Bhidlita Yonkhe Imicabango Lemelene Nelwati NgaNkulunkulu!

 1. Ngisiphi secwayiso umphostoli Pawula lasibhalela emaKhristu lagcotjiwe?

UMPHOSTOLI Pawula wecwayisa: “Yekelani kwentiwa nifane nalelive.” (Rom. 12:2) Lamavi Pawula wawasho kumaKhristu elikhulu lekucala leminyaka. Kungani akhipha lesecwayiso lesicondzile lebesiya kumadvodza nebesifazane lebebatinikele kuNkulunkulu futsi bagcotjwe ngumoya longcwele?—Rom. 1:7.

2-3. Sathane wetama ngatiphi tindlela kusikhweshisa kuJehova, futsi singatibhidlita kanjani tintfo “letimbelwe tacina” etingcondvweni tetfu?

² Pawula bekakhatsatekile ngoba lamanye emaKhristu besekanake kakhulu kucabanga lokungakhi nekuhlakanipha lebekukhutsatwa live laSathane. (Eph. 4:17-19) Loko kungenteka kunome ngubani kitsi. Njengembusi walelive, Sathane usebentisa tindlela letehlukahlukene kute asikhweshise kuJehova. Nasi sibonelo, nasifuna kuba bantfu lababalulekile nobe labavelele, Sathane utawusebentisa loko kute asikhweshise kuJehova. Angahle etame kusebentisa tintfo lesake safundza ngato ekhaya, esikolweni nome kubantfu lesiphila nabo, kute asente sicabange ngendlela yena lacabanga ngayo.

³ Singakhona yini kubhidlita tintfo “letimbelwe tacina” etingcondvweni tetfu? (2 Khor. 10:4) Naka indlela Pawula laphendvula ngayo: “Sibhidlita imicabango nato tonkhe tintfo letiphakeme letimelene nelwati ngaNkulunkulu; futsi sitfumba yonkhe imicabango kute ilalele Khristu.” (2 Khor. 10:5) Ngako, ngekusitwa nguJehova singakhona kushintja indlela lekabi lesicabanga ngayo. Njengemutsi lokhonako kususa shevu, liVi laNkulunkulu lingayisusa imiphumela lemibi yalelive laSathane.

 4. Nguluphi lushintjo lokwadzingeka labanyenti betfu balwente ngesikhatsi bacala kwemukela liciniso?

⁴ Cabanga ngetingucuko lokwadzingeka utente ngesikhatsi ucala kwati loko liBhayibheli lelikufundzisako. Linyenti letfu kwadzingeka kutsi liyekele imikhuba lemibi. (1 Khor. 6:9-11) Simbonga kakhulu Jehova ngekutsi asisite siyekele leyo mikhuba lemibi!

 5. Ngutiphi tintfo letimbili letichazwe kuRoma 12:2 lokudzingeka sitente?

⁵ Nanobe kunjalo, loko akusho kutsi akusadzingeki sente letinye tingucuko. Nanobe sesayekela kwenta tono letinkhulu lebesitenta ngaphambi kwekutsi sibhajatiswe, kusadzingeka kutsi sichubeke sisebenta kamatima kute sigweme nobe ngabe yini lengasilingela kutsi siphindze sente tono lesesatiyekela. Singakwenta kanjani loko? Pawula uyaphendvula: “Yekelani kwentiwa nifane nalelive, kodvwa gucukani ngekutsi nishintje tingcondvo tenu.” (Rom. 12:2) Ngako timbili tintfo lokudzingeka sitente. Kwekucala, kudzingeka ‘siyekele kwentiwa’ sifane nalelive. Kwesibili, kudzingeka ‘sigucuke’ ngekutsi sishintje tingcondvo tetfu.

