Mpho eo Modimo a Faneng ka Yona—Ke ya Bohlokwa Haholo

Dimpho tse ding ke tsa bohlokwa ho rona hobane di tswa ho batho ba itseng ba tsebahalang kapa bao re ba ratang haholo. Leha ho le jwalo, re ka nka dimpho tse ding e le tsa bohlokwa esita leha e le tsa boleng bo tlase hobane feela di tswa ho setho sa lelapa kapa ho metswalle ya rona. Ho jwalo le ka mpho eo Ntatemoholo Rusell a ileng a efa Jordan, eo re buileng ka yena sehloohong se fetileng. Taba ee e amana jwang le mpho ya thekollo?

Bibele e re: “Modimo o ile a romela Mora wa hae ya tswetsweng a nnotshi lefatsheng e le hore re ka fumana bophelo ka yena.” (1 Johanne 4:9) Sena se etsa hore thekollo e be mpho ya bohlokwa haholo. Modimo o matla ohle. Ha mopesaleme a bua ka Modimo, o ile a re: “Wena, eo lebitso la hao e leng Jehova, wena o le mong o Ya Phahameng ka ho Fetisisa hodima lefatshe lohle.” (Pesaleme ya 83:18) Ruri ha ho motho e mong ya ka re fang mpho ya bohlokwa hakaalo.

Bibele e boetse e re Modimo ke ‘Ntate wa rona.’ (Esaia 63:16) Ka tsela efe? O re file bophelo. Ho ekelletsa moo, jwaloka ntate, Modimo o a re rata. Ha a bua le batho ba hae ba mehleng ya Bibele, ba neng ba boetse ba bitswa Efraime, o ile a re: “Na Efraime ke mora wa bohlokwa ho nna, kapa ngwana ya tshwarwang ka lerato? . . . Ruri ke tla mo hauhela.” (Jeremia 31:20) Modimo o ikutlwa jwalo le ka barapedi ba hae ba mehleng ena. Hase feela hore ke Mmopi wa rona ya matla ohle empa o boetse ke Motswalle le Ntate wa rona. Ka sebele sena se etsa hore dimpho tsohle tseo a re fang tsona e be tsa bohlokwa.

Dimpho tse ding di bohlokwa hobane di fanwe ka lerato, e seng ka tlamo kapa ka ho qobellwa. Mofani ya se nang boithati ha a lebelle hore a buseletswe ka lebaka la ho bontsha ba bang mosa.

Modimo o re file Mora wa hae hobane a re rata. Bibele e re: “Lerato la Modimo le ile la bonahatswa ho rona ka sena, hobane Modimo o ile a romela Mora wa hae ya tswetsweng a nnotshi lefatsheng.” Hobaneng? “E le hore re ka fumana bophelo ka yena.” (1 Johanne 4:9) Na Modimo o ne a tlamehile ho etsa jwalo? Ho hang! “Thekollo e lefilweng ke Kreste Jesu” ke ponahatso ya lerato la Modimo le “mosa wa hae o sa tshwanelang kapa mohau wa hae.”—Baroma 3:24.

Mpho ee ya Modimo e bontsha mohau wa hae ka tsela efe? Bibele e re: “Modimo o buella lerato la hae ho rona ka hore, ha re sa ntse re le baetsadibe, Kreste o ile a re shwela.” (Baroma 5:8) Modimo o ile a susumetswa ke lerato hore a thuse batho ba fokolang, ba baetsadibe le ba se nang mang we! Ka hona, mpho ena ha rea e sebeletsa ebile re ke ke ra kgona ho patala Modimo bakeng sa yona. Ha ho mohla ho tla ke ho be le lerato le fetang leo Modimo a re bontshitseng lona.

Dimpho tse ding ke tsa bohlokwa hobane mofani wa tsona a ile a tela dintho tse ngata e le hore a fane ka tsona. Haeba motho a tela ntho eo a e ratang haholo mme a re fa yona, re ananela mpho eo le ho feta.

Modimo o ile “a fana ka Mora wa hae ya tswetsweng a nnotshi.” (Johanne 3:16) Ruri Jesu e ne e le motho wa bohlokwa haholo ho yena. Dilemong tse ngatangata tseo Modimo a neng a ntse bopa bokahohle ka tsona, Jesu o ne a sebetsa le yena mme e ne e le ‘eo Modimo a neng a mo rata ka ho kgethehileng.’ (Liproverbia 8:30) Jesu ke ‘Mora wa Modimo ya ratwang’ hape ke “setshwantsho sa Modimo ya sa bonahaleng.” (Bakolose 1:13-15) Ha ho kamano e matla ho feta e nnileng ya e ba teng pakeng tsa Modimo le Jesu.

Leha ho le jwalo, Modimo ha a ka “a qenehela esita le Mora wa hae.” (Baroma 8:32) Jehova o re file se molemohadi seo a nang le sona. Ha ho mpho e bitsang ho feta ena eo a neng a ka fana ka yona.

Ka dinako tse ding mpho e ka ba ya bohlokwa hobane e tlile ka nako e loketseng, ka nako eo o e hlokang e le kannete. Ka mohlala, na o ne o ke ke wa thaba haeba motho e mong a ne a ka o patalla sepetlele kamora hore o fumane phekolo e pholositseng bophelo ba hao? Ruri o ne o ke ke wa kgaotsa ho mo leboha!

Bibele e re: “Feela jwalo ka ha ka Adama bohle ba shwa, kahoo hape bohle ba tla phediswa ka Kreste.” (1 Bakorinthe 15:22) Jwalo ka bana ba Adama, kaofela ha rona re a “shwa” kahoo re sitwa ho itokolla lefung kapa hona ho boelana le Modimo. Re boetse re ke ke ra kgona ho ‘phedisa’ batho ba bang.” Bibele e beha taba ena tjena: “Ha ho le ya mong wa bona eo ka mokgwa leha e le ofe a ka lopollang esita le morabo, kapa a fa Modimo thekollo bakeng sa hae.” (Pesaleme ya 49:7) Re hloka thekollo e le kannete. Haeba e ne e se ka yona ho ne ho se mohla re tla boelana le Modimo.

Ka lebaka la lerato la hae le leholo, Jehova o ile a ithaopela ho lefella “phekolo” eo re neng re e hloka, e le hore ‘bohle ba ka phediswa’ ka Kreste Jesu. Thekollo e kgona ho finyella see jwang? “Madi a Mora wa hae Jesu a re hlwekisa sebeng sohle.” Kahoo, haeba re bontsha tumelo sehlabelong sa thekollo se entsweng ka madi a Jesu, re ka fumana tshwarelo bakeng sa dibe tsa rona mme ra ba le monyetla wa ho fumana bophelo bo sa feleng. (1 Johanne 1:7; 5:13) Thekollo e tla tswela ba malapa a rona ba hlokahetseng molemo jwang? Bibele e re: “Kaha lefu le teng ka motho, tsoho ya bafu le yona e teng ka motho [e leng Jesu].”—1 Bakorinthe 15:21.a

Ha ho na mpho e ka lekanang le eo Modimo a ileng a re fa yona ka Jesu. Ha ho motho ya kileng a tela ho hongata molemong wa rona ho feta Jehova Modimo ebile ha ho mpho eo re e hlokang ho feta sehlabelo se re lokollang sebeng le lefung. Ruri thekollo ke mpho ya bohlokwa ka ho fetisisa!