wabona tingilosi letimbili tembetse lokumhlophe, tihleti lapho Jesu abebekwe khona, lenye ingasenhloko, lenye ingasetinyaweni. ¹³ Ngako tatsi kuye: “Ukhalelani?” Yena watiphendvula watsi: “Batsetse iNkhosi yami, angati nekutsi bayibekephi.”¹⁴ Ngemuva kwekusho loko, wagucuka wabona Jesu emile, kodvwa akazange abone kutsi nguye. ¹⁵ Jesu watsi kuye: “Ukhalelani, futsi ufuna bani?” Yena abecabanga kutsi ngulomuntfu labegadza insimu, ngako watsi kuye: “Mnumzane, nangabe kunguwe lomtsetse, ngicela ungitjele kutsi umbekephi, ngitekuya ngiyomlandza.” ¹⁶ Jesu watsi kuye: “Mariya!” Yena wagucuka, wakhuluma naye ngesiHebheru, watsi: “Raboni!” (lokusho kutsi “Mfundzisi!”) ¹⁷ Ngako Jesu watsi: “Yekela kunginkonkoshela, ngobe ngisengakenyukeli kuBabe. Kodvwa hamba uye kubomnaketfu utsi kubo: ‘Sengenyukela kuBabe longuYihlo, nakuNkulunkulu wami longuNkulunkulu wenu.’” ¹⁸ Mariya waseMagdala wahamba wayewubikela bafundzi, watsi: “Ngiyibonile iNkhosi!” Wabatjela naloko Jesu labekushito.

NOVEMBER 12-18, 2013

UMCEBO LOSEVINI LANKULUNKULU | IMISEBENTI 1–3

“Umoya Longcwele Utfululelwa Ebandleni LebuKhristu”

(Imisebenti 2:1-8) Ngelilanga leMkhosi weliPhentekhoste, bonkhe bebahlangene endzaweni yinye. ² Masinyane kwevakala umsindvo uvela ezulwini unjengekuhhusha kwemoya lomkhulu, wagcwala lendlu lebebahleli kuyo. ³ Kwabonakala lokunjengemalangabi lamise kwelulwimi, futsi nguloko naloko kwahlala etikwemuntfu ngamunye, ⁴ bonkhe base bagcwala umoya longcwele, bakhuluma ngetilwimi letehlukahlukene, njengobe nje umoya bewubenta kutsi bakhulume.⁵ Ngaleso sikhatsi, eJerusalema kwakunemaJuda labesaba Nkulunkulu, avela kuto tonkhe tive temhlaba. ⁶ Kwatsi nakuvakala lomsindvo, bantfu labanyenti babutsana ndzawonye badidekile, ngobe nguloyo naloyo abeva labafundzi bakhuluma lulwimi lwakhe. ⁷ Lesicumbi samangala kakhulu satsi: “Labantfu labakhulumako akusibo yini baseGalile? ⁸ Pho kwentiwa yini kutsi ngamunye wetfu eve lulwimi lwakhe?

(Imisebenti 2:14) Phetro wasukuma nebaphostoli labalishumi nakunye, waphakamisa livi watsi: “Bantfu baseJudiya nani nonkhe lenihlala eJerusalema, yatini loku futsi nilalelisise emavi ami.

(Imisebenti 2:37, 38) Nabeva loku batsintseka etinhlitiyweni futsi bakhuluma naPhetro nalaba labanye baphostoli, batsi: “Banaketfu, kufanele senteni?” ³⁸ Phetro watsi kubo: “Phendvukani, nibhajatiswe egameni laJesu Khristu kute nitsetselelwe tono tenu, futsi nitawutfola sipho lesingumoya longcwele.

(Imisebenti 2:41) Ngako labo labemukela emavi akhe ngenhlitiyo yonkhe babhajatiswa, futsi ngalelo langa imiphefumulo lengaba tinkhulungwane letintsatfu yengetwa kubo.

(Imisebenti 2:42-47) Bachubeka batinikela etimfundzisweni tebaphostoli, ekwabelaneni tintfo, ekudleni ndzawonye kanye nasemithantazweni.

