Mmuso wa Modimo ke Eng?

Molaetsa o ka sehloohong oo Bibele e buang ka wona ke Mmuso wa Modimo. Jehova o tla sebedisa Mmuso oo ho etsa hore lefatshe e be Paradeise jwalo ka ha a ne a rerile ho tloha qalong. Mmuso wa Modimo ke eng? Re tseba jwang hore o a busa hona jwale? O se o entse dintho dife? Hona o tla etsa dintho dife nakong e tlang? Kgaolo ena le tse pedi tse latelang di tla araba dipotso tsena.

1. Mmuso wa Modimo ke eng, hona Morena wa oo ke mang?

Mmuso wa Modimo ke puso e thehilweng ke Jehova Modimo. Morena wa wona e leng Jesu Kreste o busa a le lehodimong. (Matheu 4:17; Johanne 18:36) Ha Bibele e bua ka Jesu e re: “O tla busa e le Morena . . . ka ho sa feleng.” (Luka 1:32, 33) Ka ha Jesu ke Morena wa Mmuso wa Modimo, o tla busa batho bohle ba lefatsheng.

2. Jesu o busa le bomang?

Jesu ha a buse a le mong. Batho ba tswang “molokong o mong le o mong le lelemeng le leng le le leng le bathong ba bang le ba bang le setjhabeng se seng le se seng . . . ba tla busa e le Marena hodima lefatshe.” (Tšenolo 5:9, 10) Ke batho ba bakae ba tla busa le Kreste? Ho tloha ha Jesu a ne a le lefatsheng, Bakreste ba dimilione e ile ya ba balatedi ba hae. Empa ke ba 144 000 feela ba tla ya lehodimong ho ya busa le Jesu. (Bala Tšenolo 14:1-4.) Bakreste ba bang bohle ba lefatsheng, ba tla ba tlasa Mmuso oo.​—Pesaleme ya 37:29.

3. Ke jwang Mmuso wa Modimo o leng molemo ho feta mebuso ya batho?

Le hoja babusi ba bang ba batla ho etsetsa batho dintho tse molemo, ha bana matla a ho etsa dintho tsohle tseo ba di batlang. Ha nako e ntse e ya ba hlahlangwa ke ba bang ba ka nnang ba se ke ba nahanela ditlhoko tsa batho. Empa Jesu Morena wa Mmuso wa Modimo o tla dula a busa. Modimo o ‘emisitse mmuso o ke keng wa senngwa le ka mohla.’ (Daniele 2:44) Jesu o tla busa lefatshe lohle mme a ke ke a rata batho ba bang ho feta ba bang. O lerato, o mosa mme o na le toka ebile o tla ruta batho hore ba tshware ba bang ka lerato, mosa le toka.​—Bala Esaia 11:9.

4. Lefatshe lohle le tla buswa ke mmuso o matla

Jesu Kreste o na le matla a ho busa ho feta mmusi le ha e le ofe. Bala Matheu 28:18 ebe le buisana ka potso ena:

• Ke hobaneng ha Jesu a na le matla a ho busa a fetang a babusi ba bang?

Babusi ba lefatshe ba busa karolo e itseng feela ya lona hape ba busa nako e kgutshwanyane. Empa Mmusong wa Modimo teng ho ke ke ha ba jwalo. Bala Daniele 7:14 ebe le buisana ka dipotso tsena:

• Ke hobaneng ha e le ntho e thabisang ho tseba hore Mmuso wa Modimo o ke ke wa fediswa?

• Ke hobaneng ha e le ntho e thabisang ho tseba hore Mmuso wa Modimo o tla busa lefatshe lohle?

5. Mebuso ya lefatshe e lokela ho fediswa

Ke hobaneng ha e le Mmuso wa Modimo feela o lokelang ho busa batho? Bapala VIDEO ebe le buisana ka potso e latelang.

VIDEO: Mmuso wa Modimo Keng?​—Karolwana (1:41)

• Ditlamorao tsa ho buswa ke batho ke dife?

Bala Moeklesia 8:9 ebe le buisana ka dipotso tsena:

• Na o nahana hore ke Mmuso wa Modimo feela o lokelang ho busa? Ke hobaneng ha o tjho jwalo?

6. Batho ba ilo busa Mmusong wa Modimo ba a re utlwisisa

Ka ha Morena wa rona Jesu e kile ya ba motho, o tla kgona ho “utlwela mefokolo ya rona bohloko.” (Baheberu 4:15) Jehova o kgethile banna le basadi ba tshepahalang ba 144 000 “molokong o mong le o mong le lelemeng le leng le le leng le bathong ba bang le ba bang le setjhabeng se seng le se seng” hore ba ilo busa le Jesu.​—Tšenolo 5:9.

• Na o utlwa e le ntho e kgothatsang ho tseba hore Jesu le batho ba ilo busa le yena ba a tseba hore na ho jwang ho ba motho? Ke hobaneng ha o tjho jwalo?

7. Melao ya Mmuso wa Modimo e molemo ho feta ya batho

Mebuso ya lefatshe e etsa melao eo e nahanang hore e tla sireletsa batho. Mmuso wa Modimo le wona o na le melao eo batho ba buswang ke wona ba lokelang ho e latela. Bala 1 Bakorinthe 6:9-11 ebe le buisana ka dipotso tsena:

• O nahana hore lefatsheng ho tla ba jwang ha batho bohle ba se ba mamela melao ya Modimo?a

• Na o nahana hore ke ntho e utlwahalang hore ebe Jehova o lebelletse hore batho ba buswang ke Mmuso wa hae ba mamele melao ya hae? Ke hobaneng ha o tjho jwalo?

• Ke eng e bontshang hore batho ba sa mameleng melao ya Modimo ba ka fetoha? (Sheba temana ya 11.)

KAKARETSO

Mmuso wa Modimo ke mmuso o lehodimong o tla busa lefatshe lohle.

Re Ithutileng?

• Ke bomang ba tlo busa Mmusong wa Modimo?

• Ke ka tsela efe Mmuso wa Modimo o leng molemo ho feta mebuso ya lefatshe?

• Jehova o lebelletse hore batho ba tla buswa ke Mmuso wa hae ba etseng?

BATLA

Ithute hore na Jesu o ile a re Mmuso wa Modimo o hokae.

“Na Mmuso wa Modimo o ka Pelong ya Hao?” (Sehlooho se websaeteng)

Ke hobaneng ha Dipaki Tsa Jehova di kgetha ho tshepahalla Mmuso wa Modimo eseng mebuso ya batho?

Ho Tshepahalla Mmuso wa Modimo (1:43)

Hlokomela hore na Bibele e reng ka batho ba 144 000 bao Jehova a ba kgethileng hore ba ilo busa le Jesu.

“Ke Bomang ba Yang Lehodimong?” (Sehlooho se websaeteng)

Ke eng e thusitseng mme e mong ya neng a le teronkong ho bona hore Modimo ke yena feela ya tla etsa hore ho be le toka lefatsheng?

“Ka Moo ke ileng ka Fumana Hore na ke Hobaneng ha ho na le ho Hloka Toka” (Tsoha!, November 2011)