• “Ke Tla di fa Modisa a le Mong”
    Jehova o Tsosolositse Borapedi ba Nnete

    •  5. Akaretsa boprofeta ba Ezekiele.

      5 Bala Ezekiele 17:3-10. Kakaretso ya boprofeta bona ke ena: “Ntsu e kgolo” e kgaola lekala le ka hodimodimo la sefate sa kedare ebe e le isa “naheng ya bo rakgwebo.” Yaba ntsu eo e “nka peo e nngwe naheng eo” ya e jala tshimong e nang le mobu o motle “pela metsi a mangata.” Peo eo e ile ya mela yaba e eba “sefate sa morara se sekgutshwanyane.” Ka mora moo, ha hlaha “ntsu e nngwe hape e kgolo.” Sefate sa morara se ile sa otlollela metso ya sona ho ntsu ya bobedi hobane se batla e se leme nqa e nngwe pela metsi a mangata. Jehova o ile a kgalemela sefate sena sa morara, a bontsha hore metso ya sona e tla kgaolwa le hore ‘makgasi a sona a tla omella.’

      Ntsu e nkile lekala la sefate sa kedare.

      Ntsu ya pele e kgolo e ne e emela Morena Nebukadnezare wa Babilona (Sheba serapa sa 6)

       6. Hlalosa hore na boprofeta bona bo bolelang.

      6 Boprofeta boo bo bolelang? (Bala Ezekiele 17:11-15.) Ka selemo sa 617, Morena Nebukadnezare wa Babilona (e leng “ntsu e kgolo” ya pele) o ile a thibella Jerusalema. O ile a tlosa Morena Jojakine wa Juda (e leng “lekala le ka hodimodimo”) boreneng a mo isa Babilona (e leng ‘naha ya bo rakgwebo’). Nebukadnezare o ile a etsa Tsedekia (wa leloko la boreneng e leng “peo e nngwe naheng”) morena wa Jerusalema. Ho ile ha thwe morena enwa e motjha wa Juda a ikane ka lebitso la Modimo hore o tla tshepahalla morena wa Babilona le ho mo sebeletsa. (2 Dikron. 36:13) Empa Tsedekia o ile a tswa kano ena tlase, a kwenehela morena wa Babilona yaba o kopa thuso ya sesole ho Faro morena wa Egepeta (e leng “ntsu e kgolo” ya bobedi). Le ha ho le jwalo, ha a ka a atleha. Jehova o ile a kgalemela Tsedekia hobane o ile a tswa kano ena tlase. (Ezek. 17:16-21) Qetellong Tsedekia o ile a tloswa boreneng yaba o shwella teronkong Babilona.—Jer. 52:6-11.