Jehova o Tla o Sireletsa Jwang?

 1. Ke hobaneng ha Jesu a ile a kopa hore Jehova a sireletse barutuwa ba hae?

BOSIUNG ba ho qetela pele Jesu a shwa o ile a nahana ka mathata ao barutuwa ba hae ba neng ba tla ba le ona. Ka ha Jesu o ne a rata metswalle ya hae o ile a kopa Ntate wa hae hore a ba “lebele ka lebaka la ya kgopo.” (Joh. 17:14, 15) Jesu o ne a tseba hore ka mora hore a kgutlele lehodimong, Satane Diabolose o tla tswela pele a lwantsha mang kapa mang ya batlang ho sebeletsa Jehova. Ho hlakile hore bahlanka ba Jehova ba ne ba tla hloka ho sireletswa.

 2. Re ka kgodiswa ke eng hore Jehova o tla araba dithapelo tsa rona?

² Jehova o ile a araba thapelo ya Jesu hobane a rata Mora wa Hae. Haeba re etsa sohle se matleng a rona ho kgahlisa Jehova le rona o tla re rata mme a arabe dithapelo tsa rona ha re mo kopa hore a re thuse le ho re sireletsa. Jwalo ka Hlooho ya lelapa e ratang lelapa la yona, Jehova o tla tswela pele a hlokomela bana ba hae. Haeba a sa etse jwalo seo se tla hlompholla lebitso la hae le ho senya botumo ba hae.

 3. Ke hobaneng ha re hloka hore Jehova a re sireletse kajeno?

³ Kajeno re hloka hore Jehova a re sireletse ho feta neng kapa neng. Satane o ile a lelekwa lehodimong “a halefile haholo.” (Tšen. 12:​12) O entse hore batho ba nahane hore ha ba re hlorisa ba etsetsa “Modimo tshebeletso e halalelang.” (Joh. 16:⁠2) Batho ba bang ba sa dumeleng ho Modimo ba a re hlorisa hobane ha re tshwane le bona. Ho sa tsotellehe hore na ba re hlorisetsang, seo ha se re tshose. Hobaneng? Hobane Lentswe la Modimo le re: “Morena o a tshepahala, mme o tla le tiisa le ho le boloka ho ya kgopo.” (2 Bathes. 3:⁠3) Jehova o re sireletsa jwang? A re ke re bueng ka ditsela tse pedi tseo a re sireletsang ka tsona.

 4. Ho ya ka Baefese 6:13-17, Jehova o re file eng ho re sireletsa?

⁴ Jehova o re file dihlomo tsa ntwa tse tla re sireletsa ha Satane a re hlasela. (Bala Baefese 6:​13-17.) Dihlomo tsena tsa ntwa tseo Modimo a re fileng tsona di matla mme di sebetsa hantle. Le ha ho le jwalo, di tla re sireletsa haeba re dula re di sebedisa kaofela ha tsona. Sehlomo ka seng se emela eng? A re ke re bueng ka tsona.

 5. Lebanta la nnete ke eng, hona ke hobaneng ha re lokela ho le tlama?

⁵ Lebanta la nnete le emela nnete eo re e fumanang ka Lentsweng la Modimo e leng Bibele. Ke hobaneng ha re lokela ho tlama lebanta lee? Hobane Satane “ke ntate wa leshano.” (Joh. 8:44) Haesale a bua leshano ka dilemo tse ngata mme o kgelositse “lefatshe lohle leo ho ahilweng ho lona.” (Tšen. 12:9) Empa nnete eo re e fumanang ka Bibele e a re sireletsa hore re se ke ra kgeloswa. Re ka le tlama jwang lebanta lee la tshwantshetso? Re ka etsa seo ka ho ithuta seo e leng nnete ka Jehova, ka ho mo rapela “ka moya le ka nnete” le ka ho itshwara ka botshepehi dinthong tsohle.​—Joh. 4:24; Baef. 4:25; Baheb. 13:18.

