Jeremia
42 Balaoli bohle ba sesole, Johanane+ mora oa Karea, Jezania mora oa Hoshaia le sechaba sohle, ho tloha ho mofutsana ho ea ho morui, ba tla 2 ’me ba re ho moprofeta Jeremia: “Re kopa u re hauhele, u re rapelle ho Jehova Molimo oa hao molemong oa batho bohle ba setseng+ etsoe re ne re le bangata empa re se re le ’maloa joalokaha u bona. 3 E se eka Jehova Molimo oa hao a ka re bolella tsela eo re lokelang ho tsamaea ka eona le hore na re etse’ng.”
4 Eaba moprofeta Jeremia o re: “Ke le utloile ’me ke ntse ke rapela Jehova Molimo oa lona joalokaha le nkopile. Ke tla le bolella hore na Jehova o itseng ha a le araba, nke ke ka le patela letho.”
5 Ba re ho Jeremia: “Jehova e ke e be paki ea ’nete le e tšepahalang e tla re ahlola haeba re ke ke ra hlompha litaelo tsohle tseo Jehova Molimo oa hao a tlang ho re fa tsona ka uena. 6 Re tla mamela Jehova Molimo oa rona eo re u romang ho eena ebang re rata litaelo tseo a re fang tsona kapa che. Re tla mamela lentsoe la Jehova Molimo oa rona e le hore lintho li tle li re tsamaele hantle.”
7 Ka mor’a matsatsi a leshome Jehova a bua le Jeremia. 8 Kahoo, a bitsa Johanane mora oa Karea le balaoli bohle ba sesole ba neng ba e-na le eena le sechaba sohle, ho tloha ho mofutsana ho ea ho morui.+ 9 A re ho bona: “Jehova Molimo oa Iseraele, eo le itseng ke le kopele mohau ho eena o re: 10 ‘Haeba ruri le tla lula naheng ena, ke tla le haha, nke ke ka le liha. Ke tla le hloma, nke ke ka le fothola etsoe ke tla utloa bohloko* ka lebaka la tlokotsi eo ke le baketseng eona.+ 11 Le se ke la tšosoa ke morena oa Babilona eo le mo tšabang.’+
Jehova o re: ‘Le se ke la mo tšaba etsoe ke na le lona e le hore ke le pholose le ho le lopolla matsohong a hae. 12 Ke tla le hauhela ’me morena oa Babilona o tla le hauhela,+ a le khutlisetse naheng ea lona.
13 Empa haeba le ka re: “Re ke ke ra lula naheng ena,” ebe ha le mamele Jehova Molimo oa lona 14 ’me le re: “Re ka mpa ra ea naheng ea Egepeta,+ moo re ke keng ra bona ntoa, ra utloa molumo oa lenaka kapa ra lapela bohobe. Ke hona moo re tla lula teng.” 15 Joale mamelang Jehova lona ba setseng ba Juda. Jehova oa mabotho, Molimo oa Iseraele, o re: “Haeba le ikemiselitse ho ea Egepeta ho ea lula teng,* 16 sera seo le se tšabang se tla le hlasela ka sabole hona moo naheng ea Egepeta le tlala eo le e tšabang e tla le latela ho ea fihla Egepeta ’me le tla shoella teng.+ 17 Batho bohle ba ikemiselitseng ho ea Egepeta hore ba lule teng ba tla bolaoa ka sabole, tlala le lefu la seoa. Ha ho le ea mong oa bona ea tla pholoha kapa a balehe tlokotsi eo ke tla ba tlisetsa eona.”’
18 Jehova oa mabotho, Molimo oa Iseraele o re: ‘Haeba le ka ea Egepeta, ke tla le halefela joalokaha ke ile ka halefela baahi ba Jerusalema.+ Batho ba tla tšoha ha ba le bona. Le tla rohakoa, le songoe, le nyefoloe+ ’me ha le sa tla hlola le bona sebaka sena.’
19 Jehova o buile le lona, lona ba setseng ba Juda hore le se ke la ea Egepeta. Le tsebe hore kannete ke le lemositse kajeno 20 hore ha le ka etsa phoso eo feela, le tla shoa. Etsoe le itse ke bue le Jehova Molimo oa lona la re: ‘Re rapelle ho Jehova Molimo oa rona, u re bolelle sohle seo Jehova Molimo oa rona a tla se bua ’me re tla se etsa.’+ 21 Ke le boleletse kajeno hore na o itse’ng empa le tla hana ho mamela Jehova Molimo oa lona kapa ho etsa ntho leha e le efe eo a nthometseng hore ke le bolelle eona.+ 22 Joale tsebang hore le tla shoella sebakeng seo le batlang ho ea lula ho sona.+ Le tla bolaoa ka sabole, tlala le lefu la seoa.”