Esaia

40 “Tšelisang, tšelisang batho ba ka,” ho bolela Molimo oa lōna.+ 2 “Buang le pelo ea Jerusalema+ ’me le e bolelle hore tšebeletso ea eona ea sesole e phethiloe,+ hore phoso ea eona e lefiloe.+ Etsoe e amohetse letsohong la Jehova karolo e feletseng bakeng sa libe tsohle tsa eona.”+

3 Mamelang! E mong oa hoeletsa lefeelleng:+ “Hlekang tsela ea Jehova!+ Otlollang tsela e khōlō ea Molimo oa rōna thoteng ea lehoatata.+ 4 Phula e ’ngoe le e ’ngoe e ke e phahamisoe,+ ’me thaba e ’ngoe le e ’ngoe le leralla li ke li batalatsoe.+ Sebaka se litutulu e be naha e motsitsa, le sebaka se matsaranka e be thota.+ 5 Ka sebele khanya ea Jehova e tla senoloa,+ ’me nama eohle e tla e bona hammoho,+ etsoe molomo oa Jehova o boletse hoo.”+

6 Mamelang! E mong o re: “Hoeletsa!”+ Eaba e mong o re: “Ke hoeletse ke re’ng?”

“Nama eohle ke joang bo botala, ’me mosa oohle oa bona o lerato o joaloka thunthung ea naha.+ 7 Joang bo botala bo omeletse, thunthung e ponne,+ kahobane moea oa Jehova o fokile holim ’a tsona.+ Ka sebele batho ke joang bo botala.+ 8 Joang bo botala bo omeletse, thunthung e ponne;+ empa ha e le lentsoe la Molimo oa rōna, le tla tšoarella ho isa nakong e sa lekanyetsoang.”+

9 Nyolohela thabeng e phahameng,+ uena mosali ea tlisetsang Sione litaba tse molemo.+ Phahamisa lentsoe la hao ka matla, uena mosali ea tlisetsang Jerusalema litaba tse molemo.+ Le phahamise. U se ke ua tšoha.+ E-re ho metse ea Juda: “Molimo oa lōna ke enoa.”+ 10 Bonang! ’Musi Morena Jehova o tla tla joaloka ea matla, ’me letsoho la hae le tla busa bakeng sa hae.+ Bonang! Moputso oa hae o ho eena,+ ’me moputso oo a o lefang o ka pel’a hae.+ 11 O tla alosa mohlape oa hae joaloka molisa.+ O tla bokella likonyana ka letsoho la hae;+ o tla li beha sefubeng.+ Tse anyesang o tla li tsamaisa ka tlhokomelo.+

12 Ke mang ea lekantseng metsi ka seatla, a lekanya boholo ba maholimo ka boahlamo+ ba seatla ’me a akarelletsa lerōle la lefatše tekanyong eo,+ kapa a lekanya lithaba ka kofuto e lekanyang, le maralla ka sekala? 13 Ke mang ea lekantseng boholo ba moea oa Jehova, ’me ke mang eo joaloka moeletsi oa hae a ka mo tsebisang letho?+ 14 O rerisane hammoho le mang e le hore motho a etse hore a utloisise, kapa ke mang ea mo rutang tsela ea toka, kapa ea mo rutang tsebo,+ kapa ea mo tsebisang tsela ea kutloisiso ea sebele?+

15 Bonang! Lichaba li joaloka lerotholi ka nkhong; ’me li lekantsoe joaloka lerōle sekaleng.+ Bonang! O phahamisa lihlekehleke+ joaloka lerōle feela le lesesaane. 16 Esita le Lebanone ha ea lekana bakeng sa ho boloka mollo o tuka, ’me liphoofolo+ tsa eona tse hlaha ha lia lekana bakeng sa nyehelo ea secheso.+ 17 Lichaba tsohle li tšoana le ho hong ho sa pheleng ka pel’a hae;+ o li lekantse joaloka lefeela le ntho eo e seng ea sebele.+

18 Le ka tšoantša Molimo le mang,+ ’me le ka beha sebōpeho sefe haufi le eena?+ 19 Setsebi sa mesebetsi ea matsoho se foromile setšoantšo se entsoeng ka ho qhibilihisoa,+ ’me ea sebetsang ka tšepe o se koahela ka khauta,+ ’me o tea liketane tsa silevera.+ 20 O khetha sefate se itseng e le monehelo, sefate se sa bolang.+ O ipatlela setsebi sa mesebetsi ea matsoho, bakeng sa ho lokisa setšoantšo se betliloeng+ se ke keng sa sisinngoa.+

21 Na ha le tsebe? Na ha le utloe? Na ha lea bolelloa ho tloha qalong? Na ha lea sebelisa kutloisiso ho tloha ha lefatše le thehoa?+ 22 Ho na le Ea lulang ka holim ’a selika-likoe sa lefatše,+ seo ba lulang ho sona ba leng joaloka marutle, Ea otlollang maholimo feela joaloka lesela le lesesaane la boleng bo botle, ea a alang joaloka tente eo ho luloang ho eona,+ 23 Ea etsang hore balaoli ba phahameng e se ke ea e-ba letho, ea entseng hore baahloli ba lefatše e be ntho eo e seng ea sebele.+

24 Ha ba e-s’o lengoe; ha ba e-s’o jaloe; kutu ea bona ha e e-s’o mele ka metso fatše.+ Ho hlokahala feela hore motho a ba bulule ’me baa omella;+ ’me sefefo se tla ba fefola joaloka litlhaka.+

25 “Empa le ka ntšoantša le mang hoo nka lekanngoang le eena?” ho bolela Mohalaleli.+ 26 “Phahamisetsang mahlo holimo ’me le bone. Ke mang ea bōpileng lintho tsee?+ Ke Ea hlahisang lekhotla la tsona ka palo, e ’ngoe le e ’ngoe o e bitsa le ka lebitso.+ Ka lebaka la bonatla+ ba hae bo boholo, kaha o boetse o na le matla a maholo, ha ho le e ’ngoe ea tsona e haellang.

27 “Etsoe Uena Jakobo, ke ka lebaka lefe u reng, ’me Uena Iseraele, ke ka lebaka lefe u bolelang ho re, ‘Tsela ea ka e patetsoe Jehova,+ ’me toka bakeng sa ka ha e lemohuoe ke Molimo oa ka’?+ 28 Na ha ua tseba kapa ha ua utloa?+ Jehova, ’Mōpi oa lipheletso tsa lefatše, ke Molimo ho isa nakong e sa lekanyetsoang.+ Ha a khathale kapa ho tepella.+ Kutloisiso ea hae e ke ke ea batlisisoa.+ 29 O fana ka matla ho ea khathetseng;+ ’me o etsa hore matla a feletseng a atele ea se nang matla.+ 30 Bashanyana ba tla khathala ’me ba tepelle, ’me ruri bahlankana ba tla khoptjoa, 31 empa ba tšepileng+ Jehova ba tla boela ba fumane matla.+ Ba tla nyoloha ka mapheo a kang a ntsu.+ Ba tla matha ’me ba ke ke ba tepella; ba tla tsamaea ’me ba ke ke ba khathala.”+