 6. Tshireletso ya sefuba ya ho loka ke eng, hona ke hobaneng ha re lokela ho e apara?

⁶ Tshireletso ya sefuba ya ho loka e emela melao ya Jehova e lokileng. Ke hobaneng ha re lokela ho apara tshireletso ya sefuba? Feela jwalo ka ha tshireletso ya sefuba e sireletsa pelo ya lesole, ka ho tshwanang tshireletso ya sefuba ya ho loka e sireletsa pelo ya rona ya tshwantshetso kapa motho eo re leng yena ka hare tshusumetsong e mpe ya lefatshe lena. (Liprov. 4:23) Jehova o lebelletse hore re mo rate re be re mo sebeletse ka pelo yohle. (Mat. 22:36, 37) Ka hoo, Satane o leka hore re kgaotse ho sebeletsa Jehova ka pelo yohle ka hore re rate dintho tse lefatsheng tseo Jehova a di hloileng. (Jak. 4:4; 1 Joh. 2:15, 16) Ha a sa atlehe, o leka ho re tshosa hore re se ke ra mamela melao ya Jehova.

 7. Ke jwang re ka aparang tshireletso ya sefuba ya ho loka?

⁷ Re apara tshireletso ya sefuba ya ho loka ka hore re mamele melao ya Jehova ya se nepahetseng le se fosahetseng le ka hore re phele ka yona. (Pes. 97:10) Batho ba bang ba ka nna ba nahana hore melao ya Jehova ha e re fe bolokolohi. Empa haeba re tlohela ho sebedisa melaomotheo ya Bibele bophelong ba rona re tla tshwana le lesole le hlobolang tshireletso ya lona ya sefuba ntweng hobane le nahana hore e boima haholo. Hoo e tla be e se bohlale hohang. Empa haeba re rata Jehova, ditaelo tsa hae ha di be “boima” empa di sireletsa bophelo.​—1 Joh. 5:3.

 8. Ho rwala dihlomo tsa ditaba tse molemo maotong ho bolelang?

⁸ Pauluse o ile a re kgothalletsa hore maoto a rona a rwale dihlomo tsa ditaba tse molemo tsa kgotso. Ka mantswe a mang re lokela ho dula re itokiselleditse ho bolela ditaba tse molemo tsa Mmuso wa Modimo. Tumelo ya rona e a matlafala ha re bolella batho ba bang molaetsa wa Bibele. Ke ho kgothatsang ho bona ka moo batho ba Jehova lefatsheng lohle ba sebedisang monyetla o mong le o mong o hlahang ho ruta batho Bibele. Ka mohlala, ba ruta batho Bibele ha ba le mosebetsing, sekolong, ka ntlo le ntlo, dibakeng tsa kgwebo, ha ba ya dishopong, ha ba etetse ba leloko bao e seng Dipaki, ha ba bua le batho bao ba ba tsebang le ha ba sa kgone ho tswa ka matlong ka nakwana. Haeba re tshoha hoo re tlohelang ho bolela ditaba tse molemo re tla tshwana le lesole le rolang dieta tsa lona ntweng mme seo se ka etsa hore maoto a lona a tswe kotsi. Seo se tla etsa hore ho be thata ha le lwana hore le itshireletse le ho mamela ditaelo tsa molaodi wa lona.

 9. Ke hobaneng ha re lokela ho tshwara thebe e kgolo ya tumelo?

⁹ Thebe e kgolo ya tumelo e emela tumelo eo re nang le yona ho Jehova. Re na le tumelo ya hore o tla phethahatsa ditshepiso tsohle tsa hae. Tumelo eo e tla re thusa hore re ‘time metsu yohle e tukang ya ya kgopo.’ Ke hobaneng ha re lokela ho tshwara thebe ena e kgolo? Hobane e tla re sireletsa hore re se ke ra thetswa ke dithuto tsa bakwenehi le hore re se ke ra nyahamiswa ke batho ba somang seo re se dumelang. Haeba re se na tumelo re ke ke ra ba le matla a ho hana ha batho ba bang ba re susumelletsa hore re se ke ra mamela melao ya Jehova. Nako le nako ha re hana ho etsa ntho eo Jehova a sa e batleng, ebang ke sekolong kapa mosebetsing seo se tla be se bontsha hore re tshwere thebe ya rona. (1 Pet. 3:15) Ka mehla ha re hana mosebetsi o re patalang tjhelete e ngata hobane o re sitisa ho sebeletsa Jehova hantle, seo se tla be se bontsha hore re tshwere thebe ya rona. (Baheb. 13:5, 6) Nako le nako ha re sebeletsa Jehova ho sa tsotellehe ho hanyetswa seo se bontsha hore thebe ya rona ya tumelo e re sireleditse.​—1 Bathes. 2:2.

