Na o Etsa Jehova Setshabelo sa Hao?

 1. Bahlanka ba Modimo ba ikutlwa jwang ka lebaka la sebe?

HA MOAPOSTOLA Pauluse a bua ka boemo ba hae bo hlomolang pelo o ile a re: “Ke monna ya soto hakaakang!” (Bar. 7:24) Bahlanka ba bangata ba Modimo le bona ba ikutlwa ka tsela eo. Kaofela ha rona re baetsadibe mme ha re hloleha ho kgahlisa Modimo ka diketso tsa rona, re ka nna ra nyahama. Ba bang ba Bakreste ba ileng ba etsa sebe se tebileng, ba nahana hore Modimo a ke ke a ba tshwarela.

 2. (a) Lengolo la Pesaleme ya 34:22 le bontsha jwang hore bahlanka ba Modimo ha ba a lokela ho ikutlwa ba le molato ka tsela e fetelletseng? (b) Re tlo bua kang sehloohong sena? (Sheba lebokose le reng “Na ho na le Seo Metse ya Setshabelo e se Tshwantshetsang?”)

² Mangolo a re kgodisa hore ba etsang Jehova setshabelo sa bona ha ba hloke ho ikutlwa ba le molato ka tsela e fetelletseng. (Bala Pesaleme ya 34:22.) Ho etsa Jehova setshabelo ho bolelang? Re lokela ho nka mehato efe haeba re batla hore Jehova a re hauhele a be a re tshwarele? Re tla fumana dikarabo tsa dipotso tsena ka ho hlahloba tokisetso ya metse ya setshabelo ya mehleng ya Iseraele ya boholoholo. Ke nnete hore tokisetso eo e ile ya thehwa tlasa selekane sa Molao, se ileng sa nkelwa sebaka ke selekane se setjha ka Pentekonta ya selemo sa 33. Empa, hopola hore Molao oo o ne o tswa ho Jehova. Kahoo, ho ithuta ka tokisetso ya metse ya setshabelo ho re thusa ho bona hore na Jehova o tadima sebe, baetsadibe le ho baka jwang. A re qaleng ka ho hlahloba hore na morero wa metse eo e ne e le ofe.

 3. Baiseraele ba ne ba etsang ka motho ya bolaileng e mong ka boomo?

³ Mehleng ya Baiseraele, Jehova o ne a nka polao e le ntho e tebileng. Ha Moiseraele a ne a ka bolaya motho ka boomo, motho wa habo mofu ya neng a bitswa “mopheteletsi wa madi,” o ne a lokela ho mo bolaya. (Num. 35:19) Ka tsela eo, mmolai o ne a lefa bophelo ba mofu ka ba hae. Haeba mmolai a sa bolawe kapele, Naha e Tshepisitsweng e ne e tla silafala, etswe Jehova o ne a itse: “Le se ke la silafatsa naha eo le leng ho yona; hobane madi a silafatsa naha.”—Num. 35:33, 34.

 4. Baiseraele ba ne ba etsang ha motho a bolaile e mong ka phoso?

⁴ Baiseraele ba ne ba etsang ha motho a bolaile e mong ka phoso? Le hoja a entse seo ka phoso, o ne a ntse a le molato wa ho bolaya motho ya se nang molato. (Gen. 9:5) Jehova o ne a laetse hore motho ya entseng phoso e jwalo a hauhelwe ka hore a dumellwe ho balehela ho e meng ya metse e 6 ya setshabelo hore mopheteletsi wa madi a se ke a mo fumana. Ha a le motseng oo o ne a tla sireletseha. Hape o ne a lokela ho dula motseng oo wa setshabelo ho fihlela moprista ya phahameng a hlokahala.—Num. 35:15, 28.

 5. Tokisetso ya metse ya setshabelo e re thusa jwang ho utlwisisa Jehova haholwanyane?

⁵ Ke Jehova ya neng a entse tokisetso ya metse ya setshabelo. O ile a laela Joshua a re: “Bua le bara ba Iseraele, o re, ‘Fanang ka metse ya setshabelo.’” Metse ena e ne e fuwa “boemo bo halalelang.” (Josh. 20:1, 2, 7, 8) Kaha Jehova ke yena ya ileng a kgetha metse ena bakeng sa morero o kgethehileng, re ka nna ra ipotsa: Tokisetso ee, e re thusa jwang hore re utlwisise mohau wa Modimo haholwanyane? Tokisetso ena e re rutang mabapi le ho etsa Jehova setshabelo sa rona kajeno?

