Ho Rorisa Jehova ka ’Mino o Momahaneng
‘’MINO ona e ne e le o thabisang haholo le o etsang hore motho a be a sekise meokho—o ne o le monate haholo. Ho ne ho sa hlokahale liletsa tsa ’mino, ’me karolo e neng e bonahala e le thata ka ho fetisisa ea ’mino ona e ne e binoa ka bolokolohi bo babatsehang. O ne o lumellana ka tsela e phethahetseng.’
Polelo ena e ile ea buuoa ke eo e neng e le mopresidente oa nakong e fetileng oa Mokhatlo oa Watch Tower, Nathan H. Knorr, ka mor’a ho ba kopanong ea Lipaki tsa Jehova e Zambia. E hlalosa hantle molumo o susumetsang oa mantsoe a Maafrika a baloang ka makholo a binang ka tumellano.
’Mino ke e ’ngoe ea litloaelo tsa Maafrika. Motsaneng oa sebele oa Afrika, ho tloaelehile ho bona mosali a hlaola tumellanong le morethetho oa lipina tsa moetlo, bacha ba binela ka marameng lipina tseo ba li ratang ha ba ntse ba hama likhomo, le banna ba ntse ba pheta-pheta lipina tsa bona joalokaha eka ba khothalletsa likhomo hore li hule moroalo oa tsona o boima. Mosebetsi o mong le o mong o etsoang motsaneng o na le pina ea ’ona.
Likolong tse ngata tsa Afrika, bana ba rutoa ho bina ka linoto. Linoto ke eng? Ha e le hantle ke “do, re, mi” e leng tsela ea ho bina eo baesekopo ea ’mino e neng e tsebahala haholo lilemong tse seng kae tse fetileng e ileng ea etsa hore e be e tloaelehileng. Do, re, mi, fa, sol, la, ti, e lumellana le linoto tse bapaloang liletseng tsa ’mino tsa Bophirimela. Mokhoa ona oa linoto o sebelisa likhutloana, melanyana e bontšang khefu polelong, lifeeloane, le mela bakeng sa ho bontša lenane la li-beat ka har’a lebokose ka leng esita le nako ea ho binoa ha linoto. Mantsoe a mane (ntsoe la pele, sekene, tinoro, le bese) a behiloe le leng ka tlas’a le leng, ’me ke motsoako ona oa mantsoe o hlahisang ’mino o susumetsang maikutlo. Ba bangata ba lumela hore ho bonolo haholoanyane ho ithuta mokhoa ona le ho bina ka ’ona ho feta mokhoa o sebelisoang haholo e leng staff notation.
Kahoo, lipina tse ka har’a buka ea lipina ea Lipaki tsa Jehova, Binelang Jehova Lithoriso, li ile tsa fetoleloa mokhoeng oa linoto likhatisong tsohle tsa Maafrika. Taba ea pele, nako e ngata e ile ea sebelisoa pianong ka morero oa ho etsa hore ’mino o lumellane le likarolo tse ’nè tse tloaelehileng tse lumellanang. Eaba, lentsoe ka leng le fetoleloa ’minong oa linoto. Eaba e mong ea tloaelaneng le tsamaiso ea ’mino oa linoto o abeloa hore a bine lentsoe ka leng la pina e ’ngoe le e ’ngoe ho hlahloba ho nepahala ha noto ka ’ngoe. Eaba ho sebelisoa li-computer bakeng sa ho kenya mantsoe pineng e ’ngoe le e ’ngoe ka mokhoa o lumellanang le linoto. Qetellong ho ile ha khoneha hore ho lokisetsoe ’mino ona o balehang habonolo oo u o bonang o hlahisitsoe leqepheng lena.
Phello e bile efe? Lipaki tsa Jehova tsa Afrika li ka kopanya mantsoe a tsona ka thabo thorisong ea Jehova. Mantsoe a pina e ’ngoe a hlalosa maikutlo a tsona hantle: “Ka tlhōlo a re bineleng Molimo o lerato. Ka mantsoe’a nang le thoriso a re bineng ka thabo.”
[Setšoantšo sa ho bina pina ea ’muso ka ’mino oa linoto se leqepheng la 27]
(Ha u batla ho bona boitsebiso bo hlophisitsoeng hantle, sheba sengoliloeng)