Thekollo​—ke Mpho e Molemo e Tswang ho Ntate

 1. Tokisetso ya thekollo e tlisa ditlhohonolofatso dife?

SEHLABELO sa thekollo sa Jesu Kreste se re tlisetsa ditlhohonolofatso tse ngata. Tokisetso ya thekollo e fa bana bohle ba Adama ba ratang ho loka monyetla wa hore qetellong e be karolo ya lelapa la Modimo. Ka lebaka la thekollo, re ka kgona ho phela ka ho sa feleng re thabile. Leha ho le jwalo, thekollo ya Kreste e etsa se fetang seo ho batho ba mamelang. Batho ba lefatsheng le ba lehodimong ba rua molemo haholo ka hore ebe Jesu o ile a shwa a ntse a tshepahala.​—Baheb. 1:8, 9.

 2. (a) Ke dintho dife tsa bohlokwa tseo re di fumanang thapelong ya Jesu? (Sheba setshwantsho se qalong.) (b) Re tlo hlahloba eng sehloohong see?

² Dilemo tse pedi pele Jesu a shwa, o ile a ruta barutuwa ba hae hore ha ba rapela ba re: “Ntata rona ya mahodimong, lebitso la hao le ke le halaletswe. Mmuso wa hao o ke o tle. Thato ya hao e ke e etsahale lefatsheng, jwalokaha e etsahala lehodimong.” (Mat. 6:9, 10) E le hore re ananele thekollo haholwanyane, a re ke re hlahlobeng hore na e amana jwang le ho halaletswa ha lebitso la Modimo, ho busa ha Mmuso wa Modimo, le ho phethahala ha morero wa Modimo.

 3. Lebitso la Jehova le akaretsa eng, mme Satane o ile a senya lebitso leo le halalelang jwang?

³ Ntho ya pele eo Jesu a ileng a e kopa thapelong ya mohlala ke hore ho halaletswe lebitso la Modimo. Lebitso la Jehova le akareletsa bokhabane, kgalalelo le boholo ba hae. Thapelong e nngwe ya hae, Jesu o ile a re Jehova ke “Ntate ya Halalelang.” (Joh. 17:11) Kaha Jehova o a halalela, melao le melaomotheo ya hae e ya halalela. Leha ho le jwalo serapeng sa Edene, ka masene Satane o ile a belaella tokelo ya Modimo ya ho behela batho melao. Ka ho bua mashano ka Jehova, Satane o ile a senya lebitso la Modimo le halalelang.​—Gen. 3:1-5.

 4. Jesu o ile a etsang ho halaletsa lebitso la Modimo?

⁴ Jesu yena o ne a rata lebitso la Jehova haholo. (Joh. 17:25, 26) O ile a le halaletsa. (Bala Pesaleme ya 40:8-10.) Le hoja Jesu a ne a phethahetse ha a phela lefatsheng, o ile bontsha hore ho loketse hore Jehova a behele dibupuwa tsa hae tse bohlale melao. Esita leha Satane a ile a etsa hore Jesu a bolawe ka sehloho, Jesu o ile a dula a tshepahala ho Ntate wa hae ya lehodimong. Ka ho dula a tshepahala, Jesu o ile a bontsha hore motho ya phethahetseng a ka kgona ho mamela ka ho feletseng melao ya Modimo e lokileng.

 5. Re ka etsang hore re halaletse lebitso la Modimo?

⁵ Re ka bontsha jwang hore re rata lebitso la Jehova? Ka tsela eo re itshwarang ka yona. Jehova o batla hore re halalele. (Bala 1 Petrose 1:15, 16.) Sena se bolela hore re rapele yena feela, le hore re mo mamele ka dipelo tsohle tsa rona. Esita leha re hloriswa re etsa sohle seo re ka se kgonang ho phela ka melaomotheo ya hae e lokileng. Ha re etsa dintho tse ntle, re etsa hore lesedi le kganye mme seo se tlisetsa lebitso la Jehova thoriso. (Mat. 5:14-16) Re bontsha hore rea halalela ka ho phela ka tsela e bontshang hore melao ya Jehova e molemo le hore diqoso tsa Satane ke mashano. Jwaloka batho ba sa phethahalang, ha re etsa diphoso rea baka mme re kgaotsa ho etsa dintho tse sa kgahliseng Jehova.​—Pes. 79:9.