 6. Yini lesiyifundza emavini aJesu lakuMatewu 12:43-45?

⁶ Lokugucuka Pawula lakhuluma ngako, kusho lokungetulu nje kwekushintja indlela lesibukeka ngayo. Kutsintsa tsine cobo lwetfu. (Buka libhokisi lelitsi, “Ngishintje Ngalokuphelele Yini Nome Ngiyatentisa?”) Kufanele siyishintje ngalokuphelele ingcondvo yetfu—loko lesingiko ngekhatsi, indlela lesitiva ngayo, kanye netifiso tetfu. Ngako-ke, sonkhe kudzingeka sitibute, ‘Lushintjo lengilwentako kute ngibe ngumKhristu lwangephandle yini nome ngilwenta ngalokusuka enhlitiyweni?’ Lomehluko ubaluleke kakhulu. Emavini akhe labhalwe ku-Matewu 12:43-45, Jesu uveta loko lokufanele sikwente. (Fundza) Lamavi asifundzisa liciniso lelibalulekile: Akukeneli kumane nje sisuse imicabango lengasiyo kodvwa kufanele sigcwalise tingcondvo tetfu ngemicabango leyemukelwa nguJehova.

 7. Yini lesingayenta kute sishintje loko lesingiko mbamba?

⁷ Kungenteka yini vele kutsi sishintje loko lesingiko mbamba? LiVi laNkulunkulu litsi: “Kufanele nichubeke nentiwe nibe basha emandleni enu ekucabanga, nigcoke buntfu lobusha lobentiwa ngekuvumelana nentsandvo yaNkulunkulu ngekulunga nangebucotfo lobungibo.” (Ef. 4:23, 24) Ngako singakhona kushintja lesingiko ngekhatsi, kodvwa akusiko melula kwenta njalo. Kufanele sente lokungetulu nje kwekuyekela imicabango lemibi nekwenta tintfo letimbi. Kufanele sishintje ‘emandla etfu ekucabanga.’ Loko kufaka ekhatsi kushintja tifiso tetfu, imikhuba yetfu kanye netisusa tetfu tekwenta tintfo. Loku kudzinga imetamo lechubekako.

8-9. Lokwenteka kulomunye umzalwane kusigcizelela njani sidzingo sekushintja loko lesingiko ngekhatsi?

⁸ Asesicoce ngalomunye umzalwane lobekanebudlova. Ngemuva kwekutsi sekayekele kunatsa tjwala kanye nekulwa, wakufanelekela kubhajatiswa, futsi loko kwaba bufakazi lobuhle kakhulu endzaweni labehlala kuyo. Kodvwa ngemuva kwekubhajatiswa wavivinywa ngendlela labengakayilindzeli. Ngalelinye lilanga ekhaya lakhe kwefika indvodza lebeyidzakiwe futsi beyifuna kulwa naye. Ekucaleni lomzalwane akazange avume kulwa nayo. Kodvwa ngesikhatsi lendvodza icala kuhlambalata libito laJehova, lomzalwane wehluleka kutibamba. Waphumela ngephandle futsi wayishaya. Yini leyenta lomzalwane wangakhoni kutibamba? Ngisho nobe kudadisha liBhayibheli bekumsitile kutsi ancobe sifiso sekulwa, kodvwa bekasengakawashintji emandla akhe ekucabanga. Ngalamanye emagama, lomzalwane bekasengakashintji kuloko labengiko ngekhatsi.

⁹ Nobe kunjalo, lomzalwane akazange aphelelwe ngemandla. (Taga 24:16) Ngekusitwa ngulabadzala belibandla, wachubeka atfutfuka kahle. Kwagcine sekumfanela kuba ngulomdzala welibandla. Ngalelinye lilanga entsambama, angephandle kweliHholwa leMbuso wabhekana nesilingo lebesike samehlela eminyakeni leyendlulile. Lenye indvodza lebeyidzakiwe beyifuna kushaya lomunye walabadzala belibandla. Yini lomzalwane wetfu layenta? Watitfoba, futsi wehlisa umoya wakhuluma nalendvodza wayisita kutsi nayo yehlise umoya. Njengoba beyidzakiwe wayisita kutsi ibuyele ekhaya. Kungani lomzalwane enta ngendlela leyehlukile? Kungenca yekutsi besekashintje emandla akhe ekucabanga. Besekanekuthula mbamba aphindze atfobekile, loko kwaletsa ludvumo kuJehova.