⁴³ Bonkhe bantfu besaba njengobe baphostoli benta timangaliso netibonakaliso letinyenti. ⁴⁴ Bonkhe lababa ngemakholwa bebahlangana ndzawonye, babelana konkhe lebebanako, ⁴⁵ futsi batsengisa tonkhe tintfo tabo kanye nemhlaba wabo, base babela labanye leyo mali, kuye ngekwaloko umuntfu ngamunye labekudzinga. ⁴⁶ Malanga onkhe bebahlale bahlangana ngebunye ethempelini, bavakashelana futsi badla kudla ngenjabulo lenkhulu, bakwenta ngalokusuka enhlitiyweni. ⁴⁷ Bebadvumisa Nkulunkulu futsi bemukelwa ngibo bonkhe bantfu. Kuwo onkhe emalanga, Jehova wachubeka engeta linani lalabo lebebasindziswa.

w86 12/1 29 ¶4-5, 7

Iminikelo Lejabulisa Inhlitiyo

Ngelilanga lekucala lekutalwa kwelibandla lebuKhristu ngeliPhentekoste la-33 C.E., labo labatinkhulungwane letintsatfu labebasandza kubhajatiswa bachubeka nekwabelana tintfo, kudla ndzawonye nekuthandaza. Bebakwentelani loko? Kute bakhone kukhulisa kukholwa kwabo ngekutsi ‘bacinisele njalo futsi bahlanganyele etimfundzisweni tebaphostoli.’—Imisebenti 2:41, 42.

EmaJuda kanye nalabo labagucukele enkholweni yebuJuda bebetele kuphela uMkhosi weliPhentekhoste eJerusalema. Kodvwa labo lababa ngemaKhristu baba nesifiso sekuhlala sikhatsi lesidze futsi bafundze lokunyenti kute bakhulise kukholwa kwabo labasandza kukutfola. Loku kwabangela kutsi kube bete kudla nendzawo yekuhlala. Letinye tivakashi betite imali leyenele, kantsi labanye bebanalenyenti. Ngako bebabelana futsi banetisana ngetintfo lebebanato kute basite labo lebebaswele.—Imisebenti 2:43-47.

Kutsengisa loko lebebanako nekwabelana bekuyintfo lebebayenta ngekutitsandzela. Kute lobekacindzetelekile kutsi atsengise nobe anikele ngetintfo lebekanato futsi loku bekungasiyo indlela yekukhutsata buphuya. Loku akusho kutsi labo labanjingile batsengisa tonkhe tintfo tabo nabo base bayaphuya. Kunaloko ngenca yekutsi bebabavela labo labakholwa nabo ngesimo lebebakuso ngaleso sikhatsi, batsengisa tintfo tabo base banikela ngalemali kute batfutfukise tindzaba teMbuso.—Catsanisa na-2 Khorinte 8:12-15.

Kufunisisa Umcebo EVini LaNkulunkulu

(Imisebenti 3:15) kepha nabulala uMmeleli Loyinhloko wekuphila. Kodvwa Nkulunkulu wamvusa ekufeni, futsi tsine sibofakazi baloko.

it-2 61 ¶1

Jesu Khristu

“UMmeleli Loyinhloko Wekuphila.” Jesu wamelela umusa lomkhulu waBabe wakhe, ngekutsi anikele ngekuphila kwakhe lokute sono. Loku kwavula litfuba lekutsi Khristu abe nebunye nebalandzeli bakhe labagcotjiwe labatawubusa ezulwini kanye nelilungiselelo lalabo labatawuphila emhlabeni ngaphasi kweMbuso wakhe. (Mat 6:10; Joh 3:16; Efe 1:7; Heb 2:5; fundza sihloko lesitsi INHLAWULO.) Ngako waba “nguMmeleli loyinhloko [“Inkhosana,” KJ; JB] wekuphila” kubo bonkhe bantfu. (Imi 3:15) Leligama lesiGriki lelisetjentiswe lapha, kalula, lisho ‘ummeleli loholako’ ligama lelifanako nalelo lelasetjentiswa kuMose (Imi 7:27, 35) njengobe ‘bekangumholi’ wema-Israyeli.

(Imisebenti 3:19) “Ngako-ke phendvukani nigucuke, khona tono tenu titewusulwa, kuze sikhatsi sekuvuseleleka sifike sivela kuJehova

cl 265 ¶14

Nkulunkulu “Lokulungele Kutsetselela”

¹⁴ Kutsetselela kwaJehova kuchazwe kahle kumBhalo weMisebenti 3:19 lotsi: “Ngako-ke phendvukani nigucuke, khona tono tenu titewusulwa.” Lamavi ekugcina kulomusho ahumusha ligama lesiGriki lelingasho “komisa, . . . kususa noma kucedza.” Ngekusho kwaletinye tati teliBhayibheli, tifananisa lamavi nekucima intfo loyibhalile. Bekungenteka kanjani loko? I-inki lebeyisetjentiswa endvulo beyakhiwa ngekuhlanganisa i-carbon, i-gum kanye nemanti. Nasacedzile umuntfu kusebentisa le-inki bekabese ucima loko lakubhalile asebentisa sipontji lesimanti. Loko kuwufananisa kahle umusa waJehova. Nakasitsetselela tono tetfu, kufana nekutsi ucima i-inki asebentisa sipontji nemanti.

