Jobo
32 Banna bao ba bararo ba tlohela ho bua le Jobo hobane o ne a lumela hore ha a na molato.*+ 2 Empa Elihu mora oa Barakele oa Mobuze+ ea tsoang lelapeng la Rame a halefa haholo. O ile a halefela Jobo hobane a re Jobo o leka ho iketsa eka o lokile ho feta Molimo.+ 3 Hape o ile a halefela metsoalle ea Jobo e meraro hobane e hlolehile ho araba Jobo empa e ne e re Molimo o khopo.+ 4 Empa kaha e ne e le eena e monyenyane,+ o ne a emetse hore e qete ho bua le Jobo. 5 Ha Elihu a bona hore banna bao ba bararo ba ntse ba se na karabo, a halefa le ho feta. 6 Elihu mora oa Barakele oa Mobuze a re:
“Ke monyenyane,
Lona le baholo.+
Ke ile ka thola hobane ke le hlompha+
Eaba ha ke le bolelle seo ke se tsebang.
7 Ke ile ka re, ‘E-re batho ba baholo ba bue,
Ba nang le lilemo tse ngata ba bontše bohlale ba bona.’
8 Empa moea o halalelang oo Molimo a o fang batho,
Moea oa Ea Matla ’Ohle ke oona o ba fang kutloisiso.+
9 Ho ba le lilemo tse ngata ha se eona feela ntho e etsang hore motho a be bohlale
Le batho ba holileng ha se bona feela ba utloisisang hore na ke ntho efe e lokileng.+
10 Joale ke re, ‘ ’Mameleng
Ke le bolelle seo ke se tsebang.’
11 Ke ile ka le emela hore le bue,
Ka le mamela ha le ntša maikutlo a lona+
’Me le batlana le seo le ka se buang.+
12 Ke ne ke le mametse ka hloko
Empa ha ho le ea mong oa lona ea khonneng ho bontša Jobo hore o fositse*
Kapa ho araba lipotso tsa hae.
13 Le se ke la re, ‘Re bohlale.
Ke Molimo ea mo khalemelang eseng motho.’
14 O ne a sa bue le ’na
Kahoo, nke ke ka mo araba joaloka lona.
15 Ba nyahame ’me ha ba sa na likarabo.
Ba feletsoe ke mantsoe.
16 Esale ke ba emetse empa ha ba bue.
Ba eme feela ha ba tsebe hore na ba re’ng.
17 Le ’na ke tla araba,
Ke bue seo ke se tsebang,
18 Ho na le lintho tse ngata tseo ke batlang ho li bua,
Moea o halalelang ke oona o ntšusumetsang.
19 Ka mpeng ea ka ho joaloka veine e ka lekukeng* le se nang lesoba,
Joaloka makuka a veine a macha a haufi le ho phatloha.+
20 E-reng ke bue e le hore ke khone ho imoloha.
Ke tla phahamisa molomo oa ka ’me ke arabe.
21 Nke ke ka ba leeme ho motho leha e le ofe.+
Kapa ka buela ho thabisa* motho.
22 Ha ke tsebe ho qeka motho,
Haeba ke ne nka etsa joalo, ’Mopi oa ka o ne a tla qeta ka ’na ka ho panya ha leihlo.