Josefa wa Arimathea o Emela Seo a se Dumelang

JOSEFA WA ARIMATHEA o ne a sa nahane hore a ka ba le sebete sa ho ema kapela molaodi wa Moroma. Molaodi eo, e leng Ponse Pilato, o ne a tumme ka ho ba manganga. Le ha ho le jwalo, ho ne ho tla hlokahala hore ho be le motho ya buang le molaodi eo, e le hore setopo sa Jesu se lokollwe mme se patwe ka tsela e tshwanetseng. Josefa o ile a kopana le Pilato mabapi le sena, mme dintho ha di a ka tsa ba thata jwalo ka ha a ne a nahanne. Ka mora hore Pilato a netefatse hore Jesu o feela a shwele, o ile a fana ka tumello ya hore setopo sa hae se lokollwe. Le hoja Josefa a ne a ntse a utlwile bohloko ka lebaka la lefu la Jesu, o ile a potlakela moo Jesu a neng a bolaetswe teng.​—Mar. 15:42-45.

• Josefa wa Arimathea e ne e le mang?

• O ne a amana jwang le Jesu?

• Hona ke hobaneng ha re lokela ho tseba ka yena?

Lengolo la Mareka le bitsa Josefa “setho sa Lekgotla se nang le botumo bo botle.” E tlameha ebe Lekgotla leo e ne e le Sanhedrine, e leng lekgotla le phahameng la dinyewe la tsamaiso ya Sejuda. (Mar. 15:1, 43) Kaha Josefa e ne e le e mong wa baetapele ba Bajuda, ho ne ho le bonolo hore a ka kopana le molaodi wa Moroma. Ho boetse ha ho makatse hore Josefa e ne e le morui.​—Mat. 27:57.

Lekgotla la Sanhedrine le ne le hloile Jesu. Ditho tsa lekgotla leo di ile tsa ba tsa rera ho mo bolaya. Le ha ho le jwalo, Bibele e re Josefa e ne e le “monna ya molemo le ya lokileng.” (Luka 23:50) O ne a fapane le ditho tse ding tsa Sanhedrine, e le motho ya tshepahalang mme a leka ka hohle ho phela ka melao ya Modimo. E ne e le morutuwa wa Jesu hobane Bibele e re o ne a “letetse mmuso wa Modimo.” (Mar. 15:43; Mat. 27:57) Ho ka etsahala hore o ile a kgahlwa ke molaetsa wa Jesu hobane a ne a rata nnete le toka.

Johanne 19:38 e re Josefa e ne e le ‘morutuwa wa Jesu empa e le wa sephiri hobane a ne a tshaba Bajuda.’ Josefa o ne a tshabang? O ne a tseba kamoo Bajuda ba neng ba nyatsa Jesu kateng le hore mang kapa mang ya neng a bolela phatlalatsa hore ke morutuwa wa Jesu, o ne a lelekwa synagogeng. (Joh. 7:45-49; 9:22) Bajuda ba ne ba tshwara motho ya lelekilweng synagogeng hampe. Ba ne ba mo nyatsa haholo ebile ba kgaotsa ho ikamahanya le yena. Kahoo Josefa o ile a tshaba ho bolela phatlalatsa hore o ne a dumela ho Jesu. O ne a tseba hore ha a ka etsa jwalo, o ne a tla lahlehelwa ke botumo le boemo ba hae lekgotleng.

E ne e se Josefa feela ya neng a shebane le boemo bona. Ho ya ka Johanne 12:42, “ba bangata esita le ho babusi ba [ile ba beha tumelo ho Jesu], empa ka lebaka la Bafarisi ba ne ba sa bolele hore ba na le tumelo ho yena, e le hore ba se ke ba lelekwa synagogeng.” Nikodemase ke e mong wa ditho tsa Sanhedrine ya neng a tshaba ho bolela phatlalatsa hore o dumela ho Jesu.​—Joh. 3:1-10; 7:50-52.

Josefa yena e ne e le morutuwa wa Jesu. Le ha ho le jwalo, o ne a tshaba ho bolela seo phatlalatsa. Empa ho ya ka mantswe a Jesu, boo e ne e le bothata bo boholo. Jesu o itse: “E mong le e mong . . . ya bolelang phatlalatsa hore o a ntseba, le nna ke tla mo dumela ka pela Ntate ya mahodimong. Empa mang kapa mang ya ntatolang ka pela batho, le nna ke tla mo latola ka pela Ntate ya mahodimong.” (Mat. 10:32, 33, NW) Le hoja Josefa a sa ka a latola Jesu, ha a ka a ba le sebete sa ho bolela phatlalatsa hore o dumela ho yena. Ho thweng ka wena?

Bibele e bontsha hore Josefa e ne e le motho ya lokileng kaha o ile a hana ho nka karolo mmomoring wa Sanhedrine wa ho bolaya Jesu. (Luka 23:51) Ebile ho ka etsahala hore o ne a le siyo nyeweng ya hae. E tlameha ebe Josefa o ile a utlwa bohloko ha a bona Jesu a tshwarwa ka tsela e se nang toka. Empa ho ne ho se na letho leo a ka le etsang.