Kufundvwa KweliBhayibheli

(Imisebenti 2:1-21) Ngelilanga leMkhosi weliPhentekhoste, bonkhe bebahlangene endzaweni yinye. ² Masinyane kwevakala umsindvo uvela ezulwini unjengekuhhusha kwemoya lomkhulu, wagcwala lendlu lebebahleli kuyo. ³ Kwabonakala lokunjengemalangabi lamise kwelulwimi, futsi nguloko naloko kwahlala etikwemuntfu ngamunye, ⁴ bonkhe base bagcwala umoya longcwele, bakhuluma ngetilwimi letehlukahlukene, njengobe nje umoya bewubenta kutsi bakhulume. ⁵ Ngaleso sikhatsi, eJerusalema kwakunemaJuda labesaba Nkulunkulu, avela kuto tonkhe tive temhlaba. ⁶ Kwatsi nakuvakala lomsindvo, bantfu labanyenti babutsana ndzawonye badidekile, ngobe nguloyo naloyo abeva labafundzi bakhuluma lulwimi lwakhe. ⁷ Lesicumbi samangala kakhulu satsi: “Labantfu labakhulumako akusibo yini baseGalile? ⁸ Pho kwentiwa yini kutsi ngamunye wetfu eve lulwimi lwakhe? ⁹ Lapha kitsi kunalabavela ePhathiya, eMediya, e-Elamu, eMesophothamiya, eJudiya, eKhaphadosiya, ePhontusi, esifundzeni sase-Asiya, ¹⁰ eFrigiya, ePhamfiliya, eGibhithe, etigodzini taseLibhiya lengaseSirene, tihambi letivela eRoma, letihlanganisa emaJuda kanye nalabo labagucukele enkholweni yebuJuda, ¹¹ nalabavela eKhrethe nase-Arabhiya. Sonkhe sibeva bakhuluma tintfo letimangalisako taNkulunkulu ngetilwimi takitsi.” ¹² Bonkhe bebamangele futsi badidekile, ngako bakhuluma bodvwa batsi: “Kusho kutsini loku?” ¹³ Labanye bona bahlekisa ngabo batsi: “Badzakiwe.”¹⁴ Phetro wasukuma nebaphostoli labalishumi nakunye, waphakamisa livi watsi: “Bantfu baseJudiya nani nonkhe lenihlala eJerusalema, yatini loku futsi nilalelisise emavi ami. ¹⁵ Labantfu abakadzakwa njengobe nicabanga, ngobe kusengakashayi ngisho nensimbi yemfica ekuseni. ¹⁶ Kunaloko, naku lokwashiwo ngumphrofethi Joweli: ¹⁷ ‘Nkulunkulu utsi: “Emalangeni ekugcina ngitawutfululela umoya wami kuto tonkhe tinhlobo tebantfu, emadvodzana nemadvodzakati enu atawuphrofetha, emajaha abone imibono, emadvodza lamadzala emkhatsini wenu aphuphe emaphupho; ¹⁸ ngalawo malanga ngitawutfululela umoya wami etincekwini nasetincekukatini tami, futsi titawuphrofetha. ¹⁹ Ngitawukwenta timangaliso ezulwini netibonakaliso emhlabeni: Ingati, umlilo, nekushunca kwentfutfu; ²⁰ lilanga litawugucuka libe mnyama nenyanga ibe yingati ngembikwekutsi kufike lilanga laJehova lelikhulu nalelibalulekile. ²¹ Wonkhe umuntfu lobita libito laJehova utawusindziswa.”’

NOVEMBER 19-25, 2013

UMCEBO LOSEVINI LANKULUNKULU | IMISEBENTI 4–5

“Bachubeka Bakhuluma NgeliVi LaNkulunkulu Ngesibindzi”

