Numere
23 Balame a re ho Balake: “Nkahele lialetare tse supileng mona+ ’me u ntokisetse lipoho tse supileng le liramo tse supileng.” 2 Kapele-pele Balake a etsa feela joalokaha Balame a boletse. Eaba Balake le Balame ba nyehela poho le ramo aletareng ka ’ngoe.+ 3 Balame a re ho Balake: “Ema mona pel’a nyehelo ea hao ea secheso, ’na ke tsamaee. Mohlomong Jehova o tla bua le ’na. Ntho leha e le efe eo a tla mpontša eona, ke tla u bolella eona.” Kahoo, a ea leralleng le se nang letho.
4 Molimo a kopana le Balame+ ’me Balame a re ho eena: “Ke hlophisitse lialetare tse supileng ’me ke nyehetse poho le ramo aletareng ka ’ngoe.” 5 Jehova a laela Balame hore na a re’ng,+ a re: “Khutlela ho Balake ’me u bue mantsoe ana.” 6 Kahoo, a khutla ’me a bona hore Balake le likhosana tsohle tsa Moabe li ne li eme pel’a nyehelo ea hae ea secheso. 7 Joale Balame a bua maele ana a reng:+
“Balake morena oa Moabe o ntlositse Arame,+
Ho tloha lithabeng tsa bochabela:
‘Tloo u bitsetse Jakobo bomalimabe bakeng sa ka.
Tloo u nyatse Iseraele.’+
8 Ke joang nka bitsetsang bomalimabe bao Molimo a sa ba bitsetsang bomalimabe?
Ke joang nka nyatsang bao Jehova a sa ba nyatsang?+
9 Ke ba bona ke le holim’a mafika,
Ke ba bona ke le maralleng.
10 Ke mang ea ka balang lerole la Jakobo+
Kapa ea ka balang leha e ka ba kotara ea batho ba Iseraele?
E-re nke ke shoe lefu la ba lokileng
’Me qetello ea ka e ke e tšoane le ea bona.”
11 Eaba Balake o re ho Balame: “Ke hobane’ng ha u nkentse tjee? Ke u tlisitse mona hore u tl’o bitsetsa lira tsa ka bomalimabe empa uena u li hlohonolofalitse.”+ 12 A araba a re: “Ke buile seo Jehova a itseng ke se bue.”+
13 Balake a re ho eena: “Ke kopa u tle le ’na sebakeng se seng seo u tla ba bona u le ho sona. U ke ke oa ba bona kaofela. U tla khona ho bona feela karolo e itseng ea bona. Ba bitsetse bomalimabe bakeng sa ka u le moo.”+ 14 Kahoo, a mo isa tšimong ea Zofime, ka holim’a Pisga+ ’me a haha lialetare tse supileng le ho nyehela poho le ramo aletareng ka ’ngoe.+ 15 Kahoo, Balame a re ho Balake: “Ema mona pel’a nyehelo ea hao ea secheso ebe ’na ke ea mane ke e’o bua le Molimo.” 16 Jehova a kopana le Balame ’me a mo laela hore na a re’ng,+ a re: “Khutlela ho Balake ’me u bue mantsoe ana.” 17 Kahoo, a tla ho Balake ’me a bona hore o ne a eme pel’a nyehelo ea hae ea secheso ’me likhosana tsa Moabe li ne li e-na le eena. Balake a re: “Jehova o itse’ng?” 18 Eaba o bua maele ana a reng:+
“Ema Balake ’me u mamele.
’Mamele, uena mora oa Zipore.
Ha a buile ntho, na a ke ke a e etsa?
Ha a buile, na a ke ke a phetha?+
20 Ke tlile mona ho tla hlohonolofatsa,
Joale Molimo o ba hlohonolofalitse+ ’me nke ke ka khona ho fetola seo.+
21 Ha a lumelle hore Jakobo a louoe
Ebile ha a lumelle hore Iseraele e hlaheloe ke khathatso.
Jehova Molimo oa hae o na le bona+
’Me ba mo rorisa ka mantsoe a phahameng ba phatlalatsa hore ke morena oa bona.
23 Ha ho mantsoe a boloi a bakelang Jakobo bomalimabe+
Kapa bonohe leha e le bofe khahlanong le Iseraele.+
Nakong ena ho ka thoe ka Jakobo le Iseraele:
‘Bonang seo Molimo a se entseng.’
Se ke ke sa robala se e-s’o je phofu
Le ho noa mali a liphofu tse bolailoeng.”
25 Eaba Balake o re ho Balame: “Haeba u sa ba bitsetse bomalimabe, joale le teng u se ke oa ba hlohonolofatsa.” 26 Balame a araba Balake a re: “Na ha kea ka ka re ho uena, ‘Ke tla etsa sohle seo Jehova a tla se bua’?”+
27 Balake a re ho Balame: “Ke kopa u tle ke u ise sebakeng se seng hape. Mohlomong Molimo oa ’nete o tla bona ho nepahetse hore u ba bitsetse bomalimabe bakeng sa ka u le moo.”+ 28 Eaba Balake o isa Balame ka holim’a Peore, e shebaneng le Jeshimone.*+ 29 Balame a re ho Balake: “Nkahele lialetare tse supileng mona ’me u ntokisetse lipoho tse supileng le liramo tse supileng.”+ 30 Kahoo, Balake a etsa feela joalokaha Balame a boletse ’me a nyehela poho le ramo aletareng ka ’ngoe.