Dipesaleme

59 Ntopolle ho lira tsa ka, Molimo oa ka;+

E se eka u ka ntšireletsa ho ba ntsohelang matla.+

 2 Ntopolle ho ba tloaetseng ho etsa se kotsi,+

U mpholose ho batho ba molato oa mali.

 3 Etsoe, bona! ba laletse moea oa ka;+

Ba matla baa ntlhasela,+

Ho se bofetoheli ho ’na, kapa sebe sefe kapa sefe ho ’na, Jehova.+

 4 Le hoja ho se na phoso, baa matha ’me baa itokisa.+

Tsoha ha ke hooa ’me u bone.+

 5 Jehova Molimo oa mabotho, u Molimo oa Iseraele.+

U tsohe hore u lebise tlhokomelo ea hao lichabeng tsohle.+

U se ke ua bontša mohau ho mahlabaphio leha e le afe a kotsi. Selah.

 6 Ba ntse ba khutla ka shoalane;+

Ba ntse ba bohola joaloka ntja+ ’me ba pota motse ka hohle.+

 7 Bona! Ba bua ba sa khaotse ka melomo ea bona;+

Lisabole li melomong ea bona,+

Etsoe ke mang ea mametseng?+

 8 Empa, Jehova, u tla ba tšeha;+

U tla fetola lichaba tsohle litšeho.+

 9 Uena Matla a ka, ke tla lula ke u talimile;+

Etsoe Molimo ke sebaka sa ka se phahameng sa tšireletso.+

10 Molimo oa mosa o lerato ho ’na o tla nkhahlanyetsa;+

Molimo o tla etsa hore ke talime lira tsa ka.+

11 U se ke ua li bolaea, e le hore batho ba heso ba se ke ba lebala.+

Ka mafolofolo a hao u etse hore li lelere,+

U li theole, Uena thebe ea rōna Jehova,+

12 Ka lebaka la sebe sa melomo ea tsona, lentsoe la melomo ea tsona;+

E se eka li ka tšoaseha boikakasong ba tsona,

Esita le ka lebaka la thohako le thetso eo li itlhakisetsang eona.

13 Li felise ka khalefo;+

Li felise, e le hore li se ke tsa e-ba teng;

E se eka li ka tseba hore Molimo o busa Jakobo ho isa lipheletsong tsa lefatše.+ Selah.

14 Li ke li khutle ka shoalane;

Li bohole joaloka ntja ’me li pote motse ka hohle.+

15 Li ke li lelere li batle se jeoang;+

Li se ke tsa khora kapa tsa hlola bosiu.+

16 Empa ha e le ’na, ke tla bina ka matla a hao,+

Hoseng ka thabo ke tla bolela mosa oa hao o lerato.+

Etsoe u bile sebaka se phahameng sa tšireletso ho ’na+

Le sebaka seo ke balehelang ho sona letsatsing la mahlomola a ka.

17 Uena Matla a ka, ke tla u binela lipina tsa thoriso,+

Etsoe Molimo ke sebaka sa ka se phahameng sa tšireletso, Molimo oa mosa o lerato ho ’na.+