6, 7. (a) Hlalosa hore na baholo ba ne ba lokela ho etsang ha ba ahlola motho ya bolaileng e mong ka phoso. (Sheba setshwantsho se qalong.) (b) Ke hobaneng ha e ne e le bohlale hore motho eo a ye ho baholo?

⁶ Ha motho ya bolaileng e mong ka phoso a fihla motseng wa setshabelo, o ne a lokela ho ema keiting ya motse mme a qale ka hore a “bue mantswe kapa sebe sa hae moo banna ba baholo ba motse oo ba ntseng ba utlwa.” Baholo bao ba ne ba tla mo amohela. (Josh. 20:4) Ka mora nako e itseng, ba ne ba tla mo kgutlisetsa sebakeng seo polao e etsahetseng ho sona. Baholo ba sebaka seo ke bona ba neng ba tla ahlola nyewe. (Bala Numere 35:24, 25. ) Haeba ba ne ba fumana hore polao eo e entswe ka phoso, motho eo o ne a kgutlisetswa motseng wa setshabelo.

⁷ Ke hobaneng ha motho ya bolaileng e mong ka phoso a ne a lokela ho bolella baholo ka seo a se entseng? Ke hobane baholo ba ne ba lokela ho etsa bonnete ba hore phutheho ya Baiseraele e dula e hlwekile. Hape ba ne ba ka thusa motho eo hore a fumane mohau wa Modimo. Setsebi se seng sa Bibele se ile sa re: “Haeba motho eo a ne a sa ye ho baholo, o ne a tla be a beha bophelo ba hae kotsing. O ne a tla ikarabella bakeng sa lefu la hae hobane a sa ka a sebedisa tshireletso eo Jehova a fanang ka yona.” Jehova o ne a ikemiseditse ho mo thusa, empa motho eo o ne a lokela ho batla thuso eo le ho e amohela. Haeba a ne a sa balehele motseng wa setshabelo, e mong wa leloko la habo mofu o ne a tla mo bolaya.

8, 9. Ke hobaneng ha Mokreste ya entseng sebe se tebileng a lokela ho bua le baholo?

⁸ Kajeno Mokreste ya entseng sebe se tebileng o lokela ho bua le baholo hore ba mo thuse. Ke hobaneng ha ho le bohlokwa ho etsa jwalo? Lebaka la pele, ke hobane tokisetso ya hore baholo ba thuse batho ba entseng sebe se tebileng e tswa ho Jehova, jwalo ka ha Mangolo a bontsha. (Jak. 5:14-16) La bobedi, tokisetso ena e ne e thusa mofosi ya bakileng hore a se ke a pheta sebe sa hae. (Bagal. 6:1; Baheb. 12:11) La boraro, baholo ba kwetliseditswe ho thusa baetsadibe ba bakileng hore ba fole mme ba kgaotse ho ikutlwa ba le molato. Jehova o re banna bana ke “sebaka sa ho ipatela pula e nang ka sefefo.” (Esa. 32:1, 2) Ruri tokisetso ena e bontsha hore Jehova o mohau!

⁹ Bahlanka ba bangata ba Modimo ba ile ba fumana thuso e tswang ho baholo. Ka mohlala, morabo rona e mong ya bitswang Daniel o ile a etsa sebe se tebileng empa ha feta dikgwedi tse mmalwa a tshaba ho bolella baholo ka sona. Daniel o re: “Ka mora hore dikgwedi tseo di fete, ke ne ke nahana hore ha ho sa na letho leo baholo ba ka nthusang ka lona. Le ha ho le jwalo, ke ne ke dula ke tshohile hore motho e mong o tla tseba seo ke se entseng. Ha ke rapela Jehova, ke ne ke utlwa eka ke tlameha ho dula ke kopa tshwarelo.” Qetellong Daniel o ile a bolella baholo seo a se entseng. Ha a hopola ketsahalo eo, o re: “Ke nnete hore ke ne ke tshaba ho ya ho baholo. Empa ka mora hore ke bue le bona, ke ile ka utlwa ke imolohile. Hona jwale ke utlwa ke phuthulohile ho bua le Jehova.” Kajeno Daniel o na le letswalo le hlwekileng ebile e se e le mohlanka ya sebeletsang.

