Diketso Tsa Baapostola

3 Petrose le Johanne ba ya tempeleng ho ya rapela ka hora ya boraro,* motshehare wa mantsiboya. 2 Ka nako eo, monna e mong ya hlahileng a holofetse o ne a jerwe a iswa keiting ya tempele e bitswang Keiti e Ntle. O ne a behwa teng letsatsi le leng le le leng e le hore a kope tjhelete ho batho ba kenang ka tempeleng. 3 Ha a bona Petrose le Johanne ba le haufi le ho kena ka tempeleng, a ba kopa tjhelete. 4 Petrose le Johanne ba mo sheba yaba ba re: “Re shebe.” 5 A ba sheba a lebeletse hore ba mo fe ho hong. 6 Le ha ho le jwalo, Petrose a re: “Ha ke na silevera kapa kgauta empa ke o fa ntho eo ke nang le yona. Ka lebitso la Jesu Kreste wa Monazaretha, ema o tsamaye.”+ 7 A mo tshwara ka letsoho le letona, a mo emisa+ yaba maoto a hae le maqaqailana a a tiya.+ 8 A raoha yaba o a tsamaya.+ A kena le bona ka tempeleng a ntse a tlolatlola a bile a rorisa Modimo. 9 Batho bohle ba mo bona a tsamaya a ntse a rorisa Modimo. 10 Ba hlokomela hore monna eo ke yena yane ya neng a tlwaetse ho dula Keiting e Ntle tempeleng a emetse hore batho ba mo fe tjhelete.+ Ba ne ba maketse haholo ha ba bona a se a tsamaya.

11 Ha monna eo a ntse a tshwere Petrose le Johanne ka matsoho, batho ba mathela ho ya bona karolo ya tempele e bitswang Phaseje ya Solomone+ ba maketse haholo. 12 Ha Petrose a ba bona a re ho bona: “Batho ba Iseraele le makaletseng? Ke hobaneng ha le re shebile jwalo ka ha eka re entse hore monna eo a tsamaye ka matla a rona kapa ka lebaka la hore re sebeletsa Modimo ka botshepehi? 13 Modimo wa Abrahama, Isaka le Jakobo,+ Modimo wa baholoholo ba rona, o tlotlisitse Mohlanka wa hae+ Jesu,+ eo le ileng la fana ka yena+ ho dira tsa hae mme la mo latola ka pela Pilato le hoja Pilato yena a ne a entse qeto ya ho mo lokolla. 14 Le ile la latola monna eo ya halalelang le ya lokileng. La kopa hore le lokollelwe mmolai+ 15 yaba le bolaya Moetapele e Moholo ya kgethetsweng ho fana ka bophelo.+ Empa Modimo o mo tsositse bafung mme re dipaki tsa taba eo.+ 16 Ka ha re dumela ho yena, monna enwa eo le mo bonang le eo le mo tsebang o fodisitswe ka lebitso la hae. Tumelo eo re nang le yona ho yena e entse hore monna enwa a fole jwalo ka ha le bona. 17 Bana beso, ke a tseba hore le entse jwalo ka lebaka la ho hloka tsebo+ jwalo ka ha babusi ba lona le bona ba entse.+ 18 Empa Modimo o ile a dumella dintho tsena hore di etsahale e le ho phethahatsa dintho tseo a di phatlaladitseng esale pele ka baprofeta bohle, hore Kreste wa hae o ne a tla utlwa bohloko.+

19 Bakang+ mme le sokolohe,+ dibe tsa lona di tle di hlakolwe+ e le hore Jehova* a ka le kgatholla* 20 a be a romele Kreste eo a le kgethetseng yena e leng Jesu. 21 Jesu o lokela ho dula lehodimong ho fihlela nako e fihla ya hore ho ntjhafatswe dintho tsohle tseo Modimo a ileng a bua ka tsona a sebedisa baprofeta ba hae ba kgale ba halalelang. 22 Moshe o ile a re: ‘Jehova* Modimo wa lona o tla le kgethela moprofeta ya tshwanang le nna hara bana ba bo lona.+ Le mamele dintho tsohle tseo a le bolellang tsona.+ 23 Motho ya sa mameleng Moprofeta eo o tla fediswa.’+ 24 Baprofeta bohle ho tloha ka Samuele ho ya pele le bona ba ile ba bua ka ho hlaka ka matsatsi ana.+ 25 Ke lona bana ba baprofeta le majalefa a selekane seo Modimo a se entseng le baholoholo ba lona+ ha a ne a re ho Abrahama: ‘Ditjhaba* tsohle tsa lefatshe di tla hlohonolofatswa ka lebaka la ngwana* wa hao.’+ 26 Ka mora hore Modimo a kgethe Mohlanka wa hae, o ile a mo romela ho lona pele+ e le hore a le hlohonolofatse ka ho le thusa hore le bakele diketso tsa lona tse fosahetseng.”