Dipesaleme

 2 Ke tetebetse seretseng se tebileng, moo ho se nang sebaka sa ho ema.+

Ke kene metsing a tebileng,

Molapo o phallang o nkhohotse.+

 3 Ke khathalitsoe ke ho hoeletsa;+

’Metso oa ka o omeletse.

Mahlo a ka a feletsoe ke matla ha ke ntse ke letetse Molimo oa ka.+

 4 Ba ntlhoileng ntle ho lebaka ba bangata esita le ho feta moriri oa hlooho ea ka.+

Ba nkhutsisang, e le lira tsa ka ntle ho lebaka, ba bangata.+

Joale ke ile ka khutlisa seo ke neng ke sa ka ka se nka ka tlatlapo.

 5 Molimo, u tseba booatla ba ka,

Molato oa ka ha oa pateha ho uena.+

 6 E se eka ba u tšepileng ba ke ke ba hlajoa ke lihlong ka lebaka la ka,+

’Musi Morena, Jehova oa mabotho.+

E se eka ba u batlang ba ke ke ba kokobetsoa ka lebaka la ka,+

Molimo oa Iseraele.+

 7 Etsoe ke jere nyeliso ka lebaka la hao,+

Tlotlollo e koahetse sefahleho sa ka.+

 8 Ke fetohile ea khaohaneng le barab’eso,+

Le osele ho bara ba ’Mè.+

 9 Etsoe cheseho ea ntlo ea hao e ntjele,+

Linyeliso tsa ba u nyelisang li nkoetse holimo.

10 Ke ile ka lla ka ho itima lijo ha moea oa ka,+

Empa e bile bakeng sa linyeliso ho ’na.+

11 Ha ke entse lesela la mokotla liaparo tsa ka,

Joale ke ile ka fetoha polelo ea maele ho bona.+

12 Ba lulang hekeng ba ile ba qala ho nahanisisa ka ’na,+

Ke ne ke le sehlooho sa lipina tsa ba noang joala bo tahang.+

13 Empa ha e le ’na, thapelo ea ka e ne e lebisitsoe ho uena, Jehova,+

Ka nako e amohelehang, Molimo.+

Ka mosa oa hao o lerato o mongata u nkarabe ka ’nete ea poloko ea hao.+

14 Ntopolle seretseng, e le hore ke se ke ka tetebela.+

E se eka nka lopolloa ho ba ntlhoileng+ le metsing a tebileng.+

15 E se eka molapo o phallang oa metsi o ke ke oa nkhohola,+

Leha e le hore boliba bo ’metse,

Kapa seliba se koale molomo oa sona holim’a ka.+

16 Nkarabe, Jehova, etsoe mosa oa hao o lerato o molemo.+

Retelehela ho ’na ho ea ka bongata ba mehauhelo ea hao,+

17 U se ke ua patela mohlanka oa hao sefahleho sa hao.+

Kahobane ke mahlomoleng, u nkarabe kapele.+

18 U atamele moea oa ka, u o pholose;+

U ntopolle ka lebaka la lira tsa ka.+

19 U tseba nyeliso ea ka le lihlong tsa ka le ho tlotloloha ha ka.+

Bohle ba bontšang bora ho ’na ba ka pel’a hao.+

20 Nyeliso e robile pelo ea ka, ’me leqeba ke le sa phekoleheng.+

Ke ile ka ’na ka lebella hore e mong a bontše kutloelo-bohloko, empa ho ne ho se le ea mong;+

Le batšelisi, empa ha kea ka ka ba fumana.+

21 Empa ba ile ba mpha semela se chefo bakeng sa lijo,+

Ba leka ho ’noesa asene ha ke nyoriloe.+

22 Tafole ea bona e ke e be sefi ka pel’a bona,

Boiketlo ba bona e be leraba.+

23 Mahlo a bona a ke a fifale e le hore a se ke a bona;+

U tetemise matheka a bona kamehla.+

24 Tšollela nyatso ea hao holim’a bona,+

E se eka bohale ba hao bo tukang bo ka ba fihlela.+

25 Liahelo tsa bona tse pota-potiloeng ke lerako li ke li fetohe lesupi;+

E se eka ho ke ke ha e-ba le ea lulang litenteng tsa bona.+

26 Etsoe ba lelekisitse eo u mo otlileng,+

Ba ntse ba pheta bohloko ba bao u ba hlabileng.

27 U buseletse liphoso tsa bona ka phoso,+

E se eka ba ke ke ba kena ho lokeng ha hao.+

28 Ba ke ba hlakoloe bukeng ea ba phelang,+

E se eka ba ke ke ba ngoloa le ba lokileng.+

29 Empa ke hlorile ’me kea opeloa.+

Molimo, e se eka poloko ea hao e ka ntšireletsa.+

30 Ke tla rorisa lebitso la Molimo ka pina,+

Ke tla mo tlotlisa ka liteboho.+

31 Sena e tla boela e be se khahlisang ho Jehova ho feta poho,+

Ho feta pohoana e linaka, e nang le khōla e arohaneng.+

32 Ka sebele ba bonolo ba tla ho bona; ba tla thaba.+

Lōna ba batlang Molimo, lipelo tsa lōna le tsona li tsoele pele li phela.+

33 Etsoe Jehova o mamela mafutsana,+

A ke ke a nyelisa batšoaruoa ba hae.+

34 Leholimo le lefatše li mo rorise,+

Maoatle le ntho e ’ngoe le e ’ngoe e tsamaeang ka ho ’ona.+

35 Etsoe Molimo o tla pholosa Sione+

O tla haha metse ea Juda;+

Ka sebele ba tla lula moo ’me ba e rue.+

36 Bana ba bahlanka ba hae ba tla e rua,+

Ba ratang lebitso la hae ke bona ba tla lula ho eona.+