Ka nako eo Jesu a ileng a shwa ka yona, Josefa o ne a se a le sebete mme a ikemiseditse ho tshehetsa balatedi ba Jesu. Re bona seo ho Mareka 15:43 e reng: “A ba sebete ho ya ka pela Pilato mme a kopa setopo sa Jesu.”

Ho bonahala eka Josefa o ne a le teng ha Jesu a shwa. Ha e le hantle, o tsebile pele ho Pilato hore Jesu o shwele. Ke kahoo ha Josefa a ne a tlo kopa setopo sa Jesu, Pilato a ileng “a ipotsa hore na o se a shwele.” (Mar. 15:44) Haeba Josefa o ne a shebile ha Jesu a shwa, na ebe ketsahalo eo e ile ya mo ama hoo a ileng a qetella a se a sa tshabe ho itlhahisa e le morutuwa wa hae? Ho ka etsahala. Mothating ona, Josefa o ile a nka kgato. O ne a ke ke a hlola a ipata jwalo ka morutuwa wa Jesu.

Ho ya ka molao wa Bajuda, motho ya ahloletsweng lefu o ne a lokela ho patwa pele letsatsi le dikela. (Deut. 21:22, 23) Baroma ba ne ba tlohella ditopo tsa batho ba ahloletsweng lefu hore di bolle thupeng kapa ba di lahlela ka lebitleng. Empa Josefa o ne a batla hore Jesu a bolokwe ka tsela e nepahetseng. Haufi le moo Jesu a neng a bolaetswe teng, Josefa o ne a na le lebitla le entsweng ka lejwe, le neng le so ka le sebediswa. Sena se bontsha hore Josefa o ne a sa tswa fallela Jerusalema ho tswa Arimatheaa le hore o ne a rerile ho sebedisa sebaka seo sa lepato bakeng sa lelapa la hae. (Luka 23:53; Joh. 19:41) Josefa o ne a fana ka seatla se bulehileng ha a dumella hore Jesu a patwe lebitleng la hae la boemo bo hodimo. Sena se ile sa phethahatsa boprofeta bo neng bo itse Mesia o tla patwa hara “sehlopha sa barui.”​—Esa. 53:5, 8, 9.

Dibuka tsa Bibele tse nne tse buang ka bophelo ba Jesu, di re Josefa o ile a theola setopo sa Jesu thupeng, a se phuthela ka line ya boleng bo botle yaba o se kenya ka lebitleng la hae. (Mat. 27:59-61; Mar. 15:46, 47; Luka 23:53, 55; Joh. 19:38-40) Hara batho ba ileng ba thusa Josefa, Bibele e bua ka Nikodemase feela. Nikodemase o ile a fana ka dinoko tse neng di sebediswa ho tlotsa ditopo. Kaha banna bana ba ne ba hlahelletse ebile ba na le tjhelete, ha ho bonahale eka ba ne ba etsa mosebetsi ona ka bobona. Ho ka etsahala hore ba ile ba sebedisa bahlanka ho thota setopo sa Jesu le ho se boloka. Le haeba ba ile ba sebedisa bahlanka ho ba thusa, mosebetsi oo o ne o se bonolo. Molao o ne o re mang kapa mang ya amang setopo o ne a nkwa a sa hlweka ka matsatsi a 7, mme ntho efe kapa efe eo a e amang le yona e ne e nkwa e sa hlweka. (Num. 19:11; Hag. 2:13) Motho ya jwalo o ne a lokela ho arolwa setjhabeng, mme o ne a fetwa ke beke ya Paseka le mekete e meng e amanang le yona. (Num. 9:6) Ho hlophisa lepato la Jesu ho ne ho ka boela ha etsa hore Josefa a nyatswe ha bohloko ke ditho tse ding tsa Sanhedrine. Empa mothating ona, Josefa o ne a amehile ka ho fa Jesu lepato le nang le seriti le hore batho ba tsebe hore ke morutuwa wa hae.

Ka mora hore Jesu a bolokwe, Bibele ha e hlole e bua ka Josefa wa Arimathea, e leng se etsang hore re ipotse hore na o ile a fella hokae. Nnete ke hore ha ho ya tsebang. Ho ya ka seo re sa tswa se tshohla, re na le mabaka a mangata a ho dumela hore qetellong o ile a itlhahisa pepenene e le Mokreste. Nakong ena yohle o ile a ba sebete mme tumelo ya hae ya nna ya tiya ho e na le hore e fokole. Eo ke ntho e babatsehang.

Pale ya Josefa e phahamisa potso ena ya bohlokwa: Na ho na le ntho le ha e le efe, e ka ba boemo kapa mosebetsi kapa maruo, eo o e nkang e le ya bohlokwa ho feta kamano ya hao le Jehova?