10. Motho ya bolaileng e mong ka phoso o ne a lokela ho etsang hore a bontshwe mohau?

¹⁰ E le hore Moiseraele ya bolaileng e mong ka phoso a bontshwe mohau, o ne a tlameha ho balehela motseng o haufinyane wa setshabelo. (Bala Joshua 20:4.) Sena se bolela hore o ne a tla tela mosebetsi le ntlo ya hae, kaha o ne a tlameha ho dula motseng wa setshabelo ho fihlela moprista ya phahameng wa motse oo a hlokahala.a (Num. 35:25) Ho etsa jwalo ho ne ho tla mo tswela molemo. Haeba a ne a ka tloha motseng wa setshabelo, seo se ne se tla bontsha hore ha a itshole ka ketso eo a e entseng mme bophelo ba hae bo ne bo tla ba kotsing.

11. Ke diketso dife tse bontshang hore Mokreste ya bakileng o ananela mohau wa Modimo?

¹¹ Mofosi ya bakileng o lokela ho bontsha ka diketso hore o batla Modimo a mo hauhele. Haeba Mokreste a etsa sebe se tebileng o lokela ho se tlohela ka ho felletseng mme a qobe ntho leha e le efe e entseng hore a wele sebeng seo. Moapostola Pauluse o ile a bua ka diketso tsa Bakretse ba Korinthe tse neng di bontsha hore ba bakile. O ile a re: “Ho etswa ha lona hore le hlomohe ka tsela ya bomodimo, ho hlahisitse ho tiya ho hoholo hakaakang ho lona, e, ho itlosa molato ha lona, e, kgalefo, e, tshabo, e, tlholohelo, e, tjheseho, e, ho lokiswa ha phoso!” (2 Bakor. 7:10, 11) Diketso tse bontshang hore re bakile, di bontsha Jehova hore re ananela mohau wa hae ebile re a itshola.

12. Mokreste a ka nna a lokela ho tela eng hore Jehova a mo hauhele?

¹² Mokreste a ka nna a lokela ho tela eng hore Jehova a mo hauhele? O lokela ho ikemisetsa ho tlohela ntho leha e le efe eo a e ratang, haeba e tla etsa hore a wele sebeng. (Mat. 18:8, 9) Haeba metswalle ya hao e etsa hore o etse dintho tseo Jehova a sa di rateng na o tla kgaotsa ho ba motswalle wa bona? Haeba ha o kgone ho lekanyetsa jwala bo o bo nwang na o tla qoba ho ipeha maemomg a tla etsa hore o nwe haholo? Haeba o lwantshana le ditakatso tse fosahetseng tsa thobalano, na o qoba ho shebella dimovie, diwebsaete kapa ntho leha e le efe e ka etsang hore o be le menahano e ditshila? Hopola hore ntho e nngwe le e nngwe eo re e etsang ho tshepahalla Jehova e tla re tswela molemo. Ha ho na ntho e bohloko ho feta ho ikutlwa o lahlilwe ke Jehova. Ka lehlakoreng le leng, re a thaba ha Jehova a re bontsha mosa le lerato.—Esa. 54:7, 8.

13. Hlalosa hore na ke hobaneng ha motho ya balehetseng motseng wa setshabelo a ne a tla ikutlwa a sireletsehile a bile a thabile.

¹³ Motho ya bolaileng e mong ka phoso o ne a tla sireletseha motseng wa setshabelo. Jehova o ile a re ka metse eo: “E tla ba setshabelo . . . bakeng sa lona.” (Josh. 20:2, 3) Jehova o ne a sa batle hore motho ya bolaileng e mong ka phoso a ahlolwe hape bakeng sa phoso e tshwanang. Ebile mopheteletsi wa madi o ne a sa lokela ho kena motseng wa setshabelo hore a bolaye motho eo. Kahoo motho eo o ne a sireletsehile ha a le motseng wa setshabelo. Motse oo e ne e se teronko. O ne a ka kgona ho sebetsa, ho thusa ba bang le ho sebeletsa Jehova ka kgotso. Ruri o ne a ka kgona ho phela ha monate motseng oo a balehetseng ho ona!

