Abrahama le Sara ba Ile ba Mamela Modimo

Haufi le Babele ho ne ho ena le motse o bitswang Ure. Batho ba moo ba ne ba rapela medimo e meng eseng Jehova. Empa ho ne ho ena le monna ya neng a rapela Jehova feela. Lebitso la hae e ne e le Abrahama.

Jehova o ile a re ho Abrahama: ‘Tloha motseng wa heno le ho batho ba heno, o ye naheng eo ke tla o bontsha yona.’ Yaba Modimo o re ho yena: ‘O tla fetoha setjhaba se seholo mme ke tla etsetsa batho kaofela lefatsheng dintho tse ntle ka lebaka la hao.’

Abrahama o ne a sa tsebe hore na Jehova o mo roma hokae empa o ile a tshepa Jehova. Yaba Abrahama, mosadi wa hae Sara, ntate wa hae Tera le ngwana wa abuti wa hae ya bitswang Lota, ba mamela taelo ya Jehova. Ba ile ba nka dintho tsohle tsa bona yaba ba a tsamaya.

Abrahama o ne a le dilemo di 75 ha yena le ba lelapa la hae ba fihla naheng eo Jehova a ba isitseng ho yona. Naha eo e bitswa Kanana. Ha ba le moo Modimo o ile a tshepisa a re: ‘Naha ena kaofela eo o e bonang ke tla e fa bana ba hao.’ Jehova o ne a tla fa bana ba Abrahama naha eo jwang hobane yena le Sara ba ne ba se ba tsofetse hape ba se na bana?