MOSA, Tholwana eo re ka e Bontshang ka Diketso le Dipolelo

RURI mosa o a hlasimolla ho ba o bontshwang. Ha re lemoha hore re a tsotellwa, seo se a re thabisa. Ka ha e mong le e mong wa rona o labalabela ho bontshwa mosa, ebe ke jwang re ka bang le tholwana ena?

E le hore o bontshe ba bang hore o fela o le mosa e le ka nnete, o lokela ho ba kgathalla mme o bontshe seo ka diketso le dipolelo. Ka ha tholwana ena e bontshwa ka diketso, ha ho a lekana hore re etse dintho tse ntle hore fela re bonwe ke batho. Ho rata batho le ho ba hauhela ho tla re thusa hore re be le mosa wa nnete. Ho feta moo, mosa ke tholwana ya moya wa Modimo mme Bakreste ba kgothalletswa hore ba be le yona. (Bagal. 5:22, 23) A re ke re tshohleng ka moo Jehova le Mora wa hae ba ileng ba bontsha tholwana ena ka teng mme re ba etsise.

Jehova o mosa ebile o kgathalla batho bohle ho akarelletsa le bona bana “ba se nang teboho le ba kgopo.” (Luka 6:35) Nka ka mohlala feela, “o tjhabisetsa batho ba kgopo le ba molemo letsatsi la hae mme o nesetsa batho ba lokileng le ba sa lokang pula.” (Mat. 5:45) Ka hona, esita le batho ba sa dumeleng hore Jehova ke Mmopi, ba ntse ba fumana molemo ka lebaka la mosa oo a ba bontshang ona mme sena se etsa hore ba thabele bophelo.

Re ka fumana mohlala o motle wa ho bontsha mosa ho seo Jehova a ileng a se etsetsa Adama le Eva. Nakwana ka mora hore ba etse sebe, ba ile ba roka “makgasi a feiga yaba ba iketsetsa diaparo tsa letheka.” Jehova o ne a tseba hore ba ne ba tla hloka diaparo tse loketseng e le hore ba kgone ho phela ka ntle ho serapa sa Edene. Etswe le lefatshe le ne le se le rohakilwe mme jwale le medisa “meutlwa le dihlabahlabane.” Ka lebaka leo he, Jehova o ile a ba bontsha mosa mme a ba etsetsa “diaparo tse telele tsa letlalo.”—Gen. 3:7, 17, 18, 21.

Le hoja Jehova a bontsha mosa ho ba “kgopo le ba molemo,” o bontsha mosa o fetang oo ho bahlanka ba hae ba tshepahalang. Ka mohlala, mehleng ya moprofeta Zakaria, lengeloi le ile la utlwa bohloko ha le bona batho ba emisa ho haha tempele e Jerusalema. Yaba Jehova o sekehela lengeloi lena tsebe ka ho bua “mantswe a molemo, [le] mantswe a tshedisang.” (Zak. 1:12, 13) Jehova o ile a etsa se tshwanang le ho moprofeta Elia. Ka nako e nngwe moprofeta enwa o ile a sithabela maikutlo ha bohloko hoo a ileng a kopa Jehova hore a mpe a itjhwelle. Le boemong bona Jehova o ile a mamela maikutlo a Elia mme a romela lengeloi ho mo matlafatsa. Ho phaella ho seo, Modimo o ile a kgodisa moprofeta Elia hore ha a mong. Ka mora hore Elia a utlwe mantswe ana a kgothatsang a tlileng ka nako eo a neng a a hloka ka yona, o ile a kena kgabong. (1 Mar. 19:1-18) Hara bahlanka bohle ba Modimo, ke ofe ho bona ya ileng a ipabola ka ho bontsha tholwana ena ya mosa?

Ha Jesu a ne a etsa tshebeletso ya hae mona lefatsheng, o ne a tsebahala e le motho ya mosa le ya nahanelang batho ba bang. E ne e se mpodi. Re bona sena ha ka mosa a ne a re: “Tloong ho nna, lona bohle ba sehlang le ba imetsweng, mme ke tla le kgatholla. . . . Etswe joko ya ka e mosa.” (Mat. 11:28-30) Sena se ile sa susumelletsa batho hore ba mo latele hohle moo a neng a ya teng. Yaba Jesu o “susumetswa ke kgauho” mme a ba fepa, a fodisa ba kulang le ba holofetseng haesitana le ho ba ruta “dintho tse ngata” tse mabapi le Ntate wa hae.—Mar. 6:34; Mat. 14:14; 15:32-38.

