Ho Ntsha Mpa

SEO BATHO BA SE BUANG

Basadi ba bangata ba ntshang dimpa ba etsa seo ka mabaka a fapaneng, a akarelletsang mathata a ditjhelete, ho se utlwane le ntate wa ngwana, ho lakatsa ho fumana bolokolohi bo eketsehileng tabeng ya mosebetsi kapa thuto le ho se batle ho hodisa bana ba le bang. Batho ba bang ba dumela hore haeba mosadi a ntsha mpa o etsa ntho e mpe kaha o filwe boikarabelo ba ho tlisa ngwana eo lefatsheng le ho mo hlokomela.

SEO BIBELE E SE BUANG

Modimo o nka bophelo bo halalela. (Genese 9:6; Pesaleme ya 36:9) Molaomotheo oo o sebetsa le ho ngwana ya ntseng a hola ka popelong, e leng sebaka se sireletsehileng seo Modimo a se e ntseng e le hore a holele ho sona. Mongodi e mong wa Bibele o ile a re: “O ile wa mpoloka ke sireleditswe ka mpeng ya Mme”. O ile a tswela pele ka hore: “Mahlo a hao a ile a mpona ke sa le lesea le sa tswa emolwa, dikarolo tsohle tsa lona tsa ngolwa fatshe bukeng ya hao, mabapi le matsatsi ao di ileng tsa boptjwa ka ona.”—Pesaleme ya 139:13, 16.

Tsela eo Modimo a tadimang bophelo ba lesea le e so hlahe ka yona e boetse e bonahala molaong oo a neng a o file Baiseraele le hore o boetse o re file letswalo le re tataisang. Molao oo o ne o bontsha hore haeba motho a ne a ka lematsa mosadi wa moimana mme lesea la hae la shwa, o ne a lokela ho bolawa. (Exoda 21:22, 23) Leha ho le jwalo, baahlodi ba ne ba tla hlahlobisisa hore na seo se entswe ka boomo kapa tjhe.—Numere 35:22-24, 31.

Batho ba bopelletswe le letswalo. Haeba mosadi a mamela letswalo a hae mme a sa ntshe mpa o tla thaba.a Empa haeba a sa mamele letswalo la hae mme a ntsha mpa, o tla dula a ikutlwa a le molato. (Baroma 2:14, 15) Diphuputso di bontsha hore hangata basadi ba ileng ba ntsha dimpa ba ba le kgatello ya maikutlo.

Empa re ka etsang haeba re tshaba boikarabelo ba ho hodisa ngwana haholo haeba a ne a sa rerwa? Utlwa seo Modimo a se tshepisang batho ba hae ba tshepahalang: “Ho ya tshepahalang o tla etsa ka botshepehi; ho ya se nang molato . . . o tla sebetsa ka mokgwa o se nang molato.” (Pesaleme ya 18:25) Bibele e boetse e re: “Etswe Jehova o rata toka, a ke ke a tlohela ba tshepahalang ba hae.”—Pesaleme ya 37:28.

“Matswalo a bona a ntse a ba pakela mme, menahanong ya bona, ba ntse ba qoswa kapa ba bile ba emelwa.”—Baroma 2:15.

SEO BATHO BA SE BUANG

Ruth, e leng mme ya se nang molekane o re: “Ke ne ke se ke e na le bana ba bararo mme ke ile ka utlwa eka nke ke ka kgona ho ba hlokomela ha ba se ba le bane. Ha ke qeta ho ntsha mpa, ke ile ka ikutlwa ke le molato.”b Empa na Modimo o ne a ke ke a mo tshwarela?

SEO BIBELE E SE BUANG

Jesu Kreste o ile a hlalosa tsela eo Modimo a shebang dintho ka yona ha a re: “Ke tlilo bitsetsa baetsadibe pakong, eseng batho ba lokileng.” (Luka 5:32) Kahoo haeba re swabela diphoso tsa rona mme re kopa tshwarelo ebile re baka, Modimo o tla re tshwarela esita le haeba re entse dibe tse kgolo. (Esaia 1:18) Pesaleme ya 51:17 e re: ‘Modimo a ke ke a nyedisa kapa a lahla ya pelo e robehileng le e sithabetseng.’

Modimo o boetse o re fa kgotso ya kelello haeba re ikokobetsa mme re kopa hore a re tshwarele. Bafilipi 4:6, 7 e re: “Ka thapelo le thapedi hammoho le diteboho dikopo tsa lona tse matla di ke di tsebiswe Modimo; kgotso ya Modimo e fetang monahano wohle e tla lebela dipelo tsa lona le matla a lona a kelello.”c Kamora hore a ithute Bibele le ho bolella Modimo maikutlo a hae, Ruth o ile a ba le kgotso ya kelello. O ile a ithuta hore Modimo o na le ‘tshwarelo ya nnete.’—Pesaleme ya 130:4.

“[Modimo] ha aa re etsa ho ya ka dibe tsa rona, leha e le hore o re tliseditse se re tshwanelang ho ya ka diphoso tsa rona.”—Pesaleme ya 103:10.