Ho Baheberu

7 Melkizedeke e ne e le morena wa Saleme ebile e le moprista wa Modimo ya Phahameng ka ho Fetisisa. Ha Abrahama a kgutla ntweng eo a neng a tswa hlola marena ho yona, Melkizedeke o ile a mo kgahlanyetsa mme a mo hlohonolofatsa.+ 2 Abrahama o ile a mo fa karolo ya leshome ya dintho tsohle tse neng di hapilwe. Lebitso la Melkizedeke ha le fetolelwa ke “Morena ya Lokileng.” Hape ke morena wa Saleme e bolelang “Morena wa Kgotso.” 3 Ha ho tsejwe hore na ntate wa hae le mme wa hae ke bomang. Ha ho na tlaleho ya leloko labo. Ha ho tsejwe hore na o hlahile neng le hore na o shwele neng. Ka mabaka ana, o tshwana le Mora wa Modimo mme o tla dula e le moprista ka ho sa feleng.+

4 Monna eo o ne a le bohlokwa hakaakang! Ha se feela Abrahama hlooho ya lelapa,* a ileng a mo fa karolo ya leshome ya dintho tse ntlehadi tseo a neng a di hapile.+ 5 Ke nnete hore ho ya ka Molao, Balevi+ ba neng ba kgethilwe hore e be baprista, ke bona ba neng ba laetswe ho nka karolo ya leshome ho bana ba bo bona+ le hoja bana bao ba bo bona e ne e le ditloholo tsa Abrahama. 6 Athe monna enwa ya sa tsweng lelokong la Levi, o ile a nka karolo ya leshome ho Abrahama ya neng a etseditswe ditshepiso a ba a mo hlohonolofatsa.+ 7 Ha ho ya ka hanang hore e monyenyane o hlohonolofatswa ke e moholo. 8 Balevi ba neng ba fumana karolo ya leshome e ne e le batho ba shwang empa Melkizedeke yena mangolo a a paka hore o a phela.+ 9 Hape ho ka thwe Levi ya neng a fuwa karolo ya leshome le yena o ile a e ntsha ka Abrahama 10 hobane ha Melkizedeke a kopana le Abrahama,+ Levi e ne e le hona a tlo hlaha e le setloholo sa Abrahama.

11 Boprista ba leloko la Levi e ne e le karolo ya Molao wa Moshe o neng o fuwe Baiseraele. Haeba baprista ba leloko la Levi ba ne ba ka kgona ho etsa hore batho ba phethahale,+ na re ne re hloka moprista ya tshwanang le Melkizedeke?+ Na ho ne ho sa lekana ho ba le baprista ba tshwanang le Arone? 12 Haeba boprista bo a fetolwa, le Molao o lokela ho fetolwa.+ 13 Monna enwa eo ho buuwang ka yena o ne a tswa lelokong le leng leo ho lona ho neng ho se na motho ya kileng a sebeletsa aletareng.+ 14 Ho hlakile hore Morena wa rona o tswa lelokong la Juda+ empa Moshe ha a ka a bua letho ka hore baprista ba tla hlaha lelokong leo.

15 Taba ena e hlaka le ho feta ha ho hlaha moprista+ ya kang Melkizedeke,+ 16 eo e bileng moprista ka matla a etsang hore a phele ka ho sa feleng+ eseng ka lebaka la leloko leo a tswang ho lona jwalo ka ha molao o ne o laela. 17 Lengolo le leng le re: “O moprista ka ho sa feleng ka tsela e tshwanang le ya Melkizedeke.”+

18 Ka hoo, taelo e tlileng pele e fedisitswe hobane e a haellwa ebile ha e sebetse.+ 19 Molao ha o a ka wa fedisa sebe+ empa tshepo eo Modimo a re fileng yona+ e molemo hobane e kgona ho fedisa sebe. Re atamela ho Modimo ka lebaka la tshepo eo.+ 20 Ka ha Modimo o ile a etsa kano ha a kgetha Jesu hore e be moprista, 21 (ho na le banna ba ileng ba kgethwa hore e be baprista ho sa etswa kano empa ha Jesu e eba moprista, o ile a etsetswa kano ke Modimo ya ileng a re ka yena: “Jehova* o ikanne mme a ke ke a fetola maikutlo a hae,* o itse, ‘O moprista ka ho sa feleng.’”)+ 22 Jesu e bile bopaki bo tiisang hore ho na le selekane se molemo le ho feta.+ 23 Hape baprista ba ile ba hloleha ho tswela pele ka mosebetsi wa bona wa boprista hobane ba ile ba shwa yaba ba nkelwa sebaka ke baprista ba bang.+ 24 Empa ka ha Jesu o tla phela ka ho sa feleng,+ ha ho na motho ya tla mo hlahlama bopristeng. 25 O kgona ho pholosa ka ho phethahetseng ba rapelang Modimo ka lebitso la hae hobane o tla dula a phela e le hore a ba kopele thuso ho Modimo.+

26 Re hloka moprista ya phahameng ya tshwanang le enwa ya tshepahalang, ya se nang molato, ya sa silafalang,+ ya fapaneng hole le baetsadibe le ya phahamiseditsweng ka hodima mahodimo.+ 27 Ho fapana le baprista bane ba phahameng, Jesu yena ha a hloke ho etsa mahlabelo letsatsi le leng le le leng+ bakeng sa dibe tsa hae le tsa batho ba bang.+ O entse jwalo hanngwe ebile e le la ho qetela ha a ne a fana ka bophelo ba hae e le sehlabelo.+ 28 Molao o kgetha banna ba nang le bofokodi hore e be baprista ba phahameng+ empa ho ya ka kano+ e tlileng ka mora Molao, ho kgethwa Mora ya dulang a se na sebe+ ka ho sa feleng.