Jeremia
39 Ka khoeli ea leshome ha Morena Tsedekia oa Juda a e-na le lilemo tse robong a busa, Morena Nebukadnezare* oa Babilona le masole ’ohle a hae ba tla Jerusalema ’me ba e thibella.+
2 Ka letsatsi la borobong khoeling ea bone, ha Tsedekia a e-na le lilemo tse 11 a busa, ba phunya lerako la motse ba kena.+ 3 Liofisiri tsohle tse kholo tsa morena oa Babilona tsa tla ’me tsa lula Keiting e Bohareng.+ Liofisiri tseo e ne e le Nergale-sharezere Mosamgare, Nebo-sarsekime Morabsarise,* Nergale-sharezere Morabemake* le liofisiri tse ling kaofela tsa morena oa Babilona.
4 Ha Morena Tsedekia oa Juda le masole ’ohle a hae ba li bona, ba baleha+ ’me ba tsoa motseng bosiu ka tsela ea serapa sa morena. Ba tsoa ka keiti e pakeng tsa mabota a mabeli ’me ba ’na ba baleha ka tsela ea Araba.+ 5 Empa masole a Bakalde a ba lelekisa ’me a fumana Tsedekia lithoteng tsa lehoatata tsa Jeriko.+ Masole a mo nka a mo isa Ribla+ ho Morena Nebukadnezare* oa Babilona naheng ea Hamathe+ moo morena a ileng a mo ahlolela teng. 6 Morena oa Babilona a laela hore bara ba Tsedekia ba bolaoe ka pel’a mahlo a hae hona moo Ribla ’me morena oa Babilona a laela hore bahlomphehi bohle ba Juda ba bolaoe.+ 7 A foufatsa Tsedekia eaba ka mor’a moo o mo tlama ka litlamo tsa koporo o mo tlisa Babilona.+
8 Eaba Bakalde ba chesa ntlo ea morena* le matlo a batho+ ’me ba heletsa marako a Jerusalema.+ 9 Nebuzaradane+ mookameli oa balebeli a isa batho bohle ba neng ba setse motseng botlamuoeng, ba balehetseng ka lehlakoreng la hae le batho ba bang kaofela ba setseng, a ba isa Babilona.
10 Empa Nebuzaradane mookameli oa balebeli a siea ba bang ba batho ba futsanehileng ka ho fetisisa naheng ea Juda, ba se nang letho. Letsatsing leo, a boela a ba fa lirapa tsa morara le masimo hore ba sebetse.*+
11 Morena Nebukadnezare* oa Babilona a fa Nebuzaradane mookameli oa balebeli litaelo tsena malebana le Jeremia: 12 “Mo nke ’me u mo hlokomele. U se ke oa mo lematsa. Empa u mo fe ntho e ’ngoe le e ’ngoe eo a u kopang eona.”+
13 Kahoo, Nebuzaradane mookameli oa balebeli, Nebushazbane Morabsarise,* Nergale-sharezere Morabemake* le banna bohle ba ka sehloohong ba morena oa Babilona ba roma banna 14 hore ba tlose Jeremia Lebaleng la Balebeli+ ’me ba mo ise ho mora oa Akikame+ e leng Gedalia+ setloholo sa Shafane,+ hore a ee ntlong ea Gedalia. Kahoo, Jeremia a lokolloa ’me a phela le sechaba.
15 Ha Jeremia a ntse a koaletsoe Lebaleng la Balebeli,+ Jehova o ne a ile a re ho eena: 16 “Tsamaea u e’o re ho Ebede-meleke+ oa Moethiopia: ‘Jehova oa mabotho, Molimo oa Iseraele o re: “Ke phethahatsa mantsoe a ka ka motse ona. Ke o tlisetsa tlokotsi eseng katleho. U tla bona ha e etsahala mohlang oo.”’
17 Jehova o re: ‘Empa letsatsing leo, ke tla u pholosa ’me u ke ke oa nehelloa batho bao u ba tšabang.
18 Ke tla u pholosa ’me u ke ke oa bolaoa ka sabole. U tla fumana bophelo ba hao e le moputso*+ hobane u ntšepile,’+ ke Jehova ea chong.”