Mosa wa Jesu o ne o bontsha hore e ne e le motho ya utlwisisang le ya nahanelang batho ba bang. O ne a bile a tela le nako ya hae ya boinotshing e le hore feela a bontshe ba bang mosa. (Luka 9:10, 11) Ha a a ka a halefa ha mosadi e mong ya neng a na le phallo ya madi a ama seaparo sa hae sa ka ntle ka tshepo ya hore o tla fola. (Lev. 15:25-28) Jesu o ile a qenehela mosadi enwa wa batho ya neng a qetile dilemo tse 12 kaofela a kula, mme a re: “Moradi, tumelo ya hao e o fodisitse. Tsamaya ka kgotso, mme o fole bolwetseng ba hao bo bohloko.” (Mar. 5:25-34) Eo e bile ketso e tsotehang hakaakang ya ho bontsha mosa.

Jwalo ka ha re se re ithutile mehlaleng ena e boletsweng ka hodimo, mosa wa nnete o bontshwa ka diketso. Jesu o ile a hatisa bohlokwa ba sena papisong ya hae ya Mosamaria ya nang le moya wa boahelani. Le hoja Basamaria le Bajuda ba ne ba hloyane, monna enwa wa Mosamaria ya boletsweng papisong, o ile a hauhela monna wa Mojuda ya neng a kgakgathuwe ke mashodu mme a mo siya ka thoko ho tsela a le makgatheng a lefu. Ho hlakile hore Mosamaria enwa o ile a susumetswa ke mosa hore a etse ketso eo. O ile a oka monna enwa wa Mojuda mme a mo isa ntlong ya baeti hore a ilo hlokomelwa teng. Yaba Mosamaria o patala bahlokomedi ditshenyehelo tsa bona tsohle.—Luka 10:29-37.

Le hoja hangata mosa o bontshwa ka diketso, o ka boela hape wa bontshwa le ka dipuo tse molemo. Ke ka hoo Bibele e reng “ho tshwenngwa ke dipelaelo ka pelong ya motho ho tla etsa hore e thulame,” athe “lentswe le molemo le etsa hore e thabe.” (Liprov. 12:25) Re ka hlasimolla ba bang ka ho bua dipuo tse molemo le tse hahang mme sena se tla etsa hore ba thabe.a Ka tsela eo, ba tla kgothala mme ba tobane le diteko tsa bophelo ka katleho.—Liprov. 16:24.

Ka ha re entswe “ka setshwantsho sa Modimo,” re ka kgona ho ba mosa. (Gen. 1:27) Lesole la Moroma le bitswang Juliase leo moapostola Pauluse a neng a behilwe tlhokomelong ya lona, le ile la mo tshwara hantle. Ka mosa le ile ‘la mo dumella ho ya ho metswalle ya hae e le hore e mo hlokomele’ ha ba le motseng wa Sidone. (Lik. 27:3) Athe ha morao baahi ba Malta le bona ba ile ba bontsha Pauluse le batho ba bang “mosa o fetang o tlwaelehileng” ha ba robehetswe ke sekepe. Esita le baahi ba dihlekehlekeng ba ile ba ba ba ba besetsa mollo e le hore ba futhumale. (Lik. 28:1, 2) Ke nnete hore batho bana ba boletsweng ka hodimo ba lokela ho babatswa ka mosa oo ba o bontshitseng. Le ha ho le jwalo, e le hore re be le mosa wa nnete, re lokela ho etsa ho fetang feela ho bontsha ketsonyana e le nngwe feela ya mosa ka nakwana.

E le hore re thabise Modimo, re lokela ho etsa hore ho ba mosa e be karolo ya bophelo ba rona. Etswe Jehova o re re “ikapese” mosa. (Bakol. 3:12) Ke nnete hore ha se ntho e bonolo ho bontsha mosa. Ebe ke hobaneng ha re tjho jwalo? E ka nna yaba lebaka ke hore ba bang ba rona re dihlong, ha re itshepe, re a hanyetswa kapa mohlomong re ntse re na le boikutlonyana bo setseng ba ho itjheba borona feela. Le ha ho le jwalo, re ka hlola tseo tsohle ka ho itshetleha ka moya o halalelang le ka ho lwanela ho etsisa Jehova.—1 Bakor. 2:12.