(Imisebenti 4:5-13) Ngakusasa, kwahlangana baholi, emadvodza lamadzala, netati temtsetfo eJerusalema ⁶ (kwakukhona na-Anasi umphristi lomkhulu, Khayafase, Johane, Alekzanda, netihlobo letinyenti temphristi lomkhulu), ⁷ baletsa boPhetro naJohane embikwabo bababuta batsi: “Niwatsetsephi emandla ekwenta loku, futsi nikwente egameni labani?” ⁸ Agcwele umoya longcwele, Phetro watsi kubo: “Baholi nani madvodza lamadzala,⁹ lamuhla nifuna sinitjele ngalesento lesihle lesentiwe kulendvodza lebeyikhubatekile, nekutsi iphile njani. ¹⁰ Nine nabo bonkhe bantfu baka-Israyeli kufanele nati kutsi lendvodza leseyime lapha embikwenu iphiliswe ngelibito laJesu Khristu waseNazaretha, loyo lenambetsela, kodvwa Nkulunkulu wamvusa ekufeni. ¹¹ LoJesu ‘ulitje nine bakhi lenalibukela phansi, kodvwa leseligucuke laba litje lekusimisa.’ ¹² Ngetulu kwaloko, insindziso ngeke ite ngalomunye umuntfu, ngobe kute lelinye libito ngephansi kwelizulu lelinikwe bantfu, nalabangasindziswa ngalo.”¹³ Ngako bamangala nabeva indlela boPhetro naJohane lebebakhuluma ngesibindzi ngayo, nanababona kutsi abakafundzi lokuyaphi nekutsi babantfukatana nje. Babese bayabona kutsi laba bebahamba naJesu.

w08 9/1 15, libhokisi

Kusukela Emavini Emlomo Kuya EmiBhalweni Lengcwele—EmaKhristu Ekucala Kanye neKubhala

Baphostoli Bekubantfu Labangakafundzi Yini?

Ngesikhatsi tiphatsimandla kanye nemadvodza lamadzala aseJerusalema eva indlela ‘boPhetro naJohane lebebakhuluma ngayo ngesibindzi, nanababona kutsi abakafundzi lokuyaphi nekutsi babantfukatana nje, bamangala.’ (Imisebenti 4:13) Ingabe vele labaphostoli bebangakafundzi yini? Nayikhuluma ngalendzaba i-The New Interpreter’s Bible yatsi: “Lamavi akukafaneli siwatsatse njengobe anjalo, kube ngazutsi Phetro [naJohane] abakwati kufundza noma kubhala. Kodvwa bebakhona kubona umehluko lomkhulu emkhatsini webahluleli kanye nebaphostoli.”

w08-ZU 5/15 30 ¶6

Emaphuzu Labalulekile Lasencwadzini YeMisebenti

4:13—BoPhetro naJohane bebangakafundzi yini? Cha, bebafundzile. Bebabitwa ngekutsi “abakafundzi futsi babantfu labavamile nje” ngoba bebangakayi etikolweni taboRabi kute bayoceceshelwa inkholo.

(Imisebenti 4:18-20) Ngako bababita, babayala kutsi bangakhulumi lutfo futsi bangafundzisi ngeligama laJesu kunobe nguyiphi indzawo. ¹⁹ Kodvwa boPhetro naJohane baphendvula batsi: “Yehlulelani nine kutsi kulungile yini emehlweni aNkulunkulu kutsi silalele nine kunekutsi silalele Yena. ²⁰ Kodvwa tsine ngeke siyekele kukhuluma ngetintfo lesitibonile nalesitivile.”

(Imisebenti 4:23-31) Ngemuva kwekukhululwa, bahamba baya kubazalwane babacocela loko baphristi labakhulu nemadvodza lamadzala lebebakushito kubo. ²⁴ Nabeva loku, bathantaza ngebunye kuNkulunkulu batsi:

“Nkhosi Lephakeme, Wena lowadala lizulu, umhlaba, lwandle, nako konkhe lokukuko, ²⁵ nalowakhuluma ngakhokho wetfu Davide inceku yakho, usebentisa umoya longcwele, watsi: ‘Kungani tive titfukutsele, nebantfu bazindla ngetintfo letingekho? ²⁶ Emakhosi emhlaba atilungiselele kantsi nebabusi bahlangene ndzawonye kute bamelane naJehova kanye nalogcotjiwe wakhe.’ ²⁷ Ecinisweni, Herodi, Phontiyuse Pilatu, bantfu betive kanye nebantfu baka-Israyeli bahlangana ndzawonye kulelidolobha bamelana naJesu, inceku yakho lengcwele, leyo lowayigcoba, ²⁸ kuze bente loko lowakubiketela. Loku wakwenta ngemandla akho nangekuvumelana nenjongo yakho. ²⁹ Manje Jehova, naka kusonga kwabo, futsi wente tinceku takho tichubeke tikhuluma livi lakho ngesibindzi, ³⁰ uchubeke welula nesandla sakho kuze uphilise, futsi wente tibonakaliso netimangaliso ngelibito laJesu, inceku yakho lengcwele.” ³¹ Nabacedza kuncusa, indzawo lebebahlangene kuyo yanyakatiswa, bonkhe bagcwala umoya longcwele, bakhuluma livi laNkulunkulu ngesibindzi.

