KGAOLO YA 56
Etsa Hore ho Dule ho na le Bonngwe ka Phuthehong
Ha re e na le Bakrestemmoho re ikutlwa jwalo ka Morena Davida ya ileng a re: “Bonang! Ka moo ho leng hotle le ka moo ho kgahlisang ka teng ha bara ba motho ba dula ha mmoho bonngweng!” (Pesaleme ya 133:1) Ha ho iketsahalle feela hore ebe re na le bonngwe. Empa e mong le e mong wa rona o kenya letsoho hore bo be teng.
1. Keng e ikgethang ka bahlanka ba Modimo?
Ha o ka ya dibokeng naheng e nngwe, o tlo ikutlwa o phutholohile ebile o amohelehile le hoja o ka nna wa se ke wa utlwisisa puo e buuwang moo. Hobaneng? Hobane re ithuta Bibele re sebedisa dingolwa tse tshwanang lefatsheng lohle. Hape re leka ka matla ho bontshana lerato. Ho sa tsotellehe hore na re dula hokae, kaofela ha rona re ‘ipiletsa lebitsong la Jehova, e le hore re mo sebeletse ka mahetla a bapileng’ kapa re momahane.—Sofonia 3:9.
2. O ka etsang hore ho dule ho na le bonngwe?
“Le ratane ka matla haholo ho tloha pelong.” (1 Petrose 1:22) O ka sebedisa keletso ee jwang? Sheba dintho tse ntle tseo batho ba bang ba di etsang eseng diphoso tsa bona. Ho e na le hore o tlwaelane feela le batho ba ratang dintho tseo o di ratang, leka ho tlwaelana le bara le baradibabo rona ba etsang dintho ka tsela e fapaneng le ya hao. Re ka boela ra sebetsa ka thata ho lwantsha maikutlo a kgethollo ao e ka nnang yaba re na le ona.—Bala 1 Petrose 2:17.a
3. O ka etsang haeba ho bile le ho se utlwane dipakeng tsa hao le Mokrestemmoho?
Le hoja re le bonngweng, ha re a phethahala. Ka lebaka leo, ka dinako tse ding re utlwisana bohloko. Ke ka hoo Lentswe la Modimo le reng: “Tswelang pele . . . le tshwarelana,” hape le re: “Jwalo ka ha Jehova a ile a le tshwarela ka bolokolohi, le etse jwalo le lona.” (Bala Bakolose 3:13.) Re utlwisa Jehova bohloko hangata, le ha ho le jwalo o a re tshwarela. Ka hoo o lebeletse hore le rona re tshwarele bara le baradibabo rona. Ha o hlokomela hore o utlwisitse motho e mong bohloko, etsa boiteko ba ho lokisa ditaba le yena.—Bala Matheu 5:23, 24.b
ITHUTE DINTLHA TSE DING
Nahana hore na o ka etsang hore o kenye letsoho hore ho be le kgotso le bonngwe ka phuthehong.
O ka etsang hore o bope kgotso?
4. Qoba kgethollo
Re batla ho rata bara le baradi ba bo rona kaofela. Empa re ka nna ra thatafallwa ke ho rata motho ya etsang dintho ka tsela e fapaneng le ya rona. Re ka thuswa keng? Bala Liketso 10:34, 35 ebe le buisana ka dipotso tsena:
Jehova o amohetse batho ba mefuta yohle hore e be Dipaki tsa hae. Taba ee e lokela ho etsa hore o ikutlwe jwang ka batho ba etsang dintho ka tsela e fapaneng le ya hao?
Ke mefuta efe ya kgethollo e teng sebakeng seo o dulang ho sona eo o batlang ho e qoba?
Bala 2 Bakorinthe 6:11-13 ebe le buisana ka potso ena:
O nahana hore o ka etsang hore o rate bara le baradibabo rona ba etsang dintho ka tsela e fapaneng le ya hao?
5. Tshwarela ka bolokolohi mme o bope kgotso
Jehova o re tshwarela ka bolokolohi le hoja ho se mohla a tla hloka hore re mo tshwarele. Bala Pesaleme ya 86:5 ebe le buisana ka dipotso tsena:
Jehova o re tshwarela haholo hakae?
Ke hobaneng ha o ananela hore ebe o a re tshwarela?
Ke maemo afe a ka etsang hore ho be thata hore re utlwane le batho ba bang?
Ke jwang re ka etsisang Jehova mme ra ba bonngweng le bara le baradibabo rona? Bala Liproverbia 19:11 ebe le buisana ka potso ena:
Haeba motho a o tena kapa a o utlwisa bohloko, o ka etsang hore o lokise boemo boo?
Ka dinako tse ding re utlwisa batho ba bang bohloko. Re lokela ho etsang ha ho le jwalo? Bapala VIDEO ebe le buisana ka potso e latelang.
Videong ee, moradiwabo rona o ile a etsang hore a bope kgotso?
6. Sheba dintho tse ntle tseo bara le baradi beno ba di etsang
Ha re ntse re tlwaela bara le baradibabo rona, re hlokomela makgabane le mefokolo ya bona. Re ka etsang hore re shebe makgabane a bona? Bapala VIDEO ebe le buisana ka potso e latelang.
Keng e ka o thusang hore o shebe dintho tse ntle tseo bara le baradi beno ba di etsang?
Jehova o sheba dintho tse ntle tseo re di etsang. Bala 2 Likronike 16:9a ebe le buisana ka potso ena:
Taba ya hore Jehova o sheba dintho tse ntle tseo o di etsang e etsa hore o ikutlwe jwang?
Esita le taemaneng e ntle o ntse o ka bona diphoso, empa e ntse e le ya boleng bo phahameng. Ka tsela e tshwanang, bara le baradibabo rona kaofela ha ba a phethahala empa ke ba bohlokwa ho Jehova
BATHO BA BANG BA RE: “Motho o lokela ho sebetsa ka thata pele nka mo tshwarela.”
Ke hobaneng ha re lokela ho ikemisetsa ho tshwarela batho ba bang?
KAKARETSO
O ka etsa hore ho be le bonngwe ka phuthehong ka hore o tshwarele bara le baradi beno le hore o ba rate kaofela.
Re Ithutileng?
O ka etsang hore o se ke wa ba le kgethollo?
O tla etsang haeba ho bile le ho se utlwane pakeng tsa hao le Mokrestemmoho?
Ke hobaneng ha o batla ho etsisa mohlala wa Jehova ka hore o tshwarele batho ba bang?
BATLA
Bona ka moo e nngwe ya dipapiso tsa Jesu e ka o thusang ka teng hore o se ke wa ahlola batho ba bang.
Na re lokela ho kopa tshwarelo le hoja re utlwa eka ha ho na phoso eo re e entseng?
“Ho Kopa Tshwarelo ke Tsela e Atlehang ya ho Bopa Kgotso” (Molula-Qhooa, November 1, 2002)
Hlokomela hore na batho ba bang ba thusitswe keng hore ba kgaotse ho ba leeme.
Ithute hore na ke jwang o ka rarollang bothata boo o nang le bona le motho e mong pele bo ka senya kgotso ka phuthehong.
a Tlhaloso ya 6 e hlalosa ka moo lerato le etsang hore Bakreste ba qobe ho tshwaetsa batho ba bang haeba ba na le mafu a tshwaetsanwang.
b Tlhaloso ya 7 e hlalosa hore na o ka sebetsa ditaba tsa molao kapa tsa kgwebo jwang.