Jeremia
13 Jehova o itse ho ’na: “Tsamaea, u ithekele lebanta la line ’me u le tlame thekeng empa u se ke oa le kenya ka metsing.” 2 Kahoo, ka reka lebanta joalokaha Jehova a ne a ntaetse eaba ke le tlama thekeng. 3 Jehova a boela a re ho ’na: 4 “Nka lebanta leo u le rekileng, le thekeng la hao, u tlohe u ee Eufrate ’me u le pate lepatsong la lefika.” 5 Kahoo, ka ea ’me ka le pata Eufrate feela joalokaha Jehova a ntaetse.
6 Empa ka mor’a matsatsi a mangata Jehova a re ho ’na: “Tsamaea u ee Eufrate, u e’o nka lebanta leo ke u laetseng hore u le pate.” 7 Kahoo, ka ea Eufrate. Ka tsetolla lebanta moo ke neng ke le patile teng. Ka fumana le senyehile le se na thuso ho hang.
8 Joale Jehova a re ho ’na: 9 “Jehova o re: ‘Boikhohomoso ba Juda le boikhohomoso bo bongata ba Jerusalema bo tla tšoana le lebanta lena.+ 10 Batho bana ba khopo ba hanang ho mamela mantsoe a ka,+ bao ka manganga ba latelang lipelo tsa bona+ le ba latelang melimo e meng, ba e sebeletsa le ho e inamela, ba tla ba feela joaloka lebanta lena le se nang thuso ho hang. 11 Etsoe feela joalokaha lebanta le itšoarella thekeng la motho, ke entse hore bohle ba ntlo ea Iseraele le bohle ba ntlo ea Juda ba itšoarelle ka ’na e le hore e be sechaba sa ka,+ botumo ba ka,+ thoriso ea ka le hore ba ntlhomphe. Empa ha baa ka ba mamela,’ ke Jehova ea chong.+
12 U boele u ba fe molaetsa ona: ‘Jehova Molimo oa Iseraele o re: “Nkho e ’ngoe le e ’ngoe e kholo e lokela ho tlatsoa veine.”’ Ba tla re: ‘Re se re ntse re tseba hore nkho e ’ngoe le e ’ngoe e kholo e lokela ho tlatsoa veine.’ 13 Ebe u re ho bona: ‘Jehova o re: “Ke fa baahi bohle ba naha ena, marena a lutseng teroneng ea Davida, baprista le baprofeta le baahi bohle ba Jerusalema veine e ngata ho fihlela ba tahoa.+ 14 Ke tla ba thulanya, ke etse ntho e tšoanang ho bo-ntate le bara,” ke Jehova ea chong.+ “Nke ke ka ba qenehela, ka sareloa kapa ka ba hauhela. Ha ho na letho le tla nthibela ho ba felisa.”’+
15 Thehang tsebe le mamele.
Le se ke la ikhohomosa etsoe ke Jehova ea buileng.
16 Rorisang Jehova Molimo oa lona
Pele a etsa hore ho be lefifi
Le pele maoto a lona a khoptjoa lithabeng ka shoalane.
Le tla lebella leseli
Empa o tla etsa moriti o lefifi,
O tla etsa hore leseli le fetohe lefifi le letšo.+
17 Haeba le hana ho mamela,
Ke tla llela lekunutung ka lebaka la boikhohomoso ba lona.
18 E-re ho morena le ho ’mè oa morena:*+ ‘Lulang sebakeng se tlase
Kaha korone ea lona e ntle e tla theoha lihloohong tsa lona.’
19 Likeiti tsa metse ea boroa li koetsoe,* ha ho ea li bulang.
Batho bohle ba Juda ba hapuoe, ba hapuoe kaofela.+
20 Jerusalema, phahamisa mahlo ’me u bone ba tsoang leboea.+
O kae mohlape oo u o filoeng, linku tsa hao tse ntle li kae?+
Na u ke ke oa otloa ke mahlaba a kang a mosali ea pepang?+
22 Ha u re ka pelong: ‘Ke hobane’ng ha ke hlahetsoe ke lintho tsee?’+
Ke ka lebaka la phoso ea hao e kholo u hlobolisitsoeng mose+
Le lirethe tsa hao li utloileng bohloko haholo.
23 Na Mokushe* a ka fetola letlalo la hae kapa lengau la fetola maroboko a lona?+
Haeba ho joalo, le lona le ka etsa lintho tse lokileng,
Lona batho ba rutiloeng ho etsa bobe.
24 Kahoo, ke tla le hasanya joaloka ’moko o fefoloang ke moea oa lehoatata.+
25 Ena ke ntho e tla u* etsahalla, eo ke u abetseng eona
Hobane u ntebetse+ ’me u tšepile leshano,”+ ke Jehova ea chong.
26 Kahoo, ke tla phahamisa mose oa hao o u koahele sefahleho
’Me lihlong tsa hao li tla ba pooaneng.+
27 Bofebe ba hao+ le sello sa hao se kang sa pere e palesitseng
Hammoho le botekatse ba hao bo soabisang, li tla ba pooaneng.
Maralleng le har’a naha
Ke bone boitšoaro ba hao bo nyontšang.+
U malimabe, uena Jerusalema.
U tla lula u sa hloeka ho fihlela neng?”+