Dipotso Tse Tswang Ho Babadi

Dibuka tsena di a fapana dintlheng tse itseng tse buang ka tswalo ya Jesu le ka nako ya ha e sa le ngwana. Lebaka ke hore bangodi ba dibuka tsena ba ile ba sheba mahlakore a sa tshwaneng diketsahalong tsena.

Buka ya Matheu e bua haholo ka diketsahalo tse amang Josefa. E bua kamoo Josefa a ileng a ikutlwa kateng qalong ha a utlwa hore Maria ke moimana. E boetse e re bolella kamoo lengeloi le ileng la bua le yena kateng torong ho mo hlalosetsa boemo, le hore qetellong o ile a utlwisisa. (Mat. 1:19-25) Matheu o re bolella le ka toro e nngwe hape ya Josefa moo lengeloi le ileng la mo bolella hore a balehele Egepeta. Josefa o ile a etsa seo. Hamorao lengeloi le ile la mo bolella hore a kgutlele naheng ya Iseraele mme Josefa o ile a boela a mamela yaba o dula Nazaretha le lelapa la hae. Lebitso la Josefa le hlaha ka makgetlo a 8 dikgaolong tse qalang tsa Matheu, ha la Maria le hlaha ka makgetlo a mane feela.

Ka lehlakoreng le leng, lengolo la Luka lona le bua haholo ka Maria. Le bua kamoo lengeloi Gabariele le ileng la bua le yena kateng le hore o ile a etela motswalae Elizabetha yaba o rorisa Jehova. (Luka 1:26-56) Luka o boetse o bua ka mantswe a Simeone ho Maria ha a ne a profeta ka tsela eo Jesu a neng a tla utlwiswa bohloko kateng. Esita le ha a bua ka nako eo lelapa labo Jesu le neng le ile tempeleng ka yona ha a le dilemo di 12, Luka o qotsa mantswe a builweng ke Maria e seng a Josefa. Luka o re diketsahalo tsena tsohle di ile tsa ama Maria haholo. (Luka 2:19, 34, 35, 48, 51) Lebitso la Maria le hlaha ka makgetlo a 12 dikgaolong tse pedi tse qalang tsa Luka, ha la Josefa lona le hlaha ka makgetlo a mararo feela. Kahoo, Matheu o bua haholo ka dintho tse entsweng ke Josefa le kamoo a neng a ikutlwa kateng, athe Luka yena o bua haholwanyane ka tse amang Maria.

Ka ho tshwanang, le moo ba buang teng ka leloko la Jesu, bangodi bana ba babedi ba a fapana. Matheu o bua ka leloko labo Josefa e le ho bontsha hore Jesu ke setloholo le mojalefa wa Davida. Hobaneng? Hobane mora Davida e leng Solomone ke moholoholo wa Josefa. (Mat. 1:6, 16) Empa Luka yena o bua ka leloko labo Maria ho bontsha hore Jesu e ne e le mojalefa boreneng ba Davida “ho ya ka nama” kapa ka tsela ya tlhaho. (Bar. 1:3) Hobaneng? Hobane mora Davida Nathane ke moholoholo wa Maria. (Luka 3:31) Empa ke hobaneng ha Luka a sa re Maria ke moradi wa Heli, e leng ntate wa hae wa sebele? Hobane banna ke bona ba neng ba balwa ha ho etswa lethathamo la leloko. Kahoo, ha Luka a re Josefa ke mora wa Heli, o ne a bolela hore Josefa e ne e le mokgwenyana.—Luka 3:23.

Seo Matheu le Luka ba se ngotseng ka leloko la Jesu, se feela se tiisa hore Jesu e ne e le Mesia ya tshepisitsweng. Ha e le hantle, ho nepahala ha leloko la Jesu ho ne ho tsebahala hoo Bafarisi le Basaduse ba neng ba ke ke ba ho hanyetsa. Kajeno, seo Matheu le Luka ba se ngotseng ka leloko la Mesia, se matlafatsa tumelo ya rona ditshepisong tsa Modimo.