“Ho Tle ho se ke ha Senyeha Letho”

Ka mongolli oa Tsoha! Ghana

KE ILE ka kopana le eena sebakeng sa hae sa ho sebetsa sa boemo bo tlaase Labadi, motse-toropo oa Accra, a ntse a sakha le ho fala ka matsoho ka matla a makatsang. Lebitso la hae ke Adams Akuetteh. O lilemo li 70 ’me e bile ’metli lilemong tse 50 tse fetileng.

Ha ke ’motsa hore ke eng eo a e nkang e le sehlohlolo sa mosebetsi oa hae oa ho ba ’metli, kapele o ile a bolela hore ke lilemo tse ’nè tseo a li qetileng kahong ea moaho o mocha oa lekala la Mokhatlo oa Watch Tower Nungua, Ghana. Sena se etsahetse ho tloha ka 1984 ho ea ho 1988.

Ke ile ka botsa: “U ne u etsa eng setšeng sa kaho?”

“Ke ne ke sebetsa likarolong tsa konkreiti ’me ke ne ke thusa batho ba rulelang.”

Ke ile ka re: “U bonahala u hopoloa haholo mabapi le phepelo ea lipekere setšeng.”

“Oh, e, lipekere. Ua tseba hore lipekere lia tura mona Ghana. Matsatsing ao, [halofo ea k’hilogramo] e ne e le [R5,50 ho isa ho R8,25]. Kahoo ke ile ka ipolella, ‘Na re ke ke ra boela ra sebelisa tse ling tsa lipekere tsee hape? Ke tla leka.’

“Kahoo ke ile ka qala ho etsa sena ka nako ea ka. Ha molebeli oa kaho a mpona, o ile a thaba. O ile a nkabela ho etsa mosebetsi oo ka mehla. Kahoo ka lilemo tse ’nè, hoseng ho hong le ho hong ke ne ke lekola setša ke bokella lipekere tse lahlehileng. Hape ke ne ke ntša tsohle tseo ke neng ke li fumana mapolankeng a petsotsoeng.”

“Na u ne u lahla tse nthithi le tse kobehileng?”

“Che. Tse nthithi li ne li sebelisoa hape lepolankeng le bonolo, kapa ho sebelisoa drill ho li borela hore li sebelisoe bakeng sa lepolanka le thata. Ka mokhoa o hlokolosi ke ne ke otlolla tse kobehileng ka hamore.”

“Na ha ua fumana mosebetsi ona e le o bosula le o tenang?”

“Mohlomong mohlankana eena o ne a ka o fumana o le joalo, empa ho ne ho se joalo ho ’na. Molebeli oa kaho o ile a mpolella hore mosebetsi oa ka o bolokela Mokhatlo chelete, chelete ea Jehova, kahoo ke ne ke thabile. E ne e le thabo e khethehileng ho ’na ho bona liqubu tse sa lekaneng tsa lipekere tse bolokiloeng li hōla. ’Me ke ne ke ipolella, ‘Aha! Joale ke rakile batho ba rulelang.’ Empa joale liqubu tseo li ne li nyamela. Ba ne ba hoeletsa ba le holim’a marulelo ba batla tse eketsehileng! Kahoo ke ne ke sebetsa ka matla le ho ntšetsa mosebetsi pele.”

“Hona joale u etsa eng kaha mosebetsi oa kaho o felile?”

“Ke khutletse tšebeletsong ea nako e tletseng hape, ’me ke letetse mohla le tlil’o eketsa moaho oa lekala la Ghana. Ke tla fihla moo, ke tla ntša lipekere le ho boloka chelete—ka thabo.”

Ka lilemo tse ’nè o ile a etsa seo ba bang ba ka nahanang hore ke mosebetsi o tlaase. Empa le ka mohla Adams Akuetteh, “mootlolli oa lipekere oa lekala la Ghana” o ne a sa nahane joalo! Ka thabo o ile a etsa hore lipekere li sebelisoe hape ho bolokela Jehova chelete!

Ke kamoo Jesu le eena a neng a nahana ka teng. Le hoja a ne a e-na le matla a mohlolo a ho atisa mahobe, ka lekhetlo le leng ka mor’a hore ho jeoe o ile a re: “Bokellang lingoathoana tse setseng, ho tle ho se ke ha senyeha letho.”—Johanne 6:12.

Haeba ka mor’a ho bala makasine oona u na le lipotso leha e le life tsa Bibele, ka kōpo ikutloe u lokolohile ho iteanya le Lipaki tsa Jehova Holong ea ’Muso e leng sebakeng sa heno, kapa u ngolle bahatisi ba makasine oona. (Bona leqephe 5.)

[Setšoantšo se leqepheng la 32]

Adams Akuetteh, “mootlolli oa lipekere oa lekala la Ghana”