Jehova ke Modimo ya Jwang?

Ha o nahana ka Jehova Modimo, ho tla eng ka hloohong ya hao? Na ho tla Modimo ya hlollang, empa a le marung hole le batho? Kapa na ho tla Modimo ya matla empa a sa kgathalle batho? Ha e le hantle Jehova ke Modimo ya jwang? Bibele e re hlalosetsa hantle makgabane a hae mme e boetse e re o a re tsotella re le batho ka bomong.

1. Ke hobaneng ha re sa kgone ho bona Modimo?

“Modimo ke Moya.” (Johanne 4:24) Jehova ha se motho wa nama le madi. Ke Moya o phelang lehodimong, e leng sebaka seo re sa se boneng.

2. A mang a makgabane a Jehova ke afe?

Le hoja Jehova a sa bonahale, o teng mme o na le makgabane ao batho ba mo tsebang ba a ratang. Bibele e re: “Jehova o rata toka, a ke ke a tlohela ba tshepahalang ba hae.” (Pesaleme ya 37:28) E boetse e re “o na le lerato le mofuthu haholo mme o mohau,” haholoholo ho batho ba hloriswang. (Jakobo 5:11) “Jehova o haufi le ba dipelo di robehileng, o pholosa ba sithabetseng moyeng.” (Pesaleme ya 34:18) Na o ne o tseba hore dintho tseo re di etsang di ka thabisa Jehova kapa tsa mo utlwisa bohloko? Motho ya kgethang ho etsa dintho tse fosahetseng o swabisa Jehova ebile o mo utlwisa bohloko. (Pesaleme ya 78:40, 41) Empa motho ya kgethang ho etsa dintho tse nepahetseng o thabisa Jehova.​—Bala Liproverbia 27:11.

3. Jehova o bontsha jwang hore o a re rata?

Hara makgabane a Jehova, lerato ke lona le ka sehloohong. Ha e le hantle, “Modimo ke lerato.” (1 Johanne 4:8) Jehova ha a ka a bonahatsa lerato la hae ka Bibeleng feela, empa re le bona le dinthong tseo a di bopileng. (Bala Liketso 14:17.) Ka mohlala, nahana ka tsela eo a re bopileng ka yona. O re file bokgoni ba ho bona mebala e metle, ho utlwa mmino o monate le ho latswa dijo tse monate. Jehova o batla hore re thabele bophelo.

ITHUTE DINTLHA TSE DING

4. Moya o halalelang ke matla ao Modimo a a sebedisang

Feela jwalo ka ha re sebedisa matsoho ha re sebetsa, Jehova le yena o sebedisa moya o halalelang. Bibele e ruta hore moya o halalelang ha se motho empa ke matla ao Modimo a a sebedisang ho etsa dintho. Bala Luka 11:13 le Liketso 2:17 ebe le buisana ka dipotso tsena:

• Modimo o tla re fa moya wa hae o halalelang haeba re o kopa. Jwale, o nahana hore moya o halalelang ke motho kapa ke matla ao Modimo a a sebedisang? Ke hobaneng ha o nahana jwalo?

Jehova o sebedisa moya wa hae o halalelang ho etsa dintho tse hlollang. Bala Pesaleme ya 33:6 le 2 Petrose 1:20, 21 ebe le buisana ka potso ena:

• Jehova o sebedisitse moya o halalelang ka ditsela dife hape?

5. Jehova o na le makgabane a kgahlehang

Moshe e ne e le mohlanka ya tshepahalang wa Modimo mme o ne a batla ho ithuta haholwanyane ka Modimo. Ka hoo Moshe o ile a re ho Modimo: “Ntsebise ditsela tsa hao, hore ke o tsebe.” (Exoda 33:13) Jehova o ile a mo araba ka ho mo bolella hore na ke Modimo ya jwang. Bala Exoda 34:4-6 ebe le buisana ka dipotso tse latelang:

• Jehova o ile a bontsha Moshe makgabane afe a hae?

• Wena o rata makgabane afe a Jehova?

6. Jehova o kgathalla batho

Baheberu bao e neng e le setjhaba sa Modimo, e ne e le makgoba Egepeta. Jehova o ile a ikutlwa jwang ha ba hloriswa? Bapala AUDIO ebe o tsamaisana le yona, kapa o bale Exoda 3:1-10 ebe le buisana ka dipotso tse latelang.

AUDIO: Jehova o ne a ba Utlwela Bohloko (2:45)

• O ithutileng tlalehong ee mabapi le hore na Jehova o ikutlwa jwang ha batho ba utlwiswa bohloko? (Sheba temana ya 7 le ya 8.)

• Na o nahana hore Jehova o batla ho thusa batho, hona na o na le matla a ho etsa jwalo? Ebang karabo ya hao ke e kapa tjhe, hlalosa.

7. Re ka ithuta makgabane a Jehova dinthong tseo a di bopileng

Re bona makgabane a Jehova dinthong tseo a di bopileng. Bapala VIDEO ebe o bala Baroma 1:20. Ka mora moo le buisane ka potso e latelang.

VIDEO: Popo e re Bontsha Lerato la Jehova​—Mmele wa Motho (1:57)

• Ke makgabane afe a Jehova ao o a hlokomelang ha o sheba dintho tseo a di bopileng?

KAKARETSO

Jehova ke Moya mme o na le makgabane a mangata a kgahlehang, haholoholo lerato.

Re Ithutileng?

• Ke hobaneng ha re sa kgone ho bona Jehova?

• Moya o halalelang ke eng?

• A mang a makgabane a Jehova ke afe?

BATLA

Ithute ho eketsehileng ka makgabane a Jehova a mane a ka sehloohong.

“Modimo o Jwang?” (Tora ya ho Lebela, No. 1 2019)

Ithute dintlha tse bontshang hore Modimo ha a hohle.

“Na Modimo o Hohle?” (Sehlooho se websaeteng)

Bona hore na ke hobaneng ha Bibele e bitsa moya o halalelang matsoho a Modimo.

“Moya o Halalelang Keng?” (Sehlooho se websaeteng)

Ntate e mong ya sa boneng o ne a thatafallwa ho dumela hore Modimo o a mo tsotella. Utlwa hore na keng e ileng ya mo kgodisa.

“Jwale ke Kgodisehile Hore Nka Kgona ho Thusa ba Bang” (Molula-Qhooa, October 1, 2015)