Joshua

8 Jehova a re ho Joshua: “U se ke oa tšoha kapa oa thothomela.+ Nka masole ’ohle ’me u e’o loantša motse oa Ai. Ke nehelane ka morena oa Ai le batho ba hae le motse oa hae le naha ea hae+ letsohong la hao. 2 U felise Ai le morena oa eona feela joalokaha u ile oa felisa Jeriko le morena oa eona+ empa le ka inkela thepa ea eona e hapuoeng le liphoofolo tsa eona. U behe masole a tla ipata ka mor’a motse bakeng sa ho hlasela motse.”

3 Kahoo, Joshua a tsamaea le masole ’ohle ho ea loantša Ai. Joshua a khetha banna ba 30 000 ba matla ’me a ba romela bosiu. 4 A re ho bona: “Le ipate ka mor’a motse hore le tle le o hlasele. Le se ke la ea hole haholo le motse ’me kaofela ha lona le lule le itokisitse. 5 Ke tla atamela motse hammoho le masole ’ohle ’me ha ba tla ho rona ho tla re hlasela joaloka pele,+ re tla ba baleha. 6 Ha ba re lelekisa, re tla etsa hore ba re lelekise ho fihlela ba le hole le motse oa bona hobane ba tla re, ‘Ba re baleha joaloka pele.’+ Le rona re tla ba baleha. 7 Le tlohe moo le ipatileng teng ’me le hape motse. Jehova Molimo oa lona o tla etsa hore le o felise. 8 Hang ha le hapile motse le o chese.+ Le etse seo Jehova a le boleletseng sona. Tsena ke litaelo tseo ke le fang tsona.”

9 Joshua a re ba tsamaee eaba ba ea moo ba e’o ipata teng. Ba fihla ba lula pakeng tsa Bethele le Ai, ho elella ka bophirimela ho Ai. Joshua eena a sala le masole a mang bosiung boo.

10 Ka mor’a hore Joshua a tsohe hoseng haholo ’me a bokelle masole, eena le baholo ba Iseraele ba etella masole pele ho ea Ai. 11 Masole ’ohle+ a neng a e-na le eena a nyoloha ’me a ea ka pel’a motse. Ba hloma litente ho elella ka lehlakoreng le ka leboea la Ai, khohlo e le pakeng tsa bona le Ai. 12 Ka nako eo, o ne a nkile banna ba ka bang 5 000, a itse ba ipate+ pakeng tsa Bethele+ le Ai, ho elella ka bophirimela ho motse. 13 Kahoo, masole a hloma litente ka leboea ho motse+ ’me a neng a ipatile a ne a le ka bophirimela ho motse+ eaba Joshua o kena ka har’a khohlo* bosiung boo.

14 Hang ha morena oa Ai a ba bona, eena le banna ba motse ba tsoa ka potlako hoseng ho ea loantša Baiseraele sebakeng se itseng se ka pel’a lehoatata.* Empa o ne a sa tsebe hore ho na le masole a ipatileng ka mor’a motse a neng a tl’o mo hlasela. 15 Ha banna ba Ai ba ba hlasela, Joshua le Baiseraele bohle ba baleha ka tsela e eang lefeelleng.+ 16 Eaba banna bohle ba neng ba le motseng baa bitsoa hore ba ba lelekise ’me ha ba ntse ba lelekisa Joshua ba ne ba ntse ba e-ba hole le motse. 17 Banna bohle ba Ai le Bethele ba ile ba tsoa ho ea lelekisa Baiseraele, ha ho na monna ea ileng a sala. Ba ile ba siea motse o bulehile ’me ba lelekisa Baiseraele.

18 Jehova a re ho Joshua: “Otlolla letsoho u supe motse oa Ai+ ka lerumo le letsohong la hao hobane ke tla etsa hore u e hape.”+ Kahoo, Joshua a supa motse ka lerumo leo a le tšoereng. 19 Eitse ha banna ba ipatileng ba bona Joshua a otlollotse letsoho, ba ema ka potlako sebakeng sa bona ’me ba mathela motseng ba o hapa eaba ba o chesa+ hang-hang.