 6. Ke hobaneng ha Jehova a ka re nka re le ba lokileng le hoja re sa phethahala?

⁶ Ka lebaka la sehlabelo sa Kreste, Jehova o tshwarela dibe tsa ba bontshang tumelo. O amohela barapedi ba inehelang ho yena. Jehova o nka Bakreste ba tlotsitsweng e le bana ba hae ba lokileng mme ba “dinku tse ding” o ba nka e le metswalle ya hae e lokileng. (Joh. 10:16; Bar. 5:1, 2; Jak. 2:21-25) Kahoo, hona jwale re kgona ho ba ba lokileng ka pela Ntate wa rona le ho nka karolo ho halaletsweng ha lebitso la hae.

 7. Thekollo e entse hore ho be le monyetla ofe?

⁷ Thapelong ya mohlala, Jesu o ile a boela a kopa Modimo a re: “Mmuso wa hao o ke o tle.” Thekollo e amana jwang le Mmuso wa Modimo? Thekollo e entse hore batho ba 144 000 ba fumane monyetla wa ho ya sebeletsa jwaloka marena le baprista lehodimong le Kreste. (Tšen. 5:9, 10; 14:1) Ba tla sebetsa le Jesu hammoho, ho busa moloko wa batho ba mamelang ka dilemo tse sekete. Lefatshe le tla fetoha paradeise, batho bohle ba tshepahalang ba tla phethahala, mme karolo e lehodimong le e lefatsheng ya lelapa la Modimo e tla momahana. (Tšen. 5:13; 20:6) Jesu o tla fedisa Satane mme a tlose mathata ohle ao Satane aa bakileng.​—Gen. 3:15.

 8. (a) Jesu o thusitse barutuwa ba hae jwang hore ba bone hore Mmuso wa Modimo ke wa bohlokwa? (b) Kajeno re bontsha jwang hore re tshehetsa Mmuso wa Modimo?

⁸ Jesu ha a le lefatsheng, o ile a thusa barutuwa ba hae ho bona hore Mmuso wa Modimo ke wa bohlokwa. Hang hang ka mora ho kolobetswa, Jesu o ile a phatlalatsa “ditaba tse molemo tsa Mmuso wa Modimo” dibakeng tsohle. (Luka 4:43) Pele a ya lehodimong Jesu o ile a bolella barutuwa ba hae hore e tla ba dipaki tsa hae “ho isa karolong e hole hole ya lefatshe.” (Lik. 1:6-8) Ka lebaka la mosebetsi wa ho bolela ditaba tse molemo tsa Mmuso, batho lefatsheng ka bophara ba na le monyetla wa ho ithuta ka thekollo le ho tshehetsa Mmuso wa Modimo. Kajeno, re bontsha hore re tshehetsa Mmuso ka ho thusa batlotsuwa mosebetsing wa ho bolela ditaba tse molemo tsa Mmuso wa Modimo lefatsheng lohle.​—Mat. 24:14; 25:40.

 9. Ke hobaneng ha re ka kgodiseha hore Jehova o tla phethahatsa seo a neng a se rerile ka batho?

⁹ Jesu o ne a bolelang ha a re: “Thato ya hao e ke e etsahale”? Jehova ke Mmopi. Ha a re ntho e tla etsahala, e fela e etsahala jwalokaha a boletse. (Esa. 55:11) A ke ke a dumella bofetohedi ba Satane bo senye seo a neng a se rerile ka batho. Ho tloha qalong, ha e sale e le thato ya Jehova hore lefatshe le tlale ka bana ba Adama le Eva ba phethahetseng. (Gen. 1:28) Hoja ebe Adama le Eva ba ile ba shwa pele ba eba le bana, Morero wa Modimo wa hore bana ba bona ba tlale lefatshe o ne o ke ke wa phethahala. Ke kahoo, ka mora hore Adama le Eva ba etse sebe, Jehova a ileng a ba tlohela hore ba be le bana. Ka lebaka la thekollo, Modimo o fa bohle ba bontshang tumelo monyetla wa ho phethahala le ho phela ka ho sa feleng. Jehova o rata batho, mme o batla hore ba mo mamelang ba phele bophelo boo a neng a bo rerile.

