KGAOLO YA 17

Jesu ke Motho ya Jwang?

Printed Edition

Ha re ithuta ka dintho tseo Jesu a di buileng le tseo a di entseng ha a le lefatsheng, re bona makgabane a re susumelletsang hore re batle ho ba metswalle ya hae le ya Ntate wa hae Jehova. Makgabane a a ratehang ke afe? Hona re ka etsisa Jesu jwang bophelong ba rona?

1. Jesu o tshwana le Ntate wa hae ka ditsela dife?

Jesu o ithutile dintho tse ngata ho Ntate wa hae lehodimong ka dilemo tse dibilione ka ho sheba tsela eo a etsang dintho ka yona. Ka lebaka leo, Jesu o nahana jwalo ka Ntate wa hae, o ikutlwa jwalo ka yena ebile o etsa dintho jwalo ka yena. (Bala Johanne 5:19.) Ha e le hantle, Jesu o na le makgabane a tshwanang le a Ntate wa hae hoo a ileng a re: “Ya mponeng o bone le Ntate.” (Johanne 14:9) Ha o ntse o ithuta hore na Jesu ke motho ya jwang, o tla boela o tsebe le Jehova haholwanyane. Ka mohlala, tsela eo Jesu a neng a tsotella batho ka yona e bontsha hantle hore na Jehova o ikutlwa jwang ka wena.

2. Jesu o bontshitse jwang hore o rata Jehova?

Jesu o ile a re: “E le hore lefatshe le tsebe hore ke rata Ntate, esita le jwalo ka ha Ntate a mphile taelo hore ke etse, ke etsa jwalo.” (Johanne 14:31) Ha Jesu a ne a le lefatsheng o ile a bontsha hore na o rata Ntate wa hae haholo hakae ka hore a mo mamele esita le ha ho ne ho le thata. Jesu o ne a rata ho bua ka Ntate wa hae le ho thusa batho ba bang hore e be metswalle ya Jehova.—Johanne 14:23.

3. Jesu o bontshitse jwang hore o rata batho?

Bibele e re Jesu o “rata . . . bara ba batho.” (Liproverbia 8:31) O bontshitse lerato lena ka hore a kgothatse le ho thusa batho ka boitelo. Ha a ne a etsa mehlolo o ne a sa bontshe feela hore o matla, empa o ne a bontsha hore o utlwela batho bohloko. (Mareka 1:40-42) O ne a tshwara batho ka mosa hape a se na kgethollo. Mantswe a hae a ne a kgothatsa ebile a fana ka tshepo ho batho ba ikokobeditseng ba neng ba mo mamela. Jesu o ne a ikemiseditse ho utlwa bohloko le ho shwa hobane a rata batho. Empa ka ho kgetheha o rata haholo batho ba mamelang dithuto tsa hae.—Bala Johanne 15:13, 14.

ITHUTE DINTLHA TSE DING

Ithute haholwanyane hore na Jesu ke motho ya jwang. Hape nahana ka hore na o ka mo etsisa jwang tabeng ya ho rata batho le ho fana.

4. Jesu o rata Ntate wa hae

Jesu o re behetse mohlala wa hore na re ka bontsha jwang hore re rata Modimo. Bala Luka 6:12 le Johanne 15:10; 17:26. Ka mora ho bala mangolo ana, buisanang ka potso ena:

Re ka etsisa Jesu jwang tabeng ya ho bontsha hore re rata Jehova?

Jesu o a rapela. — Jesu o ne a rata Ntate wa hae mme a mo rapela hangata

5. Jesu o tsotella batho ba hlokang

Jesu o ne a beha ditlhoko tsa batho ba bang pele ho tsa hae. Le ha a ne a kgathetse, o ne a tela nako le matla a hae hore a thuse batho. Bala Mareka 6:30-44 ebe le buisana ka dipotso tsena:

Tlalehong ee, Jesu o bontshitse jwang hore o tsotella batho ba bang? (Sheba ditemana tsa 31, 34, 41 le 42.)
Keng e neng e susumelletsa Jesu ho thusa batho? (Sheba temana ya 34.)
Ka ha Jesu o na le makgabane a tshwanang le a Jehova, see se o rutang ka Jehova?
Re ka etsisa Jesu jwang tabeng ya ho tsotella batho ba bang?

Jesu o atisa mahobe a mahlano le ditlhapi tse pedi tse nyenyane ka mohlolo, hore a fepe batho ba dikete. Barutuwa ba abela banna, basadi le bana dijo.

6. Jesu ke motho ya fanang

Jesu o ne a fana le hoja a ne a se na dintho tse ngata mme o re kgothalleditse hore le rona re fane. Bala Liketso 20:35 ebe le buisana ka potso ena:

Jesu o re re lokela ho etsang e le hore re thabe?

Bapala VIDEO ebe le buisana ka potso e latelang.

VIDEO: “Ho Fana ho Tlisa Thabo e Kgolo”—Karolwana (4:00)

Re ka fana ka ditsela dife hape le haeba re se barui?

Na o ne o tseba?

Bibele e re ruta hore re lokela ho rapela Jehova ka lebitso la Jesu. (Bala Johanne 16:23, 24.) Ha re rapela ka tsela eo, re bontsha hore re ananela hore ebe Jesu o re thusitse ho ba metswalle ya Jehova.

BATHO BA BANG BA RE: “Modimo ha a tsotelle ha re utlwa bohloko.”

Ka ha Jesu o na le makgabane a tshwanang le a Ntate wa hae, dintho tseo a di entseng di re tiisetsa jwang hore Modimo o a re tsotella?

KAKARETSO

Jesu o rata Jehova, hape o rata batho. Ka ha Jesu o tshwana le Ntate wa hae, ha o ntse o tswela pele ho ithuta ka yena, o tla tseba le Jehova haholwanyane.