Bafilipi

2 Joale, haeba ho e-na le khothatso leha e le efe ho Kreste, haeba ho e-na le matšeliso leha e le afe a lerato, haeba ho e-na le karolelano leha e le efe ea moea,+ haeba ho e-na le lerato le mofuthu+ le qenehelo leha e le efe, 2 le tlatse thabo ea ka ka hore le na le kelello e tšoanang+ ’me le na le lerato le tšoanang, le kopane hammoho moeeng, le bolokile kelellong monahano+ o le mong, 3 le sa etse letho ka lebaka la ho rata likhang+ kapa ka lebaka la ho ipolelisa,+ empa ka ho ikokobetsa kelellong le nka hore ba bang ba le phahametse,+ 4 le sa hlokomele lithahasello tsa litaba tsa lōna feela,+ empa hape le hlokomela lithahasello tsa ba bang.+

5 Bolokang boikutlo bona ba kelello ho lōna bo neng bo le teng le ho Kreste Jesu,+ 6 eo, le hoja a ne a le teng ka sebōpeho sa Molimo,+ a sa kang a nahana ho inkela ka mahahapa, e leng, hore o lokela ho lekana le Molimo.+ 7 Che, empa o ile a ikhokhotha ’me a nka sebōpeho sa lekhoba+ ’me a tšoana le batho.+8 Ho feta moo, ha a iphumana ka sebōpeho e le motho,+ o ile a ikokobetsa ’me a mamela ho isa lefung,+ e, lefu thupeng ea tlhokofatso.+ 9 Ka lebaka lona lena Molimo le eena o ile a mo phahamisetsa boemong bo phahameng+ ’me ka mosa a mo fa lebitso le ka holimo ho mabitso a mang ’ohle,+ 10 e le hore lengole le leng le le leng la ba leholimong le ba lefatšeng le ba ka tlaase ho mobu le ka khumama ka lebitso la Jesu,+ 11 ’me leleme le leng le le leng le bolele pepenene hore le ela hloko hore Jesu Kreste ke Morena+ thorisong ea Molimo Ntate.+

12 Ka lebaka leo, baratuoa ba ka, ka tsela eo le ’nileng la mamela ka eona kamehla, eseng nakong ea ho ba teng ha ka feela, empa joale ka ho ithatela ho eketsehileng nakong ea ho ba sieo ha ka, le ’ne le sebeletse poloko ea lōna ka tšabo+ le thothomelo; 13 etsoe Molimo ke eena eo, ka lebaka la ho khahloa ha hae, a sebetsang+ ho lōna e le hore le rate le be le sebetse.+ 14 Le ’ne le etse lintho tsohle le sa korotle+ ’me le se na likhang,+ 15 e le hore le ka ba ba sa tšoauoeng phoso+ le ba hlokang molato, bana+ ba Molimo ba se nang sekoli har’a moloko o khopameng le o sothehileng,+ oo har’a oona le khanyang le le maseli lefatšeng,+ 16 le tšoere ka thata lentsoe la bophelo,+ e le hore nka ba le sesosa sa thabo e khaphatsehang letsatsing la Kreste,+ hore ha kea ka ka mathela lefeela kapa ka sebetsa ka thata bakeng sa lefeela.+ 17 Ho sa tsotellehe seo, esita le haeba ke ntse ke tšolloa joaloka nyehelo ea seno+ holim ’a sehlabelo+ le tšebeletso ea phatlalatsa eo tumelo e le isitseng ho eona,+ kea nyakalla+ ’me ke thaba le lōna kaofela. 18 Joale ka tsela e tšoanang le lōna le nyakalle ’me le thabe le ’na.+

19 Ke na le tšepo ho Morena Jesu ea ho romela Timothea ho lōna haufinyane, e le hore nka ba moea o hlasimolohileng+ ha ke tseba ka lintho tse le amang. 20 Etsoe ha ke na e mong ea nang le boikutlo bo kang ba hae eo kannete a tla hlokomela+ lintho tse le amang. 21 Etsoe ba bang kaofela ba batla lithahasello+ tsa bona, eseng tsa Kreste Jesu. 22 Empa le tseba bopaki boo a ileng a ipaka ka bona, hore joaloka ngoana+ le ntat’ae e ile ea ba lekhoba le ’na ho ntšetseng pele litaba tse molemo. 23 Ka hona, enoa ke eena monna eo ke nang le tšepo ea ho mo romela hang feela ha ke bone hore na lintho li eme joang malebana le ’na. 24 Ka sebele, ke kholisehile Moreneng hore le ’na ke tla tla haufinyane.+

25 Leha ho le joalo, ke nka ho hlokahala ho romela ho lōna Epafroditase,+ mor’eso le mosebetsi-’moho+ le lesole-’moho,+ empa e le moromuoa oa lōna le mohlanka oa ka bakeng sa seo ke se hlokang, 26 kaha o hlolohetsoe ho le bona kaofela ’me o tepeletse maikutlo hobane le ile la utloa hore o ne a kula. 27 E, ka sebele, o ile a kulela lefu; empa Molimo o ile a mo hauhela,+ ha e le hantle, eseng eena feela, empa le ’na, e le hore ke se ke ka fumana mesarelo holim ’a mesarelo. 28 Ka hona ke mo romela ka ho potlaka ho hoholo, e le hore ha le mo bona le ka thaba hape le hore ke se ke ka ba le mesarelo. 29 Ka hona mo amoheleng+ Moreneng ka tsela e tloaelehileng ka thabo eohle; ’me le ’ne le nke banna ba mofuta oo e le ba bohlokoa,+ 30 hobane ka lebaka la mosebetsi oa Morena o ile a ba lintšing tsa lefu, a pepesetsa moea oa hae kotsi,+ e le hore a ka koala sekheo ka botlalo bakeng sa ho se be teng ha lōna mona hore le nketsetse tšebeletso ea botho.+