Jeremia
“Na Iseraele ha a na bara?
Na ha a na mojalefa?
Ke hobane’ng ha Malkame*+ a hapile Gade?+
Ke hobane’ng ha batho ba mo rapelang ba lula metseng ea Iseraele?
2 Jehova o re: ‘Matsatsi aa tla
Ao ka ’ona ke tla etsa hore mokhosi oa ntoa* o utloahale Raba+ ea Baamone.+
E tla fetoha qubu ea majoe
Metse e e potolohileng* e tla chesoa.
Iseraele o tla hapa ba nkileng naha ea hae,’+ ke Jehova ea chong.
3 ‘Bokolla, uena Heshbone hobane Ai e sentsoe.
Hoeletsang, lona metse e itšetlehileng ka Raba.
Aparang masela a hoashang.*
Bokollang le solle masakeng a majoe*
Etsoe Malkame o tla haptjoa
Hammoho le baprista ba hae le liofisiri tsa hae.+
4 Uena morali ea sa tšepahaleng, ke hobane’ng ha u ithorisa ka likhohlo,*
Ka phula ea hao e mobu o motle?*
U tšepile matlotlo a hao,
U re: “Ke mang ea tla ntlhasela?”
5 Ke u tlisetsa ntho e tšabehang
E tsoang ho bohle ba u potolohileng.
Le tla qhalakanyetsoa hohle
’Me ha ho na ea tla bokella ba balehang,’ ke ’Musi oa Lintho Tsohle, Jehova oa mabotho ea chong.
6 Jehova o boetse o re: ‘Empa ka mor’a moo ke tla bokella bara ba Baamone ba hapuoeng.’”
7 Jehova oa mabotho o re ka Edomo:
“Na ha ho sa na bohlale Temane?+
Na keletso e ntle ha e sa le eo ho ba nang le kutloisiso?
Na bohlale ba bona bo na le thuso?
8 Khutlang, le balehe.
Tsamaeang le ipate mahaheng, lona baahi ba Dedane.+
Etsoe ke tla tlisetsa Esau koluoa
Ha nako ea hore ke mo otle e fihla.
9 Haeba batho ba kotulang morara ba ne ba ka tla ho uena,
Na ba ne ba ke ke ba siea o mong?
Haeba masholu a ne a ka tla bosiu,
A ne a tla nka lintho tseo a li batlang feela.+
10 Empa ke tla hlobolisa Esau hore a sale a sa apara letho.
Ke tla senola libaka tseo a ipatang ho tsona
E le hore a se ke a khona ho ipata.
Bana ba hae, bana babo le baahisani ba hae kaofela ba tla bolaoa.+
Le eena a ke ke a hlola a phela.+
11 Ntšiee le likhutsana tsa hao.*
Ke tla li sireletsa hore li lule li phela
’Me bahlolohali ba hao ba tla ntšepa.”
12 Jehova o re: “Haeba ba sa ahloleloang ho noa kopi ba tla tlameha ho e noa, na uena u tla tloheloa feela ebe ha u fuoe kotlo? U ke ke oa tloheloa feela eaba ha u fuoe kotlo hobane u tlameha ho e noa.”+
13 Jehova o re: “Ke hlapantse ka ’na hore Bozra o tla fetoha ntho e tšosang,+ o tla nyefoloa, a ripitloe, a rohakoe ’me metse eohle ea hae e tla senyehela ruri.”+
14 Ke utloile tlaleho e tsoang ho Jehova,
Moromuoa o rometsoe har’a lichaba o re:
“Phuthehang ’me le mo* futuhele.
Itokisetseng ho loana.+
15 Ke u entse ea se nang thuso har’a lichaba.
Batho ba u nyatsa haholo.+
16 U thetsitsoe ke hore ebe batho baa u tšaba,
Oa thetsoa le ke boikhohomoso ba hao,
Uena ea balehelang* lefikeng,
Ea lulang ka holim’a thaba.
Le hoja u haha sehlaha sa hao holimo joaloka ntsu,
Ke tla u theola,” ke Jehova ea chong.
17 “Edomo o tla fetoha ntho e tšosang.+ E mong le e mong ea fetang pel’a hae o tla mo makalla, a letse mololi ka lebaka la likotlo tsohle tsa hae. 18 Ha ho na motho ea tla lula Edomo ’me ha ho na motho ea tla phela teng.+ E tla tšoana le Sodoma le Gomora le metse e e potolohileng ka mor’a hore e felisoe,”+ ke Jehova ea chong.