it-1 128 ¶3

Baphostoli

Imisebenti lebeyentiwa eBandleni lebuKhristu. NgeliPhentekoste umoya longcwele waNkulunkulu watfululwa etukwebaphostoli futsi loko kwabacinisa kakhulu. Tahluko tekucala letisihlanu teMisebenti yebaPhostoli, tikhuluma ngekungesabi kwebaphostoli kanye nesibindzi lababanaso sekumemetela tindzaba letimnandzi nangekuvuswa kwaJesu ngisho nobe bebaboshwa, bashaywa futsi basongelwa babusi babo ngekutsi batababulala. Kulawo malanga ngemuva kweliPhentekoste, baphostoli bakhombisa kuba baholi labakahle ngesikhatsi basetjentiswa ngumoya longcwele, lokwenta kutsi libandla lebuKhristu likhule kakhulu. (Imi 2:41; 4:4) Umsebenti wabo wekushumayela wacale waba mnyenti eJerusalema, wabese uchubekela eSamariya, ngekuhamba kwesikhatsi wasakatekela emhlabeni wonkhe.—Imi 5:42; 6:7; 8:5-17, 25; 1:8.

Kufunisisa Umcebo EVini LaNkulunkulu

(Imisebenti 4:11) LoJesu ‘ulitje nine bakhi lenalibukela phansi, kodvwa leseligucuke laba litje lekusimisa.’

it-1 514 ¶4

Litje Lekusimisa

Tihlabelelo 118:22 tisitjela kutsi lelitje lelalahlwa bakhi belitawugucuka libe “litje lekusimisa indlu” (Ngesi Hebheru., roʼsh pin·nahʹ). Jesu wacaphuna waphindze wasebentisa lesiphrofetho kuye njenge “litje lekusimisa.” (NgesiGriki., ke·pha·leʹ go·niʹas, litje lekusimisa indlu). (Mat 21:42; Mak 12:10, 11; Luk 20:17) Njengoba litje lelisetikwendlu libonakala kalula, naJesu Khristu ulitje lelikhatimulako lelibandla lemaKhristu lagcotjiwe, lelifaniswa nelithempeli. NaPhetro wasebentisa Tihlabelelo 118:22 kuJesu, akhombisa kutsi bekalitje lelalahlwa bantfu kodvwa lakhetfwa nguNkulunkulu kutsi libe “litje lekusimisa indlu.”—Imi 4:8-12; fundza na-1Ph 2:4-7.

(Imisebenti 5:1) Nanobe kunjalo, indvodza lebitwa ngekutsi ngu-Ananiyase, ikanye nemkayo Safira, yatsengisa indzawo yayo.

w13 3/1 15 ¶4

Phetro Na-Ananiyasi Bacala Emanga—Ngusiphi Sifundvo Lesisitfolako?

Ananiyase nemfati wakhe batsengisa indzawo yabo kuze batfole imali letawusita labafundzi labasandza kubhajatiswa. Nakayiletsa kubaphostoli lemali, Ananiyase watsi bekayiphetse yonkhe. Kodvwa bekanemanga. Wafihla lenye yayo kuze ayisebentise. Nkulunkulu wembulela Phetro ngaloko, Phetro wase utsi ku-Ananiyase: “Awukacali emanga kubantfu kodvwa kuNkulunkulu.” Watsi nakeva lamavi Ananiyase washayeka phansi wafa. Ngemuva kwema-awa lamatsatfu, kwafika umkakhe lapho. Bekangati kutsi kwentekeni endvodzeni yakhe, naye wacala emanga, washayeka phansi, wafa ngaleso sikhatsi.

Kufundvwa KweliBhayibheli

(Imisebenti 5:27-42) Base babamisa embikweNkantolo YemaJuda. Umphristi lophakeme wakhuluma nabo, ²⁸ watsi: “Besiniyalisise kahle kutsi ningachubeki nekufundzisa ngalelibito, kodvwa asenibuke, senigcwalise iJerusalema ngalemfundziso yenu, futsi nitimisele kusetfwesa ingati yalomuntfu.” ²⁹ Phetro nalalabanye baphostoli batsi: “Kufanele silalele Nkulunkulu njengobe angumbusi kunekutsi silalele bantfu. ³⁰ Nkulunkulu wabokhokho betfu wamvusa Jesu, loyo lenambulala ngekumbetsela elugodvweni. ³¹ Wamphakamisela ngesekudla sakhe njengeMmeleli Loyinhloko neMsindzisi, kute Israyeli aphendvuke futsi atsetselelwe tono. ³² Tsine sibofakazi baletintfo, futsi umoya longcwele uyasifakazela, loyo Nkulunkulu lawunike labo labamlalelako njengembusi.”