10. Yini lokufanele siyente kute sikhone kushintja loko lesingiko ngekhatsi?

¹⁰ Letingucuko atenteki ngekushesha, tidzinga sente imetamo. Kungahle kuphele iminyaka leminyenti solo ‘senta konkhe lokusemandleni etfu.’ (2 Phet. 1:5) Letingucuko atenteki ngenca yekutsi sesinesikhatsi lesidze sikhonta Jehova. Kufanele sitimisele kute sishintje loko lesingiko ngekhatsi. Kunetinyatselo letibalulekile lekufanele sititsatse kute sikhone kushintja. Asesihlolisise letinye tato.

11. Umthantazo usisita njani sishintje emandla etfu ekucabanga?

¹¹ Kuthantaza kusinyatselo sekucala lesibalulekile. Kufanele silingise umhlabeleli lowathantaza watsi: “Nkulunkulu, dala kimi inhlitiyo lehlantekile, uvuselele kimi umoya wekulunga.” (Hla. 51:10) Kufanele sivume kutsi kudzingeka sishintje emandla etfu ekucabanga futsi sicele Jehova asisite. Yini lengasicinisekisa kutsi Jehova utasisita sente lushintjo? Kungasikhutsata kakhulu loko Jehova lakwetsembisa ema-Israyeli labenenkhani ngesikhatsi saHezekeli. “Ngiyawubanika inhlitiyo yinye, ngifake umoya lomusha ekhatsi kubo, ngibanike inhlitiyo yenyama [inhlitiyo lelalela ticondziso taNkulunkulu].” (Hez. 11:19) Jehova bekatimisele kusita ema-Israyeli kutsi ente lushintjo, futsi nalamuhla utimisele kusisita.

12-13. (a) Ngekusho kweTihlabelelo 119:59, yini lokufanele sizindle ngayo? (b) Ngumiphi imibuto lokufanele sitibute yona?

¹² Kuzindla kusinyatselo sesibili lesibalulekile. Njengobe sifundza liVi laNkulunkulu onkhe malanga, kufanele sitinike sikhatsi sekuzindla ngaloko lesikufundzako. Loko kutasisita sibone imicabango kanye netintfo lokufanele sitishintje. (Fundza Tihlabelelo 119:59; Heb. 4:12; Jak. 1:25) Kufanele sikhone kubona noma ngabe ngumiphi imikhuba nemibono lekhutsatwa bantfu balelive. Kufanele sivume kutsi sinebutsakatsaka futsi setame kwenta konkhe lesingakwenta kute sibuncobe.

¹³ Nasi sibonelo, tibute: ‘Enhlitiyweni yami kukhona yini kutigcabha kanye nemona?’ (1 Phet. 2:1) ‘Ngiyatigcabha yini ngenca yendzawo lengakhulela kuyo, imfundvo nome imali lenginayo?’ (Taga 16:5) ‘Ngibabukela phasi yini bantfu labete tintfo lenginato noma labanebuve lobehlukile kubami?’ (Jak. 2:2-4) ‘Ngiyatihawukela yini tintfo talelive laSathane?’ (1 Joh. 2:15-17) ‘Ngiyakutsandza yini kutijabulisa ngetintfo letinebudlova kanye nekutiphatsa lokubi?’ (Hla. 97:10; 101:3; Amo. 5:15) Timphendvulo talemibuto tingakusita ubone lapho kufanele utfutfukise khona. Babe wetfu losezulwini utawujabula nangabe sikhona kuncoba imicabango kanye nemiva lenemandla.—Hla. 19:14.