Na ho na le moo re lokelang ho ntlafatsa e le hore re bontshe mosa? Re lokela ho ipotsa: ‘Na mokgwaka ke motho ya mamelang ka hloko? Na ke tsepamisa maikutlo ditlhokong tsa ba bang? Ke qetetse neng ho bontsha mosa ho motho eo eseng wa lelapa kapa motswalle?’ Ka mora ho itlhahlobisisa ka dipotso tsena, ebe jwale re iketsetsa moralo wa ho tsebana ha molemo le batho ba re potolohileng, haholoholo Bakrestemmoho. Ha re etsa jwalo, re tla kgona ho ikenya dieteng tsa bona ha ba hloka thuso. Ere ka mora moo, re leke ho bontsha ba bang mosa ka tsela e tshwanang le eo re neng re tla thabela hore ba re bontshe mosa ka yona. (Mat. 7:12) Qetellong, Jehova o tla re hlohonolofatsa ka lebaka la boiteko ba rona ba ho bontsha mosa, le teng haeba re mo kopa.—Luka 11:13.

Ha moapostola Pauluse a bolela lethathamo la dintho tse neng di mo kgetholla jwalo ka mohlanka wa Modimo, o ile a balella “mosa” hara tsona. (2 Bakor. 6:3-6) Batho ba ne ba rata Pauluse hobane le yena o ne a rata batho a bile a ba tshwara le ho bua le bona ka mosa. (Lik. 28:30, 31) Ka tsela e tshwanang, le rona re ka hulela batho nneteng ka ho ba bontsha mosa. Ha re bontsha batho bohle mosa ho akarelletsa le bona bana ba re hanyetsang, re tla ba kokobetsa bohale. (Bar. 12:20) Mohlomong ka mora nako, le bona ba tla thabela ho ithuta Bibele.

Ha ho potang hore batho ba tlang ho tsoswa nakong e tlang, ba tla thabela ho tshwarwa ka mosa, mohlomong ebile e le lekgetlo la bona la pele. Sena se tla ba susumelletsa hore le bona ba bontshe ba bang mosa. Ka bomadimabe, motho ya tla hana ho bontsha ba bang mosa ka nako eo, ka nnete ha habo ke naheng. Ka lehlakoreng le leng, batho bao Modimo a ba amohelang ba tlang ho phela ka ho sa feleng, bona ba tla tshwarana ka mosa dinthong tsohle. (Pes. 37:9-11) Ke mang ya sa batleng ho phela lefatsheng leo ho tla beng ho rena kgotso jwalo? Empa ha re ntse re emetse nako eo e monate, ke jwang re ka fumanang melemo e tliswang ke ho ba mosa hona jwale?

Bibele e re motho ya nang le mosa o itswela molemo. (Liprov. 11:17) Batho ba rata motho ya mosa hoo qetellong le bona ba seng ba ba mosa. Ke ka hona Jesu a ileng a re: “Tekanyo eo le lekanyang ka yona, ba tla le lekanyetsa ka yona ka ho tshwanang.” (Luka 6:38) Ka lebaka leo, motho ya mosa o fumana metswalle e molemo ha bonolo feela mme le setswalle seo se a tshwarella.

Moapostola Pauluse o ile a kgothalletsa Bakreste ba phutheho ya Efese a re ho bona, “le bontshane mosa, le be le qenehelo e bonolo, le tshwarelane ka bolokolohi.” (Baef. 4:32) Ha bohle ka phuthehong ba thusana ba bile ba le mosa, e ba thabo feela. Hobaneng? Hobane ba qoba ho tshwayatshwaya batho diphoso le ho bua dintho tse utlwisang ba bang bohloko kapa hona ho ba phoqa. Ho e na le hore ba hase ditaba tsa mashano ka ba bang, ba lwanela ho sebedisa maleme a bona ho ba thusa le ho ba aha. (Liprov. 12:18) Sena se etsa hore bohle ka phuthehong ba sebeletse Jehova ba thabile.

Jwalo ka ha re se re bone, mosa ke tholwana e bontshwang ka diketso le dipolelo. Ha re bontsha mosa, re bonahatsa botho bo hlollang ba Modimo wa rona e leng Jehova. (Baef. 5:1) Ka hoo, tumelo ya rona e tla ba matla le ho feta mme re hulele batho borapeding bo hlwekileng. E se eka re ka tswela pele ho bontsha tholwana ena e babatsehang e le hore re ka tsejwa re le batho ba mosa.