Ho Bakolose

1 Nna Pauluse, eo ke bileng moapostola wa Kreste Jesu ka thato ya Modimo, le Timothea+ ngwanabo rona, 2 re ngolla bahalaledi le bana ba bo rona ba tshepahalang bao e leng barutuwa ba Kreste ba leng Kolose:

E se eka Modimo Ntate wa rona a ka ba mosa* ho lona le ho le fa kgotso.

3 Ka mehla re leboha Modimo Ntate wa Morena wa rona Jesu Kreste ha re le rapella 4 hobane re utlwile hore le dumela ho Kreste Jesu ebile le rata badumedimmoho le lona* 5 ka lebaka la moputso oo le o behetsweng lehodimong.+ Le ile la utlwa ka moputso oo ha le ne le bolellwa molaetsa wa nnete wa ditaba tse monate 6 tseo le ileng la di utlwa. Jwalo ka ha ditaba tse monate di eketseha ebile di fihla lefatsheng lohle,+ ke sona se ntseng se etsahala ho lona ho tloha mohla le neng le utlwa mme le tseba nnete ka mosa wa Modimo. 7 Le ithutile dintho tsena ho Epafrase,+ mohlankammoho le rona ya ratehang. Mosebeletsi eo ya tshepahalang wa Kreste o etsa mosebetsi oo re ka beng re o etsa. 8 Hape o re boleletse hore moya o halalelang o le thusa ho ba lerato.

9 Ho tloha mohla re neng re utlwa ka lerato le tumelo ya lona, re ile ra dula re le rapella+ hore le be le tsebo e ngata e nepahetseng+ ka thato ya Modimo le bohlale le hore moya wa Modimo o le thuse ho ba le kutlwisiso.+ 10 Tsela eo le phelang ka yona e lokela ho thabisa Jehova* ebile le lokela ho etsa dintho tse molemo le be le eketse tsebo ya lona e nepahetseng ka Modimo.+ 11 E se eka Modimo a ka le matlafatsa ka matla a hae a maholo,+ e le hore le tle le mamelle dintho tsohle le tiiseditse ebile le thabile. 12 Le ntse le leboha Ntate, ya entseng hore le tshwanelehe ho amohela lefa la bahalaledi+ ba leseding.

13 O re ntshitse lefifing*+ a re isa mmusong wa Mora wa hae eo a mo ratang, 14 ya ileng a re lefella e le hore re lopollwe dibeng, e leng se bolelang hore dibe tsa rona di tshwaretswe.+ 15 Mora enwa o tshwana* le Modimo ya sa bonahaleng+ ebile ke letsibolo la popo yohle+ 16 hobane dintho tse ding tsohle tse lehodimong le lefatsheng di ile tsa boptjwa ho sebediswa yena, dintho tse bonahalang le tse sa bonahaleng,+ ho sa tsotellehe hore na ke diterone, borena, mebuso kapa balaodi. Dintho tse ding tsohle di bopilwe ka yena+ ebile di bopetswe yena. 17 Hape, o bile teng pele ho dintho tse ding tsohle.+ Ho ile ha sebediswa yena ho bopa dintho tse ding tsohle tse teng 18 ebile ke hlooho ya mmele, e leng phutheho.+ Ke qalo ya dintho tsohle. Ke letsibolo, e leng wa pele ya ileng a tsoswa bafung+ e le hore e ka ba yena wa pele dinthong tsohle 19 hobane Modimo o ne a batla hore makgabane ohle a hae a be ho Kreste+ 20 le hore Kreste a etse hore dintho tsohle tse ding, ebang ke tse lehodimong kapa tse lefatsheng, di boelane le yena hape+ e le hore ho be le kgotso ka lebaka la madi+ ao a ileng a a tsholla palong.*

21 Le kile la ba hole le Modimo ebile le le dira tsa hae hobane le ne le dula le nahana ka diketso tse mpe. 22 Modimo o entse hore le boelane le yena a sebedisa mmele wa Mora wa hae ya ileng a shwa hore a le tlise ka pela hae le halalela, le se na molato ebile ho se na letho leo le ka qoswang ka lona.+ 23 Le ha ho le jwalo, le dule le ena le tumelo,+ le tsitsitse motheong,+ le tiile,+ le sa lahle tshepo eo le e fumaneng ha le ne le utlwa ditaba tse monate tse ileng tsa bolelwa lefatsheng lohle.+ Nna Pauluse, ke kgethilwe hore ke bolele ditaba tsena tse monate.+

24 Ke thabela ho sotlwa molemong wa lona.+ Ka ha ke karolo ya mmele wa Kreste, ke ikemiseditse ho dula ke sotlwa. Ke sotlwa tjena molemong wa mmele wa Kreste,+ e leng phutheho.+ 25 Ke bile mosebeletsi phuthehong ena ho latela boikarabelo+ boo Modimo a mphileng bona molemong wa lona. O nkgethile hore ke bolele lentswe la hae ka botlalo 26 e leng lekunutu le halalelang+ le neng le patilwe ho tloha mehleng ya kgale*+ le ho tloha melokong e fetileng. Empa hona jwale le senoletswe bahlanka ba hae.*+ 27 Modimo o tsebisitse ditjhaba tse ding lekunutu lena le halalelang le nang le maruo a mangata a kganyang.+ Lekunutu lena le halalelang ke Kreste ya momahaneng le lona e leng se bolelang hore le na le tshepo ya ho tlotliswa le yena.+ 28 Ke yena eo re buang ka yena. Re eletsa batho bohle ka yena ebile re ba ruta bohlale bohle ka yena hore motho e mong le e mong a tle a eme ka pela Modimo e le molatedi wa Kreste+ ya nang le tumelo e matla. 29 Ke sebetsa ka thata hore ke etse seo ebile ke a ikitlaetsa ka thuso ya matla ao a mphang ona.+