14. Kubaluleke ngani kutsi sikhetse bangani labakahle?

¹⁴ Kukhetsa bangani labakahle kusinyatselo sesitsatfu lesibalulekile. Bantfu lesitihlanganisa nabo bayayitsintsa indlela lesiphila ngayo. (Taga 13:20) Emsebentini nome esikolweni, sihlangana nebantfu labangeke basisite sicabange ngendlela Jehova lafuna sicabange ngayo. Nobe kunjalo, bangani labakahle singabatfola emihlanganweni yebuKhristu. Kulemihlangano singakhutsatana “elutsandvweni nasemisebentini lemihle.”—Heb. 10:24, 25.

15-16. Sathane wetama njani kusenta sishintje indlela lesicabanga ngayo?

¹⁵ Kufanele sikhumbule kutsi Sathane ufuna sishintje indlela lesicabanga ngayo. Usebentisa tonkhe tindlela kute ashintje umphumela lomuhle lobangelwa kucabanga ngendlela levumelana neliVi laNkulunkulu.

¹⁶ Sathane uyachubeka asibuta umbuto lawubuta Eva ensimini yase-Edeni: “Ngempela Nkulunkulu ushito yini kutsi . . . ?” (Gen. 3:1) Kulelive lelibuswa nguSathane, sihlale siva imibuto lengasenta singabate loko lesikukholelwako, lefana naletsi: ‘Vele Nkulunkulu akakuvumeli yini kushada kwebantfu bebulili lobufanako? Nkulunkulu akafuni yini vele nigubhe Khisimusi netinsuku tekutalwa? Vele Nkulunkulu ulindzele kutsi ningavumi yini kufakwa ingati? Nkulunkulu lositsandzako vele ulindzele kutsi ningatihlanganisi yini nebantfu lenibatsandzako labayekelisiwe kuba BoFakazi?’

17. Yini lokufanele siyente nangabe basibuta imibuto lengasenta singabate loko lesikukholelwako, futsi umBhalo waKholose 2:6, 7 utsi ungaba yini umphumela?

¹⁷ Kufanele siciniseke ngetintfo lesitikholelwako. Nangabe singatitfoli timphendvulo temibuto lebalulekile lemayelana naloko lesikukholelwako, singacala kukungabata kutsi kuliciniso. Kungabata kungagcina kushintje indlela lesicabanga ngayo futsi kulimate kukholwa kwetfu. Yini-ke lokufanele siyente? LiVi laNkulunkulu lisikhutsata kutsi sishintje tingcondvo tetfu kute sititfolele tsine “loko lokuyintsandvo yaNkulunkulu, lenhle, leyemukelekako nalephelele.” (Rom. 12:2) Nangabe sihlale sidadisha, singaciniseka kutsi loko lesikufundze eBhayibhelini kuliciniso. Singaciniseka ngalokuphelele kutsi timiso taJehova tilungile. Njengesihlahla lesinetimphandze letijulile, sitawucina futsi ‘sisime ekukholweni.’—Fundza Kholose 2:6, 7.

18. Yini letasisita sivikeleke emikhubeni lemibi yalelive laSathane?

¹⁸ Kute umuntfu longakucinisela kukholwa kwakho. Ngako-ke kufanele uchubeke wentiwa ube musha emandleni akho ekucabanga. Thantaza ngaso sonkhe sikhatsi ucele Jehova akusite ngemoya wakhe. Cabangisisa futsi uchubeke uhlola indlela locabanga ngayo kanye netisusa takho. Khetsa bangani labakahle futsi uchubeke utihlanganisa nebantfu labatakusita ucabange ngendlela Jehova lacabanga ngayo. Nawenta njalo, utawukhona kuyekela imikhuba lemibi, uvikeleke kulelive lelibi laSathane futsi uphumelele ekubhidliteni “imicabango nato tonkhe tintfo letiphakeme letimelene nelwati ngaNkulunkulu.”—2 Khor. 10:5.