20 Ha banna ba Ai ba hetla, ba bona mosi o tsoa motseng, o nyolohela maholimong eaba ba felloa ke matla hobane ho ne ho se na moo ba ka balehelang teng. Eaba masole a Baiseraele a neng a balehela lefeelleng a sheba ka ho banna ba neng ba ba lelekisa. 21 Ha Joshua le masole ’ohle a Baiseraele ba bona hore ba neng ba ipatile ba hapile motse ’me ba bona motse o kubella mosi, ba sheba ka ho banna ba Ai ’me ba ba hlasela. 22 Masole a hapileng motse le ’ona a tsoa motseng, a ba hlasela. Banna ba Ai ba ne ba le lipakeng, Baiseraele ba bang ba le ka lehlakoreng lena ’me ba bang ba le ka ho lane eaba baa ba bolaea ’me ha hoa ka ha e-ba le ea mong ea phonyohang kapa ea balehang.+ 23 Empa ba tšoara morena oa Ai+ a ntse a phela eaba ba mo tlisa ho Joshua.

24 Ha Baiseraele ba qeta ho bolaea baahi bohle ba Ai lefeelleng leo ba neng ba ba lelekisa ho ea ho lona ’me ba ba bolaile kaofela ka sabole, joale Baiseraele bohle ba khutlela Ai ’me ba bolaea ba setseng ka sabole. 25 Letsatsing leo ho ile ha bolaoa batho bohle ba Ai ba 12 000, ho tloha ho monna ho ea ho mosali. 26 Joshua ha aa ka a theola letsoho leo a neng a tšoere lerumo+ ka lona ho fihlela a felisitse+ baahi bohle ba Ai. 27 Ka mor’a moo, Baiseraele ba ile ba inkela liphoofolo le thepa eo ba e hapileng ea motse oo, ho ea ka litaelo tseo Jehova a neng a li file Joshua.+

28 Joale Joshua a chesa Ai ’me ho fihlela letsatsing lena ho setse qubu ea majoe feela.+ 29 A fanyeha morena oa Ai palong* ho fihlela mantsiboea. Eaba ha letsatsi le le haufi le ho likela, Joshua o laela hore setopo sa hae se theoloe palong.+ Ba se lahlela keiting ea motse ’me ba beha qubu e kholo ea majoe holim’a hae, e ntseng e le teng ho fihlela letsatsing lena.

30 Ka mor’a moo, Joshua a hahela Jehova Molimo oa Iseraele aletare Thabeng ea Ebale,+ 31 feela joalokaha Moshe mohlanka oa Jehova a ne a laetse Baiseraele le joalokaha bukeng ea Molao+ oa Moshe ho ngotsoe mantsoe a reng: “Aletare ea majoe a sa thujoang ka thulusi ea tšepe.”+ Ba ne ba nyehela ho Jehova linyehelo tsa secheso holim’a eona, ba etsa le mahlabelo a kopanetsoeng.+

32 Joale a kopiletsa Molao+ oo Moshe a neng a o ngotse holim’a majoe ao ka pel’a Baiseraele.+ 33 Baiseraele bohle, baholo ba bona, balaoli le baahloli ba bona ba ne ba eme ka mahlakoreng a mabeli a Areka ka pel’a baprista ba Balevi ba neng ba jere areka ea selekane sa Jehova. Balichaba hammoho le Baiseraele+ ba ne ba le moo. Halofo e ’ngoe ea bona e ne e le ka pel’a Thaba ea Gerizime ’me halofo e ’ngoe ea bona e le ka pel’a Thaba ea Ebale+ (feela joalokaha Moshe mohlanka oa Jehova a ne a laetse),+ ho hlohonolofatsa sechaba sa Iseraele. 34 Ka mor’a moo, a balla holimo mantsoe ’ohle a Molao,+ litlhohonolofatso+ le lithohako,+ ho ea ka sohle se ngotsoeng bukeng ea Molao. 35 Joshua o ile a balla holimo litaelo tsohle tseo Moshe a neng a li laetse. A li bala ka pel’a phutheho eohle ea Iseraele,+ ho bile ho e-na le basali le bana le balichaba+ ba neng ba lula* le bona.+