Ezekiele
5 Mor’a motho, inkele sabole e bohale, u e sebelise joaloka lehare la motho ea kutang moriri. U beole hlooho ’me u kute litelu tsa hao. Ka mor’a moo, u behe moriri oo sekaleng ebe u o arola ka likarolo tse tharo. 2 U chese karolo e ’ngoe ea oona ka har’a motse ka mor’a hore matsatsi a ho thibelloa a fele.+ Ka mor’a moo, u nke karolo e ’ngoe ea oona ’me u o hlathe ka sabole ho potoloha motse oohle.+ Karolo ea ho qetela u e lahlele moeeng ’me ke tla ntša sabole ke lelekise ba phonyohileng.+
3 U boele u nke o mong o fokolang ’me u o phuthele seaparong sa hao. 4 O mong u o lahlele mollong u o chese lore! Mollong oo, ho tla tsoa mollo o tla namela ho Baiseraele bohle.+
5 Jehova ’Musi oa Lintho Tsohle o re: ‘Ena ke Jerusalema. Ke e behile har’a lichaba. E pota-potiloe ke linaha ka mahlakoreng ’ohle. 6 E mphetohetse ’me ha e mamele likahlolo le melao ea ka. E etsa lintho tse mpe ho feta lichaba le linaha tsohle tse e potolohileng.+ Ha ba mamele likahlolo tsa ka ’me ha ba latele melao ea ka.’
7 Jehova ’Musi oa Lintho Tsohle o re: ‘Kaha le ile la sokolisa ho feta lichaba tsohle tse le potolohileng ’me la se ke la latela melao ea ka le ho mamela likahlolo tsa ka empa la mamela likahlolo tsa lichaba tse le potolohileng,+ 8 Jehova ’Musi oa Lintho Tsohle o re: “Ke khahlanong le uena Jerusalema+ ’me ke tla u ahlola ka pel’a mahlo a lichaba.+ 9 Ke tla u etsa ntho eo ke e-s’o ka ke e etsa le eo nke keng ka hlola ke e pheta hape ka lebaka la lintho tsohle tse nyonyehang tseo u li etsang.+
10 Kahoo, bo-ntate ba har’a lona ba tla ja bara ba bona+ ’me bara ba tla ja bo-ntate ba bona. Ke tla le ahlola kaofela ha lona ke be ke le hasanye hohle.”’+
11 ’Na Jehova ’Musi oa Lintho Tsohle kea ikana ke re, ‘Kaha le silafalitse sehalalelo sa ka ka litšoantšo tsohle tsa lona tse nyonyehang le ka lintho tsohle tse nyonyehang tseo le li etsang,+ le ’na ke tla le lahla.* Nke ke ka le qenehela le ho le utloela bohloko.+ 12 Sehlopha se seng sa lona se tla bolaoa ke boloetse bo kotsi kapa tlala. Se seng se tla bolaoa ka sabole+ mahlakoreng ’ohle a motse. Sehlopha sa ho qetela ke tla se hasanya hohle ’me ke ntše sabole ke se lelekise.+ 13 Ka mor’a moo, khalefo ea ka e tla fela le bohale ba ka bo tla kokobela ’me ke tla be ke khotsofetse.+ Ka mor’a hore ke ba halefele, ba tla tseba hore ’na Jehova, ke buile ’me ke batla hore ba rapele ’na feela.+
14 Ke tla etsa hore u be sebaka se senyehileng le hore u tšehoe ke lichaba tse u potolohileng le bohle ba fetang ka tsela.+ 15 Le tla tšehuoa le be le nyatsuoe,+ le be mohlala o lemosang le ntho e tšosang ho lichaba tse le potolohileng, ha ke le ahlola ebile ke le fa likotlo ke halefile haholo. Ke ’na Jehova ea chong.
16 Ke tla le tlisetsa tlala e tla le bolaea joaloka metsu. Metsu eo ke e romelang e tla le felisa.+ Ke tla etsa hore tlala e be mpe le ho feta ka ho etsa hore le se ke la hlola le fumana lijo.*+ 17 Ke tla le tlisetsa tlala le libata tse kotsi+ ’me li tla le amoha bana. Le tla bolaoa ke boloetse bo kotsi le sabole.+ Ke ’na Jehova ea chong.”