³³ Nabeva loku batfukutsela babila, bafuna nekubabulala. ³⁴ Kodvwa lenye indvodza lengumFarisi, lebitwa ngekutsi nguGamaliyeli, naleyayingumfundzisi weMtsetfo futsi ihlonishwa ngibo bonkhe bantfu, yasukuma embikwaleNkantolo YemaJuda yatsi labaphostoli abakhishelwe ngephandle sikhashana. ³⁵ Yase itsi: “Madvodza aka-Israyeli, kucapheleni loko lenihlose kukwenta kulabantfu. ³⁶ Ngobe esikhatsini lesendlulile, kwavela Thoyidasi watsi yena ungumuntfu lomkhulu futsi emadvodza langaba ngemakhulu lamane aba balandzeli bakhe. Kodvwa wabulawa, kwatsi bonkhe lebebamlandzela bahlakateka, nemacebo abo aphelela eteni. ³⁷ Ngemva kwaloko, ngemalanga ekubhalisa, kwavela Judasi waseGalile, wadvonsa bantfu labanyenti kutsi bamlandzele. Naye wafa, futsi bonkhe lebebamlandzela bahlakateka. ³⁸ Ngenca yaloko ngitsi kini: Wayekeleni lamadvodza, ningawaphatamisi; (ngobe nangabe lemfundziso nobe lomsebenti uvela kubantfu, utawuphela; ³⁹ kodvwa nangabe uvela kuNkulunkulu, ngeke nikwati kubehlula;) ngale kwaloko, nitawutitfola senilwa naNkulunkulu.” ⁴⁰ Ngako basilalela leseluleko sakhe, babita labaphostoli, bababhambabula, babayala nekutsi bayekele kukhuluma ngelibito laJesu, base bayabakhulula. ⁴¹ Ngako-ke besuka kuleNkantolo YemaJuda bajabulile ngobe bebakufanele kuhlazwa ngenca yelibito laJesu. ⁴² Malanga onkhe, abayekelanga kufundzisa nekumemetela tindzaba letimnandzi ngaKhristu Jesu, ethempelini nasemtini ngemuti.

NOVEMBER 26, 2013–DECEMBER 2, 2013

UMCEBO LOSEVINI LANKULUNKULU | IMISEBENTI 6–8

“Libandla lelisha lebuKhristu liyavivinywa”

(Imisebenti 6:1) Kulawo malanga, njengobe bafundzi bandza, emaJuda lakhuluma siGriki acala kukhonona ngemaJuda lakhuluma siHebheru, ngobe bafelokati bawo bebangemukeliswa kudla lobekwabiwa malanga onkhe.

bt-ZU 41 ¶17

“Kufanele silalele Nkulunkulu njengobe angumbusi kunekutsi silalele bantfu”

¹⁷ Libandla lelisha belisengotini lebeyibhacile naleyayilisongela. Beyiyini lengoti? Bafundzi labanyenti lababhajatiswa bebativakashi eJerusalema, futsi bebafuna kufundza lokunyenti ngaphambi kwekubuyela emakhaya. Bafundzi lebebahlala eJerusalema banikela ngekutitsandzela ngemali kute batsenge kudla futsi banakekele naletinye tindzingo tabo. (Imi 2:44-46; 4:34-37) Ngaleso sikhatsi, kwaphakama simo lesimatima ‘ngekudla lobekwabiwa malanga onkhe.’ Bafelokati lebebakhuluma siGriki “bebangamukeliswa kudla.” (Imi 6:1) Kodvwa bafelokati labebakhuluma siHebheru bona bebamukeliswa. Lenkinga beyibangwa lubandlululo. Tincane kakhulu tinkinga lebetingabanga kwehlukana kwendlula lena.

(Imisebenti 6:2-7) Ngako baphostoli labalishumi nakubili babitela ndzawonye sicumbi sebafundzi batsi: “Akukafaneli kutsi tsine siyekele umsebenti wekufundzisa ngelivi laNkulunkulu kuze sabe kudla ematafuleni. ³ Ngako-ke bazalwane, funani emadvodza lasikhombisa emkhatsini wenu, lakhulunyelwa kahle nalagcwele umoya waNkulunkulu nekuhlakanipha, kuze ente lomsebenti lobalulekile, ⁴ khona tsine sitewutinikela ekuthantazeni nasekufundziseni ngelivi laNkulunkulu.” ⁵ Loko labakusho kwasijabulisa sonkhe lesicumbi. Ngako sakhetsa Stefano, indvodza leyayigcwele kukholwa nemoya longcwele, Filiphu, Phrokhorusi, Nikhano, Thimoni, Phamenasi, naNikholawusi wase-Antiyokhi, labegucukele enkholweni yebuJuda. ⁶ Babaletsa kubaphostoli, kwatsi nasebathantazile bababeka tandla. ⁷ Ngako livi laNkulunkulu lachubeka landza, nelinani lebafundzi lakhula kakhulu eJerusalema, futsi baphristi labanyenti baba ngemakholwa.

