Lula U Itokiselitse Bokamoso bo Khanyang
JESU o ile a phehella: “Lulang le itokisitse.” (Luka 12:40, NW) Haeba re etsa joalo, ha Kreste a e-tla “ka matla le ka khanya e khōlō,” re ka arabela ka thabo taelong ena ea hae: “Emang le otlolohile ’me le phahamisetse lihlooho tsa lōna holimo hobane topollo ea lōna e-ea atamela.”—Luka 21:27, 28, NW.
Ke topollo ea mofuta ofe? Ke topollo eo Noe le lelapa la hae ba ileng ba e fumana—e, ho pholoha ho fela ha lefatše lena! Moapostola Johanne o ile a ngola: “’Me lefatše lea feta, le eona takatso ea lona; empa ea etsang thato ea Molimo, o hlola ka ho sa feleng.”—1 Johanne 2:17.
Lefatšeng le lecha la Jehova, bafo ba lefatšeng ba Morena Jesu Kreste, ba tla latsoa bophelo bo sa feleng. Bibele e re: “Ba lokileng ba tla ja lefa la lefatše, ’me ba tla hlola ho lona ka ho sa feleng.” (Pesaleme ea 37:29) Ke bokamoso bo hlollang hakakaang boo Molimo a bo tšepisang batho ba hae! Lentsoe la hae le re: “Molimo o tla ba le bona ka sebele sa oona, e be Molimo oa bona. Molimo o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko.” Bona ke boprofeta ba ’nete!—Tšenolo 21:3, 4.
Leha ho le joalo, hore u fumane bokamoso bona, u tlameha ho nka khato. Ho fumana tsebo ke mohato oa pele oa bohlokoa. Bibele e ea hlalosa: “’Me bophelo bo sa feleng, ke hore ba u tsebe, uena Molimo o ’notši oa ’nete, le Jesu Kreste eo u mo romileng.”—Johanne 17:3.
Hape, ho hlokahala hore kamehla u kopanele le ba bang ba batlang tsebo ena joalokaha moapostola a ile a khothatsa: “A re lebelaneng, re tle re isane ka cheseho leratong le mesebetsing e metle. Re se ke ra ngala liphutheho tsa rōna . . . haholo etsoe le bona letsatsi le ntse le atamela.” (Ba-Heberu 10:24, 25) Ka sebele, batho ba Jehova ba lemoha haholoanyane ho atamela ha letsatsi la ho lopolleloa lefatšeng le lecha la Molimo, ’me kahoo ba tsebahala ka ho bokana hammoho.
Ha Sunday Telegraph ea London e tlaleha ka kopano e ’ngoe lebaleng le leholo la lipapali e itse: “Ha ho masoabi ao ka ho tloaelehileng a amanang le ba bolelang hore ‘Bofelo bo Haufi.’ Bo haufi. Ho sa le joalo ho bonahala e mong le e mong a nyakalletse ka mokhoa o motle, le o tšepahalang, le oa Bomolimo.” Koranta eo e ile ea phaella: “Haeba taolo ea lefatše ea hona joale ka sebele e ka oa, Lipaki tse leng Twickenham ho bonahala e le malala-a-laotsoe ho hlophisa e ncha.”
Ho lula re itokisitse ho bolela ho ipoloka re tšoarehile, re etsa mosebetsi o tšoanang le oa Noe, eo mehleng ea pele ho Moroallo a sebelelitseng e le “’moleli oa ho loka.” (2 Petrose 2:5) Ho ipoloka re itokisitse ho bolela ho ameha “liketsong tse halalelang tsa boitšoaro le liketsong tsa boinehelo ba bomolimo.” E, u mengoa ho kopanela le batho ba Jehova ho “letela le ho boloka haufi ka kelellong boteng ba letsatsi la Jehova.”—2 Petrose 3:11, 12, NW.