Diketso Tsa Baapostola

2 Ha Mokete wa Pentekonta+ o ntse o tswela pele, kaofela ba ne ba le sebakeng se le seng. 2 Ha ba ntse ba dutse, ha eba le lerata le tswang lehodimong le kang moya o fokang ka sekgahla yaba le tlala ntlo eo ba neng ba le ka ho yona.+ 3 Ha hlaha malakabe a mollo a kang maleme. Lelakabe ka leng la dula hodima e mong le e mong. 4 Kaofela ba tlala moya o halalelang+ yaba ba bua dipuo tse fapaneng ho ya ka moo moya o neng o ba tataisa ka teng.+

5 Ka nako eo, Bajuda ba hlomphang Modimo ba tswang ditjhabeng tsohle ba ne ba tlile Jerusalema.+ 6 Ha batho ba utlwa modumo oo ba phutheha, ba makalla hore ebe barutuwa ba bua dipuo tsa bona. 7 Ba bua ba maketse ba re: “Utlwang! Na batho baa ba ntseng ba bua ha se Bagalilea?+ 8 Jwale ho tla jwang hore ebe ba bua dipuo tsa rona? 9 Hara rona mona ke Baparthia, Bamede,+ Baelame,+ baahi ba Mesopotamia, Judea, Kapadosia, Pontase, ba profinse ya Asia,+ 10 ba Frigia, Pamfilia, Egepeta le ba tswang dikarolong tsa Libia e haufi le Saerene. Ho boetse ho na le baeti ba tswang Roma, Bajuda, basokolohi,+ 11 Bakreta le Maarabia. Re utlwa ba bua ka mesebetsi e meholo ya Modimo ka dipuo tsa rona.” 12 Ba ne ba maketse, ba ntse ba botsana hore na ebe ho etsahalang. 13 Ba bang bona ba ne ba ba soma ba re: “Batho bana ba nwele.”*

14 Petrose a ema le baapostola ba 11+ yaba o phahamisa lentswe o re: “Banna ba Judea le lona baahi bohle ba Jerusalema, mmameleng ka hloko. 15 Batho bana ha ba a tahwa jwalo ka ha le nahana hobane ke hona e leng hora ya borobong hoseng.* 16 Ba phethahatsa mantswe a moprofeta Joele ha a ne a re: 17 ‘Modimo o re: “Matsatsing a ho qetela ke tla fa batho bohle moya o halalelang. Bara le baradi ba lona ba tla profeta, bahlankana ba lona ba tla bona dipono le bannabaholo ba lona ba lore ditoro.+ 18 Ka nako eo, ke tla fana ka moya wa ka esita le ho makgoba a ka a banna le a basadi mme a tla profeta.+ 19 Ke tla etsa hore ho be le mehlolo lehodimong le lefatsheng. Ho tla ba le madi, mollo le mosi. 20 Pele letsatsi le leholo la Jehova* le fihla, letsatsi le tla fifala, kgwedi e be kgubedu jwalo ka madi 21 empa e mong le e mong ya tshepetseng* lebitsong la Jehova* o tla pholoha.”’+

22 Batho ba Iseraele, mamelang: Modimo o re bontshitse ka ho hlaka hore Jesu wa Monazaretha o rometswe ke yena ka ha o ile a etsa mesebetsi e meholo le mehlolo ka thuso ya Modimo+ jwalo ka ha le ile la bona. 23 Jesu ke yena eo le ileng la mo tshwara mme la fana ka yena ho batho ba kgopo hore ba mo bolaye ka ho mo kgokgothela palong.+ Modimo o dumetse hore ho be jwalo. Ka hoo, o ne a tseba hore Jesu o tla etsahallwa ke ntho e tjena.+ 24 Empa Modimo o ile a mo tsosa,+ a mo lokolla bohlokong* ba lefu hobane lefu le ne le se na matla a ho dula le mo tshwere.+ 25 Ha Davida a bua ka Jesu o re: ‘Ke dula ke nahana ka Jehova* hobane o ka letsohong la ka le letona hore ke se ke ka tshwenyeha. 26 Ka hoo, pelo ya ka e ile ya nyakalla mme ka bua ke thabile haholo.* Ke tla dula ke ena le tshepo 27 hobane o ke ke wa ntlohela Lebitleng* kapa wa dumella motho ya o tshepahallang hore a bolle lebitleng.+ 28 O ntsebisitse ditsela tse isang bophelong. O tla etsa hore ke thabe haholo ha ke na le wena.’+

