Lipesaleme

140 Jehova, u mpholose ho batho ba babe;+

E se eka u ka ntšireletsa le ho motho oa liketso tse mabifi,+

 2 Ba rerileng lintho tse mpe ka lipelong tsa bona,+

Bao letsatsi lohle ba ntseng ba hlasela joalokaha eka ke lintoeng.+

 3 Ba leolitse maleme a bona joaloka la noha;+

Mahloko a marabe ea linaka a ka tlas’a melomo ea bona.+ Selah.

 4 Jehova, u mphemise matsoho a ea khopo;+

E se eka u ka ntšireletsa ho motho oa liketso tse mabifi,+

Ba rerileng ho nkhothometsa mehatong ea ka.+

 5 Ba iphahamisang ba mpatetse sefi;+

Ba alile liropo joaloka letlooa lehlakoreng la tsela.+

Ba nchehetse maraba.+ Selah.

 6 Ke itse ho Jehova: “U Molimo oa ka.+

Jehova, u mamele lentsoe la likōpo tsa ka tse tiileng.”+

 7 Jehova ’Musi Morena,+ matla a poloko ea ka,+

U sirelelitse hlooho ea ka letsatsing la lebotho le hlometseng.+

 8 Jehova, u se ke ua phethahatsa litakatso tsa ea khopo.+

U se ke ua ntšetsa pele morero oa hae o mobe, e le hore ba se ke ba phahamisoa.+ Selah.

 9 Ha e le lihlooho tsa ba nteetseng hare,+

E se eka khathatso ea melomo ea bona e ka li koahela.+

10 E se eka mashala a tukang a ka akheloa holim’a bona.+

Ba liheloe ka mollong,+ ka likoting tse nang le metsi, e le hore ba se ke ba tsoha.+

11 Ea buang haholo—a se ke a tiisoa ka thata lefatšeng.+

Motho ea mabifi—bobe bo mo tsome ka litlhaselo tse pheta-phetoang.+

12 Ke tseba hantle hore Jehova o tla phethisa+

Tseko ea ea hlorileng, kahlolo ea ba futsanehileng.+

13 Ka sebele ba lokileng ba tla leboha lebitso la hao;+

Ba lokileng ba tla lula ka pel’a sefahleho sa hao.+