19 “Ho na le motho ea tla futuhela makhulo a sireletsehileng a Edomo joaloka tau+ e hlahang meferong e teteaneng pel’a Jordane ’me ka motsotsoana ke tla etsa hore ba* balehe naha ea bona. Ke tla beha ea khethiloeng hore a okamele naha ea Edomo. Etsoe ke mang ea tšoanang le ’na, hona ke mang ea ka nthibang? Ke molisa ofe ea ka nkemang pele?+ 20 Ka hona, utloang qeto eo Jehova a e entseng ka Edomo le hore na o nahanne ho etsa’ng ka baahi ba Temane:+
O tla etsa hore naha ea bona e felisoe ka lebaka la liketso tsa bona.
Joang kapa joang likonyana tsa mohlape li tla hulanngoa.+
21 Ha ba oa, ho tla ba le molumo o tla etsa hore lefatše le reketle.
Ho na le seboko,
Se utloahetse ho ea fihla Leoatleng le Lefubelu.+
Letsatsing leo, lipelo tsa bahlabani ba Edomo
Li tla tšoana le pelo ea mosali ea pepang.”
23 Molaetsa o eang ho Damaseka:+
“Hamathe+ le Arpade ba tšohile.
Ba utloile tlaleho e mpe.
Baa shoa ke letsoalo.
Leoatle le loebehlane.
24 Damaseka o nyahame.
O batla ho baleha empa ha a khone ka lebaka la letsoalo.
Mahlomola le bohloko lia mo otla,
O tšoana le mosali ea pepang.
25 Ho tla joang hore ebe motse oa thoriso, motse oa thabo,
Ha oa lahloa kherehloa?
26 Etsoe bahlankana ba oona ba tla oela literateng tsa oona
Le masole kaofela a tla shoa letsatsing leo,” ke Jehova oa mabotho ea chong.
27 “Ke tla chesa lerako la Damaseka.
Litora tse sirelelitsoeng ka thata tsa Ben-hadade li tla cha.”+
28 Jehova o bua ka Kedare+ le mebuso ea Hazore eo Morena Nebukadnezare* oa Babilona a ileng a e hlasela. O re:
“Emang, le nyolohele Kedare,
Le felise ba lulang Bochabela.
29 Litente tsa bona le mehlape ea bona li tla haptjoa,
Le lintho tsohle tsa bona.
Likamele tsa bona li tla haptjoa.
Ba tla ba hoeletsa ba re: ‘Hohle mona hoa tšosa.’”
30 Jehova o re: “Balehelang hole.
Tsamaeang le lule mahaheng, lona baahi ba Hazore
Etsoe Morena Nebukadnezare* oa Babilona o le reretse bobe.
O rerile ho le hlasela.
31 Phahamang, le futuhele sechaba sa batho ba nang le khotso,
Ba lutseng ba sireletsehile,” ke Jehova ea chong.
“Ha baa sireletsoa ka likeiti kapa litšepe. Ba lula thoko.
32 Likamele tsa bona li tla haptjoa
Le mehlape ea bona e tla haptjoa.
Ke tla ba tlisetsa koluoa ho tsoa mahlakoreng ’ohle,” ke Jehova ea chong.
33 “Hazore e tla ba selao sa liphokojoe,
E hloke baahi ho ea ho ile.
Ha ho na motho ea tla lula moo.
Ha ho na motho ea tla phela teng.”
34 Ha Morena Tsedekia+ oa Juda a qala ho busa, Jehova o ile a bua le moprofeta Jeremia ka Elame+ a re: 35 “ ’Na Jehova oa mabotho ke re: ‘Ke roba seqha sa Baelame+ e leng sona se ba matlafatsang. 36 Ke tla tlisa holim’a Baelame meea e mene e tsoang likhutlong tse ’nè tsa lefatše.* Ke tla ba hasanyetsa hohle. Batho ba Elame ba hasantsoeng ba tla fihla lichabeng tsohle.’”
37 Jehova o re: “Ke tla etsa hore Baelame ba tšabe lira tsa bona le ba batlang ho ba bolaea. Ke tla tlisetsa Baelame tlokotsi, bohale ba ka bo tukang. Ke tla ba nehella sabole ho fihlela ke ba felisitse.
38 Ke tla beha terone ea ka Elame+ ’me ke felise morena le liofisiri tsa Elame,” ke Jehova ea chong.
39 “Empa matsatsing a qetellang ke tla bokella batho ba Elame ba hapuoeng,” ke Jehova ea chong.