29 Bana beso, ke kopa le ntumelle hore ke bue le lona ka bolokolohi ka Davida moholoholo wa rona. O ile a shwa a ba a patwa+ mme lebitla la hae le ntse le le teng ho fihlela jwale. 30 Davida e ne e le moprofeta mme a tseba hore Modimo o ne a mo hlapanyeditse hore o tla beha e mong wa ditloholo tsa hae* teroneng ya hae.+ 31 Ka hoo, o ile a tseba a ba a profeta hore Kreste o tla tsoha le hore a ke ke a tlohelwa Lebitleng* kapa hore mmele wa hae o bole.+ 32 Modimo o ile a fela a tsosa Jesu mme kaofela re dipaki tsa taba eo.+ 33 O ile a phahamisetswa ka letsohong le letona la Modimo,+ a fuwa moya o halalelang oo Ntate a neng a o tshepisitse.+ Ka hoo, o fane ka moya oo jwalo ka ha le bona le bile le utlwa. 34 Davida ha a ka a nyolohela lehodimong empa o itse, ‘Jehova* o itse ho Morenaka: “Dula ka letsohong la ka le letona 35 ho fihlela ke beha dira tsa hao tlasa maoto a hao.”’+ 36 Baiseraele bohle ba ke ba tsebe hore ka nnete Jesu enwa eo le mo kgokgothetseng palong,+ Modimo o mo kgethile hore e be Morena+ hape e be Kreste.”

37 Ha ba utlwa ditaba tsena, ba utlwa bohloko bo tebileng yaba ba re ho Petrose le baapostola ba bang: “Bana beso, re etse jwang?” 38 Petrose a re ho bona: “Bakang+ le be le kolobetswe+ ka lebitso la Jesu Kreste e le hore le tshwarelwe dibe+ mme le tla fuwa mpho ya moya o halalelang. 39 Tshepiso ena+ e etseditswe lona, bana ba lona le batho bohle ba dulang hole, bohle bao Jehova* Modimo wa rona a ka ba bitsetsang ho yena.”+ 40 Petrose a nna a bua mme a fana ka bopaki bo feletseng a bile a ntse a eletsa batho a re: “Le se ke la tshwana le batho bana ba fosahetseng e le hore le ka pholoha.”+ 41 Ba ileng ba thabela ditaba tsa hae ba kolobetswa+ mme batho ba ka bang 3 000 ya eba barutuwa letsatsing leo.+ 42 Ka mehla ba ne ba ithuta dithuto tsa baapostola, ba arolelana dintho tsohle, ba ja mmoho+ ebile ba rapela.+

43 Ha batho ba bona baapostola ba etsa mehlolo e mengata,+ ba hlompha Modimo. 44 Barutuwa bohle ba batjha ba ne ba bokana ebile ba arolelana dintho tsohle. 45 Ba ne ba rekisa dintho tsa bona+ ebe ba arolela bohle tjhelete ho ya ka moo e mong le e mong a hlokang ka teng.+ 46 Ba ne ba ya tempeleng letsatsi le letsatsi ba momahane, ba memana hore ba je mmoho malapeng a bona ka dipelo tse tshweu. 47 Ba ne ba boetse ba rorisa Modimo ebile ba ratwa ke batho bohle. Letsatsi le letsatsi, Jehova* a eketsa barutuwa ba ntseng ba pholoswa.+