10. Helmete ya poloko ke eng hona ke hobaneng ha re lokela ho e rwala?

¹⁰ Helmete ya poloko ke tshepo eo Jehova a re fang yona. Ke tshepo ya hore o tla re tsosa ha re hlokahetse mme o tla putsa bohle ba etsang thato ya hae. (1 Bathes. 5:8; 1 Tim. 4:10; Tite 1:1, 2) Feela jwalo ka ha helmete e sireletsa hlooho ya lesole, ka ho tshwanang tshepo ya poloko eo re nang le yona e sireletsa tsela eo re nahanang ka yona. E re sireletsa jwang? E re thusa hore re dule re nahana ka ditshepiso tseo Modimo a re tshepisitseng tsona mme e re thusa hore re se ke ra ikutlwa re imetswe ke mathata ao re nang le ona. Helmete ena re e rwala jwang? Re e rwala ka hore re etse bonnete ba hore re nahana ka tsela eo Modimo a nahanang ka yona. Ka mohlala, re tshepa Modimo eseng maruo a sa tsitsang.​—Pes. 26:2; 104:34; 1 Tim. 6:17.

11. Sabole ya moya ke eng, hona ke hobaneng ha re lokela ho e sebedisa?

¹¹ Sabole ya moya ke Lentswe la Modimo e leng Bibele. Sabole ena e na le matla a ho pepesa leshano le ha e le lefe le ho lopolla batho dithutong tse fosahetseng le mekgweng e ka ba ntshang kotsi. (2 Bakor. 10:4, 5; 2 Tim. 3:​16, 17; Baheb. 4:12) Re ithuta ho sebedisa sabole eo hantle ka ho ithuta Bibele re le bang le ka kwetliso eo re e fumanang mokgatlong wa Modimo. (2 Tim. 2:​15) Ntle le dihlomo tsa ntwa tseo a re fileng tsona, ho na le tsela e nngwe hape eo Jehova a re sireletsang ka yona. Ke tsela efe?

12. Ke eng hape eo re e hlokang, hona hobaneng?

¹² Lesole le nang le boiphihlelo le a tseba hore le ke ke la kgona ho atleha ho lwana le masole a mangata le le leng, le hloka thuso ya masole a mang. Ka ho tshwanang re ke ke ra atleha ho hanela Satane le balatedi ba hae re le bang, re hloka tshehetso ya bara le baradibabo rona. Jehova o re file “mokgatlo ohle wa barababo rona” lefatsheng lohle ba teng bakeng sa ho re thusa.​—1 Pet. 2:17.

13. Ho ya ka Baheberu 10:24, 25, ho ya dibokeng ho re thusa jwang?

¹³ Tsela e nngwe eo re fumanang tshehetso ka yona ke ka ho ya dibokeng. (Bala Baheberu 10:24, 25.) Kaofela ha rona ka dinako tse ding re a nyahama empa ha re ya dibokeng re a kgothala. Re kgothatswa ke dikarabo tse tswang pelong tsa bara le baradibabo rona. Dipuo tse thehilweng Bibeleng le dipontsho tse fanwang dibokeng di a re matlafatsa hore re tswele pele ho sebeletsa Jehova. Ha re bua le bara le baradibabo rona pele ho diboka le ka mora diboka re a kgothala. (1 Bathes. 5:14) Hape diboka di re fa monyetla wa hore re thuse batho ba bang mme seo se a re thabisa. (Lik. 20:35; Bar. 1:11, 12) Diboka di re thusa ka ditsela tse ding hape. Di re thusa hore re atlehe ha re ruta batho Bibele. Ka mohlala, re ithuta ho sebedisa dithulusi tseo re di fumanang ho Dithulusi Tsa ho Ruta hantle. Jwale lokisetsa hantle bakeng sa diboka mme o mamele ka hloko ha o le dibokeng. Ka mora diboka, sebedisa seo o ithutileng sona dibokeng. Ha o etsa dintho tsena, o tla ba “lesole le kgabane la Kreste Jesu.”​—2 Tim. 2:3.