14. Mokreste ya bakileng a ka kgodiseha kang?

¹⁴ Bahlanka ba bang ba Modimo, ba ileng ba etsa dibe tse tebileng mme ba baka, ba ntse ba ikutlwa ba le molato. Ebile ba nahana hore Jehova o tla dula a hopola dibe tsa bona. Haeba le wena o ikutlwa jwalo, kgodiseha hore Jehova o ile a o tshwarela ka ho felletseng! Daniel eo re buileng ka yena pejana, o ile a bona hore seo ke nnete. Ka mora hore baholo ba mo thuse, o ile a re: “Ke ile ka ikutlwa ke imolohile. Ho ne ho sa hlokahale hore ke nne ke ikutlwe ke le molato. Ha Jehova a o tshwaretse, o o tshwaretse. Jehova o lahlela dibe tsa hao hole le wena. O ke ke wa hlola o di bona.” Ha motho ya bolaileng e mong ka phoso a se a le motseng wa setshabelo, o ne a sa hloke ho tshoha hore mopheteletsi wa madi o tla mo bolaya. Ka ho tshwanang, ha Jehova a re tshwaretse sebe, ha re a lokela ho nahana hore o tla boela a re ahlole ka lebaka la sona.—Bala Pesaleme ya 103:8-12.

15, 16. Ho tseba hore Jesu ke Moprista ya Phahameng le Morekolli wa rona ho re fa kgodiseho efe?

¹⁵ Re na le lebaka le utlwahalang la ho kgodiseha hore Jehova o tla re hauhela ha re entse sebe mme re bakile. Ka mora hore Pauluse a utlwe bohloko ka lebaka la ho se phethahale ha hae, o ile a re: “Ho lebohuwe Modimo ka Jesu Kreste Morena wa rona!” (Bar. 7:25) Pauluse o ne a kgodisehile hore Jehova o tshwaretse dibe tsa hae tsa nakong e fetileng a sebedisa sehlabelo sa Jesu. Jwalo ka Morekolli wa rona, Jesu o hlwekisa letswalo la rona mme o etsa hore re be le kgotso ya kelello. (Baheb. 9:13, 14) Jwalo ka Moprista ya Phahameng, Jesu “o kgona le ho pholosa ka ho feletseng ba atamelang Modimo ka yena, hobane o phela kamehla ho ba kopela ka tiyo.” (Baheb. 7:24, 25) Ho ba le moprista ya phahameng ho ne ho fa Baiseraele kgodiseho ya hore Jehova o tla tshwarela dibe tsa bona. Kahoo le rona kajeno re na le kgodiseho e eketsehileng ya hore Jesu jwalo ka Moprista ya Phahameng, o tla netefatsa hore re bontshwa ‘mohau le ho fumana thuso ka nako e nepahetseng.’—Baheb. 4:15, 16.

¹⁶ E le hore Jehova e be setshabelo sa hao, o lokela ho ba le tumelo sehlabelong sa Jesu sa thekollo. Ke nnete hore Jehova o ile a fana ka thekollo bakeng sa batho ka kakaretso. Empa ho ka bo molemo hore o tadime thekollo e le mpho eo Jehova a e fileng wena ka ho toba. (Bagal. 2:20, 21) E ba le tumelo ya hore Jehova o tla tshwarela dibe tsa hao a sebedisa thekollo. Kgodiseha hore ka lebaka la thekollo, o tla phela ka ho sa feleng. E, sehlabelo sa Jesu ke mpho eo Jehova a faneng ka yona molemong wa hao.

17. Ke hobaneng ha o lokela ho etsa Jehova setshabelo sa hao?

¹⁷ Tokisetso ya metse ya setshabelo e bontsha hore Jehova o mohau. Tokisetso ena e re ruta hore bophelo bo a halalela ho Jehova. Ho feta moo, e re bontsha kamoo baholo ba re thusang kateng ha re entse sebe. E boetse e re thusa ho utlwisisa hore ho bakela dibe ho bolelang le hore na ke hobaneng ha re ka kgodiseha hore Jehova o tla re tshwarela. Na o etsa Jehova setshabelo sa hao? Ha ho na sebaka se sireletsehileng ho feta ho ba tlasa tlhokomelo ya Jehova! (Pes. 91:1, 2) Sehloohong se latelang, re tla bona kamoo re ka etsisang Jehova kateng ka ho bontsha toka le mohau.