Re Lebile Hokae?

AK’U inahane u tsamaea sebakeng seo ho seng mohla u kileng ua se bona pele. E lokela hore ebe joale u se u fihlile moo u eang teng, empa matšoao a seterata, mabitso a toropo, le matšoao ha se ao u neng u a lebeletse. Ua ipotsa: ‘Ke hokae? Na ke nkile tsela e nepahetseng?’

Lefatše la kajeno le bothateng bo tšoanang. Motho o iphumana a le sebakeng seo a sa se tloaelang ha a hlokomela boemo ba sechaba bo ntseng bo theoha ka tekanyo eo ho seng mohla e kileng ea bonoa. Ka lebaka la tsoelo-pele eohle ea saense le theknoloji, ho bonahala eka hona joale re tlameha ebe re phela lefatšeng le molemo haholoanyane. Ho Great Ages of Man, mohlophisi Russell Bourne o hlokomela hore ke lekholong la bo20 la lilemo feela “moo khopolo ea boholo-holo ea boena ba lefatše lohle e fetohileng monyetla oa sebele.”

Leha ho le joalo, seo motho a se hahamaletseng, “boena ba lefatše lohle,” ha sea finyelloa. Matšoao a tšepisitsoeng a tšireletso ea moruo, lijo tse lekaneng, bophelo bo ntlafetseng, le bophelo ba lelapa bo thabileng ha a bonahale. Buka Milestones of History ea hlokomela: “Ka litsela tse ngata, tsoelo-pele saenseng e ’nile ea amana ka ho tobileng le tšenyo le sehlōhō.”

E, kajeno moloko oa batho o lahlehile sebakeng seo o sa se tloaelang, o khelohile tseleng e lakatsehang, o hōle le khotso le tšireletseho tse neng li lohothoa qalong ea lekholo lena la lilemo. Ka hona, ba bangata kajeno ba kōpa litataiso: “Re kene joang boemong bona? Lefatše lena le lebile hokae? Na re phela mehleng ea qetello?”

Bakeng sa ho fumana moo re leng teng, re tlameha hore pele re hlahlobe moo re leng teng hona joale. Ba bang ba bolela hore re lintšing tsa taolo ea lefatše le lecha; ba bang ba bolela hore re mothating oa timetso. Bibele, joaloka ’mapa oa tsela, e re thusa ho bona moo re leng teng le moo re lebileng teng.

Ha u le leetong, ke habohlokoa hore u hlokomele matšoao a tla u thusa ho khetholla sebaka seo u eang ho sona. Ka ho tšoanang, Bibele e hlalosa litšobotsi—boemo ba lefatše le boikutlo—tse neng li tla khetholla nako eo historing e bitsoang ‘mehla ea qetello.’ (2 Timothea 3:1-5) Polelo ena ‘mehla ea qetello,’ ha e bue ka ho fela ha maholimo le lefatše la sebele. Ho e-na le hoo, e bontša “bofelo ba tsamaiso ea lintho” (NW) kapa “bofelo ba mehla” joalokaha phetolelo e ’ngoe ea Bibele e hlalosa.—Mattheu 24:3; Today’s English Version.

Moapostola oa Mokreste Pauluse o ile a ngola: “Mehleng ea qetello ho tla ba le linako tse bohloko tseo ho leng thata ho sebetsana le tsona.” (2 Timothea 3:1, NW) Ke ’nete hore sena se ka utloahala eka se sebetsa linakong tse ling tsa histori. Ha e le hantle, nako ka ’ngoe e bile le seabo sa eona sa ho latsoa mahlomola.

Joale, ho na le lebaka lefe la ho lumela hore mantsoe ana a supa mehla ea rōna?

[Tlhaloso ea Moo Setšoantšo se Nkiloeng Teng e leqepheng la 3]

Tom Haley/Sipa Press