14. Ke thuso efe hape eo re e fumanang?

¹⁴ Re boetse re thuswa ke mangeloi a mangata a nang le matla. Nahana feela hore na lengeloi le le leng le ka etsa eng. (Esa. 37:36) Jwale nahana ka seo lebotho la mangeloi a matla le ka se etsang, ha ho na motho kapa modemona ya ka hlolang lebotho la ntwa la Jehova. Jehova o na le matla, ha a na le rona ka mehla re tla dula re le matla ho feta batho ba re hanyetsang ho sa tsotellehe hore na ba bangata hakae. (Baahl. 6:​16) Re ka kgodiseha hore sena ke nnete. Dula o hopola sena nakong eo o ikutlwang o nyahame ka lebaka la seo motho eo o sebetsang le yena, o kenang sekolo le yena kapa wa leloko eo e seng Paki a se buang kapa a se etsang. Hopola hore ha o lwane o le mong empa o latela tataiso ya Jehova.

15. Ho ya ka Esaia 54:15, 17, ke hobaneng ha ho se na motho ya ka kgonang ho etsa hore batho ba Modimo ba kgaotse ho bolela ditaba tse molemo?

¹⁵ Batho ba phelang lefatsheng lena le buswang ke Satane ba na le mabaka a mangata a ho re hloya. Ha re tshehetse eng kapa eng e amanang le dipolotiki mme ha re kenelle dintweng. Re bolella batho ka lebitso la Modimo le ho ba bolella hore ke Mmuso wa Modimo feela o tla tlisa kgotso lefatsheng mme re mamela melao ya hae. Re tiisetsa batho hore mmusi wa lefatshe lena ke raleshano ebile ke mmolai. (Joh. 8:44) Hape re phatlalatsa hore lefatshe la Satane haufinyane le tlo fediswa. Satane le batho ba mo latelang ba ke ke ba etsa hore re kgaotse ho ruta batho Bibele. Ha e le hantle, re tla tswela pele re rorisa Jehova ka hohle ka moo re ka kgonang. Le hoja Satane a na le matla, ha a eso ka a atleha hore a thibele batho ba Modimo hore ba bolelle batho molaetsa wa Mmuso wa Modimo lefatsheng lohle. Lebaka ke hobane re sireleditswe ke Jehova.​—⁠Bala Esaia 54:15, 17.

16. Jehova o tla sireletsa batho ba hae jwang nakong ya matshwenyeho a maholo?

¹⁶ Re lebelletse eng? Nakong ya matshwenyeho a maholo, Jehova o tla re sireletsa ka ditsela tse pedi tse hlollang. O tla qala pele ka ho sireletsa bahlanka ba hae ba tshepahalang nakong eo a etsang hore marena a lefatshe a fedise Babylona e Moholo e leng mmuso wa bodumedi ba bohata. (Tšen. 17:16-18; 18:2, 4) Ebe ka mora moo o sireletsa batho ba hae nakong eo a fedisang karolo e setseng ya lefatshe la Satane ka Armagedone.​—Tšen. 7:9, 10; 16:14, 16.

17. Haeba re dula re na le kamano e ntle le Jehova seo se tla re thusa jwang?

¹⁷ Ha re dula re na le kamano e ntle le Jehova, Satane a ke ke a re utlwisa bohloko ka ho sa feleng. Ho e na le hoo, e tla ba yena ya tla fediswa ka ho felletseng. (Bar. 16:20) Ka hoo, apara dihlomo tse felletseng tsa ntwa mme o dule o di apere. O se ke wa leka ho lwantsha Satane le lefatshe la hae o le mong. Tshehetsa Bakrestemmoho le wena mme o latele tataiso ya Jehova. Haeba o etsa jwalo o tla kgodiseha hore Ntate wa hao ya lehodimong ya lerato o tla o matlafatsa le ho o sireletsa.​—Esa. 41:10.