KGAOLO YA 34
Re ka Bontsha Jehova Jwang Hore re a mo Rata?
Na o ikutlwa o le haufi le Modimo ho feta ha o ne o qala ho ithuta Bibele? Na o ka rata hore setswalle sa hao le yena se nne se tiye le ho feta? Haeba ho jwalo, hopola hore ha Jehova a bona o ntse o mo rata le ho feta, o tla o rata a be a o hlokomele le ho feta. O ka mo bontsha jwang hore o a mo rata?
1. Re ka bontsha Jehova jwang hore re a mo rata?
Re ka bontsha hore re rata Jehova ka ho mo mamela. (Bala 1 Johanne 5:3.) Ha a qobelle mang kapa mang hore a mo mamele. Ho fapana le hoo, o fa e mong le e mong wa rona monyetla wa hore a ikgethele hore na o tla mo mamela kapa tjhe. Hobaneng? Hobane Jehova o batla hore re mo mamele “ho tloha pelong.” (Baroma 6:17) Sena se bolela hore o batla hore o mo mamele hobane o mo rata, eseng hobane o tlamehile. Karolo ya 3 le ya 4 tsa buka ena di etseditswe ho o thusa ho bona hore o ka bontsha jwang hore o rata Jehova ka ho etsa dintho tse mo thabisang le ho qoba ho etsa dintho tse ka mo kwatisang.
2. Ke hobaneng ha ho ka nna ha ba thata ho bontsha hore re rata Jehova?
“Ditlokotsi tsa ya lokileng di ngata.” (Pesaleme ya 34:19) Kaofela ha rona ha re a phethahala hape re ka nna ra ba le mathata a ditjhelete, ra tshwarwa hampe kapa ra ba le mathata a mang. Ha re na le mathata, re ka nna ra utlwa ho le thata ho etsa seo Jehova a se batlang. Lebaka ke hore ho ka nna ha ba bonolo ho etsa se fosahetseng ho e na le ho kgahlisa Jehova. Haeba o tshepahalla Jehova ka ho etsa dintho tseo a reng o di etse, o tla be o bontsha hore o mo rata ho feta ntho le ha e le efe hape o tla be o bontsha hore o a mo tshepahalla. Ka hoo, le yena o tla o tshepahalla. A ke ke a o lahla le ka mohla.—Bala Pesaleme ya 4:3.
ITHUTE DINTLHA TSE DING
Ithute hore na ke hobaneng ha Jehova a tsotella hore na o a mo mamela kapa tjhe le hore na o ka thuswa keng hore o dule o mo tshepahalla.
3. Qoso e o amang
Ho ya ka buka ya Jobo, Satane o qositse Jobo hammoho le bohle ba batlang ho sebeletsa Jehova. Bala Jobo 1:1, 6–2:10 ebe le buisana ka dipotso tse tsena:
Ho ya ka Satane, ke hobaneng ha Jobo a ne a mamela Jehova? (Sheba Jobo 1:9-11.)
Satane o qositse batho bohle ka eng? (Sheba Jobo 2:4.)
Bala Jobo 27:5b ebe le buisana ka potso ena:
Jobo o ile a bontsha jwang hore o rata Jehova e le ka nnete?
Jobo o ile a bontsha hore o rata Jehova ka ho dula a mo tshepahalla
Re ka bontsha hore re rata Jehova ka ho dula re mo tshepahalla
4. Thabisa pelo ya Jehova
Bala Liproverbia 27:11 ebe le buisana ka dipotso tsena:
Jehova o ikutlwa jwang ha o le bohlale ebile o mo mamela? Ke hobaneng ha a ikutlwa jwalo?
5. O ka kgona ho tshepahalla Jehova
Tsela eo re ratang Jehova ka yona e re susumelletsa hore re bolelle batho ba bang ka yena. Ka ha re a mo tshepahalla, re etsa jwalo le ha ho le thata. Bapala VIDEO ebe le buisana ka dipotso tse latelang:
Na o ye o utlwe ho le thata ho bolella batho ba bang ka Jehova?
Videong ee, ke eng e thusitseng ntate Grayson hore a be sebete?
Ho bonolo ho tshepahalla Jehova ha re rata dintho tseo a di ratang re bile re hloile tseo a di hloileng. Bala Pesaleme ya 97:10 ebe le buisana ka dipotso tse tsena:
Ho latela seo o ithutileng sona, Jehova o ratang? Tse ding tsa dintho tseo a di hloileng ke dife?
O ka etsang hore o rate se setle, o hloye se sebe?
6. Ho mamela Jehova ho re tswela molemo
Ho mamela Jehova ho molemo ka mehla. Bala Esaia 48:17, 18 ebe le buisana ka dipotso tse tsena:
Na o nahana hore Jehova o dula a tseba dintho tse ka re tswelang molemo? Ke hobaneng ha o tjho jwalo?
O fumane melemo efe ka ho ithuta ka Modimo wa nnete Jehova le ka ho ithuta Bibele?
BATHO BA BANG BA RE: “Modimo ha a tsotelle hore na ke etsang.”
O ka sebedisa lengolo lefe ho bontsha hore dintho tseo re di etsang di ama maikutlo a Jehova?
KAKARETSO
Re ka bontsha hore re rata Jehova ka ho mo mamela le ho mo tshepahalla le ha ho le thata.
Re Ithutileng?
O ithutileng mohlaleng wa Jobo?
O tlo bontsha jwang hore o rata Jehova?
O tla thuswa keng hore o dule o tshepahalla Jehova?
BATLA
Bona hore na o ka etsang hore o tshepahalle Jehova le phutheho ya hae.
Ithute haholwanyane ka seo Satane a qosang batho ka sona.
“Jobo o Dula a Tshepahala” (Bibele—E na le Molaetsa Ofe? Karolo ya 6)
Bona ka moo bana le bona ba ka bontshang hore ba rata Jehova.
Batjha ba ka dula ba tshepahalla Jehova jwang le ha dithaka tsa bona di ba hatella?