bt-ZU 42 ¶18

‘Kufanele Silalele Nkulunkulu Njengobe AnguMbusi’

¹⁸ Baphostoli, lebebasebenta njengesigungu lesibusako selibandla lelikhulako, babona kutsi bekungasiko kuhlakanipha ‘kuyekela umsebenti wekufundzisa ngeliVi laNkulunkulu kuze babe kudla ematafuleni.’ (Imisebenti 6:2) Kute balungise lenkinga, batfuma bafundzi kutsi bafune emadvodza lasikhombisa nalagcwele umoya waNkulunkulu nekuhlakanipha kute bawamise kutsi kube ngiwo lenta “lomsebenti lobalulekile.” (Imisebenti 6:3) Bekudzingeka emadvodza lafanelekako, ngoba lomsebenti bewungafaki nje kuphela umsebenti wekugcina timali, kutsenga tintfo nekugcina imininingwane lebalulekile. Onkhe emadvodza lakhetfwa bekanemagama esiGriki lokwenta emukeleka kubafelokati labebaphatfwa kabi. Ngemuva kwekuthantaza ngalendzaba, baphostoli base bayawabeka lamadvodza lasikhombisa kutsi ente “lomsebenti lobalulekile.”

(Imisebenti 7:58–8:1) Batsi nasebamkhiphele ngephandle kwelidolobha, bamgcoba ngematje. Labofakazi babeka tingubo tabo tangetulu embikwalelinye lijaha lokutsiwa nguSawula. ⁵⁹ Basamshaya ngematje, Stefano wancusa watsi: “Nkhosi Jesu, yemukela umoya wami.” ⁶⁰ Ngemuva kwaloko waguca, waphakamisa livi watsi: “Jehova, ungababeki licala ngaloku.” Nakacedza kusho lamavi, wafa.

8 Sawula wakusekela kubulawa kwaStefano. Kusukela ngalelo langa, libandla lelaliseJerusalema lahlushwa kakhulu; bonkhe basakatekela etifundzeni taseJudiya naseSamariya, kwasala baphostoli.

Kufunisisa Umcebo EVini LaNkulunkulu

(Imisebenti 6:15) Njengobe bonkhe lebebakhona kuleNkantolo YemaJuda bebamgolotele, babona buso bakhe bunjengebuso bengilosi.

bt-ZU 45 ¶2

Stefano—“Labegcwele Umusa Nemandla”

² Kunentfo letsite lemangalisako lesebusweni baStefano. Emajaji ambuka emehlweni futsi abona buso bakhe “bunjengebuso bengilosi.” (Imisebenti 6:15) Tingilosi timemetela umlayeto waJehova Nkulunkulu, ngesizatfu saloko, atesabeki, futsi tinekuthula. Kukanjalo nangaStefano—ngisho nalamajaji labenetinhlitiyo letimbi bekakubona loku kuye. Yini leyamenta waba nekuthula.

(Imisebenti 8:26-30) Ingilosi yaJehova yakhuluma naFiliphu, yatsi: “Suka uye eningizimu, emgwacweni losuka eJerusalema wehlele eGaza.” (Lomgwaco bewulugwadvule.) ²⁷ Ngako wahamba, wahlangana nendvuna yesigodlo saseTopiya, lebeyisiphatsimandla lesingephansi kwaKhandase indlovukazi yaseTopiya, futsi beyinakekela yonkhe imali yakhe. Lendvuna beyiye eJerusalema kute iyewukhonta Nkulunkulu, ²⁸ futsi beseyibuyela emuva ihleti enkalishini yayo, ifundza incwadzi yemphrofethi Isaya ngelivi lelivakalako. ²⁹ Umoya waNkulunkulu watsi kuFiliphu: “Sondzela, uhambe eceleni kwalenkalishi.” ³⁰ Filiphu wagijima eceleni kwayo, weva lendvuna ifundza incwadzi yemphrofethi Isaya ngelivi lelivakalako, watsi kuyo: “Uyakucondza yini loku lokufundzako?”

bt-ZU 58 ¶16

Kumemetela “Tindzaba Letimnandzi Ngakhristu Jesu”

