Ba Ile ba Thaba Europe Bochabela
LEHLABULENG le fetileng (karolong e ka leboea ea lefatše) batho ba likete tse mashome ba ile ba subuhlellana metseng e meholo ea Europe Bochabela. Literata tse ntle tsa Budapest, Prague, Zagreb le metse e meng e fetang 20 li ne li tletse batho ba qhoaetseng libeche tse nang le ’mala o moputsoa le o mosoeu. Libeche tsena li ne li ba khetholla joaloka barati ba tokoloho ea bomolimo ba tlileng likopanong tsa Lipaki tsa Jehova.
Ka lekhetlo la pele, likopano li ile tsa tšoareloa lirephabliking tsa Europe tsa Soviet Union ka bolokolohi esita le Siberia e hōle le rephabliking ea Soviet Union ea Asia ea Kazakhstan. Ka kakaretso batho ba fetang 370 000 ba bileng teng kopanong ba ile ba thabela botsoalle bo mofuthu Czechoslovakia, Hungary, Yugoslavia, Poland, Romania le Soviet Union.
Ho ba neng ba le sieo moo, mohlomong ho ka ba thata ho nahana ka thabo ea batho ba fetang 74 252 ba ileng ba kopana Soviet Union ho rapela Jehova Molimo phatlalatsa ka ntle ho tšabo. Leha ho le joalo, thabo ea bona e ne e tšoana le ea batho ba 74 587 ba neng ba bokane Prague le ba 40 601 ba neng ba bokane Budapest ba neng ba kopane mabaleng a maholo ka ho fetisisa a lipapali Czechoslovakia le Hungary, kapa ba 14 684 ba neng ba kopane Zagreb, Yugoslavia.
Sena ke se tsotehang hobane lilemong tse ’maloa pejana, Lipaki tsa Jehova li ne li thibetsoe linaheng tse ngata tsa Europe Bochabela. Li ne li arohantsoe le linaha tsa Bophirima nakong ea Ntoa ea Mantsoe. Esita le ho kopana ka lihlopha tse nyenyane feela ho rapela Molimo e ne e le tlōlo ea molao. Kahoo ho ne ho sa makatse ha ho e-na le thabo e kaalo ea ho tseba ho kopana ka bolokolohi likopanong tse khōlō joalo!
Paki ea Leczech e lilemo li 59, e ileng ea qeta likhoeli tse robeli e koalletsoe e le ’ngoe ka seleng hoo e ka bang lilemong tse 40 tse fetileng ka baka la tumelo ea eona ho Molimo e ile ea re: “Ba bangata ho rōna ba lulang Prague re ne re lora ka kopano e khōlō e tla lokisetsoa lebaleng lena la lipapali, empa le ka mohla re ne re sa lumele hore toro ena e tla phethahala ka tsela e babatsehang tjena.”
Libeke tse peli pele ho kopano ea Prague, ho tloha ka August 9 ho fihlela ka la 11, koranta ea motseng oo, Večerník Praha, e ile ea hlokomela: “Ka baka la ho qosoa ka bohlabaphieo le ho sitisa tsamaiso ea puso moo sechaba se nang le lentsoe lipolotiking le tlhahisong ea lintho, Lipaki tsa Jehova li ile tsa koalloa literonkong tsa Bokomonisi ka lilemo tse ngata.” Ka mor’a ho hlalosa hore haufinyane motse oo o tla amohela Lipaki tse mashome a likete, koranta eo e ile ea qetella ka hore: “Mohlomong le ke ke la hlola le kopana le batho ba bangata haholo ba mosa le ba bososelang Prague ka nako efe kapa efe ntle le mafelo-bekeng a bobeli a August.”
Leha ho le joalo, mohlomong u ka botsa: ‘Na Lipaki tsa Jehova li ne li hlorisoa ka mabaka a utloahalang? Na li ne li hlile li sokela babusi ba lipolotiki linaheng tseo li lulang ho tsona? Baeti bana ba makholo a likete ba tlileng kopanong Europe Bochabela ba ne ba tsoa kae? Kaha li ne li hatelletsoe ebile li arohantsoe le linaha tsa Bophirima ka lilemo tse 40 kapa ho feta, li tsebile joang ho eketseha ka manane a maholo joalo?’