10. Thekollo e entse hore ho be le monyetla o fe bakeng sa bafu?

¹⁰ Ho tla etsahalang ka batho ba dibillione ba ileng ba shwa ba sa ka ba fumana monyetla wa ho tseba Jehova le ho mo sebeletsa? Ka lebaka la Thekollo, ho tla ba le tsoho ya bafu. Ntate wa rona ya lerato o tla ba tsosa mme ba fumane monyetla wa hore ba ithute ka yena le hore ba fumane bophelo bo sa feleng. (Lik. 24:15) Jehova o batla hore batho ba phele, eseng ba shwe. Kaha ke mohlodi wa bophelo, e tla ba ntate wa bohle ba tla tsoswa. (Pes. 36:9) Ke hantle hakaakang hore Jesu o ile a re ruta ho rapela “Ntata rona ya mahodimong.” (Mat. 6:9) Jehova o file Jesu boikarabelo ba bohlokwa ba ho tsosa bafu. (Joh. 6:40, 44) Paradeiseng, Jesu o tla phethahatsa boikarabelo ba hae ba hore e be “tsoho le bophelo.”​—Joh. 11:25.

11. Morero wa Modimo ka “bongata bo boholo” ke ofe?

¹¹ Jehova o batla hore motho e mong le e mong e be karolo ya lelapa la hae, Jesu o re: “Mang kapa mang ya etsang thato ya Modimo, enwa ke moreso le moradi weso le Mme.” (Mar. 3:35) Modimo o batla hore “bongata bo boholo” bo tswang ditjhabeng tsohle le melokong yohle le malemeng ohle e be barapedi ba hae. Bohle ba bontshang tumelo sehlabelong sa Kreste mme ba etsa thato ya Modimo ba tla ba hara ba hweletsang ba reng: “Poloko ya rona e tswa ho Modimo wa rona, ya dutseng teroneng, le Konyana.”—Tšen. 7:9, 10.

12. Thapelo ya mohlala e re bontsha eng ka morero wa Modimo?

¹² Thapelong ya Jesu ya mohlala re bona hantle seo Jehova a se rerileng ka batho ba mo mamelang. Tumellanong le thapelo ena, re batla ho etsa sohle se matleng a rona, ho halaletsa lebitso la Jehova le ho le hlompha. (Esa. 8:13) Lebitso la Jesu ka bo lona le bolela hore “Jehova ke Poloko,” mme ka lebaka la thekollo re kgona ho hlompha le ho halaletsa lebitso la Jehova. Mmuso wa Modimo o tla tlisetsa batho ba mamelang ditlhohonolofatso tse tliswang ke thekollo. Ruri thapelo ya mohlala e ya re tiisetsa hore ha ho letho le ka thibelang Modimo ho phethahatsa morero wa hae!​—Pes. 135:6; Esa. 46:9, 10.

13. Re bontsha eng ha re kolobetswa?

¹³ Tsela eo re ka bontshang ka yona hore re ananela thekollo ke ka ho inehela ho Jehova le ka ho bontsha tumelo sehlabelong sa thekollo mme re kolobetswe. Ha re kolobetswa re bontsha hore “re ba Jehova.” (Bar. 14:8) Mme re kopa Modimo hore a re fe letswalo le letle. (1 Pet. 3:21) Jehova o araba kopo eo ya rona ka hore a sebedise madi a Kreste a hlwekileng e le sehlabelo molemong wa rona. Mme re kgodisehile hore o tla re fa sohle seo a re tshepisitseng sona.​—Bar. 8:32.

