Tinkholo Letitsi Tebukhristu Timelelwa Yijerusalema Yini?

Esikhatsini lesendlulile, tincwadzi tetfu betitsi Tinkholo Letitsi TebuKhristu timelelwa bantfu baseJerusalema lebesebahlubukile. Kungetsembeki kwebantfu baseJerusalema, lokufaka ekhatsi kukhonta tithico kanye nekukhohlakala lebesekwandzile, kusikhumbuta loko lokwenteka eTinkholweni Letitsi TebuKhristu lamuhla. Nanobe kunjalo, eminyakeni yakamuva, tincwadzi tetfu, lokufaka ekhatsi lena loyifundzako nyalo, atisasho kutsi siphrofetho simelela lokutsite, ngaphandle nangabe liBhayibheli liniketa sizatfu lesicacile sekusho kanjalo. Sikhona yini sizatfu lesiphatsekako lesisekelwe emBhalweni sekutsi kutsiwe Tinkholo Letitsi TebuKhristu timelelwa yiJerusalema? Cha.

Cabanga nganaku lokulandzelako: IJerusalema yake yaba yindzawo yekukhonta lokuhlantekile; ngekuhamba kwesikhatsi, bantfu bakhona baba tihlubuki. Ngalokwehlukile, Tinkholo Letitsi TebuKhristu, atikaze takhonta Jehova ngendlela lehlantekile. Kusukela tacala ngelikhulu lesine C.E., Tinkholo Letitsi TebuKhristu betisolo tifundzisa timfundziso temanga.

Ngetulu kwaloko, ngemuva kwekutsi iJerusalema ibhujiswe yiBhabhulona, Jehova waphindze walemukela lelidolobha futsi laphindze laba yindzawo yekukhonta kweliciniso. Ngakulolunye luhlangotsi, Tinkholo Letitsi TebuKhristu atikaze temukelwa nguNkulunkulu, futsi titawutsi nasetibhujisiwe ngekuhlupheka lokukhulu, tingaphindzi tibe khona.

Nasibuka loku lesisandza kucoca ngako, singaphetsa ngekutsini? Nasihlolisisa tiphrofetho teliBhayibheli letagcwaliseka kubantfu baseJerusalema labangaketsembeki, singahle sitsi: ‘Loku kusikhumbuta ngaloko lesikubonako eTinkholweni Letitsi TebuKhristu lamuhla.’ Kodvwa site sizatfu lesisekelwe eBhayibhelini sekutsi Tinkholo Letitsi TebuKhristu timelelwa yiJerusalema.