¹⁶ EmaKhristu namuhla anelilungelo lekwenta umsebenti lofana newaFiliphu. Akwetayele kucoca ngemlayeto weMbuso nabo bonkhe bantfu labahlangana nabo ngisho bangakahleli, njengalapho nakatihambela nje. Etikhatsini letinyenti, kuvele kutentakalele nje kutsi nabahlangana nemuntfu lonenhlitiyo lenhle bavele bacoce naye ngemlayeto weMbuso. Sigadze kutsi kwenteke njalo vele, ngoba liBhayibheli likubeka ebaleni kutsi tingilosi ngito leticondzisa lomsebenti wekumemetela lomlayeto “kuto tonkhe tive, tinhlanga, tilwimi, nebantfu.” (Sembulo 14:6) Kucondzisa lokwentiwa tingilosi kulomsebenti wekushumayela, kungiko kanye loko lokwashiwo nguJesu. Emfanekisweni wakhe wakolo nelukhula, Jesu washo nankha emavi mayelana nesikhatsi sekuvuna—lokukuphela kwalelive lelibi—watsi “bavuni tingilosi.” Waphindze watsi tidalwa temoya ‘tiyawukhipha embusweni wayo tonkhe tintfo letibangela bantfu kutsi bone kanye nalabo labenta lokubi.’ (Matewu 13:37-41) Ngesikhathi lesifananako, tingilosi tatitawubutsisela ndzawonye tindlalifa teMbuso waseZulwini futsi ngemuva kwesikhashana bese tibutsisela ndzawonye labo labakha “sicumbi lesikhulu” saletinye timvu—leso Jehova lafuna kusisondzeta enhlanganweni yakhe.—Sem 7:9; Joh 6:44, 65; 10:16.

Kufundvwa KweliBhayibheli

(Imisebenti 6:1-15) Kulawo malanga, njengobe bafundzi bandza, emaJuda lakhuluma siGriki acala kukhonona ngemaJuda lakhuluma siHebheru, ngobe bafelokati bawo bebangemukeliswa kudla lobekwabiwa malanga onkhe. ² Ngako baphostoli labalishumi nakubili babitela ndzawonye sicumbi sebafundzi batsi: “Akukafaneli kutsi tsine siyekele umsebenti wekufundzisa ngelivi laNkulunkulu kuze sabe kudla ematafuleni. ³ Ngako-ke bazalwane, funani emadvodza lasikhombisa emkhatsini wenu, lakhulunyelwa kahle nalagcwele umoya waNkulunkulu nekuhlakanipha, kuze ente lomsebenti lobalulekile, ⁴ khona tsine sitewutinikela ekuthantazeni nasekufundziseni ngelivi laNkulunkulu.” ⁵ Loko labakusho kwasijabulisa sonkhe lesicumbi. Ngako sakhetsa Stefano, indvodza leyayigcwele kukholwa nemoya longcwele, Filiphu, Phrokhorusi, Nikhano, Thimoni, Phamenasi, naNikholawusi wase-Antiyokhi, labegucukele enkholweni yebuJuda. ⁶ Babaletsa kubaphostoli, kwatsi nasebathantazile bababeka tandla. ⁷ Ngako livi laNkulunkulu lachubeka landza, nelinani lebafundzi lakhula kakhulu eJerusalema, futsi baphristi labanyenti baba ngemakholwa. ⁸ Stefano labegcwele umusa nemandla aNkulunkulu, wenta timangaliso netibonakaliso letinkhulu emkhatsini webantfu. ⁹ Kodvwa kwavela emadvodza latsite elicembu lekutsiwa liSinagoge Lebantfu Labakhululiwe, akanye nalamanye laphuma eSirene, e-Alekzandriya, eSilisiya kanye nase-Asiya, kute atewuphikisana naStefano. ¹⁰ Nanobe kunjalo ehluleka kumphikisa nekumelana nekuhlakanipha kwakhe nemoya lobewumcondzisa kutsi akhulume. ¹¹ Lamadvodza akhutsata bantfu ngasese kutsi batsi: “Simvile ahlambalata Mosi naNkulunkulu.” ¹² Enta kutsi bantfu, emadvodza lamadzala, kanye netati temtsetfo basuse ludvwishi, futsi beta ngekushesha babamba Stefano ngenkhani bamyisa eNkantolo YemaJuda. ¹³ Babese baletsa bofakazi bemanga, labafike batsi: “Lomuntfu solo ukhuluma kabi ngalendzawo lengcwele nangeMtsetfo. ¹⁴ Simuve atsi loJesu waseNazaretha utawudzilita lendzawo, futsi agucule lomtsetfo lesawunikwa nguMosi.” ¹⁵ Njengobe bonkhe lebebakhona kuleNkantolo YemaJuda bebamgolotele, babona buso bakhe bunjengebuso bengilosi.