14. Ke hobaneng ha re fuwe taelo ya hore re rate batho ba bang?

¹⁴ Re ka boela ra bontsha jwang hore re ananela thekollo? Ntho enngwe le enngwe eo Jehova a e etsang e susumetswa ke lerato, mme o batla hore batho ba mo rapelang le bona ba be le lerato. (1 Joh. 4:8-11) Haeba re rata batho ba bang re tla be re bontsha hore re batla ho ba “bara ba Ntata [rona] ya leng mahodimong.” (Mat. 5:43-48) Taelo ya pele ke hore re rate Jehova mme ya bobedi ke hore re rate batho ba bang. (Mat. 22:37-40) Tsela eo re ka bontshang hore re rata batho ba bang ka yona ke ka ho mamela taelo ya hore re bolele ditaba tse molemo tsa Mmuso wa Modimo. Ha re rata batho ba bang, re bontsha khanya ya Modimo. Ha e le hantle lerato la rona ho Modimo le tla etswa “le phethahetseng ho rona” haholoholo ha re rata bara babo rona.​—1 Joh. 4:12, 20.

15. (a) Jehova o re fa ditlhohonolofatso dife hona jwale? (b) Re letetswe ke ditlhohonolofatso dife?

¹⁵ Jehova o tla re tshwarela ka ho feletseng haeba re bontsha tumelo sehlabelong sa thekollo. Lentswe la Modimo le re tiisetsa hore dibe tsa rona di tla ‘hlakolwa.’ (Bala Liketso 3:19-21.) Jwalokaha re hlokometse qalong hore ka lebaka la thekollo, Jehova o kgethile bahlanka ba hae ba batlotsuwa hore e ilo ba bana ba hae lehodimong. (Bar. 8:15-17) O mema “dinku tse ding,” hore e be karolo ya lelapa la hae e lefatsheng. Ka mora hore ba hlole teko ya ho qetela Jehova o tla ba etsa bana ba hae ba ratwang lefatsheng. (Bar. 8:20, 21; Tšen. 20:7-9) Jehova o tla dula a rata bana ba hae. Ditlhohonolofatso tse tliswang ke thekollo di tla ba teng ka ho sa feleng. (Baheb. 9:12) Mpho ena e tla dula e le ya bohlokwa. Ha ho motho ya ka re nkelang yona.

16. Thekollo e re thusitse jwang hore re lokolohe?

¹⁶ Haeba re bakela dibe tsa rona, ha ho letho leo Diabolose a ka le etsang ho re thibela ho ba karolo ya lelapa la Jehova. Jesu o ile a re shwela lefatsheng “hang le ka ho ke keng ha phetwa.” Kahoo thekollo e re rekollotse ka ho feletseng. (Baheb. 9:24-26) E hlakola sebe sohle seo re se futsitseng ho Adama. Ka lebaka la sehlabelo sa lefu la Kreste, re lokolohile bokgobeng ba lefatshe lena la Satane, mme ha re sa tshaba lefu.​—Baheb. 2:14, 15.

17. Lerato la Jehova le bolelang ho wena?

¹⁷ Kamehla re ka tshepa ditshepiso tsa Modimo. Jwalokaha melao ya hae ya popo e sa fetohe, Jehova a ke ke a fetoha. Mme a ke ke a re swetsa. (Mal. 3:6) Jehova o re fa ho hoholo ho feta mpho ya bophelo. O re fa lerato. “Rea tseba mme re lumetse lerato leo Modimo a nang le lona ho rona. Modimo ke lerato.” (1 Joh. 4:16) Lefatshe lohle e tla ba paradeise e ntle, mme motho e mong le e mong ya tla phela moo o tla bontsha lerato la Modimo. Mme batho ba lefatsheng le ba lehodimong ba tla re: “Poko le kganya le bohlale le diteboho le tlhompho le bonatla le matla di be ho Modimo wa rona ka ho sa feleng le kamehla. Amen.”​—Tšen. 7:12.