‘UnguNkulunkulu Walabaphilako’

Kufa kunemandla kwendlula Nkulunkulu yini? Chake. Kungenteka yini kutsi kufa nobe lesinye sitsa kube nemandla lendlula ‘aNkulunkulu Somandla’? (1 Khorinte 15:26; Eksodusi 6:3) Nkulunkulu unemandla ekucedza kufa ngeluvuko lwalabafile futsi wetsembisa kwenta loko kanye eveni lelisha.a Siliciniso kangakanani lesetsembiso saNkulunkulu? Jesu indvodzana yaNkulunkulu lekukuphela kwayo, wakhuluma emavi langasiniketa litsemba.—Fundza Matewu 22:31, 32.

Ngesikhatsi akhuluma nebaSadusi lebebangakholelwa ekuvusweni kwalabafile, Jesu watsi: “Kepha macondzana nekuvuswa kwalabafile: Anifundzanga yini lokwakhulunywa nguNkulunkulu kini nakatsi ‘Mine nginguNkulunkulu wa-Abrahama, naNkulunkulu wa-Isaka, naNkulunkulu waJakobe’? Akasiye Nkulunkulu walabafile, kodvwa walabaphilako.” Kulombhalo, Jesu bekabhekisela enkhulumeni leyaba khona emkhatsini waMosi naNkulunkulu esihlahleni lesivutsako cishe ngemnyaka wa-1514 B.C.E. (Eksodusi 3:1-6) Ngekusho kwaJesu, emavi aJehova kuMosi latsi “nginguNkulunkulu wa-Abrahama, naNkulunkulu wa-Isaka, naNkulunkulu waJakobe,” aveta kutsi kuvuswa kwebantfu kusetsembiso lesitawugcwaliseka, kumnyama kubovu. Sikusho ngani loko?

Ase ucabange ngemnyombo walendzaba. Ngesikhatsi Jehova akhuluma naMosi, bo-Abrahama, Isaka naJakobe, besekuphele sikhatsi lesidze bafa. Ngaleso sikhatsi besekuphele iminyaka lengu-329 Abrahama afa, kuphele lengu-224 Isaka afa nalengu-197 Jakobe afa. Nobe kunjalo, Jehova watsi: “NginguNkulunkulu” wabo, akazange atsi “benginguNkulunkulu” wabo. Yini leyabangela Jehova wakhuluma ngalamadvodza lamatsatfu shengatsi bewasaphila kantsi bese afa kadzeni?

Jesu wachaza kutsi: “Akasiye Nkulunkulu walabafile, kodvwa walabaphilako.” Ase ucabange ngaloko lokushiwo ngulamavi aJesu. Nangabe kungekho kuvuswa kwalabafile, Abrahama, Isaka naJakobe, bayawuhlala emathuneni kuze kube phakadze. Nangabe kunjalo, kusho kutsi Jehova unguNkulunkulu walabafile. Loko, kungasho kutsi kufa kuyamehlula Nkulunkulu kangangekutsi akakhoni kusita tinceku takhe letetsembekile kutsi tivuke ekufeni.

Ngusiphi-ke siphetfo lesingafinyelela kuso nga-Abrahama, Isaka, Jakobe kanye nato tonkhe tinceku taJehova letafa? Jesu washo nankha emavi latsintsa inhlitiyo: “Bonkhe bayaphila kuye.” (Lukha 20:38) Asingabati kutsi inhloso yaJehova yekuvusa tinceku takhe letetsembekile lesetafa itawugcwaliseka kumnyama kubovu, kangangekutsi utsatsa shengatsi setivele tiyaphila. (Roma 4:16, 17) Jehova ngeke atikhohlwe tinceku takhe, utativusa nasekufike sikhatsi sakhe.

Liyakujabulisa yini wena lelitsemba lekutsi sitawuphindze sibabone bantfu lesibatsandzako lesebafa? Nakunjalo, khumbula kutsi Jehova unemandla ekuncoba kufa. Kute lokungamvimba kutsi agcwalise setsembiso sakhe sekuvusa bantfu labafile. Kungaba njani utinike sikhatsi sekufundza kabanti ngesetsembiso seluvuko lwalabafile kanye nangaNkulunkulu lotasifeza? Kwenta kwakho kanjalo, kutakusondzeta kuJehova, ‘Nkulunkulu walabaphilako.’