Jeremia

7 Ana ke mantsoe ao Jehova a ileng a a bua ho Jeremia: 2 “Ema keiting ea ntlo ea Jehova u phatlalatse molaetsa ona moo: ‘Utloang lentsoe la Jehova, lona batho bohle ba Juda ba kenang ka likeiti tsena ho tla inamela Jehova. 3 Jehova oa mabotho, Molimo oa Iseraele o re: “Lokisang liketso tsa lona le mesebetsi ea lona ’me ke tla le lumella hore le ’ne le lule sebakeng sena.+ 4 Le se ke la tšepa mantsoe a bohata eaba le re: ‘Ena ke* tempele ea Jehova, tempele ea Jehova, tempele ea Jehova.’+ 5 Etsoe haeba le lokisa liketso tsa lona le mesebetsi ea lona ’me le emela toka pakeng tsa motho le moahisani oa hae,+ 6 le sa hatelle balichaba, likhutsana* le bahlolohali,+ le sa bolaee batho ba se nang molato sebakeng sena ’me le sa latele melimo e meng eaba le ipakela tlokotsi,+ 7 ke tla le lumella hore le ’ne le lule naheng ena eo ke e fileng baholo-holo ba lona ka ho sa feleng.”’

8 Empa le tšepa mantsoe a bohata+ a ke keng a le tsoela molemo ho hang. 9 Na le ka utsoa,+ la bolaea, la feba, la hlapanya ka leshano,+ la etsetsa Baale+ mahlabelo* le ho latela melimo eo le sa kang la e tseba 10 eaba lea tla, le ema ka pel’a ka ka tlung ee e bitsoang ka lebitso la ka ebe le re: ‘Re tla pholosoa’ empa le ntse le etsa lintho tsee tsohle tse nyonyehang? 11 Na le bona ntlo ee e bitsoang ka lebitso la ka e le lehaha la masholu?+ Ke bone hore na le ntse le etsa’ng,” ke Jehova ea chong.

12 “‘E-eang tabernakeleng ea ka e Shilo,+ moo ke ileng ka etsa hore lebitso la ka le lule teng pele+ ’me le bone hore na ke e entse’ng ka lebaka la bokhopo ba sechaba sa ka sa Iseraele.+ 13 Empa la ’na la etsa lintho tsena kaofela,’ ke Jehova ea chong. ‘Le hoja ke ile ka bua le lona ka makhetlo-khetlo,* ha lea ka la mamela.+ Ka ’na ka le bitsa empa la se ke la araba.+ 14 Kahoo, ntlo e bitsoang ka lebitso la ka+ eo le e tšepileng+ le sebaka seo ke le fileng sona le baholo-holo ba lona, ke tla li etsa ntho e tšoanang hantle le eo ke e entseng Shilo.+ 15 Ke tla le tlosa ka pel’a mahlo a ka feela joalokaha ke ile ka lahla bana ba bo lona e leng bana bohle ba Efraime.’+

16 “Ha e le uena Jeremia, u se ke oa rapella sechaba sena. U se ke oa bokolla, oa nkopa ka tieo kapa oa rapela bakeng sa sona+ kaha nke ke ka u mamela.+ 17 Na ha u bone hore na se etsa’ng metseng ea Juda le literateng tsa Jerusalema? 18 Bana ba roalla patsi, bo-ntate ba besa mollo, ha bo-’mè ba luba hlama e le hore ba etsetse Mofumahali oa Leholimo*+ mahobe a sehlabelo, ba etsa le linyehelo tsa lino bakeng sa melimo e meng e le ho ntšiteloa.+ 19 Jehova o re: ‘Empa na ke ’na eo ba mo siteloang?* Baa itšiteloa ’me ba tla soaba.’+ 20 Ka hona Jehova ’Musi oa Lintho Tsohle o re: ‘Bohale ba ka le khalefo ea ka li tla theoleloa sebakeng sena,+ ho batho le libata, ho lifate tsa tšimo le litholoana tsa naha. Khalefo ea ka e tla tuka ’me e ke ke ea tima.’+

21 “Jehova oa mabotho, Molimo oa Iseraele o re: ‘Eketsang linyehelo tsa lona tsa secheso mahlabelong a lona ’me le li je.+ 22 Etsoe mohla ke neng ke ntša baholo-holo ba lona naheng ea Egepeta, ha kea ka ka bua le bona kapa ka ba laela malebana le linyehelo tsa secheso le mahlabelo.+ 23 Empa ke ile ka ba fa taelo ena: “Mamelang lentsoe la ka. Ke tla ba Molimo oa lona, le be sechaba sa ka.+ Le lokela ho tsamaea tseleng eohle eo ke le laelang hore le tsamaee ho eona e le hore lintho li ka le tsamaela hantle.”’+ 24 Empa ha baa ka ba mamela kapa ba sekeha tsebe.+ Ho e-na le hoo ba ile ba latela mehopolo* ea bona, ka manganga ba latela lipelo tsa bona tse khopo+ eaba ba ea morao eseng pele, 25 ho tloha mohla baholo-holo ba lona ba tsoang Egepeta ho fihlela letsatsing lena.+ Ke ile ka ’na ka romela bahlanka bohle ba ka bao e leng baprofeta ho lona, ke ba romela letsatsi le leng le le leng, ka makhetlo-khetlo.*+ 26 Empa ba hanne ho ’mamela ’me ha baa ka ba sekeha tsebe.+ Ho e-na le hoo, ba ne ba le manganga* eaba ba etsa hampe ho feta baholo-holo ba bona.

27 “U tla ba bolella mantsoe ana ’ohle+ empa ba ke ke ba u mamela. U tla ba hoeletsa empa ba ke ke ba u araba. 28 Kahoo, e-re ho bona: ‘Sena ke sechaba se sa mamelang lentsoe la Jehova Molimo oa sona ’me se hanne ho amohela taeo. Botšepehi bo felile ebile ha se le ntho eo ba buang ka eona.’*+

29 “Kuta moriri oa hao* ’me u o lahle, u bine koli-ea-malla* maralleng a se nang letho etsoe Jehova o lahlile moloko oo o mo halefisitseng ’me o tla o tlohela. 30 Jehova o re: ‘Batho ba Juda ba entse lintho tse fosahetseng mahlong a ka. Ba behile litšoantšo tsa bona tse nyonyehang ka tlung e jereng lebitso la ka ’me ba e silafalitse.+ 31 Ba hahile libaka tse phahameng tsa Tofethe, e Khohlong ea Mora oa Hinome*+ e le hore ba chese bana ba bona mollong+ e leng ntho eo ke neng ke sa ba laela eona le eo ho seng mohla nkileng ka e nahana le ho e nahana.’*+

32 Jehova o re: ‘Ka hona, matsatsi aa tla ao ka ’ona e ke keng ea hlola e bitsoa Tofethe kapa Khohlo ea Mora oa Hinome* empa ho tla thoe ke Khohlo ea Polao. Ba tla pata bafu Tofethe ho fihlela ho se ho se na sebaka se setseng.+ 33 Litopo tsa sechaba sena e tla ba lijo tsa linonyana tsa maholimo le libata tsa lefatše ’me ha ho na motho ea tla tšosa linonyana le libata tseo.+ 34 Ke tla felisa mohoo oa thabo le mohoo oa nyakallo, ke felise lentsoe la monyali le lentsoe la monyaluoa+ metseng ea Juda le literateng tsa Jerusalema etsoe naha e tla sala e se na baahi.’”+